LESSION 12

Cossa che ndarà giutarte a seitar a studiar la Bìblia?

Edission stampada

Studiar la Bìblia la ze la meio roba che una persona la pol far. Ma fursi te pensi che no te sarè bon de seitar a studiarla. Ma parché che te ghè de seitar a studiar la Bìblia? Cossa che ndarà giutarte a seitar a studiar anca se te infronti dificoltà?

1. Parché che studiar la Bìblia l’è tanto importante?

Studiar la Bìblia l’è tanto importante parché ela la ga el poder de cambiar la nostra vita par meio. (Ebrei 4:12) Quando te studi la Bìblia, te impari tante robe importante. Anca te impari la meio maniera de viver e la te giuta a gaver una speransa. La Bìblia la ne dise come Dio el pensa, e la mostra che el se preocupa con noantri. La Bìblia anca la ndarà giutarte a esser amigo de Geovà. Cossita, el stùdio dela Bìblia el ndarà giutarte a gaver una vita meio.

2. Parché che ghemo de dar valor a quel che la Bìblia la insegna?

Quel che imparemo dela Bìblia el ga tanto valor. Par quela, ghemo de sforsarse par imparar le verità dela Bìblia e mai abandonarle. (Proverbi 23:23) Mostremo che demo tanto valor a quel che imparemo quando seitemo a studiar la Bìblia, anca cole dificoltà. — Ledi Proverbi 2:4, 5.

3. Come che Geovà el pol giutarte a seitar a studiar?

Geovà l’è el Creador, la persona pi poderosa che ghen’è e el to Amigo. Lu el te cognosse tanto ben e el vol giutarte a esser so amigo. Lu el pol darte la voia e anca la forsa par seitar a imparar sora lu. (Ledi Filipensi 2:13.) Se te ghè bisogno de forsa par seitar a studiar la Bìblia o par meter in pràtica quel che te impari, Geovà el ndarà giutarte. Lu el pol anca darte forsa se te sì drio infrontar dificoltà o problemi. Alora, domanda sempre a Geovà che el te giute a seitar a studiar la Bìblia. — 1 Tessalonissensi 5:17.

IMPARA DE PI!

Come che te pol seitar a studiar la Bìblia anca se te ghè tanto laoro da far o che i altri i vol che te te fermi? Come che Geovà el pol giutarte a nò fermarte mai de studiar?

4. Mostra che el to stùdio dela Bìblia el ga tanto valor par ti

Te pensi che no te ghè mia tempo par studiar la Bìblia par causa de tuti i laori che te ghè de far? Cossa te podarissi far? Ledé Filipensi 1:10, e dopo, parlé sora questo:

Che robe te pensi che le ze pi importante nela vita?
Come te pol mostrar che el stùdio dela Bìblia el ga tanto valor par ti?

A. Ilustrassion: Ilustrassion de come se impienisse un mistier con sassi e areia. 1. Una sbranca de areia e una mùcia de sassi. 2. El mistier l’è quasi pien de areia. 3. I sassi i ze par sora dela areia e fora del mistier.

B. Ilustrassion: 1. La medèsima sbranca de areia e mùcia de sassi. 2. El medèsimo mistier l’è quasi pien de sassi. 3. La areia la ze intorno dei sassi e el mistier resta quasi pien. Una sbranca de areia la resta fora del mistier.

Metemo dir che te vol meter la areia e i sassi rento un mistier
Se prima te meti la areia, no te sarè bon de meter rento anca i sassi. Ma se prima te meti i sassi, ghen sarà posto anca par la areia. La medèsima roba la sucede con noantri. Se te fè prima le robe pi importante, dopo te gavarè tempo par far le altre robe

Noantri ghemo bisogno de cognosser e adorar a Dio. El stùdio dela Bìblia el ne giuta a far questo. Ledé Mateo 5:3, e dopo, parlé sora questo:

Cossa sucederà se demo valor al stùdio dela Bìblia?

5. No stà mia fermarte de studiar par causa dei altri

Fursi qualchedun el proa fermarte de studiar la Bìblia. Varda quel che ga sucedesto con Francesco. Vardé el VÌDEO, e dopo, parlé sora questo:

VÌDEO: La perseveransa la ne ga portà benedission (5:22)

Una parte del vìdeo ‘La perseveransa la ne ga portà benedission’. Francesco el va via dopo che el ga parlà ai so amighi che no restaria pi insieme con lori.

Cossa che i amighi e la fameia de Francesco i ga fato quando lu el ghe ga parlà sora quel che l’era drio imparar?
Anca cossita, Francesco no’l se ga fermà de studiar la Bìblia. Che benedission lu el ga ricevesto?

Ledé 2 Timòteo 2:24, 25, e dopo, parlé sora questo:

Cossa che i to amighi e la to fameia i dise sora quel che te sì drio imparar?
De acordo con questi testi, cossa che te ghè de far quando qualchedun el vol che te te fermi de studiar? Parché che te ghè de far cossita?

6. Sìpia sicuro che Geovà el ndarà giutarte

Quando cognossemo de pi a Geovà, volemo assarlo contento. Ma pol esser fadiga far quel che lu el ne domanda. Se questo l’è drio suceder con ti, no stà mia desister parché Geovà el te giutarà. Vardé el VÌDEO, e dopo, parlé sora questo.

VÌDEO: Geovà el ne giuta a cambiar la vita (3:56)

Cossa che Jim el ga bio de cambiar par far Geovà contento?
Cossa che te ga piasesto de pi sora la so stòria?

Ledé Ebrei 11:6, e dopo, parlé sora questo:

Cossa che Geovà el ndarà far se te te sforsi de cognosserlo e de farlo contento?
Come che Geovà el se sente de veder el to sforso de seitar a studiar la Bìblia?

FURSI QUALCHEDUN EL TE DOMANDE: “Parché che te sì drio studiar la Bìblia?”

Cossa che te ndarissi risponder?

COSSA CHE TE GHÈ IMPARÀ?

Anca che no sìpia fàcile seitar a studiar la Bìblia, fìdate che Geovà el te giutarà. Cossita, Geovà el te benedirà e te podarè esser felice par sempre.