Come smorosar de una maniera che ghe piase a Geovà?

1-2. Cossa che arquanti i ga dito sora la època che i ga smorosà?

POL ESSER tanto bel smorosar. L’è sicuro che, se valtri sì drio smorosar, volé esser contenti come tanti altri fradei e sorele intanto che i era drio smorosar. Seian,a una sorela dela Etiòpia, la ga dito: “Quando che mi e el me omo èrino drio smorosar, go bio dei momenti pi bei dela me vita. Discoreino de assunti importanti, ma anca rideino tanto. Son stata contenta quando go capio che gavea catà una persona che mi amea e che la me amea.”

² Ma, Alessio, un fradel dela Olanda, el ga dito: “L’è stà tanto bel cognosser la me dona intanto che èrino drio smorosar. Ma anca ghemo bio dele dificoltà.” In questo stùdio, ndaremo veder arquante dificoltà che fursi quei che i ze drio smorosar i infronta e arquanti prinsipi dela Bìblia che pol giutarli a far una bona dessision. Ndaremo anca veder come i altri nela congregassion i pol giutar quei che i ze drio smorosar.

CON CHE OGETIVO SE GA DE SMOROSAR?

3. Con che ogetivo se ga de smorosar? (Proverbi 20:25)

³ El tempo che due persone le smorosa pol esser tanto bel. Ma tuti i due ghe ocore gaver ben in mente qual che l’è el ogetivo de smorosar, o sia, lori i ga de cognosserse ben e far una bona dessision. Dele volte, la dessision la ze de maridarse. Altre volte la dessision la ze finir de smorosar. Se lori due i desside de finir de smorosar, no vol dir che i ga fato qualcossa de sbalià. Lori i era drio smorosar pròpio par capir se saria bon maridarse o nò. Sicuro che la ze una dessision tanto importante. Parché? Parché vanti de prometer qualcossa ghe pensemo tanto ben. (Ledi Proverbi 20:25.b) E nel giorno del matrimònio, el fradel e la sorela i promete davanti de Geovà de amarse e rispetarse intanto che i ze vivi. Alora, sicuro che ghemo de pensarghe ben vanti de maridarse.

4. Parché che a tuti noantri ne ocore gaver ben in mente qual che l’è el ogetivo de smorosar?

⁴ L’è tanto importante che quei che no i ze maridadi i gàpie in mente che due persone le smorosa par cognosserse e capir se le volarà maridarse o nò. Cossita, lori no i ndarà scominsiar a smorosar se belche i sa che no i ndarà maridarse. Ma anca tuti noantri ne ocore gaver in mente qual che l’è el ogetivo de smorosar. Par esémpio, arquanti i pensa che due persone che le ze drio smorosar le gavarà pròpio de maridarse. L’è tanto bruto pensar cossita. Varda quel che Melissa, una sorela dei Stati Unidi che no la ze mia maridada, la ga dito: “Quando un fradel e una sorela i ze drio smorosar, arquanti fradei i pensa che lori i gavarà pròpio de maridarse. Questo ne fà vegner fora tanta ansietà. Par quela, arquanti i seita smorosar anca se i ga capio che no i sarà boni un par el altro. E ghen’è de quei che no i vol gnanca scominsiar a smorosar par causa de questo.”

GAVÉ DE COGNOSSERVE BEN UN AL ALTRO

5-6. De acordo con 1 Piero 3:4, cossa che due persone che le ze drio smorosar le ga de imparar una del’altra?

⁵ Se valtri sì drio smorosar, cossa che ve giutarà a dessider se gavé de maridarve o nò? Cognosser tanto ben un al altro. Vanti de smorosar, fursi gavé visto arquante robe un del altro. Ma adesso che sì drio smorosar, gavé anca de cognosser quel che ghen’è “par rento nel cuor”. (Ledi 1 Piero 3:4.c) Cossa che questo vol dir? Intanto che sì drio smorosar, podé cognosser come la ze la personalità de quel’altra persona, la so maniera de pensar e la so amicìssia con Geovà. Dopo, proa farte queste domande: ‘Questa persona la sarà un bon sposo o una bona sposa par mi?’ (Pro. 31:26, 27, 30; Efe. 5:33; 1 Tim. 5:8) ‘Ela la sarà bona de darme la atension e el amor che go de bisogno? E mi, sarò bon de far la stessa roba? Saremo boni de dàrghene fora coi difeti un del altro?’d (Rom. 3:23) Intanto che ve cognossé, ricordeve che la roba pi importante no la ze mia quanto valtri sì compagni, ma come sì boni dàrghene fora cole difarense un del altro.

⁶ Che altre robe gavaré de capir sora quel’altra persona intanto che sì drio smorosar? Vanti de esser passionà, gavé de parlar sora robe importante, come par esémpio, quel che volé far nel futuro. Ma no te ocore parlar de robe toe de scomìnsio, come problemi de salute, dificoltà econòmiche o robe brute che te ga sucedesto nel passà. (Varda anca Gioani 16:12.) Alora, parlaghe ala persona se no te vol discorer sora arquanti assunti toi. Ma, dopo de un tempo, ela la gavarà de saver queste robe par esser bona de dessider maridarse con ti o nò. Par quela, gavaré de parlar sora questi assunti un colaltro.

7. Come che due persone che le ze drio smorosar le pol cognosserse meio? (Varda anca el quadro “Come un fradel e una sorela i pol smorosar quando i ze de star distante un del altro?”.) (Varda anca la ilustrassion.)

⁷ Come che te pol cognosser pròpio la persona che te sì drio smorosar? Te pol farghe domande e scoltar le risposte. Valtri gavé de parlar pròpio quel che valtri senti e risponder quel che pensé. (Pro. 20:5; Tia. 1:19) Anca podaré discorer intanto che prediché, magné insieme o caminé ndove che ghen’è gente. Podé cognosserve meio anca quando resté insieme coi amighi e cola fameia. Te pol anca pensar de far robe insieme che ndarà giutarte a veder come che la persona che te sì drio smorosar la se comporta in posti difarente e con persone difarente. Aschwin, un fradel dela Olanda, el ga dito: “Quando che mi ero drio smorosar Alicia, feino robe che ne giutesse a cognosserse un al altro. Noantri feino robe sémplisse, come pareciar un magnar insieme o altri afari. Intanto che resteino insieme, èrino boni veder le bone qualità un del altro e anca i difeti.”

8. Come che studiar insieme pol giutar due persone che le ze drio smorosar?

⁸ Studiar insieme l’è nantra maniera de cognosserve ben. Quando saré maridadi, Dio el sarà una parte tanto importante del vostro matrimònio. (Ecl. 4:12) Cossita, gavaré de torve el tempo par la adorassion in fameia. Ma podé torve del tempo par studiar insieme ancora intanto che sì drio smorosar. L’è vera che el omo no l’è gnancora el paron dela dona parché valtri no sì gnancora una fameia. Ma, studiar insieme ndarà giutarve a capir come che la ze la amicìssia un del altro con Geovà. Varda el esémpio de Max e Laysa, che i ze dei Stati Unidi. Lori i ga dito: “Quando ghemo scominsià a smorosar, ghemo studià publicassion che le parlea sora smorosar, sora el matrimònio e sora la vita in fameia. Studiar queste robe ne ga giutà a parlarse de assunti che fursi no ndarìssino mai scominsiar a discorer.”

ALTRE ROBE IMPORTANTE

9. Cossa che ve giutarà a dessider a chi contar che sì drio smorosar?

⁹ Chi che ga de saver? Quando scominsié a smorosar, fursi, podé dessider contarghe sol a qualche persone. (Pro. 17:27) Cossita, tute le altre persone no le volerà saver una mùcia de robe sora valtri e no le ndarà seitar a domandar quando ndaré maridarve. Ma, se valtri dessidì no dir gnente a nissuni, pol esser che taché a far le robe de scondon e a restar massa tempo valtri soli. Questo l’è un perìcolo. Saria bon dir che sì drio smorosar a persone che le ndarà giutarve e darve boni consili. (Pro. 15:22) Par esémpio, podé contarghe a persone dela fameia, bravi amighi o a ansiani dela congregassion.

10. Come un fradel e una sorela i pol smorosar de una maniera che ghe dà onor a Geovà? (Proverbi 22:3)

¹⁰ Come smorosar de una maniera che ghe dà onor a Geovà? L’è importante farse questa domanda parché i sentimenti che gavé un par el altro i deventa pi forti col tempo. Alora, cossa che pol giutarve a seitar a far tuto polito? (1 Cor. 6:18) No sté restar valtri soli, parlar de robe imorai gnanca bever massa. (Efe. 5:3) Queste robe pol far cresser la voia de far sesso e sarà pi fadiga far quel che l’è giusto. Alora, parlé sempre de come che valtri podé mostrarve rispeto un al altro e far quel che Geovà el dise che l’è giusto. (Ledi Proverbi 22:3.e) Varda el esémpio de Dawit e Almaz, che i ze dela Etiòpia. Lori i ga dito: “Mai resteino noantri soli casa o nte un auto. Invesse, resteino sempre in posti ndove che ghen’era tanta gente o insieme ai nostri amighi. Cossita, semo stati boni de contentar a Geovà intanto che èrino drio smorosar.”

11. Come che un fradel e una sorela che i ze drio smorosar i pol dessider come mostrar i so sentimenti un par el altro?

¹¹ L’è giusto che due che i ze drio smorosar i mostre che i se vol ben? Intanto che sì drio smorosar, valtri ve volaré cada volta pi ben e fursi vegnarà la voia de dimostrar questi sentimenti un par el altro. Ma, se la voia de far sesso la deventa pi forte, sarà pi difìcile far bone dessision. (Cànt. 1:2; 2:6) Quando mostré che ve volé ben un al altro, pol esser pi fadiga controlarve e far quel che ghe piase a Geovà. (Pro. 6:27) Alora, quando valtri scominsié a smorosar, gavé de parlarve sora come dimostrar che ve volé ben de una maniera che ghe piase a Geovà.f (1 Tes. 4:3-7) Domandéve: ‘Come che le persone ndove semo de star le dimostra che le se vol ben? Se femo queste robe, sarà che scominsiaremo a gaver voie sbaliade?’

12. Parché che gavé de star atenti se vien fora problemi intanto che smorosé?

¹² Come che podé dàrghene fora coi problemi? Cossa gavé de far se dele volte vien fora problemi? Sarà che questo vol dir che no sì mia boni un par el altro? Nò, parché quei che i ze maridadi no i ze sempre intesi intrà de lori. Un matrimònio forte l’è fato de due persone che le ze bone de dàrghene fora coi so problemi dela maniera giusta. Alora, la maniera che valtri sì boni de dàrghene fora coi vostri problemi la mostra come che saria el vostro matrimònio. Podé domandarve insieme: ‘Semo boni de parlarse con calma e rispeto? Semo boni de dir che ghemo sbalià e de cambiar quando ghe ocore? Volemo sempre gaver rason, o semo boni de acetar quel che quelaltro el pensa, domandar scusa e perdonar?’ (Efe. 4:31, 32) Ma se intanto che smorosé, seité a barufar e no sì mai intesi, no sté pensar che questo ndarà cambiar e deventar meio dopo maridadi. Se te te nircordi che quel’altra persona no la sarà bona par ti, la meio dessision par valtri due la sarà de fermarve de smorosar.g

13. Cossa che pol giutar un fradel e una sorela a dessider quanto tempo smorosar?

¹³ Quanto tempo gavé de smorosar? Se no ghe pensemo ben vanti de far una dessision, pol esser che femo robe sbaliade. (Pro. 21:5) Alora, gavé de smorosar el tempo che ve ocore par cognosserve un al altro. Ma no sté tirarla massa longa. La Bìblia la dise: “Quando no sucede quel che se speta, el cuor el sofre.” (Pro. 13:12) Gavé de ricordarve che de pi tempo che passé insieme, pi ve vegnarà la voia de far sesso e pi fadiga sarà far quel che Geovà el ghe piase. (1 Cor. 7:9) Par quela, invesse de pensar quanto tempo gavé de smorosar, podé domandarve: ‘Par dessider maridarme o nò, cossa che ancora go de saver de quel’altra persona?’

COME CHE PODEMO GIUTAR QUEI CHE I ZE DRIO SMOROSAR?

14. Come che podemo giutar i nostri amighi che i ze drio smorosar? (Varda anca el ritrato.)

¹⁴ Se cognossemo un fradel o una sorela che i ze drio smorosar, come che podemo giutarli? Podemo convidarli par magnar con noantri, par vegner ala nostra adorassion in fameia o par ndar a spasso insieme. (Rom. 12:13) Cossita, lori i podarà cognosserse de pi. E se lori i ghe ocore de qualchedun par ndar insieme nel auto o de un posto par parlarse intrà de lori, sarà che podemo giutarli? (Gàl. 6:10) Alicia, che ghemo parlà vanti, la se ricorda de quel che ela e so omo i ghe piasea tanto quando i era drio smorosar. Ela la ga dito: “Èrino tanto contenti quando qualche fradel o sorela i ne convidea par ndar casa soa. Cossita, podeino parlar intrà de noantri sensa esser massa distante de altre persone.” Se un fradel e una sorela che i ze drio smorosar i ne domanda de passar tempo con lori, ghemo de ricordarse che questa la ze una bela maniera de giutarli. Ghemo de star atenti de no assarli massa distante dei altri, ma anca ghemo de capir quando lori i ga de bisogno de un tempo sol lori due. — Fil. 2:4.

15. Che nantra roba i amighi i pol far par giutar quei che i ze drio smorosar? (Proverbi 12:18)

¹⁵ Nantra roba che podemo far par giutar quei che i ze drio smorosar la ze star atenti a quel che disemo. Par quela, ghemo de controlarse. (Ledi Proverbi 12:18.h) Par esémpio, pol esser che semo premosi de dir in volta che due amighi i ga scominsià a smorosar. Ma, fursi lori due i vol dar questa notìssia ai altri. No ghemo de parlar de quel che i fà gnanca parlar mal de lori ai altri. (Pro. 20:19; Rom. 14:10; 1 Tes. 4:11) Gnanca no ghemo de seitar a domandar quando che i ndarà maridarse. Varda quel che Elise e so omo i ga dito: “Dele volte, arquante persone le ne domandea quando che ndeino maridarse e come che saria el nostro matrimònio. No saveino gnanca cossa risponder, parché no gaveino gnancora parlà intrà de noantri sora questo assunto.”

16. Se un fradel e una sorela i se ferma de smorosar, cossa che ghemo de far?

¹⁶ E cossa che ghemo de far se un fradel e una sorela i desside de fermarse de smorosar? Noantri no ghemo mia de scuriosar, farghe domande o proar capir se qualchedun ga colpa de quel che ga sucedesto. (1 Pie. 4:15) Una sorela de nome Lea la ga dito: “Quando mi me go fermà de smorosar, go sentio che le persone intorno de mi le se domandea parché mi gavea fato questa dessision. Son restada tanto mal!” Come ghemo dito prima, quando due persone le se ferma de smorosar, no vol dir che le ga fato qualcossa de sbalià. Invesse, fursi lore le ga capio che saria meio no maridarse. Ancora cossita, quando due persone le desside fermarse de smorosar, pol esser che le ndarà sentirse sole e disgustade. Alora, ghemo de star atenti de catar fora maniere de giutarle. — Pro. 17:17.

17. Cossa che quei che i ze drio smorosar i ga de far?

¹⁷ Come ghemo imparà in questo stùdio, quando un fradel e una sorela i scomìnsia a smorosar, lori i gavarà dificoltà. Ma anca i gavarà bele robe. Una sorela de nome Jessica la ga dito: “Smorosar qualchedun l’è un laorasso. Ma son contenta de saver che ghemo doperà questo tempo par cognosserse ben!” Alora, se valtri sì drio smorosar, seité a sforsarve de cognosser ben un al altro. Cossita, valtri faré una bona dessision.