STÙDIO 41
Te pol esser felice!
‘Quei che i ga tanto rispeto par Geovà e i lo obedisse i ze felici.’ — SAL. 128:1.
CÀNTICO 110 “La alegria che vien de Geovà”
COSSA CHE NDAREMO IMPARAR?a
1. Parché che ne ocore cognosser e adorar a Geovà par esser felici?
ESSER felici no vol dir restar contenti sol quando sucede robe bone. Nte un bel discorso che el ga fato, Gesù el ga dito cossa che vol dir esser felici. Lu el savea che semo stati creadi cola voia de cognosser e adorar a Geovà. Par quela che el ga dito che, quando cognossemo e adoremo a Geovà, semo felici. (Mat. 5:3) Come Geovà l’è el Dio felice, quei che lo adora anca i ze felici. — 1 Tim. 1:11.
‘Quei che i ze perseghidi parché i vol far quel che l’è giusto i ze felici.’ — Mat. 5:10 (Vedi i paràgrafi 2 e 3.)i
2-3. (a) De acordo con quel che Gesù el ga dito, chi che ancora pol esser felici? (b) Cossa che ndaremo imparar adesso, e parché che l’è importante farlo?
2 Ma sarà che podemo esser felici anca quando semo drio tribolar? Si! Par esémpio, Gesù el ga dito che quei che i piande par causa dei so problemi o de quel che i ga fato nel passà i pol esser felici. E lu el ga dito che, quando femo quel che l’è giusto, podemo esser felici anca se le persone le ne vien contra o le ne dise su. (Mat. 5:4, 10-11) Ma come che podemo esser sempre felici?
3 Alora, Gesù l’era drio insegnar che saremo felici sol se cognossemo a Geovà e se semo so amighi. (Tia. 4:8) Cossita, saremo felici anca quando infrontemo dificoltà nela vita. Adesso, ndaremo imparar sora tre robe importante che le pol giutarne a esser felici.
STÙDIA LA BÌBLIA E LE PUBLICASSION
4. Quala che la ze la prima roba che ghemo de far par esser felici? (Salmo 1:1-3)
4 Cossa che ghemo de far par esser felici? Studiar la Parola de Dio. El salmista el ga dito: “Felice l’è quel che lede la lege de Geovà, di e note.” (Ledi Salmo 1:1-3.b) Gesù el ga spiegà che la Parola de Dio la ze compagna al magnar. Le persone e anca le bèstie le ga de magnar par seitar vive. Ma sol le persone che le ga bisogno de leder la Parola de Dio. Gesù el ga dito che “el omo el ga de viver, nò sol de pan, ma de tute le parole che le vien dela boca de Geovà”. (Mat. 4:4) Alora, ghemo de leder e studiar la Bìblia tuti giorni.
5-6. (a) Cossa che podemo imparar nela Bìblia? (b) Come che leder la Bìblia pol giutarne?
5 Geovà el ne insegna come esser felici par meso dela so Parola parché el ne ama tanto. Nela Bìblia podemo imparar parché che Geovà el ne ga creà, cossa ghemo de far par esser so amighi, come esser perdonadi par i nostri sbali e come esser felici adesso. Imparemo anca sora la bela speransa che Geovà el ne dà par el futuro. (Ger. 29:11) Imparar sora la Bìblia ne assa tanto contenti!
6 La Bìblia anca la ne dà tanti bei consili par la vita, e quando li metemo in pràtica, semo pi felici. Gesù el ga dito: “Felici i ze quei che i scolta la Parola de Dio e i la mete in pràtica!” (Luc. 11:28) Alora quando semo drio restar desanimadi par via dele nostre dificoltà, ghemo de sforsarse par leder de pi la Bìblia e pensar sora in quel che ledemo.
7. Cossa che podemo far intanto che semo drio leder la Bìblia?
7 Noantri ghemo de torse el tempo par leder la Bìblia e pensarghe sora quel che ledemo. Par capir meio, metemo dir che qualchedun el ga fato un magnar che te piase tanto. Ma come no te ghè tanto tempo e te ghè pensieri, te fè presto mandarlo do sensa gòdertelo. Dopo, magari, te te ciami gramo. Se no restemo atenti, la medèsima roba la pol suceder quando ledemo la Bìblia. Alora, dopera ben el to tempo intanto che te la ledi. Par esémpio, imagina le robe che le ga sucedesto, proa sentir la voce dele persone e pensa sora quel che te sì drio leder. Studiar la Bìblia cossita ndarà giutarte a esser pi felice.
8. Come che el schiavo fedele e prudente l’è drio far quel che Gesù el ghe ga domandà? (Vedi anca la nota.)
8 Gesù el ga scoliesto “el schiavo fedele e prudente” par darne nel tempo giusto quel che ne ocore par esser amighi de Geovà.c (Mat. 24:45) Noantri ghemo le reviste La Sentinela e Despertai!, artìcoli nel site jw.org, riunion tute le stimane e el JW Broadcasting® tuti i mesi. Tuto quel che el schiavo fedele e prudente el ne dà vien dela Bìblia e ne giuta a capir la maniera che Geovà el pensa. (1 Tes. 2:13) Quando doperemo tuto quel che el schiavo el ne dà, semo anca boni de far la seconda roba che ne assa felici.
VIVI DE UNA MANIERA CHE GHE PIASE A GEOVÀ
9. Quala che la ze la seconda roba che ghemo de far par esser felici?
9 Cossa che ghemo de far par esser felici? Viver de una maniera che ghe piase a Geovà. El salmista el ga dito che la persona che la ga tanto rispeto par Geovà e che lo obedisse la ze felice. (Sal. 128:1) Se ghemo tanto rispeto par Geovà, no ndaremo mai far gnente che ndarà disgustarlo. (Pro. 16:6) Par quela sempre se sforsemo de far quel che Geovà el dise che l’è giusto e no far quel che lu el dise che l’è sbalià. (2 Cor. 7:1) Se femo quel che ghe piase a Geovà e stemo distante de quel che lu el òdia, saremo pi felici. — Sal. 37:27; 97:10; Rom. 12:9.
10. De acordo con Romani 12:2, cossa che ghemo de far?
10 Ledi Romani 12:2.d Noantri savemo che Geovà el ga la autorità de dirne quel che l’è giusto e quel che l’è sbalià, ma ne ocore anca voler obedirlo. Par esémpio, la medèsima roba la sucede cole lege che el governo el fà. Fursi una persona la sàpia dele lege sora la velocità che podemo ndar in volta col auto, ma ancora cossita, no la gàpia voia de obedirle. Alora, ghemo de mostrar nela nostra vita che savemo che obedir a Geovà l’è la meio roba e che volemo obedirlo. (Pro. 12:28) Davi el ga capio pròpio questo, parché el ga dito: “Ti te me fè cognosser la strada dela vita. Davanti de ti ghen’è tanta alegria. La felicità la ze ala to drita par sempre.” — Sal. 16:11.
11-12. (a) Quando infrontemo problemi o restemo desanimadi, parché che ghemo de star atenti? (b) Come che Filipensi 4:8 pol giutarne quando ndemo scòlier le nostre diversion?
11 Dele volte, tuti noantri infrontemo problemi e restemo desanimadi. Par quela, pol esser che ghemo bisogno de far qualcossa par passarsela fora un pochetin. L’è vera che l’è bon farlo, ma ghemo de star atenti par no far una roba che la ndarà disgustar a Geovà. — Efe. 5:10-12, 15-17.
12 Paolo el ga dito ai fradei filipensi che lori i gavea de seitar a pensar in tuto quel che l’è ‘giusto, in tuto quel che l’è puro, in tuto quel che ne giuta a gaver de pi amor e in tuto quel che l’è bon’. (Ledi Filipensi 4:8.e) Anca se Paolo no’l fusse drio parlar de diversion, podemo meter in pràtica quel che lu el ga dito quando ndemo scòlier le nostre diversion. Alora, vanti de leder un libro, scoltar una mùsica, vardar un filme o giugar qualcossa, varda se l’è de acordo con questo testo. Cossita, te sarè bon de capir se quel che te vol far assarà Geovà contento, o nò. Noantri volemo viver dela maniera che ghe piase a Geovà. (Sal. 119:1-3) Se femo polito cossita, saremo boni de far la tersa roba che ne giutarà esser felici. — Ati 23:1.
METI LA ADORASSION A GEOVÀ IN PRIMO POSTO NELA VITA
13. Quala che la ze la tersa roba che ghemo de far par esser felici? (Gioani 4:23, 24)
13 Cossa che ghemo de far par esser felici? Ghemo de meter la adorassion a Geovà in primo posto nela nostra vita. Geovà el mèrita che metemo la nostra adorassion a lu in primo posto nela vita parché el ne ga creà. (Apo. 4:11; 14:6, 7) Ma come che lu el vol che lo adoremo? Geovà el vol che lo adoremo “con spìrito e verità”, o sia, che femo tuto de acordo cola Bìblia e che assemo che el spìrito santo el ne giute a farlo. (Ledi Gioani 4:23, 24.f) Ma cossa ghemo de far se semo de star nte un paese che el governo no’l ne assa lìberi par adorar a Geovà? Anca cossita, adorar a Geovà ga de esser la roba pi importante dela nostra vita. Nei nostri giorni, ghen’è de pi de sento fradei che i ze in preson sol parché i ze Testimònie de Geovà.g Ma, lori i seita a far el so meio par studiar, pregar e parlar ai altri sora Dio e el so Regno. Se anca noantri infrontemo una dificoltà cossita podemo esser felici parché Geovà l’è dela nostra banda e ndarà benedirne. — Tia. 1:12; 1 Pie. 4:14.
IMPARA DE UN BEL ESÉMPIO
14. Cossa ga sucedesto con Jovidon, e parché?
14 Esempi dei fradei i mostra che, se femo le tre robe che ghemo pena imparà, poderemo esser felici anca quando infrontemo dificoltà. Par esémpio, proa varda cossa ga sucedesto col fradel Jovidon Bobojonov, che el ga 19 ani e l’è de star nel Tagichiston. Nel giorno 4 de otobre de 2019, lu l’è stà metesto in preson par arquanti mesi come se el fusse un bandido parché no’l ga volesto ndar al esèrsito. I soldadi i ghe ga dato bote parché lu no’l volea mia meter su le robe de un soldà e gnanca far la promessa de servir al esèrsito. Dopo, lu l’è stà condanà e mandà par una preson che ghe ga tocà laorar tanto. Quel che ga sucedesto con lu l’è stà tanto bruto che tanti giornai del mondo i ga parlà sora questo. Alora, el presidente del so paese el ga dito che el podea esser molà e tornar casa. El fradel Jovidon el ga infrontà tante dificoltà, ma lu el ga seità a esser felice e leal a Geovà. Parché? Parché lu no’l se ga mai fermà de far pi forte la so amicìssia con Geovà.
Jovidon el ga seità a studiar la Bìblia e le publicassion, el ga vivesto de una maniera che ghe piase a Geovà e el ga metesto la adorassion a Dio in primo posto nela vita (Vedi i paràgrafi 15 a 17.)
15. Come che Jovidon el ga seità a imparar sora Geovà intanto che l’era in preson?
15 Jovidon no’l gavea la Bìblia e gnanca le publicassion, ma el ga seità a imparar sora Geovà. Come che el ga fato questo? Fradei e sorele i portea de magnar par lu e i scrivea el testo del giorno nela sacoleta che i doperea par portarlo. Cossita, lu l’era bon de seitar a imparar sora Geovà tuti i giorni. E dopo che l’è stà molà, lu el ga dato un bel consìlio a tuti quei che no i gavea gnancora infrontà brute dificoltà nela vita. Lu el ga dito: “Ghemo de doperar la nostra libertà par cognosser de pi a Geovà par meso dela Bìblia e dele nostre publicassion.”
16. Sora cossa che Jovidon el ga seità a pensar?
16 Jovidon el se ga sforsà de far sempre quel che Geovà el dise che l’è giusto. Invesse de pensar in robe che le ze sbaliade, lu el ga seità a pensar in Geovà e in quel che ghe piase a lu. Lu anca el vardea le bele robe che Geovà el ga creà. Par esémpio, quando el se desmissiea tuti i giorni, el scoltea i osei cantar e de note lu el vardea la luna e le stele. Lu el ga dito: “Mi restea tanto contento de vardar questi presenti de Geovà.” Cossa che el esémpio de Jovidon el ne insegna? Quando ghe demo valor a tute le robe che Geovà el ne dà e a quel che la Bìblia la dise, noantri semo felici e ghemo forsa par seitar leai a lu.
17. De acordo con 1 Piero 1:6, 7, cossa che sucede con una persona che la infronta dificoltà come Jovidon?
17 Jovidon el ga anca metesto la so adorassion a Geovà in primo posto nela vita. Lu el savea che l’era importante seitar leal al vero Dio parché Gesù el ga dito che ghemo de adorar e servir sol a Geovà. (Luc. 4:8) Anca se i soldadi i volea che lu el se fermesse de servir a Geovà, lu el ga sempre pregà tanto par seitar leal. Tuto quel che Jovidon el ga infrontà lo ga giutà a gaver una fede ancora pi forte che vanti. — Ledi 1 Piero 1:6, 7.h
18. Cossa che ne ocore far par esser pròpio felici?
18 Geovà el sa quel che ne ocore far par esser felici. Alora se femo le tre robe che ghemo imparà in questo stùdio, saremo felici anca quando infrontemo dificoltà. Cossita, anca noantri podaremo dir: “Felice el pòpolo che el so Dio l’è Geovà!” — Sal. 144:15.
CÀNTICO 89 Quei che i obedisse i sarà benedidi
a Tanti i pensa che sol i sarà felici se i ga tanta diversion, soldi, poder, e se i ze persone importante. Ma Gesù el ne ga insegnà cossa che ghemo de far par esser felici. In questo stùdio, ndaremo imparar tre robe che ne giutarà a esser felici.
b (Salmo 1:1-3) Felice l’è el omo che no’l camina secondo el consìlio dei rugni, no’l pesta nela strada dei pecadori, gnanca se senta con quei che i ghe ride drio. 2 Ma el so piaser l’è nela lege de Geovà, e lu el lede la So lege in voce bassa di e note. 3 E lu el ga de deventar come una pianta piantada darente l’àqua, che la dà i so fruti nel so tempo e che le so foie no resta fiape. E tuto quel che el fà el ndarà ben.
c Vedi el artìcolo “Você está recebendo ‘alimento no tempo apropriado’?” nela Sentinela de 15 de agosto de 2014.
d (Romani 12:2) No sté pi assarve influensar par questo mondo, ma sìpie trasformadi, rinovando la vostra mente, par proar a valtri stessi la bona, acetàbile e perfeta volontà de Dio.
e (Filipensi 4:8) Alora fradei, seité a pensarghe sora in tuto quel che l’è vero, tuto quel che l’è importante, tuto quel che l’è giusto, tuto quel che l’è puro, tuto quel che ne giuta a gaver de pi amor, tuto quel che se parla ben, tuto quel che l’è bon e tuto quel che mèrita lode.
f (Gioani 4:23, 24) Seben che, riva la ora e adesso l’è, quando i veri adoradori i adorarà el Pare con spìrito e in verità, parché veramente el Pare l’è drio ndar in serca de questi par che i lo adore. 24 Dio l’è spìrito, e quei che lo adora i ga de adorarlo con spìrito e verità.”
g Par imparar de pi, varda “Presos por causa de sua fé” nel jw.org.
h (1 Piero 1:6, 7) Par via de questo valtri sì tanto contenti, anca se par un poco de tempo gavé de patir diverse provassion. 7 Cossita la vostra fede provada e che la ga de pi valor che el oro che se rovina anca se l’è provado con fogo, la sìpia un motivo de lode, glòria e onor quando Gesù Cristo el sarà rivelà.
i ILUSTRASSION Pàgina 7: Un fradel l’è drio esser portà al tribunal. Arquanti fradei i ze lì insieme a lu.