“Lori i volea che mi fusse sicuro dela verità par meso dela Bìblia”

EL ME PASSÀ:

Son nassesto in San Domingo e son el pi gióveno de 4 fioi. Me pare e me mare i era persone studiade e lori i volea che anca mi e me fradei fùssino slevadi insieme de bona gente. Quatro ani vanti che mi nassesse, me genitori i ga cognossesto i missionari mòrmon e ghe ga piasesto parché queste persone le gavea una bona creansa e le se vestia ben. Par quela, lori i ga dessidio che la nostra fameia la ndaria far parte dela Ciesa de Gesù Cristo dei Santi dei Ùltimi Giorni, o sia, la Ciesa Mòrmon. Semo stati una dele prime fameie del paese a far parte de questa ciesa.

Intanto che vegnea grando, me piasea restar insieme dele persone dela ciesa parché, par lore, l’era tanto importante far tuto polito e darghe valor ala fameia. Ero pròpio contento de esser mòrmon e volea deventar missionàrio.

Quando mi gavea 18 ani, la me fameia la ga cambià par i Stati Unidi parché là mi ndea seitar studiar nela università. Intorno de un ano dopo, i me zii, che i ze Testimònie de Geovà, i ze vegnesti visitarne e i ga convidà la nostra fameia par ndar insieme de lori assister un congresso dela Bìblia. Son restà maraveià parché, intanto che se ledea i testi dela Bìblia, tuti che i era là i vardea insieme nela so pròpia Bìblia e i scrivea do quel che i era drio imparar. Par quela, go ciapà un papel e una pena e go scominsià a far compagno lori.

Dopo del congresso, i me zii i ga dito che, come mi volea esser missionàrio, lori i podea giutarme a imparar de pi sora la Bìblia. In quela època, mi cognossea ben el libro del Mòrmon, ma no savea quasi gnente dela Bìblia. Alora, me ga piasesto la idea.

LA BÌBLIA LA GA CAMBIÀ TANTO LA ME VITA:

Mi studiea la Bìblia coi me zii par telèfono. Lori i volea che mi fusse sicuro dela verità par meso dela Bìblia. Par quela, sempre i me disea de far una comparassion intrà quel che mi credea e quel che ero drio imparar dela Bìblia.

Mi me fidea de arquante robe che i mòrmon i me gavea insegnà, ancora che no savesse se le era pròpio de acordo cola Bìblia. La me zia la me ga mandà la revista Despertai! de 8 de novembre de 1995, che le Testimònie de Geovà le fà. Dopo de léderla, son nicorto che no savea de tante robe che i mòrmon i crede. Par quela, son ndato in serca nel site ofissial dei mòrmon par veder se l’era pròpio vera quel che la Despertai! la disea. Son ndato anca visitar el museo dei mòrmon in Utah, nei Stati Unidi.

Mi catea che i insegnamenti dei mòrmon i era intesi cola Bìblia. Magari, dopo che go ledesto la Bìblia con pi atension, go visto che no l’era mia cossita. Par esémpio, la Bìblia la insegna in Ezechiel 18:4 che la ànima la more. Ma, el libro del Mòrmon, in Alma 42:9, dise: “La ànima no la pol mai morir.”

No l’era sol queste difarense de insegnamenti che no me piasea. Mi no catea mia giusto pensar che un paese l’è meio che i altri. E i mòrmon i insegna che el giardin del Èden l’era nel stato del Missouri, Stati Unidi. I lìderi dela ciesa anca i insegna che, nel futuro, Dio ndarà governar la Tera par meso del governo dei Stati Unidi.

Alora, go scominsià a pensar cossa che ndaria suceder coi altri paesi, come el mio, se fusse pròpio cossita. Una sera, go discoresto par telèfono con un gióveno che l’era drio studiar par esser missionàrio mòrmon. Ghe go domandà se lu el lotaria contra i mòrmon de altri paesi se ghen fusse una guera. Son restà spaventà quando lu el me ga dito de sì! Dopo, son ndato in serca par catar de pi informassion sora i insegnamenti dei mòrmon e go anca parlà coi lìderi dela Ciesa Mòrmon. Ma, lori i me ga dito che mi no saria mia bon de catar le risposte ale me domande adesso.

Questo me ga fato restar disgustà e alora, go pensà parché che volea deventar missionàrio. Go capio che quel che mi volea l’era giutar le persone, ma par far questo, no ocorea che fusse missionàrio mòrmon. Mi anca volea esser missionàrio parché savea che le persone le ndea rispetarme. Ma no savea quasi gnente sora Dio e, ancora che gavesse ledesto la Bìblia tante volte, no ghe dea tanto valor. Mi no gavea idea de quel che Dio el vol par la Tera e par le persone.

COME SON STÀ GIUTÀ:

Nel me stùdio dela Bìblia cole Testimònie de Geovà, go imparà tante robe come el nome de Dio, cossa che sucede dopo dela morte e come che Dio ndarà doperar Gesù par far le so promesse realisarse. Mi ero drio imparar sora questo libro maraveioso e me piasea parlar ai altri sora questo. Go sempre savesto che ghen’era un Dio, ma adesso, mi preghea a lu come el me meio amigo. Nel giorno 12 de lùlio de 2004, me go batesà come Testimònia de Geovà e sei mesi dopo, go scominsià a doperar la pi granda parte del me tempo par insegnar ai altri sora la Bìblia.

Go laorà 5 ani nela sede mondial dele Testimònie de Geovà in Nova York, Stati Unidi. Me ga piasesto tanto de giutar a far Bìblie e publicassion dela Bìblia che le insegna le persone in tuto el mondo. E ancora me piase tanto giutar i altri a imparar sora Dio.