I adulti i pol darte orientassion

PARCHÉ CHE I TOSATEI I GHE OCORE DELA ORIENTASSION DEI ADULTI?

I tosatei i ghe ocore dei consili e dela orientassion dei adulti. Valtri, pupà e mame, gavé la obrigassion de dar questa orientassion. Ma anca altre persone le pol giutar el to fiol.

PARCHÉ CHE LA ORIENTASSION DEI ADULTI L’È IMPORTANTE?

In tanti posti, i tosatei i resta poco tempo insieme dei adulti. Par arquanti motivi:

• I tosatei i passa la pi granda parte del so tempo ntela scola, ndove ghen’è de pi tosatei che adulti.

• Tanti che i ga fioi i ga de laorar e, quando i tosatei i riva casa i resta lori soli.

• Una peschisa fata nei Stati Unidi la dise che i tosatei che i ga intrà 8 e 12 ani, i guasta intorno de 6 ore par giorno drio veder television, ntela internet e drio giugar videogames.a

Un libro che parla sora slevar i fioi el dise: “Ancoi, i gióveni i va in serca de consili dei altri gióveni invesse de domandar orientassion ai adulti.”b

COME DAR ORIENTASSION AL TO FIOL?

Dopera del to tempo col to fiol.

CONSÌLIO DELA BÌBLIA: “Insegna al toseto la strada che el ga de ndar. Anca quando el sarà vècio, lu no la abandonarà.” — Proverbi 22:6.

I peschisadori i dise che i gióveni i ghe piase de pi dela orientassion del so pupà e so mama, invesse dei consili dei so amighi. El Dr. Laurence Steinberg, che el ga scrito el libro Você e Seu Filho Adolescentec, el dise: “El pupà e la mama i ze le persone pi importante par giutar nel comportamento dei gióveni e in quel che lori i fà fin che i deventa adulti. El gióveno el ghe dà atension ala opinion del so pupà e so mama, fin quando no i ze de acordo con quel che i dise.”

El to fiol el vol la to orientassion, alora dopera el to tempo par dir quala zela la to opinion, quel che l’è importante par ti e quel che te ghè imparà ntela to vita.

Scoli una persona par esser un esémpio par el to fiol.

CONSÌLIO DELA BÌBLIA: “La persona che la va con quei che i ga el saver la deventarà sàbia.” — Proverbi 13:20.

Scoli una persona pi vècia che el to fiol che la pol esser un esémpio par lu. Giùtalo a esser amigo de quela persona. Ma no vol mia dir che la persona la gavarà la responsabilità de slevar el to fiol. La amicìssia con un adulto pol giutar nela orientassion che te lo dè. La Bìblia la dise che el esémpio de Paolo l’è stà tanto importante par el gióveno Timòteo, ancora che lu el fusse belche adulto. Questa amicìssia la ze stata bona par lori due. — Filipensi 2:20, 22.

Nei ùltimi ani, i tosatei no i resta tanto tempo insieme coi so noni o zii parché i ze de star distante de lori. Se sucede cossita nela to fameia, va in serca de oportunità par el to fiol imparar con adulti che i ga bone qualità.