Come che i gióveni i pol deventar cada volta pi bravi servi de Geovà?

1. Cossa che tanti gióveni i ga fato?

TUTI i ani, tanti gióveni i se batesa. Se te sì un de questi gióveni, te pol esser sicuro che Geovà e tuti noantri semo pròpio contenti. (Pro. 27:11) Fin adesso, te ghè fato tante robe bone. Par esémpio, te ghè belche imparà tante robe dela Bìblia, e fursi fà arquanti ani che te sì drio studiarla. Studiar la Bìblia te ga giutà a cognosser e a amar a Geovà, e a esser sicuro che ela la ze la so Parola. El to amor par Geovà te ga fato voler dedicarte e batesarte. Sicuro che questa la ze stata una roba tanto bona!

2. Cossa che ndaremo veder in questo stùdio?

² Fursi te ghè infrontà tante dificoltà vanti de batesarte. Ma te pol esser sicuro che te infrontarè ancora de pi dificoltà nel futuro. Parché? Parché Sàtana el vol che te te fermi de amar e de servir a Geovà. (Efe. 4:14) Ma no stà assar che una roba cossita la suceda. Alora, cossa che pol giutarte a seitar leal a Geovà e a doperar la to vita par servirlo? Sforsarte par deventar un servo de Geovà cada volta pi bravo. (Ebr. 6:1) Adesso, ndaremo veder come che te pol farlo.

COME CHE TE POL DEVENTAR UN SERVO DE GEOVÀ CADA VOLTA PI BRAVO?

3. Cossa che tuti i ga de far dopo de batesarse?

³ Paolo el ga dito ai fradei de Èfeso che lori i gavaria de deventar cada volta pi bravi servi de Geovà. (Efe. 4:13) Par giutarne a capir, pensemo nte un bambin. I genitori i resta contenti de tender del so bambin. Ma questo fiol no’l sarà un bambin par sempre parché ghe tocarà vegner grando. (1 Cor. 13:11) La medèsima roba la ga de suceder dopo che se batesemo. De acordo con quel che Paolo el ga dito ai fradei de Èfeso, ghemo de deventar cada volta pi bravi servi de Geovà. Alora, ndemo veder arquante robe che pol giutarne a farlo.

4. De acordo con Filipensi 1:9, cossa che ndarà giutarte a deventar un servo de Geovà ancora pi bravo? Spiega.

⁴ Ama cada volta de pi a Geovà. Anca che te ami tanto a Geovà, te pol amarlo ancora de pi. Paolo el seitea a pregar che i fradei filipensi i amesse cada volta de pi a Geovà. (Ledi Filipensi 1:9.b) Ma come che te pol amar cada volta de pi a Geovà? Te ghè de cognosserlo cada volta de pi e gaver la capacità de capir le robe. E quando lo cognossemo meio, ndaremo amarlo de pi, pensar sora le so bele qualità e nela so maniera de far le robe. Alora, ndaremo far tuto quel che podemo par assarlo contento e mai disgustarlo. Sicuro che volemo sforsarse tanto par capir quel che Geovà el vol che femo e far el meio che podemo par obedirlo.

5-6. Cossa che pol giutarne a amar cada volta de pi a Geovà?

⁵ Gesù sempre el fà tuto compagno al so Pare. Alora, quando cognossemo a Gesù, ndaremo cognosser e amar ancora de pi a Geovà. (Ebr. 1:3) E podemo cognosser a Gesù quando ledemo la Bìblia. Alora, sfòrsate de leder la Bìblia tuti i giorni. Se te studi i quatro Vangeli, te ndarè cognosser meio a Gesù. Intanto che te sì drio lederli, impara sora le bele qualità che lu el ga mostrà. Tute le persone, anca i picinini, i ghe piasea de star darente de Gesù e i so dissìpoli no i gavea paura de parlarghe quel che i pensea. (Mar. 10:13-16; Mat. 16:22) Gesù anca el mostrea bontà e amor ale persone. Come Gesù el fà compagno al so Pare, podemo esser sicuri che anca Geovà el mostra queste qualità. Alora, podemo pregar a Geovà e parlarghe tuto quel che semo drio sentir. Lu el ne ama, el ne tende e mai el ndarà giulgarne. — 1 Pie. 5:7.

⁶ Quando Gesù el vedea le persone sofrir, lore le ghe fea tanto pecà. El apòstolo Mateo el ga dito: “Quando el vedea tuta quela gente, ghe fea pecà de lori, parché i era maltratadi e butadi de una banda al’altra come piégore sensa pastor.” (Mat. 9:36) E Geovà el sente la medèsima roba. Varda quel che Gesù el ga dito: “La voia del me Pare, che l’è nel cielo, la ze che gnanca un de questi pìcoli i se perde.” (Mat. 18:14) Sicuro che restemo tanto contenti de saver che Geovà el se preocupa con noantri. Cossita, quando cognossemo de pi a Gesù semo boni de amar cada volta de pi a Geovà.

7. Come che star insieme con bravi fradei pol giutarte?

⁷ Ghen’è nantra roba che pol giutar un gióveno a deventar un servo de Geovà ancora pi bravo. Cossa? Star insieme con bravi fradei dela congregassion. Se te sì un gióveno, stà atento come che questi fradei i ze contenti e che no i se ga mai ciamà grami de servir a Geovà. Te pol anca domandarghe cossa che ga belche sucedesto nela so vita. Se te ghè de dessider una roba importante nela to vita, te pol domandarghe consili. La Bìblia la dise che, quando una persona la domanda consili ai altri, le robe le va ben nela so vita. — Pro. 11:14.

8. Cossa che te pol far se te ghè dubi sora quel che la Bìblia la insegna?

⁸ Sìpia sicuro de quel che la Bìblia la dise. Ghemo visto nel paràgrafo due che Sàtana el ndarà far de tuto par intrigarte de esser un bravo servo de Geovà. Par esémpio, lu el vol tanto che te gàpie dubi sora quel che la Bìblia la insegna. Fursi arquante persone le vol farte creder che no l’è stà Dio che el ga creà tute le robe, o che semo vegnesti del macaco o de altre robe. Pol esser che quando te eri pi gióveno, no te pensei tanto sora questo, ma adesso le persone le seita a parlar sora queste teorie nela scola. E fursi te par fàcile creder in quel che i maestri i insegna. Ma sarà che lori i ga belche studià le prove che ghen’è un Creador? L’è tanto bon ricordarse de quel che dise in Proverbi 18:17: ‘La prima persona che la parla de una roba la pensa che la ze giusta, fin che vien nantra e ghe fà domande.’ Alora, invesse de creder in tuto quel che i altri i parla nela scola, stùdia la Bìblia e le publicassion. Te pol anca parlar coi fradei e sorele che i credea in queste teorie e domandarghe cossa che li ga giutà a creder che ghen’è un Creador che el ne ama. Cossita, te sarè pi sicuro che ghen’è un creador.

9. Cossa che te ghè imparà col esémpio de Melissa?

⁹ Varda el esémpio dela sorela Melissa. Ela la ga studià tanto sora la creassion e questo ghe ga giutà a gaver una fede pi forte in quel che la Bìblia la insegna.c Ela la ga dito: “L’è tanto fàcile creder in quel che i maestri i insegna sora le teorie che Dio no’l ga creà tute le robe, che semo vegnesti del macaco o de altre robe. Nel scomìnsio, mi no volea studiar de pi sora questo parché gavea paura che quel che i me maestri i era drio insegnar l’era giusto. Alora me go ricordà che Geovà no’l vol che credemo nte una roba sensa studiar le prove. Par quela, go scominsià a studiar par catar le risposte ale domande che mi me fea. Par esémpio, go ledesto el libro Existe um Criador Que se Importa com Você? e le reviste A Vida Teve um Criador? e Come la vita la ga scominsià? Sinque domande par pensarghe sora. Mi me ciamo grama de no gaverlo fato prima, parché l’era pròpio questo che mi gavea de bisogno.”

10-11. Cossa che pol giutarte a mai far imoralità sessual? (1 Tessalonissensi 4:3, 4)

¹⁰ No stà far imoralità. La voia de far sesso pol esser tanto forte par arquanti gióveni. E fursi le persone le seite a dirghe che i ga de far imoralità sessual. Ma i gióveni i ga de ricordarse che l’è pròpio questo che Sàtana el vol che lori i fae. Se te sì drio infrontar una roba cossita, cossa che pol giutarte a nò cascar in questa tràpola? (Ledi 1 Tessalonissensi 4:3, 4.d) Quando te preghi a Geovà, parlaghe tuto quel che te sì drio sentir e domandaghe forsa par seitar leal. (Mat. 6:13) No stà desmentegarte che Geovà el vol giutarte, e nò giulgarte. (Sal. 103:13, 14) Nantra roba che pol giutarte tanto la ze leder la Bìblia. L’è questo che ga giutà Melissa a fermarse de pensar in robe sbaliade. Ela la ga dito: “Leder la Bìblia tuti i giorni me ga giutà a nò desister, a ricordarme che mi son de Geovà e che mi vui tanto servirlo.” — Sal. 119:9.

¹¹ No stà proar dàrghene fora coi to problemi ti sol. Pitosto, parla ai to genitori quel che te sì drio infrontar. L’è vera che no l’è mia fàcile parlar con lori sora queste robe, ma l’è pròpio importante farlo. Varda quel che Melissa la ga dito: “Mi go domandà a Geovà che el me desse coraio par parlar col me pare sora quel che ero drio infrontar. Dopo che ghemo ciacolà, me go sentio tanto meio. E mi savea che Geovà l’era pròpio contento con mi.”

12. Come che te pol far bone scólie nela vita?

¹² Dopera prinsipi dela Bìblia nela to vita. Pin pian, i to genitori i va assarte cada volta pi lìbero par far le to scólie. Anca cossita, ghen’è tante robe che te toca ancora imparar. Alora, cossa che pol giutarte a nò far un bruto sbàlio che ndarà intrigar la to amicìssia con Geovà? (Pro. 22:3) Una sorela de nome Kari la ga capio che un bravo servo de Geovà no’l ga bisogno de una lege par tuto par far bone scólie nela vita. Ela la ga dito: “Mi go capio che gavaria de saver quel che Geovà el pensa sora quel che mi volea far e no sol ricordarme dele lege.” Alora quando te sì drio leder la Bìblia, proa domandarte: ‘Cossa che questo me insegna sora la maniera che Geovà el pensa? Sarà che posso imparar qualche prinsìpio de quel che son drio leder che el ndarà giutarme a far una bona scólia? Parché che far quel che la Bìblia la dise sarà bon par mi?’ (Sal. 19:7; Isa. 48:17, 18) Se te ledi la Bìblia e te pensi nei so prinsipi, sarà pi fàcile far scólie che le ndarà assar Geovà contento. Se te seiti a farlo, te vederè che no te ocore una règola par tute le robe nela vita, parché te ndarè saver quel che Geovà el pensa.

13. Come che gaver boni amighi pol giutarte? (Proverbi 13:20)

¹³ Gàpia amighi che i ama a Geovà. Nel paràgrafo 7, ghemo visto che i amighi i pol giutarte tanto a esser un bravo servo de Geovà. (Ledi Proverbi 13:20.e) Una sorela che la ga nome Sara la era drio restar desanimada. Varda cossa che la ga giutà a tornar a esser contenta. Sara la ga dito: “Mi go fato boni amighi nela ora che mi gavea tanto de bisogno. Go scominsià a pareciar el stùdio dela Sentinela tute le stimane con una sorela dela congregassion. Nantra sorela la me ga giutà a far comentari nele riunion. Questi amighi i me ga giutà a studiar de pi la Bìblia e a pregar a Geovà ancora meio. Cossita, la me amicìssia con Geovà la ze restada pi forte e son tornada a esser contenta.”

14. Come che Juliano l’è stà bon de gaver boni amighi?

¹⁴ Come che te pol gaver boni amighi? Varda quel che un ansiano che el ga nome Juliano el ga dito: “Quando ero pi gióveno, mi e i fradei che i ndea insieme nela predicassion semo deventadi amighi. Questi fradei i era tanto bravi e lori i me ga giutà a esser contento de predicar. Lori i me ga anca giutà a voler esser pioniero. Go capio che mi podaria gaver tanti boni amighi se fesse amicìssia anca coi fradei che no i gavea la medèsima età che mi. Adesso son drio laorar in Betel e seito a far boni amighi. El so esémpio el me giuta a far bone scólie sora la diversion, e questo me giuta a esser pi amigo de Geovà.”

15. Cossa che Paolo el ga dito a Timòteo? (2 Timòteo 2:20-22)

¹⁵ Cossa che te ghè de far se te vedi che esser amigo de qualchedun dela congregassion pol intrigar la to amicìssia con Geovà? El apòstolo Paolo el ga dito a Timòteo che lu el gavaria de star distante dei fradei che no i era bravi servi de Geovà. (Ledi 2 Timòteo 2:20-22.f) La nostra amicìssia con Geovà la ga tanto valor par noantri, par quela, no volemo che gnente ne fae perderla. — Sal. 26:4.

FAR DE PI PAR GEOVÀ TE GIUTARÀ A ESSER CADA VOLTA PI BRAVO

16. Cossa che ndarà giutarte a esser un servo de Geovà ancora pi bravo?

¹⁶ Scoli quel che te vol far de pi par Geovà. Te pol scòlier far quel che ndarà giutarte a gaver una fede ancora pi forte e a esser un servo de Geovà ancora meio. (Efe. 3:16) Par esémpio, fursi te vedi che te ghè de leder de pi la Bìblia e studiarla meio. (Sal. 1:2, 3) O fursi te vedi che te ghè de pregar de pi e pensar meio in quel che te ndarè parlar a Geovà. O pol esser che te te nicordi che te ghè de scòlier meio le to diversion o come che te doperi el to tempo. (Efe. 5:15, 16) Sicuro che Geovà el resta tanto contento quando el vede che te sì drio sforsarte par esser un bravo servo de lu.

17. Come che te vè sentirte de giutar i altri?

¹⁷ Te pol deventar un servo de Geovà ancora pi bravo se te giuti i altri. Gesù el ga dito: “Ghen’è de pi felicità in dar che in ricever.” (Ati 20:35) Alora, sicuro che te vè restar tanto contento se te doperi la to forsa e el to tempo par giutar i altri. Par esémpio, te pol sforsarte de giutar i fradei pi veci e quei che i ze maladi nela congregassion. Fursi te pol comprar qualcossa che i ga de bisogno, o giutarli a doperar el telèfono o altre robe eletròniche. Se te sì un fradel, te pol sforsarte par deventar un servo ministerial par giutar de pi la congregassion. (Fil. 2:4) Te pol anca mostrar che te ami le persone che no le serve a Geovà quando te predichi a lore. (Mat. 9:36, 37) E fà anca el meio che te pol par esser un pioniero, laorar in Betel o nele costrussion.

18. Come che laorar de pi par Geovà pol giutarte?

¹⁸ Te pol deventar un servo de Geovà ancora pi bravo se te seiti a far de pi par lu. Par esémpio, se te laori come pioniero te podarè far la Scola par Vangelisadori del Regno, servir in Betel o nela costrussion. Una pioniera che la ga nome Kaitlyn la ga dito: “Laorar de pi nela predicassion con bravi fradei e sorele me ga giutà tanto dopo del batésimo. El bel esémpio de questi fradei me ga fato veder che mi podaria cognosser de pi la Bìblia e insegnar ancora meio.”

19. Che benedission te gavarè se te te sforsi de esser un bravo servo de Geovà?

¹⁹ Sicuro che te gavarè tante benedission se te te sforsi de esser un bravo servo de Geovà. Par esémpio, no te vè mia doperar el to tempo con robe che no le ga mia valor. (1 Gio. 2:17) E no te ndarè sofrir par via de scòlie sbaliade, e le robe nela to vita le ndarà ben. (Pro. 16:3) El to esémpio el ndarà incoraiar tuti i fradei, i gióveni e anca i pi veci. (1 Tim. 4:12) E te vè esser felice e sentirte in pace de saver che te sì drio contentar el to meio Amigo, Geovà. — Pro. 23:15, 16.