Dopera la Bìblia come un spècio

Tiago el ga scrito che la Bìblia la ze come un spècio parché la ne giuta a veder quel che semo pròpio e quel che ghemo rento el cuor. (Tia. 1:22-25) Come che podemo doperar la Bìblia come se la fusse un spècio?

Ledi pin pian. Se noantri se vardemo massa svelto nte un spècio, fursi assaremo de veder quel che ne tocaria rangiar o meter a posto. La medèsima roba la pol suceder quando ledemo la Bìblia. Se la ledemo massa svelti, no saremo boni de capir quel che ne ocore cambiar. Alora, ne ocore leder la Bìblia pin pian e con tanta atension.

Varda quel che ti te ghè de cambiar e nò i altri. Quando se vardemo nte un spècio, dele volte semo boni de vardar anca i altri. Pol esser che scominsiemo a vardar quel che lori i gavaria de meter a posto invesse de vardar a noantri. La medèsima roba pol suceder quando ledemo la Bìblia e pensemo in quel che i altri i ga de cambiar invesse de noantri. Se femo cossita, no saremo boni de deventar persone meio.

No stà pensar che te toca esser perfeto. Se noantri se vardemo nte un spècio e sol vardemo quel che no ne piase mia, restaremo desanimadi. Par quela, quando ledemo la Bìblia, no ne ocore pensar che ne toca far una mùcia de robe che Geovà no’l speta mia. — Tia. 3:17.