STÙDIO 37
CÀNTICO 114 Dimostremo passiensa
Cossa che pol giutarne se sofrimo par causa dele robe sbaliade che ghen’è nel mondo?
“Lu el spetea giustìssia, ma ghen’era sol ingiustìssia.” — ISA. 5:7.
COSSA CHE NDAREMO IMPARAR?
In questo stùdio, ndaremo imparar sora quel che Gesù el fea quando el vedea che le persone le era maltratade, e come che podemo far compagno a lu.
1-2. (a) Cossa che tanti i fà quando i vede le robe sbaliade che ghen’è nel mondo? (b) Cossa che ndaremo imparar in questo stùdio?
NOANTRI vivemo nte un mondo ndove tante persone le trata pròpio mal i altri. Tanti i ze maltratadi parché i ze poareti, par causa del posto de ndove i ze vegnesti, dela so cultura o dela so rassa. Altri i sofre parché i governanti o altre autorità sol i pensa de imuciar soldi invesse de preocuparse coi altri. Par causa de robe cossita, tuti noantri sofrimo.
2 Tanti ancoi i resta cativi de esser maltratadi o de veder che altri no i ze tratadi con giustìssia. Come tuti i vol viver in pace e con giustìssia, tanti i fà protesti contra i governanti e contra le lege, o i va drio ale persone che le promete cambiar le robe. Anca se se fidemo del tuto nel Regno de Dio e se savemo che no ghemo de far parte del mondo, pol esser che restemo disgustadi e fin cativi de veder tante robe sbaliade. (Gio. 17:16) Fursi se domandemo: ‘Cossa go de far adesso? Sarà che podaria far qualcossa par giutar quei che i sofre?’ Ndemo veder come Geovà e Gesù i se sente de veder le robe brute che ghen’è ancoi.
GEOVÀ E GESÙ I ÒDIA VEDER CHE LE PERSONE LE ZE MALTRATADE
3. Parché che no ne piase veder le persone esser maltratade? (Isaia 5:7)
3 No ne piase esser maltratadi gnanca veder persone esser tratade cossita parché semo stati creadi con qualità compagne a Geovà. Lu “el ama la integrità e la giustìssia”. (Sal. 33:5; Gén. 1:26) Lu mai el trata mal i altri e el resta disgustà quando el vede che le persone le ze maltratade. (Deu. 32:3, 4; Mic. 6:8; Zac. 7:9) Par esémpio, Isaia el ga dito che Geovà l’era drio scoltar i israeliti che i era drio ‘osar de tanto sofrir’. (Ledi Isaia 5:7.a) Par quela, Geovà el ga castigà quei che i era drio desobedir ala lege e i era drio tratar mal i altri. — Isa. 5:5, 13.
4. Come che Gesù el se sentia de veder le persone sofrir? (Varda anca la ilustrassion.)
4 Anca Gesù el ama la giustìssia e el òdia veder persone esser maltratade. Varda un esémpio. Quando lu l’era qua nela Tera, Gesù el ga visto un omo che el gavea una man desgrassiada. Alora, quel omo ghe ga fato pecà e lu lo ga curà. Ma, i lìderi religiosi i ze restadi cativi parché Gesù lo gavea curà nte un sabo, e la Lege la disea che no se podea far gnente de sabo. Lori i era pi preocupadi cola Lege che con quel omo che l’era drio tribolar. E come che Gesù el se ga sentio de veder quei lìderi religiosi? Lu l’è restà tanto disgustà de veder che lori no i se preocupea con quel omo. — Mar. 3:1-6.
I lìderi religiosi giudei i tratea mal le persone, ma Gesù el se preocupea con lore (Varda el paràgrafo 4.)
5. Cossa che ghemo de ricordarse se restemo massa cativi cole robe sbaliade che vedemo?
5 Come ghemo visto, Geovà e Gesù i ze restadi cativi quando i ga visto persone esser maltratade. Alora, no l’è mia sbalià se anca noantri se sentimo cossita. (Efe. 4:26) Ma ghemo de ricordarse che anca se restemo cativi, no saremo boni de finir coi problemi e podemo fin restar maladi o tanto desanimadi. (Sal. 37:1, 8; Tia. 1:20) Alora, el esémpio de Gesù pol giutarne tanto a saver quel che ghemo de far quando semo maltratadi o vedemo che altre persone le ze tratade cossita.
COSSA GESÙ EL GA FATO QUANDO EL GA VISTO CHE LE PERSONE LE ERA MALTRATADE?
6. Cossa che Gesù el ga visto quando l’era qua nela Tera? (Varda anca la ilustrassion.)
6 Quando l’era qua nela Tera, Gesù el ga visto tante persone esser maltratade. Par esémpio, lu el ga visto come lore le sofria par causa dela mùcia de règole che i lìderi religiosi i seitea a catar fora. (Mat. 23:2-4) Lu anca el ga visto come i giudei i era drio sofrir par causa dei romani e come lori i volea esser lìberi de questo governo. Par quela che un grupo de persone in quela època fin el ga fato guera contra i romani. Ma Gesù no li ga mai giutà a cambiar qualcossa nel governo. Invesse, quando lu el ga savesto che i volea farlo rè, lu el ga scampà via. — Gio. 6:15.
Quando le persone le ga volesto che Gesù el deventesse rè, lu el ga scampà via e no’l se ga mai metesto nela polìtica (Varda el paràgrafo 6.)
7-8. Parché che Gesù no’l ga proà finir fora con tuti i problemi dele persone quando l’era qua nela Tera? (Gioani 18:36)
7 Quando Gesù l’era qua nela Tera, lu no’l ga mai proà giutar i governanti a finir fora coi problemi. Parché? Lu el savea che le persone no le pol governar a lore stesse e gnanca no le ze bone de far questo. (Sal. 146:3; Ger. 10:23) Lore no le pol finir fora col sofrimento. E Gesù no’l ga mai proà giutar i governi parché el governante de questo mondo l’è Sàtana. Lu l’è tanto rugno e tante persone le ghe va drio. (Gio. 8:44; Efe. 2:2) Anca se ghen’è persone bone ancoi, lore no le pol finir fora coi problemi parché no le ze bone de far tuto con giustìssia. — Ecl. 7:20.
8 Gesù el savea che sol el governo de Geovà el podaria finir fora coi problemi del mondo. Par quela, lu el ga doperà tuto el so tempo e tuta la so forsa par predicar le bone notìssie del Regno. (Luc. 8:1) Lu el ga prometesto a “quei che i ga fame e sen dela giustìssia” che tute le robe sbaliade che ghen’è ancoi le sarà finide fora. (Mat. 5:6 e la nota nela Bìblia de Stùdio in portoghese; Luc. 18:7, 8) Gnanca un governo l’è bon de far questi cambiamenti. Sol el governo de Geovà, che l’è nel cielo, el pol finir fora coi problemi che ghen’è nel mondo. — Ledi Gioani 18:36.b
FÌDATE NEL GOVERNO DE GEOVÀ COMPAGNO A GESÙ
9. Cossa che te assa sicuro che sol el governo de Geovà el pol finir fora cole robe rugne che sucede ancoi?
9 Come vivemo nei ùltimi giorni, ghen’è de pi robe sbaliade de quando Gesù l’era qua nela Tera. Ma cossita come sucedea in quel tempo, Sàtana e le persone rugne i ga la colpa dele brute robe che ghen’è. (2 Tim. 3:1-5, 13; Apo. 12:12) E compagno a Gesù, savemo che sol el governo de Geovà podarà finir fora con tuto quel che fà le persone sofrir ancoi. Par quela che no femo protesti, no se metemo nela polìtica e gnanca se fidemo nte un governante. Invesse, noantri predichemo sora el Regno de Geovà. Varda el esémpio de una sorela de nome Stacy.c Prima de imparar la verità, sempre la ndea far protesti. Ma la ga scominsià a domandarse se quel che la era drio far l’era bon. Ela la ga dito: “Quando mi era nei protesti, sempre me domandea se era dela banda giusta. Ma, adesso che son dela banda del Regno de Dio, son sicura che son drio far la roba giusta. Mi no go el poder de finir fora col sofrimento, ma Geovà lo ga.” — Sal. 72:1, 4.
10. De acordo con Mateo 5:43-48, parché che no proemo cambiar le lege o i governi? (Varda anca el ritrato.)
10 Tanti ancoi i fà parte de grupi che i vol cambiar el governo. Ma tanti i resta pròpio inrabiadi, i fà tante robe sbaliade e fin ghe fà mal ai altri. Un fradel de nome Jeffrey el ga dito: “Mi sò che quando le persone le ze drio far protesti, lore le pol suito restar inrabiade, scominsiar a rovinar tuto e fin farghe mal ai altri.” Ma Gesù el ne ga insegnà che ghemo de esser tanto diferente de queste persone. Lu el ga dito che ghemo de tratar a tuti con amor, anca a quei che i pensa difarente de noantri o che i ne vien contra. (Efe. 4:31; ledi Mateo 5:43-48.d) E come ndemo drio a Gesù, se sforsemo de far quel che lu el ne ga insegnà.
Ghemo bisogno de coraio par mai meterse nela polìtica e nele robe de questo mondo (Varda el paràgrafo 10.)
11. Parché che dele volte l’è fadiga far compagno a Gesù?
11 Anca se savemo che sol el Regno de Dio el pol finir fora coi problemi, pol esser fadiga far compagno a Gesù quando qualchedun ne trata mal. Varda come che Janiya la se ga sentio quando le persone la ga tratada mal par causa del color dela so pel. Ela la ga dito: “Mi son restada tanto disgustada con quel che le persone le me ga dito. Son restada pròpio cativa e volea che lore le fusse castigade. Go fin pensà de ndar far protesti parché volea che tute le persone le fusse tratade compagno. Me parea la maniera giusta de mostrar che era disgustada con quel lì.” Ma dopo de un tempo, Janiya la ga visto che ghe tochea cambiar la so maniera de pensar. Ela la ga dito: “Mi go visto che gavea scominsià a ndar drio ai altri. Mi era drio fidarme de pi in quel che le persone le disea invesse de fidarme in Geovà. Par quela, go dessidio assar de ndar drio a quei grupi e no far pi gnente cossita.” Alora, anca se noantri restemo inrabiadi quando qualchedun ne trata mal, ghemo de star atenti par no meterse nele robe de questo mondo. — Gio. 15:19.
12. Parché che ne ocore star atenti a quel che ledemo, scoltemo o vardemo?
12 Cossa che pol giutarne a restar tranquili quando vedemo le robe sbaliade che sucede? Una roba che podemo far la ze restar atenti a quel che scoltemo, ledemo e vardemo. Arquante persone nela internet le conta stòrie sol par assar i altri spauradi o par sbrontolar de un governante. Tante volte, lore le parla sol quel che le pensa invesse de parlar pròpio quel che ga sucedesto. Ma ancora che la notìssia la sìpia giusta, no saremo boni de risolver i problemi. Se seitemo a vardar robe cossita, restaremo ancora pi ansiosi, disgustadi e desanimadi. (Pro. 24:10) Pol esser che fin assemo de meter el Regno in primo posto nela vita o de fidarse che sol Geovà el podarà finir fora coi problemi.
13. Come che leder la Bìblia tuti i giorni pol giutarne?
13 Se noantri ledemo la Bìblia tuti i giorni e ghe pensemo sora, saremo boni de far la roba giusta quando semo maltratadi o quando vedemo qualchedun esser tratà cossita. Varda el esémpio de Alia. Ela la ze restada tanto disgustada quando la ga visto che arquante persone le era drio tratar mal i altri e no le era castigade. Ela la ga dito: “Me ga tocà fermarme e domandarme: ‘Mi son pròpio sicura che sol Geovà l’è bon de finir fora coi problemi che ghen’è nel mondo?’ Mi go anca ledesto Giò 34:22-29, che me ga ricordà che Geovà el vede tuto quel che sucede. Sol lu el pol giulgar dela maniera giusta e finir fora coi problemi.” Alora, cossa ghemo de far intanto che spetemo el giorno che Geovà el giulgarà tuto con giustìssia e finirà fora coi problemi?
COSSA CHE PODEMO FAR ADESSO?
14. Cossa che noantri podemo far adesso? (Colossensi 3:10, 11)
14 Noantri no podemo cambiar le robe sbaliade che i altri i fà, ma podemo controlar quel che noantri femo. Ghemo belche visto che ne ocore ndar drio al esémpio de Gesù e mostrar amor. Par quela, se sforsemo de tratar a tuti con amor e rispeto, fin quei che i ne trata mal e i ne perseghe. (Mat. 7:12; Rom. 12:17) Geovà el resta tanto contento quando tratemo a tuti con bontà e giustìssia. — Ledi Colossensi 3:10, 11.e
15. Cossa che pol suceder quando insegnemo la Bìblia ale persone?
15 La meio maniera de giutar le persone la ze insegnarghe sora Geovà. Parché? Quando una persona la impara sora Geovà e la vol adorarlo, ela la pol cambiar e imparar a mostrar bontà e amor. (Isa. 11:6, 7, 9) Par esémpio, vanti de imparar la verità, un omo de nome Jemal el pensea che el governo del so paese l’era tanto rugno. Alora, lu el ga scominsià a far parte de un grupo che ndea contra quel governo. Ma dopo de imparar la verità, lu el ga dito: “No te pol giutar le persone a cambiar se te vè contra lore. Ma quando le persone le impara la verità dela Bìblia, lore le pol cambiar. Questo ga sucedesto con mi.” Jemal el ga capio parché el gavea de fermarse de lotar e ndar contra el governo. Dela stessa maniera, podemo giutar le persone a fermarse de tratar mal i altri quando ghe insegnemo la Bìblia.
16. Parché che te vol parlar ai altri sora quel che el Regno de Dio ndarà far?
16 Compagno a Gesù, volemo tanto parlar ale persone che el Regno de Dio el finirà fora con tuto el sofrimento che ghen’è. Questa speransa pol giutar tanto quei che i ze stati maltratadi. (Ger. 29:11) Stacy, che ghemo parlà prima, la ga dito: “Mi son bona de seitar calma quando son maltratada o quando vedo i altri sofrir parché sò che Geovà el ndarà finir fora col sofrimento. Lu el dopera la Bìblia par consolarne.” Alora, ghemo de esser pronti par consolar le persone par meso dele promesse dela Bìblia. Se te cognossi ben queste promesse, te ndarè esser ancora pi sicuro che le ndarà suceder e te sarè pronto par parlar sora le bone notìssie. Cossita, quando te sì nela scola o nel laoro te sarè bon de spiegarghe parché che sofrimo e cossa che Geovà el ndarà far par finir fora col sofrimento.f
17. Come che Geovà ne giuta quando i altri i ne trata mal?
17 Savemo che fin che l’è Sàtana che el governa questo mondo, ndaremo sofrir. Ma Geovà el ga prometesto che el ndarà finir fora con Sàtana e con tuto el sofrimento. (Gio. 12:31) Par meso dela Bìblia, Geovà el ne ga insegnà parché che sofrimo e come lu el se sente de vederne patir. (Sal. 34:17-19) E par meso de Gesù, Geovà el ne ga insegnà cossa ghemo de far quando i altri i ne trata mal e anca che el so Regno el finirà fora con tute le brute robe che ghen’è ancoi. (2 Pie. 3:13) Alora, intanto che spetemo el giorno che sol ghen sarà la giustìssia, ghemo de seitar a meterghela tuta nela predicassion! — Isa. 9:7.
CÀNTICO 158 No’l tardigarà!
a (Isaia 5:7) Parché el vignal de Geovà dei esèrsiti l’è la casa de Israel. I òmini de Giudà i ze la piantassion che lu el ghe piasea. Lu el spetea giustìssia, ma ghen’era sol ingiustìssia. Lu el spetea che i fesse quel che l’è giusto, ma i osea de tanto sofrir.”
b (Gioani 18:36) Gesù el ga rispondesto: “El me Regno no’l fà parte de questo mondo. Se el me Regno el fesse parte de questo mondo, i me servi i gavaria lotà parché mi no fusse dato ai giudei. Ma el me Regno no l’è de qua.”
c Arquanti nomi i ze stati cambiadi.
d (Mateo 5:43-48) “Valtri gavé scoltà: ‘Ama el to pròssimo e òdia el to nemigo.’ 44 Ma, mi ve digo: Seité a amar i vostri nemighi e a far orassion par quei che i ve perseghe. 45 Cossita ndaré mostrar che sì fioi del vostro Pare, che l’è nel cielo. Lu el fà vegner el sol sora i rugni e sora i boni e el fà piover sora i giusti e sora i ingiusti. 46 Parché, se valtri amé quei che i ve ama, caté che merité qualcossa? Fin quei che i tol su imposti i fà cossita. 47 Pensé che sì drio far una roba granda se saludé i vostri fradei? Fin quei che no i serve a Dio i fà cossita. 48 Alora, gavé de esser perfeti, cossita come el vostro Pare nel cielo l’è perfeto.
e (Colossensi 3:10, 11) e gavé de vestirve cola nova personalità, che, par meso dela cognossensa giusta, la ze drio esser fata nova de acordo cola imàgine de Quel che la ga creà; 11 ndove che no ghen’è greco gnanca ebreo, sirconsiso e gnanca nò sirconsiso, foresto, sita, schiavo, o omo lìbero; ma Cristo l’è tute le robe e in tuti.
f Varda anca el apéndisse A, punti 24 a 27 nela revista Amar le persone te giutarà a far dissìpoli.