STÙDIO 47
Come che te pol seitar a gaver un forte amor par i fradei?
“Seitemo a amar un al altro, parché el amor el vien de Dio.” — 1 GIO. 4:7.
CÀNTICO 109 Mostremo amor un al altro de cuor
COSSA CHE NDAREMO IMPARAR?a
1-2. (a) Parché che Paolo el ga dito che el amor l’è la qualità pi importante? (b) Che domande ndaremo risponder in questo stùdio?
QUANDO el apòstolo Paolo el ga parlà sora la fede, la speransa e el amor, lu el ga dito che la qualità “pi importante l’è el amor”. (1 Cor. 13:13) Parché? Parché in Paradiso, no ne ocorerà pi gaver una speransa gnanca fede nele promesse de Dio parché le sarà belche sucedeste. Ma sempre ne ocorerà gaver un forte amor par Geovà e par i fradei. Alora, noantri ghemo de seitar a far cada volta pi forte el nostro amor par lori.
2 In questo stùdio, ndaremo risponder a tre domande sora el amor, che l’è una qualità che ne ocore sempre gaver: (1) Parché che ghemo de amar un al altro? (2) Come che mostremo che amemo i nostri fradei? (3) Come che podemo seitar a far cada volta pi forte el nostro amor par i altri?
PARCHÉ CHE GHEMO DE AMAR UN AL ALTRO?
3. Parché che ghemo de amar un al altro?
3 Prima, quando amemo i nostri fradei, mostremo che amemo anca a Geovà. El apòstolo Gioani el ga dito: “Quei che i ama a Dio i ga de amar anca ai so fradei.” (1 Gio. 4:21) Seconda, mostremo che semo veri dissìpoli de Gesù. Lu el ga dito che ‘tuti i saveria che semo so dissìpoli par causa del amor che ghen saria intrà de noantri’. (Gio. 13:35) Terso, restemo pi unidi coi nostri fradei. Paolo el ga dito che “el amor el une de maniera perfeta”. — Col. 3:14.
4-5. Parché che podemo dir che se amemo a Geovà amemo anca ai fradei? Parla de un esémpio.
4 Parché che podemo dir che se amemo a Geovà, amemo anca ai fradei? Pensa sora questo esémpio: Par saver quanto el cuor de una persona l’è drio bater, el dotor el mete una machineta nel so brasso par scoltar i batimenti del cuor. Cossita, lu el pol saver se el cuor l’è drio bater ben. Cossa che questo ne insegna sora el amor?
5 El dotor el dopera i batimenti che ghen’è nel brasso par saver se el cuor dela persona el bate forte. Dela medèsima maniera, nostro amor par i fradei el mostrarà se el nostro amor par Geovà l’è forte. Par quela, se no ghemo pi un forte amor par i fradei, anca el nostro amor par Geovà l’è cossita. Magari, quando se sforsemo de sempre mostrar amor ai fradei, mostremo che anca el nostro amor par Geovà l’è tanto forte.
6. De acordo con 1 Gioani 4:7-9, 11, parché che ghemo de star su cole récie se vedemo che el nostro amor par i fradei l’è drio restar pi fiaco?
6 Se vedemo che el nostro amor par i fradei l’è drio restar pi fiaco, ghemo de star su cole rècie. Parché? Parché questo vol dir che semo drio perder la nostra amicìssia con Geovà. El apòstolo Gioani el ga dito: “Quel che no’l ama el so fradel, che el ga visto, no’l pol mia amar a Dio, che no lo ga mia visto.” (1 Gio. 4:20) Cossa che imparemo? Sol ndaremo contentar a Geovà se amemo i altri. — Ledi 1 Gioani 4:7-9,b 11.c
COME CHE MOSTREMO CHE AMEMO I NOSTRI FRADEI?
7-8. De che maniere podemo mostrar che amemo i fradei?
7 La Bìblia la dise una volta drio man che ‘ghemo de amar un al altro’. (Gio. 15:12, 17; Rom. 13:8; 1 Tes. 4:9; 1 Pie. 1:22; 1 Gio. 4:11) Ma el amor l’è un sentimento che ghemo rento el nostro cuor e che nissuni pol vederlo. Alora, come che podemo mostrar ai altri che li amemo? Par meso de quel che parlemo e de quel che femo.
8 Varda arquante robe che la Bìblia la dise che ghemo de far par mostrar che amemo ai altri: “Parlé la verità” e “seité in pace un coi altri”. (Zac. 8:16; Mar. 9:50) “Sìpie premosi de darghe onor un al altro.” (Rom. 12:10) “Gavé de acetarve un al altro” e ‘a perdonarve del tuto’. (Rom. 15:7; Col. 3:13) “Seité portar le carghe un dei altri”. (Gàl. 6:2) “Seité a darve coraio” e ‘consolo’ e ‘preghé un par el altro’. — 1 Tes. 4:18; 5:11; Tia. 5:16.
Come che podemo giutar un fradel che l’è drio tribolar? (Varda i paràgrafi 7 a 9.)
9. Parché che podemo dir che quando consolemo un fradel semo drio mostrar che lo amemo? (Varda anca la ilustrassion.)
9 Ndemo pensarghe sora una dele robe che ghemo pena parlà. Paolo el ga dito: “Seité a darve consolo.” Un libro el dise che la parola che Paolo el ga doperà par “dar consolo” a qualchedun vol dir ‘restar dela so banda par darghe coraio quando lu l’è drio tribolar’. Alora, parché che podemo dir che quando consolemo un fradel semo drio mostrarghe amor? Parché semo drio giutarlo a servir a Geovà anca cole dificoltà. Cossita, sempre che giutemo un fradel o una sorela che l’è drio tribolar, mostremo che lo amemo. — 2 Cor. 7:6, 7, 13.
10. Parché che ne ocore gaver compassion dei altri?
10 Se noantri ghemo compassion dei altri, gavaremo una forte voia de consolarli quando i ze drio tribolar. Alora, ne ocore gaver compassion dele persone par esser boni de darghe consolo. Come cossita? Paolo el ga dito che Geovà “l’è el Pare dele grande compassion e el Dio de tuto el consolo”. (2 Cor. 1:3) Paolo el ga ciamà Geovà de “Pare dele grande compassion” parché lu el ga tanta compassion par le persone. L’è par causa de questa granda compassion che Geovà sempre el vol consolar a tuti. (2 Cor. 1:4) Cossita come l’è bel bever un bicier de àqua fresca quando ghemo sen, l’è tanto bel gaver el consolo de Geovà quando semo drio infrontar una dificoltà. Ma come che podemo consolar i altri compagno a Geovà? Ndemo veder adesso un per de qualità che ndarà giutarne a gaver compassion dei altri e darghe consolo.
11. De acordo con Colossensi 3:12 e 1 Piero 3:8, che altre qualità ne ocore gaver?
11 Cossa che ndarà giutarne a seitar a amar e a consolar i nostri fradei? Noantri ghemo de meterse nel posto de lori e gaver compassion e amor. (Ledi Colossensi 3:12;d 1 Piero 3:8.e) Quando ghemo compassion par i nostri fradei e se preocupemo con lori anca gavaremo una forte voia de consolarli quando i ze drio tribolar. Gesù el ga dito che ‘la boca la parla quel che ghen’è nel cuor’ e che ‘el omo bon el parla robe bone’. (Mat. 12:34, 35) Semo sicuri che consolar i nostri fradei l’è una maniera tanto importante de mostrar che li amemo.
COME CHE PODEMO SEITAR A FAR CADA VOLTA PI FORTE EL NOSTRO AMOR PAR I ALTRI?
12. (a) Parché che ne ocore star sempre atenti? (b) Che domanda ndaremo risponder adesso?
12 Tuti noantri volemo seitar a “mostrar amor un al altro”. (1 Gio. 4:7) Ma ghemo de ricordarse che Gesù el ga dito che el amor de tanta gente ‘ndaria sfredarse’. (Mat. 24:12) L’è vera che Gesù no l’era drio dir che i so dissìpoli i se fermaria de amar un al altro. Ma ghemo de star atenti par no scominsiar a tratarse come le persone del mondo le se trata. Alora, cossa che pol giutarne a saver se ancora ghemo un forte amor par i fradei?
13. Cossa che pol mostrar che ghemo amor par i nostri fradei?
13 Ghen’è diverse maniere de mostrar che amemo i nostri fradei. Par esémpio, quel che femo quando un fradel el fà un sbàlio o el ne disgusta pol mostrar se lo amemo o nò. (2 Cor. 8:8) Quando una roba cossita sucede, ghemo de ricordarse che el apòstolo Piero el ga dito che ne ocore gaver un “grando amor un par el altro, parché el amor el querze tanti pecati”. — 1 Pie. 4:8.
14. De acordo con 1 Piero 4:8, come che ga de esser el nostro amor par i fradei? Parla de un esémpio.
14 Nel scomìnsio del versìcolo 8, Piero el ga dito che ne ocore gaver un “grando amor” un par el altro. La parola che lu el ga doperà par “grando” la vol dir “stirar”. Dopo, lu el ga parlà che se ghemo un amor grando cossita, saremo boni de perdonar tuti sbali dei altri. Par giutarne a capir, pensemo nte un esémpio. Metemo dir che te ghè una tola piena de maciete. Alora, se te ciapi un toco de strasso e te lo stiri sora la tola, te sarè bon de querzer tute le maciete che ghen’è. Dela medèsima maniera, se noantri ghemo un grando amor par i fradei, saremo boni de stirarlo par querzer i so sbali, o sia, perdonar tuti so pecati.
15. De acordo con Colossensi 3:13, cossa che saremo boni de far se amemo i nostri fradei?
15 Alora, el nostro amor par i fradei el ga de esser pròpio forte. Cossita, saremo boni perdonarli anca quando no l’è mia fàcile. (Ledi Colossensi 3:13.f) Quando semo boni perdonarli, mostremo che ghemo un forte amor par lori e assaremo Geovà contento. Ma cossa ancora pol giutarne a perdonar i altri quando i ne disgusta e a mai esser parmolosi?
Cossita come butemo via un bruto ritrato e se tegnemo sol i bei, volemo tegner in mente sol bei ricordi dei nostri fradei (Varda i paràgrafi 16 e 17.)
16-17. Cossa che ndarà giutarne a perdonar i fradei? Parla de una ilustrassion. (Varda anca la ilustrassion.)
16 Cossa che pol giutarte a perdonar i fradei? Sfòrsate de vardar le robe bone che i fà invesse dei so sbali. Metemo dir che te sì ndato a spasso insieme de altri fradei e sorele. Te sì restà tanto contento, e prima de ndar casa, te fè ritrati de tuti insieme. Magari, dopo te te nicordi che un fradel l’è vegnesto fora cola fàcia mesa bruta nte un dei ritrati. Alora, te fè de manco doperarlo. Pitosto te lo buti via e te doperi quel che tuti i ze restadi bei.
17 Podemo dir che questi ritrati l’è come quel che se tegnemo in mente dei altri. Sicuro che se ricordemo de bele robe che ghemo fato insieme dei nostri fradei. Ma cossa che te ghè de far se un fradel o una sorela el ga parlà o el ga fato qualcossa che te ga disgustà? Sfòrsate de desmentegarte, o butar via, cossita come te farissi con quel ritrato. (Pro. 19:11; Efe. 4:32) Noantri ghemo de desmentegarse dei sbali dei nostri fradei parché volemo tégnerse in mente i bei ricordi de quel che i ga fato.
PARCHÉ CHE GHEMO DE AMAR I NOSTRI FRADEI ANCOI DE PI CHE MAI?
18. Cossa che noantri ghemo imparà in questo stùdio?
18 Parché che volemo seitar a gaver un forte amor par i nostri fradei? Come ghemo belche imparà, quando ghemo un forte amor par i fradei, mostremo che amemo anca a Geovà. E podemo mostrar che amemo i nostri fradei quando ghe demo consolo. Ma ghemo de ricordarse che sol saremo boni de consolarli se ghemo compassion par lori. Noantri ghemo de perdonarli sempre, anca quando no l’è mia fàcile.
19. Parché che ghemo de mostrar amor un al altro ancoi?
19 Parché che l’è tanto importante mostrar amor un al altro ancoi? Piero el ga dito: ‘El fin de tute le robe l’è darente. Alora, gavé grando amor un par el altro.’ (1 Pie. 4:7, 8) E noantri belche saveino che sarìssino “persone odiade par tute le nassion”, parché Gesù el ne ga avisà. (Mat. 24:9) Par quela, noantri ghemo de esser cada volta pi unidi. Alora, se noantri amemo i nostri fradei e sorele, Sàtana no’l sarà mai bon de rovinar la nostra union “parché el amor el une de maniera perfeta”. — Col. 3:14; Fil. 2:1, 2.
CÀNTICO 130 El amor de Geovà ne motiva a perdonar
a Adesso, l’è tanto importante mostrar che amemo i nostri fradei e sorele de pi che mai. Ma parché che podemo dirlo e come che podemo mostrar che li amemo del bon?
b (1 Gioani 4:7-9) Amadi, seitemo a amar un al altro, parché el amor el vien de Dio, e tuti quei che i ama i ze vegnesti de Dio e i cognosse a Dio. 8 Quel che no’l ama no’l cognosse a Dio, parché Dio l’è amor. 9 Podemo veder pròpio ben el amor de Dio par noantri, parché Dio el ga mandà el so ùnico Fiol al mondo, e cossita podemo guadagnar la vita par meso de lu.
c (1 Gioani 4:11) Cari, se Dio el ne ga amà cossita, anca noantri ghemo la obrigassion de gaver amor un par el altro.
d (Colossensi 3:12) Par quela, come persone che Dio el ga scoliesto, sante e amade, gavé de meterve su forti sentimenti de compassion, bontà, umiltà, brandura e passiensa.
e (1 Piero 3:8) Alora, che tuti valtri gàpie la medèsima maniera de pensar. Gavé anca de meterve nel posto dei altri e de gaver amor come de fradei, compassion e umiltà.
f (Colossensi 3:13) Seité soportarve un al altro e a perdonarve del tuto un al altro, anca se qualchedun el ga rason par brontolar contra nantra persona. Cossita come Geovà el ve ga perdonà del tuto, valtri gavé de far compagno.