Sarà che Dio el scolta pròpio le nostre orassion?

DIO EL SCOLTA LE TO ORASSION.

“Ò Ti che te scolti le orassion, a ti le rivarà persone de tuti i tipi.” — Salmo 65:2.

Arquante persone le prega anca se le pensa che no ghen’è nissuni drio scoltarle. Le fà cossita parché le pensa che parlar sora i so sentimenti nte una orassion va giutarle a sentirse ben. Ma la orassion no la ze sol una roba che se fà par sentirse meio. La Bìblia la mostra de maniera ciara che “Geovàa l’è darente de tuti quei che i lo ciama, de tuti quei che i lo ciama con sinsierità. Lu el scolta la so sùplica par aiuto”. — Salmo 145:18, 19.

Par quela, podemo esser sicuri che Geovà el scolta le orassion de quei che i lo adora. Con amor, lu el dise: “E valtri ndaré ciamarme e ndaré pregar a mi, e mi vao scoltarve.” — Geremia 29:12.

DIO EL VOL CHE TE PREGHI A LU.

“No sté mia fermarve de pregar.” — Romani 12:12.

Nela Bìblia, Dio el ne convida a “seitar far orassion” e a “pregar in tute le situassion.” Alora, vedemo che Geovà Dio el vol pròpio che preghemo a lu. — Mateo 26:41; Efesi 6:18.

Parché che Dio el vol che preghemo a lu? Pensaghe sora: un pare el resta contento quando so fiol ghe domanda aiuto. L’è vera che tante volte el pare belche el sa cossa che el fiol el ga de bisogno. Ma, quando el pare el scolta so fiol drio domandarghe aiuto, lu el sente che el fiol el se fida in lu. Dela stessa maniera, quando preghemo a Geovà Dio, mostremo che se fidemo in lu e che volemo esser so amighi. — Proverbi 15:8; Tiago 4:8.

DIO EL SE IMPORTA CON TI.

“Buté sora lu tute le vostre preocupassion, parché lu el tende de valtri.” — 1 Piero 5:7.

Dio el vol che preghemo a lu parché lu el ne ama e el tende de noantri. Lu el capisse i problemi che semo drio infrontar e le nostre preocupassion, e el vol giutarne.

In tuta la so vita, el rè Davi el ga pregà a Geovà Dio par domandarghe aiuto tante volte. Anca, el ga pregà par parlar sora i so sentimenti e le so preocupassion. (Salmo 23:1-6) Dio el amea Davi e el scoltea le so orassion. (Ati 13:22) Dela medèsima maniera, Dio el scolta le nostre orassion parché lu el se preocupa con noantri.

“MI AMO A GEOVÀ, PARCHÉ EL SCOLTA LA ME VOCE”

Queste parole le ze del scritor del Salmo 116. Lu l’era sicuro che Dio scoltea le so orassion, e saver de questo lo giutea tanto. Lu el sentia che Dio l’era darente de lu, cossita el gavea la forsa che ghe ocorea par darghene fora coi problemi e cole ansietà dela vita. — Salmo 116:1-9.

Quando semo sicuri che Dio el scolta le nostre orassion, no ndaremo mia desister de pregar a lu. Varda quel che Piero, che l’è de star nela Spagna, el ga infrontà. El so fiol de 19 ani l’è morto nte un assidente e lu l’è restà tanto triste. Nele so orassion, el ga parlà a Dio sora i so sentimenti, e tante volte el ghe ga domandà consolo e aiuto. Lu el ga contà quel che ga sucedesto dopo: “Geovà el ga rispondesto ale me orassion par meso del consolo e del aiuto che i nostri fradei nela fede i ga dato a mi e ala me sposa”.

L’è vera che le orassion de Piero no le ga mia fato so fiol tornar a viver, ma sicuro che le ga giutà tanto a lu e ala so fameia. La so sposa, María Carmen, la se ricorda: “Le orassion le me ga giutà a darghene fora col dolor. Mi savea che Geovà Dio el me capia, parché quando mi preghea a lu, sentia che lu el me dea pace e el me assea tranquila.”

Nela Bìblia e in quel che ga sucedesto con queste persone, vedemo che Dio el scolta pròpio le orassion. Ancora cossita, no le ze mia tute le orassion che Dio el risponde. Parché che ghen’è orassion che Dio el risponde e altre che no’l risponde mia?