Tito

3 Te ghè de seitar ricordar a lori de star soto e de obedir ai governi e ale autorità, de esser pareciadi par far el ben, 2 de no parlar mal de nissuni, de no barufar, de no voler sempre gaver rason, ma de tratar tuti con brandura. 3 Anca noantri infati, na volta èrino sensa senso e desobedienti, èrino persi, schiavi de voie e piaseri, la nostra vita la era piena de cativeria e invìdia, èrino tanto odiadi e gaveino òdio un par el altro. 4 Ma, quando che el nostro Salvador, Dio, el ga dimostrà la so bontà e el so amor par la umanità, 5 (nò parché noantri ghemo fato qualche roba giusta, ma gràssie ala so misericòrdia), lu el ne ga salvà par meso del bagno che ne ga portà ala vita e el ne ga fato novi par meso del spìrito santo. 6 Lu el ga trato spìrito santo sora de noantri de maniera generosa par meso de Gesù Cristo, el nostro Salvador. 7 Cossita, dopo de esser stati dechiaradi giusti gràssie ala so maraveiosa bontà, podaremo gaver la eransa de acordo cola nostra speransa dela vita eterna. 8 Queste parole le ze degne de fidarse e mi vui che ti te meti sempre in evidensa queste robe, cossita che quei che i ga credesto in Dio i gàpia la mente consentrada nel far òpere bone. Queste robe le ze tanto bone e le ze de benefìssio par i òmini. 9 Ma no stà far discussion sensa senso e sora genealogie, no stà barufar e far discussion sora la Lege, parché no ga senso e no serve par gnente. 10 Se un omo el istiga insegnamenti falsi, te ghè de rigetarlo dopo gaver dato a lu consili forti una prima e una seconda volta, 11 parché questo omo el se ga slontanà dela strada giusta e l’è drio pecar, e alora lu el se condana. 12 Quando che te mandarò Àrtema o Tìchico, fà tuto quel che te pol par vegner catarme a Nicòpoli, parché mi go dessidesto de passar lì el inverno. 13 Daghe el nessessàrio a Zena, che el cognosse ben la Lege, e a Apolo, cossita che no ghe manche gnente par el viaio. 14 E che anca i nostri fradei i impare a far bone òpere par poder giutar quando che ghen’è nessessità, cossita che lori i sìpia produtivi. 15 Tuti quei che i ze con mi i te manda i so saludi. Saluda a quei che i ne ama e che i ze con noantri nela fede. Che la maraveiosa bontà la sìpia con tuti valtri.