STÙDIO 26
CÀNTICO 123 De volentiera obedimo a Geovà e ala organisassion
Sìpia ùmile e aceta che ghen’è tante robe che no te sè mia
“No semo mia boni de capir el Tuto Poderoso.” — GIÒ 37:23.
COSSA CHE NDAREMO IMPARAR?
In questo stùdio, ndaremo veder che podemo dàrghene fora cole dificoltà quando se fidemo in Geovà e se sforsemo de pensar in quel che savemo, invesse de preocuparse con quel che no savemo mia.
1. Come che Geovà el ne ga fato, e parché?
GEOVÀ el ne ga fato cola capacità de pensar, imparar robe nove e saver meter in pràtica quel che imparemo. Parché che lu el ne ga fato cossita? Parché el vol che femo bone dessision de acordo con quel che ghemo imparà sora lu. — Pro. 2:1-5; Rom. 12:1.
2. (a) Cossa che ghemo de capir sora noantri stessi? (Giò 37:23, 24) (Varda anca la ilustrassion.) (b) Parché che l’è importante capir che no savemo tute le robe?
2 Geovà el ne ga fato cola capacità de imparar tante robe, ma no semo boni de saver de tuto. (Ledi Giò 37:23, 24.a) Varda el esémpio de Giò. Geovà el ghe ga fato una mùcia de domande par giutarlo a nicorderse che ghen’era tante robe che lu no’l savea mia. Questo lo ga giutà a esser ùmile e a cambiar la so maniera de pensar. (Giò 42:3-6) L’è importante che anca noantri capimo che no savemo de tuto. Cossita, ndaremo fidarse che Geovà ne giutarà a saver quel che ne ocore par far bone dessision. — Pro. 2:6.
Capir che no savemo tuto pol giutarne tanto, cossita come ga giutà a Giò (Varda el paràgrafo 2.)
3. Cossa che ndaremo veder in questo stùdio?
3 In questo stùdio, ndaremo veder arquante robe che no savemo e le dificoltà che pol vegner fora de no saverle. Anca ndaremo veder parché che l’è bon no saver de tute le robe. Questo stùdio ndarà far pi forte la nostra fede in Geovà, el Dio che el sa tuto e che ne dise sempre quel che ne ocore saver. — Giò 37:16.
NO SAVEMO QUANDO VEGNARÀ EL FIN
4. De acordo con Mateo 24:36, cossa che noantri no savemo?
4 Ledi Mateo 24:36.b Noantri no savemo quando vegnarà el fin de questo bruto mondo. Quando Gesù l’era qua nela Tera, gnanca lu no’l savea el giorno del fin.c Lu el ga dito ai so apòstoli che sol Geovà el ga el dirito de scòlier quando arquante robe ndarà suceder. (Ati 1:6, 7) Geovà el ga belche scoliesto el giorno del fin, ma noantri no savemo quando che el sarà.
5. Che dificoltà fursi ghemo come no savemo el giorno del fin?
5 Come no savemo el giorno del fin, gnanca no savemo quanto ancora ne tocarà spetar fin che el vegna. Alora, fursi restemo desanimadi o ansiosi, e pol esser ancora pedo se semo drio spetarlo romai fà tanto tempo. Noantri anca podemo restar desanimadi se qualchedun dela nostra fameia o altra persona ne ride drio parché el fin no l’è gnancora rivà. (2 Pie. 3:3, 4) Par quela, fursi arquanti i pensa che se i savesse el giorno del fin saria pi fàcile portar passiensa e dàrghene fora con quei che i ne ride drio.
6. Parché che l’è bon no saver el giorno del fin?
6 Parché che l’è bon no saver el giorno del fin? Cossita, podemo mostrar a Geovà che lo servimo parché lo amemo e se fidemo in lu. Noantri volemo servir a Geovà par sempre, e nò fin che riva el so giorno. Alora, invesse de pensar in quando vegnarà el fin, l’è meio pensar in come sarà la vita dopo che el riva. Cossita, saremo boni de restar cada volta pi amighi de Geovà, fidarse ancora de pi in lu e far el meio che podemo par contentarlo. — 2 Pie. 3:11, 12.
7. Cossa che noantri savemo?
7 Ma cossa che noantri savemo? Savemo che i ùltimi giorni ga scominsià in 1914. Nela Bìblia, Geovà el ne ga dato tante professie che le prova che i ùltimi giorni i ga scominsià in questo ano. La Bìblia anca la dise come che saria el mondo de 1914 avanti. Par quela, semo sicuri che el ‘grando giorno de Geovà l’è darente’. (Sof. 1:14) Noantri anca savemo che Geovà el vol che predichemo le “bone notìssie del Regno” a tute le persone. (Mat. 24:14) Questo laoro l’è fato in de pi de mila léngue e in de pi de 240 paesi. Alora, no ne ocore saver el giorno del fin par meterghela tuta nel laoro de predicassion.
NO SAVEMO COME GEOVÀ EL NDARÀ GIUTARNE
8. Cossa che l’è “el laoro del vero Dio”? (Eclesiasti 11:5)
8 Tante volte, noantri no capimo “el laoro del vero Dio”. (Ledi Eclesiasti 11:5.d) Ma cossa elo “el laoro del vero Dio”? L’è quel che Geovà el fà suceder e quel che el assa che suceda par far quel che el vol. Alora, no ghemo come saver sempre quel che Geovà el farà par giutarne o parché el ga assà che una roba sucedesse. (Sal. 37:5) La Bìblia la dise che no semo boni de cognosser el laoro del vero Dio, cossita come no capimo del tuto come un bambin el cresse rento la mare. Gnanca i dotori che i stùdia tanto no i ze boni de capir del tuto come che questo sucede. Dela medèsima maniera, anca noantri no semo boni de capir del tuto la maniera che Geovà el fà le robe.
9. Cossa che fursi scominsiemo a sentir?
9 Come ghemo visto, no savemo come Geovà el ndarà giutarne. Par quela, pol esser che scominsiemo a gaver sentimenti e preocupassion che ne intriga de far de pi par Geovà. Par esémpio, pol esser che se tiremo indrio de viver con manco robe e manco soldi o de ndar de star nte un posto che ghe ocore de aiuto nela predicassion. O fursi pensemo che Geovà no l’è contento con noantri parché el laoro che èrino drio far nela organisassion no l’è ndato ben o parché no semo drio insegnar la Bìblia a nissuni.
10. Che qualità imparemo a gaver quando no savemo tuto?
10 Gaver sempre in mente che no savemo de tuto ne giuta a esser ùmili. Parché? Parché ndaremo capir che quel che sa de tuto l’è Geovà e che no semo noantri che ghemo de saver. (Isa. 55:8, 9) Noantri anca imparemo a fidarse che Geovà el ndarà far tuto dela meio maniera. Alora, quando sucede robe bone nela predicassion o femo un bel laoro nela organisassion, noantri ghe demo el onor a Geovà. (Sal. 127:1; 1 Cor. 3:7) E quando le robe no le va mia come speteino, se ricordemo che Geovà el pol far suceder tuto quel che el vol. (Isa. 26:12) Cossita, femo el nostro meio e se fidemo che Geovà el ndarà giutarne in quel che ne ocore, anca se lu no’l fà pi miràcoli come nel passà. — Ati 16:6-10.
11. Cossa che noantri savemo?
11 Ma cossa che noantri savemo? Che Geovà el fà tuto con amor, giustìssia e sabedoria. Noantri anca savemo che el ghe dà tanto valor a quel che femo par lu e par i nostri fradei e che el benedisse quei che i ze leai. — Ebr. 11:6.
NO SAVEMO QUEL CHE NDARÀ SUCEDER DOMAN
12. De acordo con Tiago 4:13, 14, cossa che no savemo?
12 Ledi Tiago 4:13, 14.e Noantri no savemo quel che ndarà sucederne doman. E la Bìblia anca la mostra che ‘pol suceder qualcossa rugna o che no spetemo mia’. (Ecl. 9:11) Par quela, noantri no savemo se quel che ghemo in mente de far ndarà ben o se saremo vivi par farlo.
13. Parché che pol esser fadiga ndar avanti quando no savemo quel che sucederà doman?
13 Pol esser fadiga ndar avanti quando no savemo quel che ndarà suceder doman. Parché? Pol esser che restemo tanto preocupadi con quel che pol suceder che perdemo la alegria. Par esémpio, saver che una roba bruta pol suceder de colpo pol farne restar triste e desanimadi. E quando le robe no le sucede come speteino, podemo restar disgustadi e stufi. — Pro. 13:12.
14. Cossa ghemo de far se volemo esser felici? (Varda anca la ilustrassion.)
14 Quando semo drio infrontar dificoltà, podemo provar che servimo a Geovà parché lo amemo e no parché spetemo qualcossa indrio. La Bìblia la mostra che no ghemo de spetar che Geovà el ne dae protession de tute le robe brute e che lu no’l ne dise cada roba che ndarà suceder nela nostra vita. Lu el sa che no ne ocore saver tuto quel che sucederà doman par gaver alegria. Invesse, semo felici se ndemo drio ale so orientassion e ghe obedimo. (Ger. 10:23) Quando se fidemo in Geovà par far una dessision, no restemo massa ansiosi con quel che vien fora dopo, e pensemo come Tiago, che el ga dito: ‘Se Geovà el vol, sarò vivo e ndarò far questo e quelaltro.’ — Tia. 4:15.
Geovà el ndarà protegerne se ndemo in serca dele so orientassion e ghe obedimo (Varda i paràgrafi 14 e 15.)g
15. Cossa che noantri savemo sora el futuro?
15 Noantri no savemo quel che ndarà suceder in tuti giorni dela nostra vita, ma savemo che Geovà el ga prometesto che podaremo viver par sempre. Noantri anca savemo che Geovà no’l pol contar busie e che gnente pol intrigarlo de far quel che el ga prometesto. (Tito 1:2) Sol Geovà el pol dir ‘del scomìnsio, el final’ e le robe che no le ga gnancora sucedesto. Geovà el ga fato quel che el ga prometesto nel passà e el farà la medèsima roba nel futuro. (Isa. 46:10) Noantri anca savemo che gnente pol intrigar Geovà de amarne. (Rom. 8:35-39) Lu sempre el ne darà la sabedoria, el consolo e la forsa che ne ocore par dàrghene fora con tuti i problemi. Alora, noantri podemo esser sicuri che Geovà el ndarà giutarne e benedirne. — Ger. 17:7, 8.
NO CAPIMO TUTO QUEL CHE GEOVÀ EL SA SORA NOANTRI
16. De acordo col Salmo 139:1-6, cossa che Geovà el sa sora noantri, e come te te senti de saverlo?
16 Ledi Salmo 139:1-6.f Geovà el sa tuto sora noantri. Lu el sa quel che pensemo e quel che sentimo. Lu anca el capisse quel che parlemo, quel che ghemo rento el cuor e el sa tuto quel che femo e parché lo femo. L’è par quela che el rè Davi el ga dito che Geovà l’è atento a noantri e sempre el sa cossa far par giutarne. Davi el ga scrito: “La to cognossensa la ze pi granda de quel che posso capir, e tanto alta che no son bon rivarghe.” (Sal. 139:6) Pensa che bel che l’è de saver che Geovà, el Tuto Poderoso che el ga creà el cielo e la Tera, el se preocupa con cada un de noantri.
17. Parché che fursi l’è fadiga creder che Geovà el se preocupa con noantri?
17 Parché che dele volte l’è fadiga creder che Geovà el se preocupa con noantri? Par via de qualcossa che ga sucedesto nela nostra fameia, dela nostra cultura o de robe che credeino vanti de imparar la verità. O pol esser che ghemo fato bruti sbali nel passà e se sentimo come Davi, che el ga pensà che Geovà no’l volea pi esser so amigo. (Sal. 38:18, 21) O fursi semo drio sforsarse tanto par cambiar una roba nela nostra vita par contentar a Geovà e se domandemo: ‘Se Geovà el capisse pròpio come che mi son, parché che el vol che mi càmbio?’
18. Parché che l’è bon saver che Geovà el ne cognosse meio che noantri stessi? (Varda anca la ilustrassion.)
18 Noantri ghemo de capir che Geovà el ne cognosse meio che noantri stessi e el vede le bele qualità che ghemo, anca se no le vedemo mia. L’è vera che lu el sa che sbaliemo, ma lu el ne ama tanto e el sa che volarìssino esser persone meio. (Rom. 7:15) Quando se nicordemo che Geovà el sa che podemo deventar persone meio, saremo ancora pi leai e lo serviremo con alegria.
Semo boni de dàrghene fora cole nostre dificoltà quando se fidemo nele bele promesse de Geovà (Varda i paràgrafi 18 e 19.)h
19. Cossa che noantri savemo sora Geovà?
19 Ma cossa noantri savemo? Semo sicuri che Geovà l’è amor. (1 Gio. 4:8) E vedemo che lu el ne ama parché tuto quel che el ne dise de far l’è el meio par noantri. Savemo che Geovà el vol che ghemo la vita eterna parché che el ga dato el so Fiol come sacrifìssio. Questo sacrifìssio ne assa sicuri che podemo contentar a Geovà, anca se sbaliemo. (Rom. 7:24, 25) Savemo anca che “Dio l’è pi grando che el nostro cuor e el sa tute le robe”. (1 Gio. 3:19, 20) Alora, ghemo de sempre ricordarse che Geovà el vede tuto quel che femo e el se fida che saremo boni de contentarlo.
20. Cossa pol giutarne a no restar massa ansiosi?
20 Geovà el ne dise tuto quel che ne ocore saver. Quando semo ùmili e acetemo che no semo boni de saver tuto, no restemo massa ansiosi e podemo doperar la nostra forsa par far le robe pi importante. Cossita, mostremo che se fidemo in Geovà, che l’è la persona che la sa tuto. (Giò 36:4) Anca se ancoi ghen’è robe che no capimo mia tanto ben, semo premosi par capirle in Paradiso, parché Geovà el seitarà a insegnarne par sempre. — Ecl. 3:11.
CÀNTICO 104 Pare, dame el to spìrito santo
a (Giò 37:23, 24) No semo mia boni de capir el Tuto Poderoso. Lu el ga tanto poder, e lu mai el ndarà contra la so giustìssia e la so granda integrità. 24 Alora, le persone ghe ocore gaver un grando rispeto par lu, parché no ghe piase mia quei che i pensa che i ga sabedoria.”
b (Mateo 24:36) “Sora quel giorno e quela ora nissuni i sa, gnanca i àngeli nel cielo, gnanca el Fiol, ma solche el Pare.
c Come Gesù el ndarà lotar contra Sàtana, capimo che adesso lu el sa el giorno del Armagedon e quando lu el ndarà “completar la so vitòria”. — Apo. 6:2, 19:11-16.
d (Eclesiasti 11:5) No te sé come che la forsa dela vita la laora nei ossi de un picinin che no l’è gnancora nassesto. Dela stessa maniera, no te sì bon de capir el laoro del vero Dio, quel che el fà tute le robe.
e (Tiago 4:13, 14) Scolté valtri che disé: “Ancoi o doman, ndaremo viaiar fin quela cità e passaremo un ano lì par far negossi e imuciar su soldi.”, 14 anca se no savé come sarà la vostra vita doman. Parché valtri sì come una nèbia che la càpita par un pochetin de tempo e dopo la sparisse.
f (Salmo 139:1-6) Ò Geovà, ti te me esamini e me cognossi. 2 Ti te sè quando me sento do e quando me levo su. De distante ti te capissi i me pensamenti. 3 Ti te me vedi quando son drio caminar e quando me buto do. Ti te cognossi ben tuto quel che mi fao. 4 Anca vanti che ghen sìpia una parola nela me léngua, ti, ò Geovà ti belche te la sè ben. 5 Ti te sì intorno de mi, davanti e de drio, e te meti sora mi la to man. 6 La to cognossensa la ze pi granda de quel che posso capir, e tanto alta che no son bon rivarghe.
g ILUSTRASSION: Un pare e el so fiol i ze drio pareciar un per de robe che ghe ndaria ben se sucedesse una desgràssia.
h ILUSTRASSION: Un fradel che l’è drio infrontar bruti colpi el pensa nele benedission che ghen sarà in Paradiso.