Istrussion par la Riunion Vivemo e Insegnemo come Gesù

Cossa che ghen’è in queste istrussion

• Cossa che ndaremo imparar ancoi? 2

• Lession pressiose dela Bìblia 3-5

  • Discorso 3

  • Va in serca de lession pressiose dela Bìblia 4

  • Letura 5

• Imparemo a Insegnar come Gesù 6-14

  • Come scominsiar a parlar cola persona 7

  • Come seitar a parlar cola persona 8

  • Come giutar la persona a far compagno Gesù 9

  • Come spiegar quel che te credi 10

  • Discorso 11

  • Cossa parlar 12

  • Situassion 13

  • Doperar vìdei e publicassion 14

• Vivemo come Gesù 15-16

  • Stùdio bìblico cola congregassion 16

• Conclusion dela riunion 17

• Lodi e consili 18

• Controle del tempo 19

• Vìsita del superintendente de sircuito 20

• Stimana dela assemblea o del congresso 21

• Stimana dela Selebrassion 22

• Superintendente dela Riunion Vivemo e Insegnemo 23

• Presidente dela Riunion Vivemo e Insegnemo 24

• Quel che dà consili ai servi e ansiani 25

• Altre sale 26

• Vìdei 27

1. Queste orientassion le ndarà giutar tuti quei che i fà parte nela Riunion Vivemo e Insegnemo come Gesù. Vanti de pareciarse par le so parte, i studianti i ga de leder come farle nela Programassion dela Riunion Vivemo e Insegnemo e anca in questo documento. Tuti i predicadori i ga de esser insentivadi a meterse a disposission par far le parte de studiante. Altre persone che le va sempre ale riunion anca le pol partissipar se le ze de acordo con quel che la Bìblia la insegna e le vive de acordo con quel che le ga imparà dela Bìblia. Se una persona che no la ze ancora predicadora la vol far parte nele riunion, el superintendente dela Riunion Vivemo e Insegnemo el ga de parlar con ela cossa che la ga de far e dirghe se la pol far parte o nò. Questo el ga de esser fato insieme con quel che el stùdia la Bìblia cola persona (o insieme col pare o la mare che l’è Testimònia de Geovà). Quel che ghe ocore par una persona esser predicadora no batesada l’è la medèsima roba par far parte nele riunion. — Organizados cap. 8 paràg. 8.

COSSA CHE NDAREMO IMPARAR ANCOI

2. Un minuto. Tute le stimane, dopo del càntico e dela orassion del scomìnsio, el presidente dela Riunion Vivemo e Insegnemo el ga de assar le persone con voia de scoltar quel che sarà considerà nela riunion. El presidente anca el ga de parlar sora i punti che ndarà benefissiar de pi la congregassion.

LESSION PRESSIOSE DELA BÌBLIA

3. Discorso: Diese minuti. Nela Programassion dela Riunion Vivemo e Insegnemo ghen’è el tema e due o tre punti prinsipai del discorso. Un ansiano o un servo ministerial qualificà el ga de far questa parte. Quando ndaremo scominsiar a studiar un novo libro dela Bìblia in quela stimana, sarà mostrà un vìdeo de introdussion con informassion sora quel libro. El orador el pol parlar come che el vìdeo l’è relassionà col tema. Ma lu el ga anca de parlar sora i punti che ghen’è nela Programassion. E se el tempo el permete, lu el ga de doperar ben le gravure che le ze stà pareciade par giutar a spiegar la matèria. Lu anca el pol doperar idee de altre publicassion par guitarlo nel so discorso.

4. Va in serca de lession pressiose dela Bìblia: Diese minuti. Questa parte la ze con domande e risposte ma sensa introdussion gnanca conclusion. Un ansiano o un servo ministerial qualificà el ga de far questa parte. Lu el ga de far le due domande par quei che i ze nela riunion. Anca, lu el pol dessider se ocore leder el testo bìblico dela domanda. I comentari i ga de esser de 30 secondi o manco.

5. Letura: Quatro minuti. Un omo el ga de far questa parte de studiante. El studiante el ga de leder quela parte dela Bìblia o de una publicassion, ma sensa far una introdussion gnanca una conclusion. El presidente dela riunion el ga de giutar i studianti che i fà la parte a leder de una maniera giusta, fàcile de capir, sensa strabucarse, metendo in evidensa parole e frase par giutar le persone a capir ben, cambiar el volume, emossion e el ritmo dela voce, doperar ben le pause e leder de maniera natural. Arquante parte dela letura le ze pi curte e altre le ze pi longhe. Alora, el superintendente dela Riunion Vivemo e Insegnemo el ga de pensar nele abilità dei studianti quando che lu el ndarà scòlier chi che farà queste parte.

IMPAREMO A INSEGNAR COME GESÙ

6. Quìndese minuti. Questa session dela riunion la serve par dar la oportunità a tuti de ricever trenamento par predicar, insegnar e parlar cada volta meio cole persone. Se ghen’è bisogno, i ansiani i pol far parte de studiante. Cada studiante el ga de studiar e meter in pràtica la lession dela revista Sfòrsate e dela revista Ama le persone che ghen’è scrito nela designassion dela Programassion par la Riunion Vivemo e Insegnemo. Dele volte, ghen sarà una parte che dise “discorso con arquante domande”. Un ansiano o un servo ministerial qualificà el ga de far questa parte. — Vedi el paragràfo 15 par saver come far le parte cola istrussion “discorso con arquante domande”.

7. Come scominsiar a parlar cola persona: Un studiante o una studiante el pol far questa parte. Se l’è un studiante che el ndarà farla, quel che lo giuta el ga de esser nantro studiante o una persona dela so fameia. Ma se l’è una studiante che la ndarà far questa parte, quela che la giuta la ga de esser nantra studiante o una persona dela so fameia. El studiante e quel che lo giuta i pol far la parte in pié o sentadi. — Par saver de pi sora cossa parlar e in qual situassion se pol far la parte, vedi i paràgrafi 12 e 13.

8. Come seitar a parlar cola persona: Un studiante o una studiante el pol far questa parte. Se l’è un studiante che el ndarà farla, quel che lo giuta el ga de esser nantro studiante. Ma se l’è una studiante che la ndarà far questa parte, quela che la giuta la ga de esser nantra studiante. (Ministério do Reino 05/97 pàg. 3) El studiante e quel che lo giuta i pol far la parte in pié o sentadi. El studiante el ga de mostrar come seitar a parlar cola persona che ga mostrà interesse la prima volta che el ga parlà con ela. — Par saver de pi sora cossa parlar e in qual situassion se pol far la parte, vedi i paràgrafi 12 e 13.

9. Come giutar la persona a far compagno Gesù: Un studiante o una studiante el pol far questa parte. Se l’è un studiante che el ndarà farla, quel che lo giuta el ga de esser nantro studiante. Ma se l’è una studiante che la ndarà far questa parte, quela che la giuta la ga de esser nantra studiante. (Ministério do Reino 05/97 pàg. 3) El studiante e quel che lo giuta i pol far la parte in pié o sentadi. Questa parte la ga de dimostrar un toco de un stùdio che el ga belche scominsià. No bisogna far una introdussion gnanca una conclusion, sol se la lession che lu el ga de meter in pràtica la ze sora questo. No ocore leder tuta la matèria cola voce alta, ma lu el pol dessider se lo farà o nò.

10. Come spiegar quel che te credi: Se l’è un discorso, un studiante el ga de farlo. Ma se l’è una dimostrassion, un studiante o una studiante el pol farla. Se l’è un studiante che el ndarà farla, quel che lo giuta el ga de esser nantro studiante o una persona dela so fameia. Ma se l’è una studiante che la ndarà far questa parte, quela che la giuta la ga de esser nantra studiante o una persona dela so fameia. El studiante el ga de doperar la matèria par spiegar ben quel che el crede e con rispeto. Lu el pol dessider se el ndarà dir o nò ndove che el ga catà la informassion che el ga doperà nela parte.

11. Discorso: Un omo el ga de far questa parte. Lu el ga de far un discorso par la congregassion. Quando el discorso l’è sora la parte Par imparar de pi (A) dela revista Ama le persone, el studiante el ga de spiegar come che i testi i pol esser doperadi nela predicassion. Par esémpio, lu el pol spiegar quando un testo el pol esser doperà, cossa vol dir e come giutar la persona a capirlo. Quando el discorso l’è sora una dele lession dela revista Ama le persone, el studiante el ga de spiegar come meter in pràtica quela lession nela predicassion. Se lo giuta a spiegar meio, lu el pol doperar el esémpio che ghen’è nel punto 1 dela lession o un dei testi dela parte “Vedi anca”.

12. Cossa parlar: Questo paràgrafo e el pròssimo i spiega sora le parte “Come scominsiar a parlar cola persona” e “Come seitar a parlar cola persona”. Se no ghen’è mia nantra istrussion, el ogetivo del studiante el ga de esser parlar de una verità sémplisse dela Bìblia che ghe interessa ala persona e assar un assunto par seitar a parlar con ela. El studiante el ga de parlar quel che giuta le persone del teritòrio e che sìpia nel tempo giusto. Lu el pol dessider se el ndarà assar una publicassion o mostrar un vìdeo dele Prinsipai publicassion e vìdei par insegnar. Invesse de voler gaver in mente le presentassion, i studianti i ga de sforsarse a parlar cada volta meio cole persone, de maniera natural e dimostrarghe interesse.

13. Situassion: El studiante el ga de doperar la situassion che l’è nela Programassion e cambiarla de acordo col so teritòrio. Par esémpio:

1. (1) De casa in casa: La situassion pol esser predicar de casa in casa, par telèfono o par carta. Pol esser anca seitar a parlar cola persona de queste maniere.

2. (2) Predicassion informal: La situassion la mostra come doperar una ciàcola par predicar. Pol esser parlar qualcossa sora la Bìblia con un colega de laoro, de scola, visini, nela lìnea o quando te sì drio far altre robe.

3. (3) Predicassion ndove ghen’è persone: La situassion la mostra come predicar col careto, nel comèrsio, nele vie, nele piasse, nei stassionamenti o ndove ghen’è persone.

14. Vìdei e publicassion: Un studiante el pol dessider se el va doperar un vìdeo o una publicassion. Se nela parte de studiante dise par doperar un vìdeo o se lu el vol doperarlo, el pol parlar sora el vìdeo ma no’l ga de mostrarlo, sol far finta.

VIVEMO COME GESÙ

15. Dopo del càntico, i primi 15 minuti i ze doperadi par far una o due parte par giutar quei che i ze nela riunion a meter in pràtica quel che la Parola de Dio la insegna. Se no ghen’è mia nantra istrussion, un ansiano o un servo ministerial qualificà el ga de far queste parte. Ma la parte Orientassion par la congregassion la ga de esser fata par un ansiano. Quando ghen’è una parte che dise “discorso con arquante domande”, quel che el fà el discorso el ga de far le domande che ghen’è nela Programassion e el pol anca far altre domande quando ghe par meio. La so introdussion no la ga de esser massa longa. Cossita, el sarà bon de spiegar i punti prinsipai e quei che i ze nela riunion i podarà partissipar. Se ghen’è una intervista, l’è meio che la persona la va al palco, se la pol, e nò che la reste sentada do nel so posto.

16. Stùdio bìblico cola congregassion: Trenta minuti. Un ansiano qualificà el ga de far questa parte. (Nele congregassion che ghen’è pochi ansiani se pol doperar servi ministeriai qualificadi, se ghe ocore.) El corpo de ansiani el desside chi che l’è qualificà par far el stùdio bìblico cola congregassion. Quei che i farà questa parte i ga de presentar la matèria de maniera ciara, doperar ben el tempo, meter in evidensa i testi prinsipai e giutar a tuti a veder che l’è importante meter in pràtica quele informassion nela so vita. I podarà catar nele nostre publicassion de pi orientassion de come far parte con domande e risposte. (Sentinela 04/23 pàg. 24, quadro) Quando quel che l’è drio far el stùdio el ga finio de considerar tuta la matèria, no ocore tirarla longa. Se l’è possìbile, cada stimana se ga de doperar difarenti fradei par far el stùdio bìblico cola congregassion e par far la letura. Se el presidente dela Riunion Vivemo e Insegnemo el domanda par far el stùdio pi curto, quel che l’è drio far el stùdio el ndarà dessider come farlo. Par esémpio, lu el pol scòlier de no leder arquanti paràgrafi.

CONCLUSION DELA RIUNION

17. Tre minuti. El presidente dela Riunion Vivemo e Insegnemo ndarà parlar sora quel che ghemo imparà nela riunion che pol giutar i fradei e anca el ndarà parlar sora quel che ndaremo imparar nela pròssima riunion. Se ghen’è tempo, lu el pol parlar chi che farà le parte nela pròssima stimana. Se ghen’è qualche anùnsio o carta par leder e no ghen’è mia nantra istrussion, el presidente el pol doperar i ùltimi tre minuti de questa parte. Altre informassion, come la programassion par ndar predicar e par netar el Salon, le ga de esser nel quadro de anunsi; el presidente no’l ga de anunsiarle del palco. Se i ùltimi tre minuti i ze poco tempo par far tuti i anunsi e leder le carte, el presidente el ga de domandar ai fradei che i farà le parte nela Riunion Vivemo come Gesù par scurtar le so parte. (Vedi i paràgrafi 16 e 19.) La riunion la se finisse con càntico e orassion.

LODI E CONSILI

18. Dopo de cada parte de studiante, el presidente dela Riunion Vivemo e Insegnemo el ga intorno de 1 minuto par lodar el studiante e darghe consili doperando la lession dela parte. El presidente no’l ga de anunsiar vanti dela parte del studiante qual lession che lu el ga de meter in pràtica. Ma, dopo che el studiante el finisse la so parte e el presidente lo loda, el presidente el pol dir quala che la era la lession che lu el gavea de meter in pràtica e parché che el studiante el ga fato ben quela lession lì. Senò, lu el pol spiegar par el studiante de una maniera bondosa parché che lu el ga de sforsarse nantra volta par meter in pràtica quela lession e come che el pol farlo. El presidente el pol anca parlar de altri detali dela parte se lu el vede che sarà bon par el studiante o quei che i ze nela riunion. Se el presidente el vol, dopo dela riunion o nantra ora, el pol dar altri consili al studiante doperando la revista Ama le persone, la revista Sfòrsate o el libro Beneficie-se. Ma no’l ga de farlo davanti ai altri. Lu el pol dar consili sora la lession che el studiante el gavaria bio de meter in pràtica o sora nantra lession. — Par saver de pi informassion sora quel che i ga de far el presidente dela Riunion Vivemo e Insegnemo e quel che dà consili ai servi e ansiani, vedi i paràgrafi 19, 24, e 25.

CONTROLE DEL TEMPO

19. Gnanca una parte la ga de passar del tempo gnanca quel che el presidente dela riunion el parla intrà una parte e quel’altra. La Programassion dela Riunion Vivemo e Insegnemo la dise quanto tempo ga de durar cada parte. Ma se la matèria la ze stata ben spiegada, no ocore tirarla longa sol par doperar tuto el tempo. Se un fradel el passa del tempo, el presidente dela riunion o quel che dà consili ai servi e ansiani el ga darghe un consìlio, ma nò davanti ai altri. (Vedi i paragrafi 24 e 25.) La riunion intiera, coi càntichi e le orassion, la ga de durar 1 ora e 45 minuti.

VÌSITA DEL SUPERINTENDENTE DE SIRCUITO

20. Quando la congregassion la ga la vìsita del superintendente de sircuito, la riunion la sarà de acordo cola Programassion par la Riunion Vivemo e Insegnemo, ma con arquante robe difarente. Invesse de far el Stùdio bìblico cola congregassion, el superintendente de sircuito el farà un discorso de servìssio de 30 minuti. Vanti de questo discorso de servìssio, el presidente dela Riunion Vivemo e Insegnemo el parla quel che ghemo imparà nela riunion e quel che ndaremo imparar nela pròssima stimana, el fà i anunsi e el lede le carte che ocore leder. Dopo, lu el convida el superintendente de sircuito par vegner al palco. Dopo del discorso de servìssio, el superintendente de sircuito el finisse la riunion con un càntico che lu el ga scoliesto vanti. Lu el pol convidar nantro fradel par finir con una orassion. Durante la vìsita del superintendente de sircuito, no ghen sarà parte de studiante nela léngua dela congregassion in altre sale. I grupi i pol far le so riunion anca se ghen’è la vìsita del superintendente de sircuito nela congregassion che la tende de quel grupo. Ma el grupo el scoltarà insieme cola congregassion el discorso de servìssio del superintendente de sircuito.

STIMANA DELA ASSEMBLEA O DEL CONGRESSO

21. No ghen’è mia riunion nela stimana dela assemblea o del congresso. Tuti nela congregassion i ga de esser ricordadi che cada un el ga de studiar la matèria de quela stimana lu sol o cola so fameia.

STIMANA DELA SELEBRASSION

22. Se la Selebrassion la ze nte un giorno nel meso dela stimana, no ghen sarà la Riunion Vivemo e Insegnemo.

SUPERINTENDENTE DELA RIUNION VIVEMO E INSEGNEMO

23. El corpo de ansiani el ga de scòlier un ansiano par esser el superintendente dela Riunion Vivemo e Insegnemo. La so responsabilità la ze che la riunion la sìpia ben organisada e che tuti i fae de acordo con queste istrussion. El superintendente sempre el ga de comunicarse ben con quel che dà consili ai servi e ansiani. Quando la Programassion par la Riunion Vivemo e Insegnemo la ze disponìbile, el superintendente dela Riunion Vivemo e Insegnemo el ga de far le designassion de tute le parte dele riunion par quei due mesi. Questo vol dir le parte de studiante, de quei che no i ze mia studianti e de presidente dela riunion del meso dela stimana (intrà i fradei che el corpo de ansiani el ga aprovà). (Vedi i paràgrafi 3-16 e 24.) Quando el ndarà far le designassion de studiante, ghe toca pensar nela età del studiante, nela so speriensa e se el se sente lìbero par parlar sora el assunto dela parte. El superientendente el farà la medèsima roba cole altre parte. I studianti i ga de ricever le so parte al manco tre stimane vanti dela parte, par meso del formulàrio Designassion par la Riunion Vivemo e Insegnemo come Gesù (S-89). El superintendente dela Riunion Vivemo e Insegnemo el ga de esser sicuro che ghen sìpia una còpia dele designassion dela riunion nel quadro de anunsi. El corpo de ansiani el pol scòlier nantro ansiano o un servo ministerial par giutar el superintendente. Ma sol ansiani i ga de far designassion par le parte che no le zia mia de studiante.

PRESIDENTE DELA RIUNION VIVEMO E INSEGNEMO

24. Cada stimana, un ansiano el sarà el presidente dela Riunion Vivemo e Insegnemo. (Congregassion che ghen’è pochi ansiani le pol doperar servi ministeriai qualificadi, se ocore.) El presidente el ga de pareciar quel che el ndarà parlar nel scomìnsio dela riunion, nela parte Cossa che ndaremo imparar ancoi? e quel che el ndarà parlar nel fin, nela Conclusion dela riunion. El presidente anca el anunsia tute le parte e, se ghen’è pochi ansiani, lu el pol far altre parte nela riunion, come quele che bisogna sol mostrar un vìdeo sensa far un discorso. I comentari intrà una parte e altra i ga de esser curti. El corpo de ansiani el desside chi che l’è qualificà par esser el presidente dela riunion. Cada stimana, quei che i ze qualificadi i pol esser scoliesti par esser presidente dela riunion. De acordo cole nessessità dela congregassion, el superintendente dela Riunion Vivemo e Insegnemo el pol esser el presidente dela riunion de pi volte che i altri ansiani qualificadi. Se un ansiano l’è qualificà par far el Stùdio bìblico cola congregassion, alora lu l’è qualificà par esser anca el presidente dela riunion. Ma ricordeve che el fradel che el sarà el presidente dela riunion el ga de lodar e dar consili con amor a quei che i fà le parte de studiante. Lu el ga anca la responsabilità de tender che la riunion la se finisse nela ora giusta. (Vedi i paràgrafi 17 e 19.) Se el presidente el vol e se ghen’è posto nel palco, lu el pol doperar un micròfono de pedestal par anunsiar le parte. Cossita, intanto che lu el fà questo, el fradel che el farà la pròssima parte el pol vegner al palco e pareciarse par scominsiar la parte. El presidente el pol restar sentà nel palco intanto che el fradel el fà la Letura dela Bìblia e durante la session Imparemo a Insegnar come Gesù. Far questo giutarà a sparagnar tempo.

QUEL CHE DÀ CONSILI AI SERVI E ANSIANI

25. Sempre che l’è possìbile, se ga de scòlier un ansiano che el ga speriensa in far boni discorsi par dar consili ai servi e ansiani. Quando ocore, quel che dà consili ai servi e ansiani el ga de dar i consili, no davanti ai altri, ma sol par el servo o el ansiano sora qualche parte che el ga fato; pol esser dele parte dela Riunion Vivemo e Insegnemo, discorsi pùblichi, e par quei che i fà e lede el stùdio dela Sentinela e el stùdio bìblico cola congregassion. (Vedi el paràgrafo 19.) Se ghen’è tanti ansiani nela congregassion che i fà ben i discorsi e i insegna ben, alora, cada ano se pol scòlier un ansiano difarente par dar i consili ai servi e ansiani. No ocore dar consili a un fradel tute le volte che lu el fà un discorso o parte.

ALTRE SALE

26. De acordo col nùmero de studianti, la congregassion la pol gaver altre sale par le parte de studiante. Ghen sarà un fradel qualificà, se possìbile un ansiano, par dar i consili in cada una de queste altre sale. Un servo ministerial qualificà el pol far questo laoro quando ghen’è bisogno. El corpo de ansiani el desside chi che pol esser scoliesto par far questo. Anca, lori i ndarà dessider se sarà sempre el medèsimo fradel o se el cambiarà tute le stimane. Questo fradel el ga de far de acordo cole istrussion del paràgrafo 18. I studianti i ga de esser convidadi par ndar ale altre sale dopo dela parte Va in serca de lession pressiose dela Bìblia, dela session Lession pressiose dela Bìblia. Pena dopo che la session Imparemo a Insegnar come Gesù la se finisse, i studianti i ga de tornar ai so posti.

VÌDEI

27. Arquanti vìdei spessìfichi i ze doperadi par far la Riunion Vivemo e Insegnemo. Se pol catar questi vìdei nel aplicativo JW Library^®, che se pol doperar in diversi apareli.

© 2023 Watch Tower Bible and Tract Society of Pennsylvania

S-38-TAL 11/23