1 Parché pregar?
ORASSION. Pregar l’è una dele robe che assa le persone pi interessade e curiose quando le lede la Bìblia. Vedemo sete domande che le persone le se fà sora la orassion e dopo ndemo veder le risposte dela Bìblia sora questo. Questi artìcoli i pol giutarte a scominsiar a pregar a Dio e a far meio le to orassion.
IN TUTO EL MONDO tante persone de difarente culture e religion le prega. Tante le prega lore sole o con altri insieme. Pol esser nte una ciesa, un témpio, una sinagoga, una meschita o nte un santuàrio. Arquanti i dopera tapeti par indenociarse e far orassion, un rosàrio, libro de orassion, imàgine, i fà una roda de orassion o scrive orassion in plachete e le pica su.
Intrà le persone e le bèstie ghen’è tante robe che se someia. Par esémpio, noantri ghemo de bisogno de magnar, de àqua e dela ària. Come le bèstie, anca noantri nassemo, vegnemo grandi e morimo. (Eclesiasti 3:19) Ma, de tuta la creassion nela Tera, sol le persone le prega. Parché?
La risposta la ze fàcile: noantri preghemo parché ghemo de bisogno. Le persone le fà orassion parché le vol parlar con una forsa pi poderosa, o sia, qualcossa che lore le vede come santa, sacra e eterna. La Bìblia la mostra che semo stati fati con questa nessessità. (Eclesiasti 3:11) Gesù Cristo el ga dito: “Felici i ze quei che i sà dele so nessessità spiritual.” — Mateo 5:3.
“Nessessità spiritual” vol dir che ghemo bisogno de rivarse a Dio. Par quela che ghen’è tanti posti de adorassion e arquanti i dopera scapulari, imàgine o altre robe come queste nela so adorassion. Ghen’è persone che le prega tanto. Tanti i proa ndar in serca de Dio dela so pròpia maniera o fursi i se fida de quel che i altri i ghe dise. Ma le persone no le ga mia poder, le vive pochi ani e no le ze mia bone saver tuto sora una situassion. Cossita, ne ocore el aiuto de una persona che sìpia pi sàbia, pi poderosa e che la gàpia vivesto par tanto de pi tempo che noantri par giutarne nela nostra nessessità spiritual. Alora, parché che sentimo che ghemo bisogno de pregar?
Gheto belche passà par qualche situassion che te ocorea de orientassion, sabedoria o risposte ale to domande ma nissun l’è stà bon de giutarte? Gheto belche sentio che te gavei de bisogno de consolo dopo de una desgràssia? O fursi te ocorea de aiuto quando te ga tocà far una dessision importante o de esser perdonà parché te eri drio sentirte tanto colpà?
De acordo cola Bìblia, tuti questi i ze boni motivi par far orassion. La Bìblia la ze el meio libro che parla sora questo parché la ga le orassion de tanti òmini e done fedeli e te pol fidarte in tuto quel che la dise. Queste persone le ga pregà a Dio par gaver consolo, orientassion, perdon e risposte ale domande pi importante dela vita. — Salmo 23:3; 71:21; Daniel 9:4, 5, 19; Abacuche 1:3.
Ancora che le orassion de queste persone le fusse difarente, ghen’era qualcossa che se someiea. Tute lore le savea che le gavea de far qualcossa importante par esser scoltade, una roba che ancoi arquanti no i ghe bada. Lore le savea a chi le gavea de pregar.