Go una vita felice parché go sempre laorà par Geovà

Nel ano dopo, l’è stà dato un anùnsio in Betel che la filial dela Àfrica del Sud la gavea de bisogno de beteliti par laorar nte una màchina nova. Mi go dito che podaria ndar e son stà contento che i me ga scoliesto. Anca i ga scoliesto altri tre fradei del Betel del Canadà: Bill McLellan, Dennis Leech e Ken Nordin. Ghemo savesto che restarìano un bel tempo nela Àfrica del Sud.

Mi go telefonà ala me mama e ghe go dito: “Mama, go de dirte una roba. Son drio ndar ala Àfrica del Sud!” La me mama la gavea una forte amicìssia con Geovà e una fede forte, ma no la era de parlar tanto. E in quel giorno, anca che la gàpie parlà poco, mi savea che la era de acordo che mi ndesse. Ela e me pupà i ze restadi disgustadi parché mi ndaria de star distante, ma no i era contra che mi ndesse.

EL VIAIO ALA ÀFRICA DEL SUD!

Mi e altri tre fradei semo restadi nel Betel de Broklyn tre mesi par imparar a doperar una màchina de stampar tipogràfica. Dopo, semo ndati con un bastimento fin la Cità del Cabo nela Àfrica del Sud. Mi gavea pena fato 20 ani. L’era belche note quando ghemo ciapà un tren par ndar dela Cità del Cabo fin Johanesburgo. Quando l’era matina bonora, el tren el se ga fermà nela pìcola cità de Karoo, che l’era un posto che parea un deserto. Noantri quatro ghemo vardà fora par la finestra e se ghemo domandà: “Che posto elo questo?” Dopo de arquanti ani, semo ndati visitar quel posto. Alora, ghemo capio che l’era un posto tranquilo con pìcole e bele cità.

Par arquanti ani, go laorà nte una màchina de linotipo, che la doperea tante létere fate de piombo par stampar La Sentinela e Despertai!. Quel che se fea con quela màchina l’era tanto bel, ma no l’era fàcile doperarla. La filial la stampea le reviste in tante léngue dela Àfrica del Sud, ma anca dei paesi che i era del nort. Semo restadi tanto contenti de rivar de tanto distante e veder quela màchina esser ben doperada!

Dopo, mi go scominsià a laorar nel Scritòrio dela Gràfica che el tendea dei laori dela tradussion, de stampar e de mandar via de Betel le publicassion. Mi gavea tanto laoro de far, ma me sentia tanto felice.

EL MATRIMÒNIO E UNA NOVA DESIGNASSION

Nel ano de 1968, mi e Laura Bowen se ghemo maridà. Ela la era pioniera e la era de star darente de Betel. Laura la laorea anca nel Departamento de Tradussion de Betel, drio scriver le tradussion. In quela època, quando un betelita el se maridea el gavea de ndar via de Betel. Alora, semo stati designadi pionieri spessiai. Mi son restà preocupà col magnar e con ndove ndar de star. Mi gavea vivesto 10 ani in Betel, e mai me gavea preocupà con queste robe. Ma e adesso? Come ndarìssino pagar le conte sol coi soldi che riceverìssino come pionieri spessiai? Gaveino de ndar ale riunion e a altri posti, tender dela salute, magnar, pagar el afito e altre robe. I soldi che cada un ciapea par mese l’era pròpio poco e sol li ciaparìssìno se féssino le ore, le revisite e asséssino quante publicassion ghe volea.

Noantri semo stati designadi come pionieri par giutar un pìcolo grupo darente dela cità de Durban, nel mar Ìndico. Lì ghen’era tante persone dela Ìndia e tante le era de fameie che le gavea laorà tanto col sucro nela època de 1875. Ma anca che no i laorea pi col sucro lori i mantegnea la so cultura e el so magnar, che l’era tanto bon! Lori i parlea inglese, alora l’era pi fàcile par noantri predicar par lori.

In quela època, i pionieri spessiai i gavea de far 150 ore par mese. Alora, nel primo giorno, mi e la Laura voléino laorar sei ore nela predicassion. Ma l’era tanto caldo e gavea tanta umidità. No gavéino revisite e gnanca studi dela Bìblia. Alora, gavarìssino de far quele sei ore nela predicassion de casa in casa. Noantri ghemo scominsià a predicar e un tempo dopo, go vardà nel relòio e fea sol 40 minuti che gaveino scominsià. Mi me domandea: “Saremo boni de soportar questo?”

Dopo de un tempo, l’è deventà pi fàcile! Tuti i giorni, pareciéino la merenda e portéino anca cafè o una minestra nte una roba che li tegnea caldi. Quando gaveino de bisogno, ferméino el auto soto una pianta. Dele volte, i tosatei i vegnea intorno del auto parché i restea curiosi. In pochi giorni, ghemo capio che dopo dele prime due o tre ore, el tempo el passea tanto svelto.

Noantri restéino tanto contenti de insegnar la verità dela Bìblia a quele persone che le ne ricevea tanto ben. Le persone dela Ìndia le gavea rispeto, le ne tratea tanto ben e le amea a Dio. Tanti dela religion hindu i ga imparà la verità. I ghe piasea tanto imparar sora Geovà, Gesù, la Bìblia e sora la speransa del paradiso e dela ressuression. Dopo de un ano, gavéino belche 20 studi dela Bìblia. Tuti i giorni, magneino nela casa de un studiante difarente. Noantri èrino tanto felici!

Poco tempo dopo, ghemo ricevesto la designassion de esser viaianti. El nostro teritòrio l’era tanto bel. L’era nele praie del mar Ìndico. Tute le stimane restéino nela casa de una fameia difarente, visitéino i predicadori dela congregassion e laoréino con lori par incoraiarli. Ne parea esser parte dele so fameie e ne piasea tanto giugar coi so tosatei e anca cole so bèstie. Quei due ani i ga passà pròpio svelto. Ma, un fradel de Betel el ne ga telefonà e el ga dito: “Ne piaseria che te tornessi a Betel.” Mi go rispondesto: “Varda, . . . semo tanto contenti qua.” Ma sicuro che èrino pronti par servir ndove che ocorea.

SON TORNÀ A BETEL

El me laoro in Betel l’era nel Departamento de Servìssio. Lì, mi go bio la oportunità de laorar con bravi fradei e che i gavea tanta speriensa. In quel tempo, el superintendente de sircuito el visitea le congregassion e dopo el mandea un relatòrio par Betel. Alora, el Departamento de Servìssio el mandea una carta ale congregassion de acordo con quel che el Superintendente de Sircuito el gavea scrito. Queste carte le era mandade par incoraiar i fradei e darghe qualche orientassion. I fradei del nostro departamento i gavea tanto laoro parché i relatori dei superintendenti i vegnea nele léngue xosa, zulu e altre léngue dei africani e lori i gavea de tradusirle par el inglese. Dopo, lori i gavea de tradusir le carte de Betel del inglese par le léngue dei africani. Me ga piasesto tanto de laorar con quei bravi fradei! Lori i me ga giutà a capir meio le dificoltà che i fradei negri i infronta nela Àfrica.

In quela època, nela Àfrica del Sud gavea la polìtica del apartheid. Una persona sol podea restar insieme con quei che i era dela so rassa. Cada grupo gavea de viver nte un posto difarente. I nostri fradei negri i podea parlar, predicar e veder le riunion sol nela so pròpia léngua.

Fin quel tempo, mi no cognossea tanto la cultura dei negri dela Àfrica parché li mi go sempre giutà nele congregassion de léngua inglesa. Alora, nel Departamento de Servìssio, mi go bio la oportunità de imparar de pi sora i fradei negri africani, la so cultura e la so maniera de viver. Son stà anca bon de capir le dificoltà che questi fradei i infrontea par causa dele tradission e de quel che le religion del so posto le insegnea. Lori i era tanto coraiosi parché i se fermea de ndar drio ale tradission quando i imparea che le era sbaliade. Lori anca no i acetea far qualcossa che gavea spiritismo. E le so fameie e i so visini i restea tanto cativi con lori. Nantra roba che go visto, l’è stà che quei che i era de star nele colònie i era tanto poareti. Tanti i ze ndati poco ala scola e altri mai i ze ndati, ma i gavea tanto rispeto par la Bìblia.

Mi go bio la oportunità de giutar i fradei davanti dei tribunai in assunti de libertà de adorassion e neutralità. Arquanti tosatei che i era Testimònie de Geovà i ze stati mandadi via dela scola parché no i fea orassion come i altri e no i cantea le mùsiche del paese. Veder la lealtà de questi fradei ga fato pi forte la me fede.

I nostri fradei anca i ga infrontà tante dificoltà nte un pìcolo paese dela Àfrica, de nome Suazilàndia (ancoi Eswatini). Quando el rè Sobhuza II l’è morto, tuti i òmini i gavea de taiar tuti i cavei e le done le gavea de taiarli ben curti. Ma, i fradei no i lo ga fato parché questa la era una tradission par adorar i morti. Par quela, tanti i ze stati perseghidi. Noantri semo restadi maraveiadi de veder la so lealtà! I nostri fradei nela Àfrica i ga infrontà tante brute dificoltà, ma i ga bio passiensa e i ze stati fedeli. Questo ga fato pi forte la nostra fede.

SON TORNÀ A LAORAR NELA GRÀFICA

Nel ano de 1981, mi son tornà ala gràfica par giutar nte un progeto che doperarìssino el computador par far stampar le publicassion. Che bel tempo l’è stà quel! L’era drio cambiar tanto la maniera de stampar le publicassion. Una persona che la vendea màchine par stampar la ga dato a Betel una màchina fotocompositora par noantri proarla e no gavarìssino de pagar gnente. Betel la ga proà questa màchina e la ga cambià nove màchine pi vècie par sinque de queste pi nove. Anca, nantra màchina pi granda la ze stata metesta nela gràfica de Betel. Le robe le era drio cambiar pròpio svelto!

Quando noantri, beteliti del Canadà, semo rivadi ala Àfrica del Sud mai gavarìssino pensà che saria cossita. (Isa. 60:17) Quando ghemo scominsià a doperar computadori, ghemo scominsià doperar el MEPS che la ze una una maniera pi fàcile de far e stampar le publicassion in tante léngue. In quela època, èrino belche maridadi con brave sorele e pioniere. Bill e mi èrino drio laorar in Betel. Ken e Dennis i ga bio fioi e i ze ndati de star darente de Betel.

Gaveino cada volta de pi laoro in Betel. Noantri féino e stampéino le publicassion in de pi léngue e gaveino de mandarle ale altre filiai. Alora, gaveino de bisogno de un novo Betel. La nova filial la ze stata fata nte un bel posto nel oeste de Johanesburgo e la ze stata dedicada in 1987. L‘è stà pròpio bel par mi veder tute quele robe drio suceder e anca servir par tanti ani nela Comission de Filial dela Àfrica del Sud.

UNA NOVA DESIGNASSION!

Nel ano de 2001, go ricevesto un novo convite. Adesso, mi gavaria de laorar nela nova Comission de Filial dei Stati Unidi. Ne ga despiasesto assar el nostro laoro e i amighi nela Àfrica del Sud, ma anca semo restadi tanto contenti de scominsiar una nova designassion nela fameia del Betel dei Stati Unidi.

Noantri semo restadi preocupadi cola mama dela Laura, parché la gavea una bela età. Col nostro cambiamento par Nova York, no podarìano far tanto par giutarla. Ma le tre sorele dela Laura le gavea dito che le ndaria giutar la so mama in tuto che la gavesse de bisogno. Lore le ga dito: “Noantre no semo bone de far quel che valtri fé, ma se tendemo dela mama, valtri podé seitar a laorar in Betel.” Noantri semo tanto grati par questo!

El me fradel e la so dona che i era de star in Toronto, Canadà, i ga tendesto dela me mama che la era védova. In quel tempo, fea belche 20 ani che la era de star con lori. Poco dopo che ghemo cambià par Nova York, la me mama la ze morta. Noantri semo tanto grati che i ga tendesto con tanto amor dela me mama. No l’è mia fàcile tender dei genitori quando i resta pi veci, ma i nostri parenti i ga fato el meio che i podea par tender dela me mama. Lori i ze una benedission de Geovà!

Par arquanti ani, el me laoro nel Betel dei Stati Unidi l’è stà nel departamento che stampa le publicassion. Adesso, questo laoro l’è restà pi fàcile e pi sémplisse. Fà poco che go scominsià a laorar nel Departamento de Compre. Fà belche 20 ani che son drio laorar in questo Betel e son pròpio contento. Adesso, nel Betel dei Stati Unidi ghen’è intorno de 5 mila beteliti e 2 mila commuters!

Sessanta ani indrio, mi gnanca imaginea cossa che ndaria suceder cola me vita. In tuti questi ani, Laura la me ga sempre giutà de tuto el cuor. Sicuro che ghemo bio una vita tanto felice! Noantri ghemo bio difarente designassion, ghemo laorà insieme de bravi fradei e anca ghemo bio la oportunità de visitar tanti Betei come rapresentante dela sede. Adesso, mi go de pi de 80 ani e go manco laoro che vanti, ma ghen’è tanti bravi fradei e sorele pi gióveni par tender de tuto el laoro che ghen’è.

El salmista el ga dito: “Felice la nassion che el so Dio l’è Geovà.” (Sal. 33:12) Questo l’è pròpio vera! Mi ghe ringràssio tanto a Geovà parché son drio servirlo insieme col so pòpolo felice.