El amor e la gratitùdine i mena al batésimo

1-2. De acordo con Ati 8:27-31, 35-38, parché che el etìope el ga volesto esser batesà?

GHETO belche pensà de batesarte e deventar un seghidor de Cristo? Arquanti i ga belche dessidio far questo par causa del amor e dela gratitùdine che i sente par Geovà. Varda el esémpio de un omo che el laorea par la regina dela Etiòpia.

² Quando el etìope el ga imparà sora le Scriture, el ga fato una dessision suito. (Ledi Ati 8:27-31, 35-38.) Parché che lu el ga volesto batesarse? Quel etìope el ga fato el viaio par adorar a Dio in Gerusalen parché belche el amea a Geovà. Quando Filipe lo ga catà, el etìope l’era drio leder una parte del libro de Isaia. Questo mostra che lu el dea tanta atension ala Parola de Dio. Alora, se capisse che el etìope el gavea dessidio cambiar de religion par adorar el vero Dio insieme de quela nassion dedicada a Lu. El etìope el ga volesto far questi cambiamenti parché lu el amea a Geovà. Dopo che el ga discoresto con Filipe, el se ga sentio pròpio grato par quel che Gesù el gavea fato par lu. Par causa del so amor a Geovà, el etìope l’è stà motivà a far la importante dessision de batesarse e deventar dissìpolo de Cristo. — Mat. 28:19.

3. Cossa che podaria impedir qualchedun de batesarse? (Vedi el quadro “Che tipo de tera l’è el to cuor?”)

³ El to amor par Geovà el te farà voler batesarte. Ma pol esser che el amor par altre robe o altre persone el te impedissa, o te fae tirarte indrio, de far questa dessision. Par capir meio, pensa in arquanti esempi. Fursi te ghè paura che, se te te batesi, i to parenti e i to amighi che no i ze Testimònie de Geovà e che te ami tanto i ndarà contra ti. (Mat. 10:37) Pol esser che te piase de far qualcossa e, ancora che te sè che Geovà no’l ghe piase de queste robe, no te sì mia bon fermarte de farle. (Sal. 97:10) O magari te resti tanto contento quando te ricordi dei feriadi che te selebrei nel passà che adesso te cati fadiga no farlo, ancora che te gàpia imparà che i ze dela religion falsa e che Dio no’l ghe piase. (1 Cor. 10:20, 21) Alora, domandate: ‘Cossa e chi che amo de pi?’

EL AMOR PI IMPORTANTE

4. Cossa ga de motivarte a voler batesarse?

⁴ Ghen’è tante robe bone che amemo e semo grati. Par esémpio, fursi ancora vanti de studiar cole Testimònie de Geovà te gavei rispeto par la Bìblia e te ghè imparà a amar Gesù. E adesso che te cognossi le Testimònie de Geovà, te piase tanto restar insieme a lore. L’è bon che te ami tute queste robe, ma no l’è mia questo tipo de amor che el te farà dessider dedicarse a Geovà e batesarse. L’è el amor par Geovà che el ndarà motivarte a far questo. Se el to amor par Geovà l’è pi importante che qualche altra roba nela to vita, gnente pol fermarte de dedicarte a Lu. Anca dopo del batésimo questo amor el va giutarte a seitar nela strada dela verità.

5. Cossa che ndaremo imparar adesso?

⁵ Gesù el ga dito che noantri ghemo de amar a Geovà con tuto el nostro cuor, ànima, mente e forsa. (Mar. 12:30) Come che podemo imparar a amar e rispetar Geovà de questa maniera? Pensaghe sora come Geovà sempre el mostra amor par ti. Alora, anca ti te volarè mostrar che te lo ami. (1 Gioani 4:19) Quando te ami a Geovà, te vè scominsiar a sentir e a far anca altre robe. Ndemo veder quale zele.b

6. De acordo con Romani 1:20, come che te pol imparar de pi sora Geovà?

⁶ Impara sora Geovà par meso dela so creassion. (Ledi Romani 1:20; Apo. 4:11) Pensaghe sora come Geovà l’è stà sàbio quando el ga creà tute le piante e le bèstie. Impara come el nostro corpo l’è stà fato de maniera maraveiosa. (Sal. 139:14) Pensa quanto poder ghen’è nel Sol, che l’è sol una intrà bilioni de stele.c (Isa. 40:26) Sicuro che el to rispeto par Geovà el sarà ancora pi grando quando te pensi in tuto quel che lu el ga creà. Ma par gaver una forte amicìssia con Geovà, no ghemo sol de saver che lu l’è sàbio e poderoso, ghemo de far anca altre robe. Una de queste robe la ze imparar de pi sora Lu.

7. Par amar a Geovà ancora de pi, te toca esser sicuro de che?

⁷ Geovà no’l se importa sol cole persone come un grupo, ma el se importa anca con ti. Càtito fadiga creder che el Creador del cielo e dela Tera l’è atento a ti e che te sì importante par lu? Se te pensi cossita, ricòrdate che ‘Dio no l’è distante de cada un de noantri’. (Ati 17:26-28) Geovà ‘el esamina el cuor de tuti’ e lu anca el ga prometesto che “se te vè in serca de lu, te sarè bon de catarlo”. (1 Cró. 28:9) Te sì drio imparar dela Bìblia parché Geovà el ga volesto. (Ger. 31:3) Quanto de pi te capissi tuto quel che Geovà el fà par ti, pi forte sarà el to amor par lu.

8. Come che te pol mostrar che te sì grato par el amor de Geovà?

⁸ Quando te parli con Geovà in orassion, te mostri che te sì grato par el amor che lu el ga par ti. Te pol parlar con lu sora i to problemi e anca ringrassiarlo par quel che lu el fà par ti. E dopo, l’è importante star atento a come Dio el risponde ale to orassion. (Sal. 116:1) Quando te fè questo, la to amicìssia con Geovà la resta pi forte e anca el to amor par lu el sarà pi forte. Cossita, te sarè sicuro che lu el capisse i to sentimenti. Ma par esser ancora pi amigo de Geovà, te ghè de capir come lu el pensa e cossa che lu el vol che te fae. Come che te pol far questo? Par meso del stùdio dela so Parola, la Bìblia.

9. Come che te pol mostrar che te ghe dè valor ala Bìblia?

⁹ Impara a darghe valor ala Parola de Dio, la Bìblia. Sol la Bìblia la insegna la verità sora Geovà e cossa che lu el vol par el to futuro. Par quela, ledi la Bìblia tuti di. Paréciate ben vanti de studiar la Bìblia col to istrutor e meti in pràtica tuto quel che te impari. Cossita, te ndarè mostrar che la Parola de Dio la ze tanto importante par ti. (Sal. 119:97, 99; Gioani 17:17) Te ghè una programassion par leder la Bìblia? Te sì bon de far de acordo con questa programassion tuti di?

10. Cossa che sol la Bìblia la conta?

¹⁰ La Bìblia la ze el ùnico libro che spiega de maniera giusta quel che Gesù el ga fato par ti. Tante persone le ga contà sora quel che ga sucedesto quando Gesù l’era qua ntela Tera, e quel che le ga contà ghen’è sol nela Bìblia. Quando te impari sora quel che Gesù el ga dito e el ga fato, te sarè motivà a esser so amigo.

11. Cossa che te giutarà a far pi forte el to amor par Geovà?

¹¹ Impara a amar Gesù, e el to amor par Geovà el restarà pi forte. Parché che questo va suceder? Parché Gesù el ga mostrà de maniera perfeta le qualità de so Pare. (Gioani 14:9) Par quela, quanto de pi te impari sora Gesù, de pi te ndarè capir come Geovà l’è, e ancora pi importante lu el sarà par ti. Pensaghe sora come Gesù el ga mostrà compassion par quele persone che i altri ghe fea de poco, o sia, i poareti, i maladi e quei che no i podea difenderse. Pensa anca nei consili che Gesù el dà e come la to vita la resta meio quando te meti in pràtica quel che lu el dise. — Mat. 5:1-11; 7:24-27.

12. Quando te impari de pi sora Gesù, cossa che te gavarè voia de far?

¹² Gesù l’è morto par cada un de noantri, cossita podemo gaver el perdon dei nostri pecati. Alora, pensaghe sora questo sacrifìssio che Gesù el ga fato de volentiera. (Mat. 20:28) Quando pensemo sora questo, el nostro amor par Gesù restarà ancora pi forte. Cossita, te volarè anca ciamarte gramo dei to sbali e domandar el perdon de Geovà. (Ati 3:19, 20; 1 Gioani 1:9) Quanto de pi te ami Gesù e Geovà, pi caro te gavarè de restar insieme de quei che li ama.

13. Cossa che Geovà el te dà?

¹³ Impara a amar la fameia de Geovà. Fursi to parenti e to amighi de una volta, no i ze boni de capir parché che te vol servir a Geovà. Pol esser che lori fin i reste contra ti. Ma Geovà no’l te assarà mia ti sol. Lu el te dà una fameia de fradei in tuto el mondo. Se te tien sempre darente i fradei e sorele dela congregassion, lori i ndarà amarte e giutarte. (Mar. 10:29, 30; Ebr. 10:24, 25) Dopo de un tempo, fursi anca i to parenti i volarà servir a Geovà insieme de ti e viver de acordo cola Bìblia. — 1 Pie. 2:12.

14. De acordo con 1 Gioani 5:3, cossa che te ghè imparà sora i prinsipi de Geovà?

¹⁴ Impara a rispetar e a obedir i prinsipi de Geovà. Vanti de cognosser a Geovà, fursi te gavei le to idee sora quel che l’è giusto e sbalià. Ma adesso te sè che i prinsipi de Geovà i ze i meio che ghen’è. (Sal. 1:1-3; ledi 1 Gioani 5:3.) Pensa nei consili che la Bìblia la dà par i òmini, le done, el pare, la mare e par i fioi. (Efe. 5:22–6:4) Càtito che la to fameia la ze pi felice adesso che te meti in pràtica questi consili? Quando te meti in pràtica i consili de Geovà sora gaver boni amighi, càtito che te giuta a deventar una persona meio? Sito pi felice adesso? (Pro. 13:20; 1 Cor. 15:33) Obedir i prinsipi de Geovà l’è sempre la meio roba de far!

15. Che aiuto Geovà el te dà par giutarte a saver come meter in pràtica i consili dela Bìblia?

¹⁵ Fursi, dele volte, no te sè ben come meter in pràtica i consili che te sì drio imparar dela Bìblia. L’è par quela che Geovà, par meso dela so organisassion, el ne dà publicassion che ne giuta capir quel che l’è giusto e quel che l’è sbalià de acordo cola Bìblia. (Ebr. 5:13, 14) In queste publicassion, ghen’è consili che i ze fàcili de capir e che i ndarà giutarte in diverse situassion dela to vita. Alora, ledi e stùdia queste publicassion. Cossita, te volarè far parte dela organisassion de Geovà.

16. Come che Geovà el organisa el so pòpolo?

¹⁶ Impara a amar e a obedir la organisassion de Geovà. Geovà el organisa el so pòpolo in congregassion e el ga dato al so fiol Gesù autorità sora lore. (Efe. 1:22; 5:23) Gesù el ga scoliesto un pìcolo grupo de òmini untadi par far un laoro pròpio importante nele congregassion. Gesù el ciama questo grupo de “schiavo fedele e prudente”. Questi òmini untadi i organisa el laoro che l’è fato nele congregassion. Lori i tende ben dela so responsabilità de dar la istrussion e el aiuto che te ghè de bisogno par cognosser a Geovà e esser so amigo. (Mat. 24:45-47) Par esémpio, lori i tende che ghen sìpia ansiani con abilità nela to congregassion par tenderte e protegerte. (Isa. 32:1, 2; Ebr. 13:17; 1 Pie. 5:2, 3) I ansiani i ze pronti par giutarte a gaver una amicìssia forte con Geovà e consolarte. Lori i te giuta insegnar altri sora Geovà, e questa la ze la roba pi importante che lori i pol far par ti. — Efe. 4:11-13.

17. De acordo con Romani 10:10, 13, 14, parché che parlemo ai altri sora Geovà?

¹⁷ Giuta altri a imparar come amar a Geovà. Gesù el ga comandà i so seghidori a insegnar ai altri sora Geovà. (Mat. 28:19, 20) Ma, no te ghè de far questo sol par obedir una òrdine. Invesse, quando el to amor par Geovà el resta ancora pi forte, te vè sentirte compagno i apòstoli Piero e Gioani. Lori i ga dito: “Noantri no podemo mia fermarse de parlar dele cose che ghemo visto e che ghemo scoltà.” (Ati 4:20) Giutar altri amar a Geovà pol darne tanta alegria. Par esémpio, pensa quanto contento Filipe l’è restà quando el ga insegnà la verità dele Scriture al etìope e lo ga giutà a voler batesarse. Quando te fè come Filipe e te parli ai altri sora Geovà, te mostri che te vol esser una Testimònia de Geovà. (Ledi Romani 10:10, 13, 14.) Quando te dessidi de far questo, fursi anca ti te ndarè domandarte: “Cossa me impedisse de esser batesà?” — Ati 8:36.

18. Cossa che ndaremo imparar nel pròssimo stùdio?

¹⁸ La dessision pi importante che te podarissi far nela to vita l’è batesarse. Par quela, te toca pensar ben sora tuto quel che te gavarè de far. Cossa che te ocore saver sora el batésimo? Cossa che te ghè de far vanti e dopo de esser batesà? Nel pròssimo stùdio, te ndarè catar le risposte a queste domande.