12 Gaver Ogetivi

COSSA VOL DIR

Gaver un ogetivo no vol dir sol gaver un sogno o una voia, ma vol dir pensar vanti de far, acetar cambiamenti quando ghe ocore, e sforsarse.

Noantri podemo gaver ogetivi che se realisa in tempi difarenti, quei che i se realisa in giorni, in stimane, in mesi, in un ano o ancora de pi. Te pol realisar ogetivi che ghe vol tanto tempo par meso de realisar diversi ogetivi pi pìcoli.

PARCHÉ L’È IMPORTANTE

Quando te realisi i to ogetivi, te ndarè fidarte de pi in ti, te farè pi forte le amicìssie che te ghè e te sarè pi felice.

Fidùcia in si stesso: Quando ti te realisi ogetivi che ghe vol manco tempo, ti te restarè sicuro par realisar ogetivi che ghe vol de pi tempo e anca par infrontar le dificoltà dela vita, come la pression dei coleghi.

Amicìssia: A tuti i ghe piase star darente a persone che i ga ogetivi nela vita, o sìpia, persone che le sà quel che le vol e che le se sforsa par realisarli. Par esémpio, se ti e un dei to amighi gavé el medèsimo ogetivo, la vostra amicìssia la restarà pi forte intanto che laoré insieme par realisarlo.

Felicità: Quando ti te realisi i to ogetivi, te restarè contento.

“Me piase tanto gaver ogetivi. Cossita me sento motivà parché sò quel che go de far. L’è tanto bel realisar un ogetivo, vardar indrio e dir: ‘Che bel! Son stato bon de far quel che volea.’” — Christopher.

COSSA LA BÌBLIA LA DISE: “Quel che el varda el vento no’l ndarà semenar, e quel che el varda le nùvole no’l ndarà tor su.” — Eclesiasti 11:4.

COSSA TE POL FAR

Varda quel che te pol far par gaver e realisar i to ogetivi:

Fà una scòlia. Scrivi do i to ogetivi. Scoli quel che te vol far par primo, par secondo, par terso e cossita avanti.

Pensa cossa far. Par cada ogetivo, fà questo:

• Dessidi par quando che te sarè bon de realisarlo.

• Gàpia in mente cossa che te ghè de far par realisarlo.

• Pensa quale che le ze le dificoltà che pol vegner fora e come infrontarle.

Fà. Ti no te ghè bisogno de pensar in tuti i detali vanti de scominsiar a far qualcossa. Domàndate: ‘Quala che la ze la prima roba che go de far par realisar el me ogetivo?’ Dopo, fà questo. Sìpia atento a quel che te ghè belche fato e quala che la ze la pròssima roba che te ghè de far.

COSSA LA BÌBLIA LA DISE: “L’è sicuro che i progeti de quel che pensa ben vanti i gavarà boni resultadi.” — Proverbi 21:5.