Parché ghen’è tanto sofrimento?

1, 2. Che domanda tanti i se fà?

UN TSUNAMI el finisse fora con un paeseto. Un terorista el dà tiri in un posto pùblico, ferindo e copando tante persone. Una mare la more par via de un tumor, assando indrio sinque fioi.

² Quando sucede tragèdie e disastri come questi, tanti i se domanda: ‘Parché?’ Tanti anca i se domanda parché el mondo l’è pien de òdio e sofrimento. E ti, te ghè belche fato sta domanda?

3, 4. (a) Che domande Abacuc el ga fato? (b) Come Geovà el ga rispondesto?

³ La Bìblia la mostra che anca servi fedeli de Dio i se ga fato sta domanda. Par esémpio, el profeta Abacuc el ga domandà a Geovà: “Parché te me fè veder tanta perversità? E parché ti te sì drio tolerar la opression? Parché ghen’è tanta destrussion e violensa davanti de mi? E parché ghen’è tante barufe e confliti?” —Habacuque 1:3.

⁴ In Habacuque 2:2, 3 Dio el ga dato la risposta ale domande de Abacuc e el ga promesso indrissar la situassion. Geovà el ga grando amor par le persone. La Bìblia la dise: “Lu el ve tende.” (1 Pedro 5:7) Se noantri odiemo veder el sofrimento, Dio el òdia ancora de pi. (Isaías 55:8, 9) Par quela, ndemo considerar la domanda: ‘Parché ghen’è tanto sofrimento?’

PARCHÉ GHEN’È TANTO SOFRIMENTO?

5. (a) Cossa tanti maestri religiosi i dise sora el sofrimento? (b) Cossa la Bìblia la insegna?

⁵ I pastori, i preti e altri maestri religiosi i dise che la è la volontà de Dio che le persone le sofre. Arquanti i dise che tuto quel che sucede a una persona, incluso le tragèdie, l’è stà una roba che Dio el ga belche determinà. E anca i dise che questo l’è un mistèrio. Altri i dise che tuti quei che i more i va viver con Dio ntel cielo. Ma questo no l’è mia vera. Geovà mai el fà suceder robe rugne. La Bìblia la dise: “El vero Dio mai el fà robe rugne, el Tuto Poderoso mai el fà robe sbaliade!” —Jó 34:10.

6. Parché tanti i colpa a Dio par tuto el sofrimento?

⁶ Tanti i colpa a Dio par tuto el sofrimento parché i pensa che Dio el governa el mondo. Ma gavemo imparà ntel capìtolo 3 che el governante del mondo l’è Sàtana el Diaol.

7, 8. Parché ghen’è tanto sofrimento ntel mondo?

⁷ La Bìblia la dise che “tuto el mondo l’è soto el poder del perverso.” (1 João 5:19) Sàtana l’è un governante rugno e crudel. Lu l’è drio “inganar tuta la tera abitada”. (Apocalipse 12:9) Tanti i lo imita. Par quela, el mondo l’è pien de busie, òdio e crudeltà.

⁸ El pecà l’è nantra rason de esister tanto sofrimento ntel mondo. Adamo e Eva i se ga rebelà e i ga passà el pecà ai so fioi. Par via del pecà, i umani i fà altri umani sofrir e tante volte i vol esser de pi che i altri. Par quela i barufa, i fà guere e i maltrata i altri. (Eclesiastes 4:1; 8:9) Dele volte le persone le sofre par via “del tempo e del imprevisto”. (Eclesiastes 9:11) Pol suceder un insidente o altre robe rugne con noantri quando se catemo ntel posto sbalià ntel momento sbalià.

9. Parché podemo esser sicuri che Geovà el ga una bona rason par assar el sofrimento continuar?

⁹ Geovà mai el fà le persone sofrir. Lu no’l ga mia la colpa dele guere, dela criminalità e dela violensa. Dio gnanca el fà suceder desgràssie come teremoti, tornadi e inondassion. Fursi ti te domandi: ‘Se Geovà l’è el pi poderoso del universo, parché Lu ancora el assa suceder ste robe brute?’ Savemo che Dio el fà pròpio caso de noantri, par quela Lu el ga una bona rason par assar el sofrimento continuar. —1 João 4:8.

PARCHÉ DIO EL ASSA LE PERSONE SOFRIR?

10. Cossa Sàtana el ga messo in dùbio?

¹⁰ Ntel giardin del Èden, el Diaol el ga inganà Adamo e Eva. Sàtana el ga acusà Dio de esser un Governante rugno. El Diaol el ga dito che Dio l’era drio sconder de Adamo e Eva qualcossa de bon. Sàtana el volea che lori i credesse che lu el saria un governante meio che Geovà e che lori no i gavea bisogno de Dio. —Gênesis 3:2-5; vedi la Nota Final 27.

11. A che domanda gavemo de risponder?

¹¹ Adamo e Eva i ga desobedio a Geovà e i se ga rebelà contra Lu. Lori i pensea che i gavea el dirito de dessider quel che l’era giusto e quel che l’era sbalià. Ma Geovà el sa quel che l’è meio par noantri. Come Geovà el podaria mostrar che quei che i se ga rebelà i era sbaliadi?

12, 13. (a) Parché Geovà no’l ga suito finio fora con quei che i se ga rebelà? (b) Parché Geovà el ga assà Sàtana e i umani governarse?

¹² Geovà no’l ga suito finio fora con Adamo e Eva. Invesse, Lu el ga assà che lori i gavesse fioi. Alora Geovà el ga dato ai fioi de Adamo e Eva la oportunità de scòlier a chi lori i volea come governante. El propòsito de Geovà l’era impienir la Tera con persone perfete e questo ndaria suceder no importa cossa el Diaol el proasse far. —Gênesis 1:28; Isaías 55:10, 11.

¹³ Sàtana el ga contà tute quele busie sora Geovà davanti de milioni de àngeli. (Jó 38:7; Daniel 7:10) Alora Geovà el ga dato tempo a Sàtana par provar se sta acusassion la era pròpio vera. Lu anca el ga dato tempo ai umani par stabilir i so propi governi e mostrar se i era boni governarse sensa el so aiuto.

14. Cossa el tempo el ga mostrà?

¹⁴ Par miliari de ani i umani i ga proà governarse, ma no i ze stati boni. L’è stà proà che Sàtana l’è un busier. I umani i ga bisogno del aiuto de Dio. El profeta Geremia el gavea rason quando el ga dito: “Mi sò pròpio ben, ò Geovà, che no l’è del omo el so camino. Gnanca l’è del omo guidar i so passi.” —Jeremias 10:23.

PARCHÉ GEOVÀ L’È DRIO SPETAR TANTO?

15, 16. (a) Parché Geovà l’è drio assar el sofrimento continuar par tanto tempo? (b) Parché Geovà no’l risolve i problemi che Sàtana l’è drio causar?

¹⁵ Parché Geovà l’è drio assar el sofrimento continuar par tanto tempo? Parché Lu no’l finisse cole robe rugne? Ghe volea tempo par mostrar che el governo de Sàtana l’è rugno. I umani i ga proà tuti i tipi de governo sensa resultà. I umani i ga fato tanto progresso ntela siensa e ntela tecnologia, ma ancora cossita ghen’è de pi ingiustìssia, poareti, criminalità e guere. Tuto questo el mostra che no semo mia boni governarse sensa Dio.

¹⁶ Geovà no’l risolve i problemi che Sàtana l’è drio causar, parché se Lu el fesse questo el saria drio giutar el governo de Sàtana. Lu mai el faria questo. Ancora par sora, i umani i ndaria creder che i ze boni governarse. Ma questa la è pròpio una busia. Geovà mai el dise busie e mai el dà apoio a busie. —Hebreus 6:18.

17, 18. Come Geovà ndarà indrissar tuti i dani che Sàtana el ga causà?

¹⁷ Sarà che Geovà el pol indrissar i dani che la rebelion de Sàtana e dei umani la ga causà? Si! Par Dio tuto l’è possìbile. Geovà el sa quando tute le acusassion de Sàtana le sarà rispondeste. Alora si, Lu el farà dela Tera un paradiso, cossita come la gavea de esser. Tuti quei che i ze ntele “tombe memoriai” i sarà ressussitadi. (João 5:28, 29) No ghen sarà pi malatie e gnanca la morte. Gesù ndarà indrissar tuti i dani che Sàtana el ga causà. Geovà ndarà doperar Gesù par “desfar i laori del Diaol”. (1 João 3:8) Semo pròpio grati che Geovà el ga bio passiensa con noantri durante tuto questo tempo. Cossita podemo cognosser a Lu e podemo dessider se volemo obedir a Lu. (João 4:23; Lesi 2 Pedro 3:9, 10.) Geovà el ne dà la forsa par soportar el sofrimento. —Lesi 1 Coríntios 10:13.

¹⁸ Geovà el ne assa lìberi de scòlier Lu come nostro Governante. Lu el ga dato ai umani el regalo dela libertà de scolia. Ndemo veder parché questo l’è un regalo pressioso.

COME DOPERAR LA LIBERTÀ DE SCOLIA?

19. (a) Che straordinàrio regalo Geovà el ne ga dato? (b) Parché gavemo de esser grati par sto regalo?

¹⁹ Geovà el ne ga dato el straordinàrio regalo dela libertà de scolia che ne fà esser difarenti dei animai. Lori i fà le robe par istinto, ma noantri podemo scòlier viver come volemo o viver come Geovà el vol. (Provérbios 30:24) Noantri no semo come le màchine che le fà sol quel che le ze state programade par far. Gavemo la libertà de scòlier chi volemo esser, chi volemo come amighi e cossa volemo far cola nostra vita. Geovà el vol che godemo la nostra vita.

20, 21. Quala la è la meio scolia che ti te pol far?

²⁰ Geovà el vol che lo amemo. (Mateus 22:37, 38) Lu l’è come un pare che el se sente tanto contento quando el scolta i so fioi dirghe del cuor “Mi te amo” e nò parché i ze stati obrigadi a dirlo. Geovà el ne ga dato la libertà de scòlier se volemo o nò servirlo. Sàtana, Adamo e Eva i ga scoliesto desobedir a Geovà. E ti, cossa te ndarè scòlier?

²¹ La meio scolia che te pol far la è servir a Geovà. Milioni i ga fato la scolia de contentar a Dio e ­assar de banda a Sàtana. (Provérbios 27:11) Presto Dio el finirà fora con tuto el sofrimento. Alora, cossa ti te pol far adesso par viver in questo novo mondo? El pròssimo capìtolo ndarà risponder a questa domanda.