Predicassion spessial par scominsiar studi bìblichi in setembre

Nel mese de setembre, ndaremo sforsarse de domandar ale persone se le vol studiar la Bìblia doperando la revista Te pol viver felice par sempre!. In questo mese, i predicadori i podarà scòlier far 30 o 50 ore come pionieri ausiliar. Come che sarà fata questa predicassion spessial?

• Nela prima vìsita: Cola parte de drio dela revista, giuta la persona a gaver voia de imparar de pi e mostraghe come l’è un stùdio bìblico. Ricòrdate de quei che te sì drio visitar e anca de quei che i ga belche mostrà interesse. Anca se lori no i ga volesto un stùdio dela Bìblia vanti, pol esser che adesso i acete con questa nova revista e la nova maniera de studiar la Bìblia. No ghemo de assar la revista se no ghen’è nissuni casa. Gnanca meterla insieme a una carta par una persona che no la vol studiar la Bìblia. In questo mese, la comission de servìssio dela congregassion la podarà organisar de pi riunion par la predicassion.

• In altre oportunità: Podé assar la revista Viver felice par sempre! nel careto dela congregassion. Se qualchedun el ghe piase dela revista, parlaghe che lu el pol anca far un stùdio dela Bìblia sensa pagar gnente. Te pol mostrarghe in pochi minuti come l’è un stùdio bìblico, senò podé combinar de parlarse nantra ora. El superintendente de servìssio el pol scòlier arquanti predicadori par far questa predicassion spessial nei comersi del teritòrio. Se te parli con qualchedun quando no te sì nela predicassion o con un colega de laoro, te pol domandarghe se el vol studiar la Bìblia.

Gesù el ne ga mandà ‘far dissìpoli e insegnarghe’. (Mat. 28:19, 20) Spetemo che questa predicassion spessial ne giute obedir le parole de Gesù doperando la revista Viver felice par sempre!.