Neemia

1 Parole de Neemia, fiol de Acalia: Nel mese de chisleo, nel vigèsimo ano, mi ero nel palàssio de Susan. 2 Alora l’è rivà Anani, un dei me fradei, insieme de altri òmini de Giudà. Mi ghe go domandà sora i altri giudei che ancora i era vivi dopo de esser presonieri e anca sora la cità de Gerusalen. 3 Lori i ga rispondesto: “Quei che i ze restadi vivi e che i ze là nela provìnsia i ze drio infrontar brute dificoltà e umiliassion. I muri de Gerusalen i ze rovinadi e i so portoni i ze stati brusadi col fogo.” 4 Suito dopo de scoltar queste parole, me go sentà, go tacà piander e son restà de luto par tanti giorni. E go fato gegiun e go pregà al Dio del cielo. 5 Mi go dito: “Ò Geovà, Dio del cielo, el Dio grando e che el mèrita profondo rispeto. Ti te rispeti el acordo che te fè e te dimostri amor leal a quei che i te ama e che i obedisse ai to comandamenti.