Go imparà che Geovà l’è bon e pronto a perdonar

EL ME PASSÀ

Son cressesto nte un posto poareto nela cità de Montreal. Quando gavea sei mesi, me pare l’è morto, e el ga assà me mare a tirar su mi e me sete fradei ela sola.

Col tempo, tuti i giorni la me vita la era star in meso la droga, violensa, giugar par soldi e star in volta coi criminosi. Quando gavea diese ani, go scominsià laorar par quei che dea in préstio soldi contra la lege e anca par le prostitute. Mi era un grando busier e imbroiea le persone de tante maniere difarente, e lo fea de gusto. Far queste robe l’era deventà un vìssio.

Con 14 ani, mi era un imbroion del bon. Comprea tanti relogi, anei, pulsere col oro sol par fora e dopo ghe scrivea che l’era oro puro, e li vendea par strada e ntei stassionamenti dei shopping. Me piasea ciapar tanti soldi in poco tempo. Una volta, go guadagnà 10 mila dòlari canadensi nte un di!

Con 15 ani i me ga butà fora del riformatòrio, che l’era una scola ndove i metea i tosi criminosi. Cossita, no gavea ndove viver. Dormia par le strade, ntei parchi o casa de qualchedun che gavea cognossesto.

La polìssia me ciamea tante volte par farme domande par via de tuto quel che fea contra la lege. Come le robe che vendea no le era ciavade, no i me ga mai metesto in preson. Ma me tochea pagar una mùcia de multe par tuto quel che fea de imbroi, falsità e vender sensa permission. Come no gavea paura de gnente, mi fin laorea par quei che i dea in préstio soldi contra la lege e ndea cobrar quei che i gavea dèbiti con lori. L’era tanto pericoloso che dele volte ndea in giro cola arma. Arquante volte go laorà par le organisassion criminose.

LA BÌBLIA LA GA CAMBIÀ TANTO LA ME VITA

La prima volta che go sentio parlar dela Bìblia gavea 17 ani. Vivea con me morosa che gavea scominsià studiar la Bìblia cole Testimònie de Geovà. Ma, come no me piasea le règole morai dela Bìblia, go impiantà me morosa e son ndà viver con nantra tosa che mi era belche drio smorosar.

Gnanca de creder, anca questa tosa la ga scominsià studiar cole Testimònie de Geovà. Ma me ga ciamà atension i cambiamenti nela so personalità, la ga scominsià esser pi bona e con pi passiensa. Un di i me ga convidà a una riunion nel Salon del Regno, e son ndà. Go catà persone tanto difarente! Bona gente che me ga ricevesto de brassi verti. Mai me gavea sentio cossita tanto ben. De toseto no go mai ricevesto afeto e me fameia no se ga mai interessà tanto de mi. Cossita la atension che go ricevesto dele Testimònie de Geovà l’era quel che me ocorea. E quando i me ga domandà se volea studiar la Bìblia go dito si de volentiera.

Quel che go imparà fursi me ga salvà la vita. Mi e nantri due ladroni gaveino pensà de far un assalto parché ne ocorea 50 mila dòlari par pagar i me dèbiti de giugo. Manco mal che me son tirà indrio! Lori due i ze ndati vanti col progeto, un i lo ga copà e quel altro l’è finio in preson.

El stùdio dela Bìblia me ga fato veder che gavea de cambiar ancora tanto. Par esémpio, in 1 Corinti 6:10 la Bìblia dise: “I ladroni, quei che i vol sempre de pi, quei che i beve massa, quei che i ofende i altri, quei che i cava via soldi dei altri no i guadagnarà el Regno de Dio.” Quando go ledesto questo versìcolo go tacà piander. Gavea de cambiar del tuto. (Romani 12:2) Mi era un omo violento e la me vita una busia, un disastro.

Ma go anca imparà che Geovà l’è bon e pronto a perdonar. (Isaia 1:18) Cossita go pregà tanto a Geovà e lo go suplicà che el me giutesse a cavarme via vissi e cambiar me vita. Col so aiuto, una scianta par volta, son stà bon de vegner fora de quel buso e cambiar come mi era. La roba importante ze che mi e me morosa se ghemo maridà.

A 24 ani belche gavea tre fioi. Me ocorea un laoro normal par mantégnerli. Ma el problema l’era che mi no gavea speriensa de laoro e gnanca era ndà scola. Go suplicà ancora el aiuto de Geovà e go tacà ndar in serca de laoro. Nele interviste disea che volea cambiar e guadagnarme de viver de maniera onesta. Dele volte mi disea anca che era drio studiar la Bìblia par esser una bona persona, ma tuti i me mandea via. In ùltima, dopo de contarghe nantra volta la me stòria nte una intervista, un omo el me ga dito: “No sò ben parché, ma qualcossa me dise che go de tégnerte par laorar.” Son sicuro che la ze stà la risposta ale me orassion. Un pochetin dopo mi e me sposa se ghemo batesà come Testimònie de Geovà.

COME SON STÀ GIUTÀ

Son vivo parché go metesto in pràtica i consili dela Bìblia e son ndà drio al esémpio de Gesù. Go una bela fameia e una cossiensa neta parché son sicuro che Geovà el me ga perdonà.

Ze 14 ani che dopero el me tempo, 70 ore par mese, par giutar le persone a capir la Bìblia. Fà poco tempo che anca me sposa la ga scominsià questo laoro insieme de mi. Nei ùltimi 30 ani go giutà 22 coleghi de laoro a deventar Testimònie de Geovà. Mi vao ancora nei shopping, ma nò par imbroiar le persone. Invesse, dopero la oportunità par darghe el pi grando presente che ghen’è: la speransa de viver nte un mondo sensa pi imbroioni. — Salmo 37:10, 11.