Quala la è la condission dei morti?

1-3. (a) Che domande le persone le se fà sora la morte? (b) Come arquante religion le risponde?

LA BÌBLIA la promete che nel futuro “no ghen sarà pi la morte.” (Apocalipse 21:4) Ntel capìtolo 5, gavemo imparà che el risgate el ne dà la speransa de vita eterna. Ma le persone le ze drio morir. (Eclesiastes 9:5) L’è par quel che tanti i se fà una importante domanda: Cossa sucede quando morimo?

² La risposta a questa domanda la è ancora pi importante quando qualchedun che amemo el more. Fursi se domandemo: ‘Ndove l’è ndà? El pol veder noantri? El pol giutarne? Sarà che ndaremo véderlo nantra volta?’

³ Le religion le dà difarenti risposte a ste domande. Arquante le insegna che se ti te sì bon te ndarè al cielo e se ti te sì rugno te ndarè brusar nel inferno. Altre le dise che quando te mori, ti te deventi un spìrito e te ndarè viver con quei dela to fameia che i ze morti. E ancora altre le insegna che dopo dela to morte te ndarè rinasser come nantra persona o animal.

4. Che idea compagna le religion le insegna sora la morte?

⁴ Le religion le insegna difarenti robe. Ma quasi tute le ga una idea compagna: quando i umani i more una parte de lori la continua a viver. Sarà che la è pròpio vera?

QUALA LA È LA CONDISSION DEI MORTI?

5, 6. Cossa sucede con noantri quando morimo?

⁵ Geovà el sa cossa sucede quando morimo e Lu el ga dito che la vita la finisse quando la persona la more. La morte la è el contràrio dela vita. Quando qualchedun el more, no ghen’è un spìrito che continua a viver in nantra parte coi so sentimenti e i so ricordi.a Quando morimo, no podemo veder, scoltar e gnanca pensar.

⁶ El Rè Salomon el ga scrito che “i morti no i sa pròpio gnente.” I morti no i pol amar gnanca odiar, e “no ghen’è laoro, gnanca progeto, gnanca cognossensa, gnanca sapiensa ntel Sepolcro.” (Lesi Eclesiastes 9:5, 6, 10.) La Bìblia anca la dise nel Salmo 146:4 che quando qualchedun el more “i so pensieri” i more insieme.

COSSA GESÙ EL GA DITO SORA LA MORTE

7. Cossa Gesù el ga dito sora la morte?

⁷ Quando el so gran amigo Làsaro l’è morto, Gesù el ga dito ai so dissìpoli: “El nostro amigo Làsaro el se ga indormensà.” Ma Gesù no’l volea dir che Làsaro l’era drio riposar. Gesù ancora el ga dito: “Làsaro l’è morto.” (João 11:11-14) Gesù el ga comparà la morte al sono. Lu no’l ga mia dito che Làsaro l’era in cielo o con quei dela so fameia che i era morti. E no’l ga dito che Làsaro l’era drio sofrir nel inferno o rinasser come nantra persona o animal. Invesse, l’era come se Làsaro el stesse in un sono profondo. Altri scritori i ga comparà la morte al sono. La Bìblia la dise che quando Stevon l’è stà copà, “el se ga indormensà nela morte.” (Atos 7:60) Anca el apòstolo Paolo el ga scrito che arquanti Cristiani “ i se ga indormensà nela morte.”—1 Coríntios 15:6.

8. Come savemo che Dio no’l ne ga creà par morir?

⁸ Sarà che Dio el ga creà Adamo e Eva par dopo morir? Nò! Geovà el ga creà lori par goder la vita eterna con salute perfeta. Geovà el ne ga fato cola voia de viver par sempre. (Eclesiastes 3:11) I genitori no i vol mia veder i so fioi restar veci e morir. Compagno a lori, Geovà el ga el medèsimo sentimento par noantri. Ma se Dio el ne ga creà par viver par sempre, parché morimo?

PARCHÉ MORIMO?

9. Parché no l’era mia difìcile obedir ala òrdine che Geovà el gavea dato a Adamo e Eva?

⁹ Ntel giardin del Èden, Geovà el ga dito a Adamo: “De tute le piante del giardin te pol magnar quanto te vol. Ma quanto ala pianta dela cognossensa del ben e del mal ti no te ghè mia de magnar, parché nel giorno che te la magni, sicuro che te ndarè morir.” (Gênesis 2:9, 16, 17) Questa òrdine no la era mia difìcile de obedir, e Geovà el gavea el dirito de dessider quel che l’era bon e quel che l’era mal par Adamo e Eva. Se lori i gavesse obedio a Geovà, i dimostraria rispeto par Lu e par la so autorità. Anca i dimostraria che lori i era grati a Geovà par tuto.

10, 11. (a) Come Sàtana el ga inganà Adamo e Eva? (b) Parché lori no i gavea scuse par desobedir a Dio?

¹⁰ Par desgràssia, Adamo e Eva i ga scoliesto desobedir a Geovà. Sàtana el ga dito a Eva: “L’è pròpio cossita che Dio el ga dito, che no gavé de magnar de tute le piante del giardin?” Eva la ga rispondesto: “Podemo magnar del fruto dele piante del giardin. Ma, quanto al fruto dela pianta che la è in meso del giardin, Dio el ga dito: ‘No gavé de magnarlo, nò, gnanca gavé de tocarlo, senò ndaré morir.’”—Gênesis 3:1-3.

¹¹ Alora Sàtana el ga dito: “Sicuro che valtri no ndaré morir. Parché Dio el sa che, nel medèsimo di che valtri magné de sto fruto, i vostri oci i se verderà e valtri saré come Dio, savendo quel che l’è bon e quel che l’è mal.” (Gênesis 3:4-6) Sàtana el volea che Eva la credesse che ela sola la podaria dessidir quel che l’era bon e quel che l’era mal. Anca lu el ga dito una busia sora cossa sucederia se Eva la desobedisse. Sàtana el ga dito che Eva no la moreria, par quela che Eva la ga magnà del fruto e dopo lo ga dato a so omo. Adamo e Eva i savea che Geovà el gavea dito par no magnar de quel fruto. Ma quando lori i lo ga magnà, i ga scoliesto desobedir ala la òrdine de Dio e i ga dimostrà che no i rispetea el so amoroso Pare celestial. No i gavea scuse par far sta roba!

12. Parché l’è stà pròpio una mancansa de rispeto quel che Adamo e Eva i ga fato?

¹² L’è stà pròpio una mancansa de rispeto quel che i nostri primi genitori i ga fato al so Creador! Imagina che ti te ghè laorà tanto par dar del bon e del meio al to fiol e ala to fiola. Sol che lori i se ga rebelà contra ti e i ga fato tuto al contràrio de quel che te ghè mandà. Come ti te sentiria? Questo no te spacaria el cuor?

13. Cossa Geovà el volea dir quando el ga dito “ala polver te ritornarè”?

¹³ Quando Adamo e Eva i ga desobedio, lori i ga perso la oportunità de viver par sempre. Geovà el gavea dito a Adamo: “Parché te sì polver e ala polver te ritornarè.” (Lesi Gênesis 3:19.) Questo volea dir che Adamo el ritornaria ala polver, come se mai el fusse stà creà. (Gênesis 2:7) Dopo che Adamo el ga pecà, lu l’è morto e el ga assà de esister.

14. Parché morimo?

¹⁴ Se Adamo e Eva i gavesse obedio a Dio i saria ancora vivi. Ma quando i ga desobedio a Lu, lori i ga pecà e i ze morti. El pecà l’è come una bruta malatia che gavemo eredità dei nostri primi genitori. Tuti noantri semo nassesti pecadori e par quel che morimo. (Romanos 5:12) Ma questo no l’era mia el propòsito de Dio par i umani. Lu no’l volea che i umani i morisse, par quela che la Bìblia la ciama la morte de “nemigo”.—1 Coríntios 15:26.

LA VERITÀ LA NE FÀ LÌBERI

15. Come la verità sora la morte la ne fà lìberi?

¹⁵ La verità sora la morte la ne fà lìberi de tante idee sbaliade. La Bìblia la insegna che i morti no i sente dolor o tristessa. No podemo parlar con lori gnanca lori i pol parlar con noantri. No podemo giutar i morti gnanca lori i pol giutarne. No ocore mia gaver paura parché lori no i pol farne mal. Tante religion le insegna che i morti i continua a viver in nantro posto e che podemo giutarli se demo soldi ai preti o a altri religiosi. Se savemo la verità sora la morte, no semo mia inganadi con ste busie.

16. Che busie le religion le insegna sora la morte?

¹⁶ Sàtana el dopera la religion falsa par dir busie e far creder che i morti i ze ancora vivi. Par esémpio, arquante religion le insegna che, quando morimo, una parte de noantri continua a viver in nantro posto. Sarà che la to religion la insegna cossita o la insegna quel che la Bìblia la dise? Sàtana el dopera le busie par distansiar le persone de Geovà.

17. Parché la idea del inferno la insulta a Geovà?

¹⁷ No l’è gnanca de creder quel che tante religion le insegna. Arquante le insegna che i rugni i ndarà brusar nel inferno. Questa busia la insulta a Geovà parché Lu mai el faria le persone sofrir cossita! (Lesi 1 João 4:8.) Cossa ti te pensaria de un pare che el brusa la man del so fiol nel fogo par castigarlo? Sicuro che te pensaria che sto pare l’è pròpio rugno e ­gnanca te gavaria voia de cognósserlo. Questo l’è quel che Sàtana el vol che pensemo de Geovà!

18. Parché no ocore mia gaver paura dei morti?

¹⁸ Tante religion le insegna che i morti i ze spìriti poderosi e che i pol deventar amighi o nemighi ­rugni. Tanti i crede in queste busie e i ga paura dei morti. Alora i adora i morti invesse che Geovà. Ma, te ghè de ricordar che i morti no i pol sentir e gnanca far qualcossa, cossita no ocore mia gaver paura de lori. Geovà l’è el vero Dio e el nostro Creador. Gavemo de adorar sol a Lu. —Apocalipse 4:11.

19. Come la verità sora la morte la ne giuta?

¹⁹ La verità sora la morte la ne fà lìberi dele busie religiose. Questa verità la ne giuta a capir la maraveiosa promessa de vita eterna che Geovà el ga fato.

20. Cossa ndaremo veder ntel pròssimo capìtolo?

²⁰ Tanto tempo indrio, Giobe, un servo de Dio, el ga domandà: “Se un omo el more, el pol viver nantra volta?” (Jó 14:14) Sarà che l’è possìbile che una persona morta la pol tornar a viver? Vedemo la emossionante risposta che Dio el ne dà ntel pròssimo capìtolo.