Domande dei Letori

Chi che sarà ressussità par viver nela Tera, e cossa che ndarà suceder con queste persone dopo dela ressuression?

Varda come che la Bìblia la risponde a queste domande.

Ati 24:15 dise che ghen sarà “una ressuression de giusti e de ingiusti”. I giusti i ze quei che i ze stati obedienti a Dio vanti de morir. Alora, so nome l’è scrito nel libro dela vita. (Mal. 3:16) I ingiusti i ze quei che no i ga bio la oportunità de imparar sora Geovà vanti de morir. Par quela, so nome no l’è scrito nel libro dela vita.

Gioani 5:28, 29 anca el parla dei giusti e dei ingiusti compagno a Ati 24:15. In questo testo, Gesù el ga dito che “quei che i ga fato robe bone” i gavarà “una ressuression de vita”, ma quei che ‘i ga fato robe rugne’ i gavarà una “ressuression de giulgamento”. I giusti i ga fato robe bone vanti de morir e so nome l’è scrito nel libro dela vita. Alora, so ressuression sarà de vita. Invesse, i ingiusti i ga fato robe rugne vanti de morir e el so nome no l’è gnancora scrito nel libro dela vita. Par quela, lori i gavarà una ressuression de giulgamento. Come cossita? Questi ressussitadi i gavarà la oportunità de imparar sora Geovà e de obedirlo. Alora, sarà un tempo de giulgamento par veder se lori i gavarà so nome scrito nel libro dela vita.

Apocalisse 20:12, 13 dise che tuti i ressussitadi i gavarà de obedir a quel che ghen sarà “scrito nei roli”. Questi roli i sarà le lege che Dio el darà ale persone nel novo mondo. Tuti quei che no i volarà obedirle i sarà finidi fora. — Isa. 65:20.

Daniel 12:2 dise che arquanti i ndarà ressussitar par ricever la vita eterna, ma altri i “sarà invergognadi e assadi de banda par sempre”. Cossa che questo vol dir? Dopo che i se finisse i mila ani, arquanti i podarà viver par sempre e i altri i sarà finidi fora par sempre. — Apo. 20:15; 21:3, 4.

Par giutarte a capir, proa pensar in questa ilustrassion. I giusti e i ingiusti i ze come se fusse stranieri che i vol ndar de star in nantro paese. I giusti i ze come stranieri che i ga la permission par ndar viver e laorar nte un paese. Invesse, i ingiusti i ze come stranieri che i pol restar nel paese sol par un tempo. Ma tuti i due i ga de far polito se i vol seitar a viver in quel paese. Dopo de un tempo, quei stranieri i podarà ricever permission par seitar a viver nel paese come se i fusse nassesti lì, o i podarà esser paradi via. Alora, l’è cossita che sucederà coi ressussitadi. I giusti i gavarà de seitar a far polito e i ingiusti i gavarà de imparar sora le lege de Geovà e obedirle par seitar a viver in Paradiso.

Geovà l’è un Dio de amor, ma lu anca l’è un Dio giusto. (Deu. 32:4; Sal. 33:5) E par via del so grando amor, Geovà el ndarà ressussitar i giusti e i ingiusti. Ma tuti i ressussitadi i gavarà de obedir ale so lege e sol quei che i lo ama e i lo obedisse i podarà seitar a viver nel novo mondo.