STÙDIO 18
CÀNTICO 65 Ndemo far sempre meio par Geovà!
Gióveni, fé compagno a Marco e a Timòteo
“Quando te vien, mename Marco, parché lu el me va ben nel laoro par Dio.” — 2 TIM. 4:11.
COSSA CHE NDAREMO IMPARAR?
In questo stùdio, ndaremo veder cossa che i gióveni i pol imparar del esémpio de Marco e Timòteo, come che i pol gaver bele qualità e far de pi par giutar i altri.
1-2. Che dificoltà fursi Marco e Timòteo i ga bio par servir a Geovà?
GIÓVENO, semo sicuri che te vol far de pi par Geovà e che te vol giutar la congregassion. Restemo contenti de veder tanti gióveni che i vol giutar i altri. (Sal. 110:3) Ma pol esser che te pensi che l’è massa fadiga far tuto questo. Fursi te te ghè tirà indrio de ndar de star in nantro posto par giutar parché te gavei paura. O pol esser che no te ghè acetà un laoro nela organisassion parché te pensei che no te sarissi bon de farlo. Ma seto che anca altre persone le se ga sentio cossita?
2 Marco e Timòteo i se ga sentio compagno a ti. Ma anca se i gavea paura e i pensea che no i saria boni de far el so laoro, lori i ga proà far de pi par Geovà. Pol esser che Marco el fusse de star insieme de so mare nte una bela casa quando el apòstolo Paolo e Barnabè i lo ga convidà par far un viaio missionàrio. (Ati 12:12, 13, 25) Lu el ga acetà star distante dela so fameia parché el volea far de pi par Geovà. Prima, lu l’è ndato de star nela Antiochia, e dopo, l’è ndato a posti ancora pi distanti con Paolo e Barnabè. (Ati 13:1-5) Fursi, anca Timòteo l’era de star insieme dei so genitori quando Paolo lo ga convidà par ndar insieme nte un viaio. Lu l’era gióveno e fursi el pensea che no’l saria bon de giutar Paolo. (Varda anca 1 Corinti 16:10, 11 e 1 Timòteo 4:12.) Ancora cossita, Timòteo el ga acetà el convite de Paolo e el ga bio tanta alegria nel so laoro a Geovà. — Ati 16:3-5.
3. (a) Come che savemo che Paolo el ghe dea tanto valor a Marco e a Timòteo? (2 Timòteo 4:6, 9, 11) (Varda anca la ilustrassion.) (b) Cossa che ndaremo imparar in questo stùdio?
3 Ancora de gióveni, Marco e Timòteo i ga imparà a tender de arquanti laori nela congregassion. Quando Paolo el savea che presto el ndaria morir, el ga domandà a questi bravi gióveni che i fusse visitarlo. Sicuro che Paolo el ghe dea tanto valor. (Ledi 2 Timòteo 4:6,a 9,b 11.c) Alora, in questo stùdio, ndaremo imparar sora le bele qualità che Marco e Timòteo i gavea, come che i gióveni i pol ndar drio el so esémpio e come i bei consili de Paolo i pol giutar i gióveni ancoi.
Marco e Timòteo i ga acetà far laori importanti ancora de gióveni. Par quela, Paolo el ghe dea tanto valor a questi gióveni (Varda el paràgrafo 3.)h
MARCO EL GAVEA CARO DE GIUTAR I ALTRI
4-5. Come che Marco el ga mostrà che el gavea caro de giutar i altri?
4 Servir ai altri vol dir sforsarse par giutarli e seitar a farlo anca se l’è fadiga. Marco l’era pròpio cossita. Pol esser che lu l’è restà disgustà quando Paolo no’l ga volesto che lu el fusse insieme nte un viaio par predicar. (Ati 15:37, 38) Ma ancora cossita, Marco el ga seità a sforsarse par servir ai so fradei e sorele.
5 Marco l’è ndato de star in nantro posto par predicar insieme del so primo cusin, Barnabè. Intorno de 11 ani dopo, lu l’è ndato a Roma par incoraiar Paolo, che l’era in preson. (Filém. 23, 24) Paolo el ghe dea tanto valor a quel che Marco el gavea fato che el ga dito che lu l’era “una fonte de grando consolo”. — Col. 4:10, 11.
6. Che bele robe ga sucedesto con Marco quando l’è restà insieme de bravi fradei? (Varda la nota.)
6 Marco sempre l’era insieme a bravi fradei e el ga imparà tanto de lori. Par esémpio, dopo de star un tempo insieme de Paolo in Roma, lu l’è ndato a Babilònia par laorar insieme del apòstolo Piero. Lori i ze deventadi boni amighi e Piero lo vedea come un fiol. (1 Pie. 5:13) Intanto che i laorea insieme, pol esser che Piero el ghe ga parlà sora tuto quel che Gesù el gavea fato. Alora, Marco l’è stà bon de scriver tante robe sora Gesù nel libro dela Bìblia che el ga so nome.d
7. Come che un gióveno de nome Seung-Woo l’è ndato drio el esémpio de Marco? (Varda anca el ritrato.)
7 Marco sempre el se sforsea de gaver tanto de far nel so laoro a Geovà e de star insieme a bravi fradei. Come che te pol ndar drio el so esémpio? Pol esser che te vol esser un servo ministerial o un ansiano par giutar i to fradei. Ma no stà restar desanimà se ancora no te sì stà bon de rivarghe. Invesse, porta passiensa e va in serca de quel che te pol far par giutar i altri e la congregassion. Varda quel che ga sucedesto Seung-Woo, un fradel che adesso l’è ansiano. Quando lu l’era pi gióveno, lu el vedea che altri gióveni i gavea de pi laori che lu. Seung-Woo l’è restà tanto desanimà parché el pensea che i altri no ghe badea. Alora, lu el ga parlà ai ansiani come che lu l’era drio sentirse. Un dei ansiani el ghe ga dito che el gavea de far el so meio par giutar i altri, anca se nissun vedesse quel che lu l’era drio far. Seung-Woo el ga metesto in pràtica questo consìlio e el ga scominsià a giutar i fradei pi veci che i gavea bisogno de aiuto par ndar ale riunion. Lu el ga dito: “Cossita, mi go capio cossa che vol dir servir ai altri e go visto come che giutarli me dà tanta alegria.”
Parché che l’è bon che i gióveni i gàpia amicìssia coi fradei pi veci? (Varda el paràgrafo 7.)
TIMÒTEO EL SE PREOCUPEA TANTO COI ALTRI
8. Parché che Paolo el ga convidà Timòteo par vegner insieme de lu nel so viaio? (Filipensi 2:19-22)
8 Paolo el gavea de tornar ale cità che el gavea belche infrontà perseghission. Par quela, el volea viaiar insieme de fradei coraiosi. Alora, prima, lu el ga convidà Sila, un fradel che el adorea a Geovà fea tanti ani. (Ati 15:22, 40) Dopo, Paolo el ga convidà el gióveno Timòteo. Parché? Parché le persone le parlea robe bone de Timòteo, e Paolo el ga visto che el se preocupea tanto coi altri. — Ati 16:1, 2; ledi Filipensi 2:19-22.e
9. Come che Timòteo el ga mostrà che el se preocupea coi so fradei e sorele?
9 Dopo che ga scominsià a viaiar insieme de Paolo, Timòteo el ga mostrà che el se preocupea de pi coi altri che con lu stesso. Par quela, Paolo el ga domandà che Timòteo el restesse in Berea par incoraiar quei che i era pena deventadi dissìpoli de Gesù. (Ati 17:13, 14) In quela volta, anca Sila l’è restà in Berea insieme de Timòteo. Sicuro che Timòteo el ga imparà tanto del esémpio de Sila. Dopo de un tempo, Paolo el ga domandà che Timòteo el fusse lu sol a Tessalònica par incoraiar i fradei. (1 Tes. 3:2) Nei 15 ani dopo, Timòteo el ga imparà a amar tanto i so fradei e sorele e a ‘piander con quei che i piandea’. (Rom. 12:15; 2 Tim. 1:4) Come che i gióveni ancoi i pol ndar drio el esémpio de Timòteo?
10. Come che un fradel de nome Woo Jae el ga imparà a preocuparse de pi coi altri?
10 Varda cossa che ga giutà un fradel de nome Woo Jae a preocuparse de pi coi altri. Quando l’era gióveno, ghe fea fadiga ciacolar coi fradei e sorele pi veci. Nele riunion, lu sol li saludea e no ghe parlea pi gnente. Alora, un ansiano el ga dito che saria bel se lu el se sforsesse de ciacolar coi altri e dirghe quel che ghe piase in lori. Quel ansiano el ghe ga dito che el podaria anca pensar in quel che i altri ghe piaseria de parlar. Lu el ga metesto in pràtica quel bel consìlio. Woo Jae, che adesso l’è ansiano, el ga dito: “Ancoi l’è fàcile par mi ciacolar coi gióveni e anca coi pi veci. Mi resto contento de cognosser de pi i fradei e sorele e saver dele so dificoltà. Alora, son bon de giutarli parché go capio quel che i ga de bisogno.”
11. Come che i gióveni i pol imparar a preocuparse coi altri nela congregassion? (Varda anca el ritrato.)
11 Anca ti che te sì gióveno pol imparar a preocuparte coi altri. Alora, quando te sì nele riunion, proa ciacolar con tuti i fradei e sorele. Domandaghe se l’è tuto polito con lori e dopo scoltali con atension. Cossita, te ndarè capir quel che te pol far par giutarli. Par esémpio, fursi un fradel pi vècio el ga bisogno de aiuto par doperar el aplicativo JW Library®. Alora, proa ti giutarlo. O pol esser che nissun no lo ga gnancora convidà par ndar ala predicassion in quel fin de stimana. Alora, proa ti convidarlo par ndar insieme. Quando te te sforsi de giutar i fradei e sorele dela congregassion, te deventi un bel esémpio par tuti.
I gióveni i pol giutar tanto nela congregassion (Varda el paràgrafo 11.)
I CONSILI DE PAOLO POL GIUTARTE
12. Come che i consili de Paolo a Timòteo pol giutar anca a ti?
12 I consili che Paolo el ga dato a Timòteo lo ga giutà a esser felice e a far el so meio a Geovà. (1 Tim. 1:18; 2 Tim. 4:5) Se te sì un gióveno, questi consili i pol giutar anca a ti. Come? Proa leder le carte che Paolo el ga scrito a Timòteo come se le fusse state scrite par ti, e sfòrsate de meter in pràtica questi consili. Adesso, ndemo veder arquanti de questi consili.
13. Cossa che ndarà giutarne a seitar leai a Geovà?
13 “Trena a ti stesso col ogetivo de mostrar devossion a Dio.” (1 Tim. 4:7b) “Devossion a Dio” vol dir esser leal e far quel che ghe piase a lu. Ma noantri no semo nassesti con questa qualità. Alora, ghemo de sforsarse par imparar a gaverla. Nel greco, le parole “trena a ti stesso” le era doperade par parlar del sforso che le persone le fea quando se pareciea par una competission. Queste persone le gavea de sforsarse tanto par far quel che le giutaria a vinser. Dela medèsima maniera, ghemo de sforsarse tanto par far quel che ndarà giutarne a gaver una amicìssia pi forte con Geovà.
14. Qual che ga de esser el to ogetivo quando te ledi la Bìblia? Parla de un esémpio.
14 Una roba tanto importante che ghemo de far la ze leder la Bìblia tuti i giorni. Ma no stà desmentegarte che el to ogetivo l’è lederla par far la to amicìssia con Geovà restar cada volta pi forte. Par esémpio, metemo dir che te sì drio leder sora quando Gesù el ga parlà con un gióveno sior. (Mar. 10:17-22) Quel gióveno el credea che Gesù l’era el Messia, ma ghe manchea fede par deventar so dissìpolo. Ancora cossita, Gesù lo ga vardà con amor e ghe ga parlà con bontà, parché el volea che quel gióveno el fesse la meio dessision. Gesù l’era drio mostrar el amor che Geovà el sentia. (Gio. 14:9) Alora, te pol domandarte cossa che quel che te ghè ledesto te insegna sora Geovà. Dopo, proa pensar sora come che te pol meter in pràtica quel che te ghè imparà. Te pol domandarte: ‘Come che mi posso far ancora pi forte la me amicìssia con Geovà e giutar de pi i altri?’
15. Parché che l’è importante che i gióveni i devente un bel esémpio par i altri? Parla de un esémpio. (1 Timòteo 4:12, 13)
15 “Deventa un esémpio par i fedeli.” (Ledi 1 Timòteo 4:12, 13.f) Paolo el ga dito a Timòteo che ghe ocorea gaver arquante abilità, come leder e insegnar ben. Ma lu anca el ga dito che el gavea de esser amoroso, fedele e puro. Parché? Parché quel che una persona la fà l’è pi importante de quel che la parla. Metemo dir che te ndarè far un discorso sora meterghela tuta nela predicassion. Sarà pi fàcile par ti parlar sora questo se te sì belche drio sforsarte par far questo laoro. E te pol esser sicuro che tuti nela congregassion i gavarà caro de ndar drio el to bel esémpio. — 1 Tim. 3:13.
16. (a) Che sinque robe un gióveno el pol far par esser un bon esémpio? (b) Come che un gióveno el pol esser ‘un esémpio nel parlar’?
16 In 1 Timòteo 4:12, Paolo el parla de sinque robe che i gióveni i pol far par esser un bon esémpio. Alora, cossa pénsito de leder, studiar e meter in pràtica el consìlio de Paolo? Metemo dir che te vol deventar ‘un esémpio nel parlar’. Cossa che te pol far? Proa pensar come doperar quel che te parli par incoraiar i altri. Se te sì de star coi to genitori, sarà che te podarissi ringrassiar de pi par quel che i te fà? Quando te sì nele riunion, sarà che te podarissi ringrassiar la parte che un fradel o una sorela ga fato e dirghe quel che te ga piasesto? E quando te vè far un comentàrio, proa dir quel che te ghè capio cole to parole. Sicuro che, se te te sforsi de esser un esémpio nel parlar, tuti i vederà che te sì drio deventar un bravo servo de Geovà. — 1 Tim. 4:15.
17. Cossa che pol giutar un gióveno a far de pi par Geovà? (2 Timòteo 2:22)
17 “Scampa via dele voie che i gióveni i ga, ma sfòrsate par gaver la giustìssia.” (Ledi 2 Timòteo 2:22.g) Paolo el ga dito a Timòteo che lu el gavea de scampar via dele robe che podaria intrigarlo de far de pi par Geovà, o rovinar la so amicìssia con lu. E ti, come che te pol meter in pràtica questo consìlio? Fursi te te nicordi che no te fè robe che le ze sbaliade, ma che le te ciava el tempo che te podarissi doperar par far pi forte la to amicìssia con Geovà. Par esémpio, proa pensar nel tempo che te doperi nela internet, par giugar o par divertirte. Sarà che te podarissi doperar un poco de questo tempo par far de pi par Geovà e par giutar i altri? Fursi te podarissi giutar a tender del Salon del Regno, ndar ala predicassion o al careto. Se te fè questo, te pol gaver amighi novi che i te giutarà a far pi forte la to amicìssia con Geovà.
SERVI AI ALTRI E GÀPIA TANTA ALEGRIA
18. Parché che podemo dir che Marco e Timòteo i ga bio tanta alegria?
18 Marco e Timòteo i ga cambià la so vita par giutar i altri. Par quela, lori i ga fato bele robe e i ga bio tanta alegria. (Ati 20:35) Marco el ga viaià fin posti pròpio distanti par giutar i so fradei. Lu anca el ga scrito un libro dela Bìblia che parla dela vita de Gesù. Timòteo el ga giutà Paolo a scominsiar tante congregassion e el ga incoraià tanto i fradei e sorele. Sicuro che Geovà l’è restà contento de veder tuto quel che Marco e Timòteo i ga fato de volentiera nela adorassion a lu.
19. Parché che i gióveni i ga de star atenti ai consili che Paolo el ga dato a Timòteo, e cossa ndarà suceder se i li mete in pràtica?
19 Quando ledemo le carte che Paolo el ga scrito a Timòteo, vedemo che lu lo amea tanto. Ma quando ledemo queste carte, vedemo come Geovà el ama anca a ti che te sì gióveno. Lu el vol che te gàpia tanta alegria. Alora, sfòrsate de meter in pràtica i consili de Paolo e de giutar i altri. Cossita, te gavarè tanta alegria adesso e te sarè ‘firme ala speransa dela vera vita’. — 1 Tim. 6:18, 19.
CÀNTICO 80 Proa e vedi che Dio l’è bon!
a (2 Timòteo 4:6) Parché mi son belche stà trato par sora come una oferta de bebida, e la ora dela me liberassion la ze darente.
b (2 Timòteo 4:9) Fà tuto quel che te pol par vegner catarme suito.
c (2 Timòteo 4:11) Sol Luca l’è con mi. Quando te vien, mename Marco, parché lu el me va ben nel laoro par Dio.
d Piero l’era una persona con forti sentimenti. Alora, l’è stà fàcile contar a Marco no sol quel che Gesù el ga fato e el ga dito, ma anca come el se sentia. Par quela che, nel libro che el ga scrito, lu el ga parlà tante volte de quel che Gesù el ga fato e el ga sentio. — Mar. 3:5; 7:34; 8:12.
e (Filipensi 2:19-22) Se el Signor Gesù el vol, vao suito mandarve Timòteo. Cossita vao esser incoraià de saver notìssie de valtri. 20 Parché no go nissun altro cola disposission compagna ala soa. Lu el ve tenderà pròpio ben. 21 Parché tuti i altri i ze drio ndar in serca dei so interessi, nò dei interessi de Gesù Cristo. 22 Ma valtri savé che lu el ga dimostrà el so valor. Come un fiol insieme so pare, lu el ga laorà come un schiavo insieme de mi nela predicassion dele bone notìssie.
f (1 Timòteo 4:12, 13) No stà assar che nissuni te manche de rispeto parché te sì gióveno. Pitosto deventa un esémpio par i fedeli nel parlar, nela condota, nel amor, nela fede, nela castità. 13 Fin che mi vegno, seita sforsarte par leder in pùblico, par dar consili, e par insegnar.
g (2 Timòteo 2:22) Alora, scampa via dele voie che i gióveni i ga, ma sfòrsate par gaver la giustìssia, la fede, el amor e la pace, insieme a quei che i se fida nel Signor con un cuor puro.
h ILUSTRASSION: Marco l’è drio giutar Paolo e Barnabè nte un viaio. Timòteo l’è contento de visitar una congregassion par incoraiar i fradei e sorele.