Come infrontar i problemi

Quando un omo e una dona i se marida, scomìnsia a vegner fora i problemi. Pol esser parché valtri pensé de maniera difarente, gavé sentimenti difarenti o sé stati slevadi su de maniera difarente. O pol esser che i problemi i vien de fora o de situassion che no speté mia.

Anca se scampar via dei problemi par la roba pi fàcile de far, la Bìblia la dise che l’è meio infrontarli. (Mateo 5:23, 24) La meio maniera de far questo l’è seghir i prinsipi dela Bìblia.

1 PARLÉ SORA I PROBLEMI

COSSA CHE LA BÌBLIA LA DISE: “Ghen’è . . . un tempo par parlar.” (Eclesiasti 3:1, 7) Ciapé tempo par parlar sora el problema. Gavé de esser sinsieri e dir al vostro sposo o sposa cossa che pensé dela situassion e come che ve sentì. Sempre gavé de dir la verità. (Efesi 4:25) Anca se sé disgustadi, no sté mia barufar. Una risposta calma la pol evitar che una sémplisse conversassion la devente una guera. — Proverbi 15:4; 26:20.

Anca se valtri no sé de acordo, seité esser gentili e no sté mia desmentegarve de dimostrar amor e rispeto par el vostro sposo o sposa. (Colossensi 4:6) Sforséve par finir col problema suito e no sté mia assar de parlarve. — Efesi 4:26.

COSSA CHE PODÉ FAR:

• Gavé de scòlier el momento giusto par parlar.

• Quando el vostro sposo o sposa l’è drio parlar, no sté mia parlarghe sora. Dopo che el finisse de parlar, valtri podé parlar.

2 GAVÉ DE SCOLTAR E CAPIR

COSSA CHE LA BÌBLIA LA DISE: “Mostré amor con afeto un par el altro. Sforséve de dar onor un par el altro.” (Romani 12:10) L’è tanto importante come che scolté. Sforséve de capir come el vostro sposo o sposa el pensa e mostré comprension e umiltà. (1 Piero 3:8; Tiago 1:19) No fé finta de scoltar. Quando podé, assé de banda quel che valtri sé drio far e dé atension al vostro sposo o sposa. Se nò, domandé se podé parlar dopo. Se valtri pensé nel vostro sposo o sposa come un dela vostra echipe e nò come un nemigo, valtri no resteré suito ofendesti. — Eclesiasti 7:9.

COSSA CHE PODÉ FAR:

• Scolté con mente verta, anca se no ve piase quel che sé drio scoltar.

• Sforséve par capir cossa che ghen’è de drio dele parole. Sté atenti ai moti e al ton dela voce.

3 SFORSÉVE PAR METER IN PRÀTICA

COSSA CHE LA BÌBLIA LA DISE: “Tuti i laori i ga el so vantaio, ma sol parlar el porta ala misèria.” (Proverbi 14:23) No basta esser de acordo sora cossa far. Gavé de esser determinadi a far quel che l’è stà dessidesto. Ghe vol sforso e laoro, ma sicuro che val la pena. (Proverbi 10:4) Se valtri laoré come echipe, riceveré una “granda ricompensa” par el vostro sforso. — Eclesiasti 4:9.

COSSA CHE PODÉ FAR:

• Podé dessider cossa che cada un de valtri el farà par risolver el problema.

• De tempo in tempo, fermeve par veder come che va.