Mostra bontà come Geovà!

VARDA quel che ga giutà Lisa e Anne a voler imparar de pi sora Geovà.a Lisa la ga dito: “Mi go volesto cognosser de pi a Geovà parché i fradei e le sorele me ga sempre mostrà tanta bontà.” Anne la ga dito: “Nel scomìnsio me piasea de pi la maniera che le Testimònie de Geovà le me tratea che quel che lore le me insegnea.” Ancoi, queste due sorele le ghe piase tanto leder la Bìblia e pensar sora quel che la dise. Ma l’è stà la bontà che i fradei e le sorele i ga mostrà che le ga giutà a voler servir a Geovà.

Come che podemo mostrar bontà de una maniera che va pròpio incoraiar i altri? Ndaremo veder che podemo farlo par meso de quel che parlemo e de quel che femo. Dopo, ndaremo anca veder a chi che ghemo de mostrar bontà.

MOSTRA BONTÀ PAR MESO DE QUEL CHE TE PARLI

El capìtolo 31 de Proverbi el dise che la brava dona la parla sempre con bontà e quel che l’è bon. (Pro. 31:26) Ma anca un paron de fameia el ga sempre de parlar cossita. I genitori i sa che se no i parla con bontà, i so fioi i restarà disgustadi e no i volerà obedirghe. Ma quando lori i parla con bontà coi so fioi, sarà pi fàcile che i ghe obedissa.

Ma tuti noantri ghemo de parlar con bontà. Cossa che pol giutarne a farlo? Proverbi 31:26 dise: “Ela la parla con sabedoria.” Mostremo sabedoria quando scoliemo ben le parole e la maniera che ndemo parlar. Par quela, vanti de parlar qualcossa podemo domandarse: ‘Quel che vao parlar ala persona ndarà assarla inrabiada o ndarà incoraiarla?’ (Pro. 15:1) Alora, mostremo sabedoria quando pensemo prima de parlar qualcossa.

Proverbi anca dise che quando parlemo qualcossa a una persona sensa prima pensar, podemo farla sofrir. (Pro. 12:18) Alora ghemo de pensar in quel che ndaremo parlar e in come ndaremo farlo. Ghemo de star atenti par mai parlar robe brute a qualchedun, o sensa bontà. (Efe. 4:31, 32) Pitosto, ghemo de parlar con amor e quel che ndarà incoraiar. Geovà el ga fato cossita con Elia. Quando Elia el gavea tanta paura, Geovà el ga mandà un àngelo e el ga parlà con una voce “bassa, e tranquila”. (1 Rè 19:12) Ma ghemo de ricordarse che se volemo esser bondosi, ghemo de far de pi che sol parlar con bontà, ghemo anca de mostrar bontà par meso de quel che femo. Vedemo come farlo.

QUANDO TE MOSTRI BONTÀ PAR MESO DE QUEL CHE TE FÈ, TE GIUTI AI ALTRI

Noantri femo compagno a Geovà quando mostremo bontà par meso de quel che parlemo, ma anca par meso de quel che femo. (Efe. 4:32; 5:1, 2) Lisa, che ghemo parlà prima, la ga dito sora la bontà che le Testimònie de Geovà le ga mostrà ala so fameia: “La nostra fameia la ghe ga tocà cambiar de casa de colpo. Alora quatro Testimònie de Geovà le ga assà de ndar laorar par giutarne a portar le nostre robe a quel’altra casa. In quel tempo, no ero gnancora drio studiar la Bìblia!” La bontà che i fradei i ga mostrà ga fato Lisa voler studiar la Bìblia.

Anca Anne, che ghemo parlà prima, la ga dato tanto valor ala bontà che le Testimònie de Geovà ghe ga mostrà. Ela la ga dito: “Par via de tuto quel che l’è drio suceder nel mondo, mi no ero bona de fidarme in nissun. Alora quando go cognossesto le Testimònie de Geovà, mi no me fidea in lore. Mi pensea: ‘Parché che lore me trata ben cossita?’. Ma la dona che la studiea la Bìblia con mi la me mostrea bontà de cuor, e par quela, mi go scominsià a fidarme nela.” Alora cossa che ga sucedesto? “Mi go scominsià a veder che quel che ero drio imparar l’era tanto importante.”

Gheto visto cossa che ga giutà Lisa e Anne a voler imparar sora Geovà? La bontà che i fradei e le sorele ghe ga mostrà. Cossita, lore le ga scominsià a fidarse in Geovà e nel so pòpolo.

MOSTRA BONTÀ COME GEOVÀ

L’è bel e ne piase tanto de veder una persona che la trata ben ai altri e la ghe dà atension. Arquanti i ze nassesti con questa abilità. Ma sarà che una persona che la ga questa abilità la ze belche drio mostrar la bontà compagno a quela che Geovà el mostra? Nò. — Vedi anca Ati 28:2.

La bontà la ze una qualità del fruto del spìrito santo. (Gàl. 5:22, 23) Alora, saremo boni de mostrar la bontà che Geovà e Gesù i mostra sol col aiuto del spìrito santo. Noantri ghemo de assar che el spìrito santo el ne giute a pensar con bontà e a mostrarla. Ma cossa che ndarà farne volerghe ben ale persone e mostrarghe bontà? El nostro amor par Geovà e par le persone. Cossita saremo boni de mostrar la bontà che la ze vera e che la ghe piase a Geovà.

A CHI GHEMO DE MOSTRAR BONTÀ?

L’è fàcile mostrar bontà a quei che cognossemo o a quei che i ne ga belche fato qualcossa de bon. (2 Sam. 2:6) Par esémpio, ghemo caro de far qualcossa de bon a una persona che la ne ga mostrà bontà. (Col. 3:15) Ma cossa che ghemo de far se pensemo che qualchedun no’l mèrita esser tratà con bontà?

Ghemo de pensar nel bel esémpio che Geovà el ne dà. Lu el mostra bontà ale persone anca che lore no le mèrita. Par esémpio, le Scriture Greche le parla tante volte dela “bontà imèrita” de Geovà. Cossa che imparemo?

Ghemo de sforsarse de mostrar bontà come Geovà. Ndemo imparar de pi sora come Geovà el mostra questa bela qualità. Geovà el mostra bontà a tute le persone. Par esémpio, lu el ghe dà quel che le ga de bisogno par viver. (Mat. 5:45) Alora, Geovà el mostra bontà anca ale persone che no lo cognosse mia. (Efe. 2:4, 5, 8) Lu el ga anca dato la vita del so Fiol come sacrifìssio par tute le persone. El apòstolo Paolo el ga dito che Geovà el ga dato la vita del so Fiol par via dela so bontà imèrita. (Efe. 1:7) E dopo che ghemo scominsià a servirlo, Geovà el seita a giutarne e a insegnarne, anca che sbaliemo. Quel che Geovà el ne insegna l’è bon par noantri come una “piova ciara” la ze bona par le piante. (Deu. 32:2) Geovà anca el ne ga mostrà la so bontà quando el ne ga dato una speransa par el futuro. — Vedi anca 1 Piero 1:13.

Sicuro che mai saremo boni de dar a Geovà tuto quel che el dà par noantri. La bontà de Geovà la ze una bela qualità che anca noantri volemo sforsarse par gaverla. Come che podemo farlo? Invesse de scòlier a chi che ndaremo mostrar bontà, ghemo de mostrarla sempre e a tuti. (1 Tes. 5:15) Se femo cossita, saremo come una foghera nte un giorno fredo. Parché? Parché ndaremo darghe consolo ala nostra fameia, ai nostri fradei, a quei che laora o i stùdia con noantri e ai nostri visini.

Pensa a chi dela to fameia o dela congregassion te podarissi mostrar bontà. Par esémpio, te podarissi giutar un fradel a far un laoro casa o a comprar qualcossa che el gàpia de bisogno. Se te vedi che qualchedun nela predicassion el ga bisogno de aiuto, te podarissi anca mostrarghe bontà.

Alora, volemo far compagno a Geovà e mostrar bontà ai altri par meso de quel che femo e parlemo.