Domande dei Letori
Nel Salmo 61:8, Davi el ga dito che el ndaria lodar el nome de Dio ‘par sempre’. Sarà che Davi el pensea che mai ndaria morir?
Nò, quel che Davi el ga dito l’era giusto.
Varda quel che Davi el ga dito in questo Salmo e anca in altri testi: ‘Mi vao cantar e lodar el to nome par sempre e vao far tuti giorni quel che te go prometesto.’ (Sal. 61:8) Nel Salmo 86:12, lu el ga scrito: “Mi vao lodarte de tuto el cuor, ò Geovà, me Dio. Vao dar glòria al to nome par sempre.” E in nantro testo, Davi el ga dito: ‘Mi vao lodar el to nome par sempre.’ — Sal. 145:1, 2.
Quando Davi el ga scrito queste parole, lu no’l pensea che no’l ndaria mai morir. Lu el savea che Geovà el gavea dito che le persone le more par causa del pecato. (Gén. 3:3, 17-19) E Davi el ga parlà che anca lu l’era un pecador. (Sal. 51:4, 5) Lu el savea che servi fedeli de Geovà come Abraon, Isache e Giacò i era morti e che anca lu el ndaria morir. (Sal. 37:25; 39:4) Ma quel che Davi el ga dito nel Salmo 61:8 mostra che el volea lodar a Dio par sempre, o sia, intanto che el fusse vivo. — 2 Sam. 7:12.
Davi el ga scrito arquante robe che ga sucedesto nela so vita come podemo veder nei Salmi 18, 51 e 52. Lu l’era un pastor e, nel Salmo 23, el ga parlà de Geovà come un pastor che el tende, el giuta e el protege le so piégore. Par quela, Davi el volea servir a Dio ‘tuti i giorni dela so vita’. — Sal. 23:6.
L’è importante ricordarse che Geovà el ga mostrà a Davi quel che el gavea de scriver. Davi el ga scrito diverse professie che le ndaria suceder tanto tempo avanti. Par esémpio, nel Salmo 110, Davi el ga dito che nel futuro el so Signor el ‘se sentaria ala drita’ de Dio, el riceveria poder par giulgar le nassion e el saria ‘sasserdote par sempre’. (Sal. 110:1-6) Un tempo dopo, Gesù, che l’era el Messia e dissendente de Davi, el ga dito che la professia de Salmo 110 la parlea pròpio sora lu e che la ndaria suceder nel futuro. — Mat. 22:41-45.
Alora, Geovà el ga fato che Davi el scrivesse robe sora el so tempo e anca sora el futuro, quando el sarà ressussità e el podarà lodar a Geovà par sempre. Cossita, capimo che quel che dise Salmo 37:10, 11 e 29 l’è drio parlar de quel che sucederia in Israel e de quel che ndarà suceder nel futuro, quando Geovà el farà quel che el ga prometesto. — Vedi el paràgrafo 8 del stùdio “Te sarè con mi in Paradiso” in questa revista.
El Salmo 61:8 e altri testi i mostra che Davi el volea lodar a Geovà intanto che el vivesse. E anca i mostra cossa che Davi el podarà far nel futuro, dopo che Geovà el ndarà ressussitarlo.