Giò el seita fedele

SARÀ che qualche umano el seitaria fedele a Dio se el fusse proà fin quasi perder la so vita e sensa ricever gnanca una ricompensa par la so obediensa? Questa domanda la ze stata rispondesta con quel che ga sucedesto con un omo de nome Giò.

Intanto che i israeliti i era nel Egito, Giò, che l’era dela fameia de Abraon, l’era de star nela Aràbia. In quel tempo, i àngeli nel cielo i se ga riunio davanti de Dio, e Sàtana l’era in meso de lori. In quela riunion, Geovà el ga dito ai àngeli come ghe piasea de Giò, parché Giò l’era fedele. Geovà fin el ga dito che no ghen’era gnanca un omo compagno a Giò. Ma Sàtana el ga dito che Giò sol servia a Dio parché Dio lo giutea e lo protegea. Anca el ga dito che Giò el ndaria bestemar contra Dio se el perdesse tuto quel che el gavea.

Dio el ga assà Sàtana far Giò perder tuto el so capital, anca i so fioi, e dopo la so salute. Giò no’l savea mia che Sàtana l’era par de drio dei so problemi e lu no’l capia parché che Dio el gavea assà suceder tute quele robe. Ancora cossita, Giò mai l’è restà contra Dio.

Tre falsi amighi i ze ndati visitar a Giò. Se pol catar quel che lori i ga dito in arquanti capìtoli del libro de Giò. De maniera sbaliada, i ga dito che Dio l’era drio castigar Giò par pecati che lu el gavea fato sconto. Lori anca i ga dito che Dio no’l se importa coi so servi e gnanca el se fida in lori. Giò el ga rigetà quele idee sbaliade. Con tanta confiasa, el ga dito che el seitaria fedele fin la morte!

Ma Giò el ga fato un sbàlio. Lu l’è restà massa preocupà in mostrar che lu el gavea rason. Un gióveno de nome Eliù, che el ga scoltà tuto quel che quei òmini i gavea dito, el ga scominsià a parlar. El ga mostrà che la roba pi importante l’era difender el dirito de Geovà governar, e nò restar massa preocupà con si stesso e proar mostrar chi che gavea la rason. Eliù anca el ga mostrà de maniera ciara che i falsi amighi de Giò i era sbaliadi.

Dopo, Geovà Dio el ga parlà con Giò par giustar la so maniera de pensar. Geovà el ghe ga parlà sora la so bela creassion e lo ga giutà a capir che i òmini i ze picinini in comparassion con Dio. Giò l’è stà ùmile e el ga acetà quel che Dio el ghe ga dito. “Geovà el ga tanta afession e misericòrdia”, alora, lu el ga guario Giò e lo ga dato due volte de pi tuto quel che el gavea vanti e lo ga benedio con altri diese fioi. (Tiago 5:11) Come Giò l’è stà fedele a Geovà soto provassion, lu el ga provà che Sàtana l’era sbalià quando el ga dito che nissuni restaria fedele a Dio quando infrontesse dificoltà.

​— De acordo col libro de Giò.