Cossa vol dir esser un cristiano? — Cossa la Bìblia la dise?

Tanti ancoi i se stima de dir che i ze cristiani. Ma i fà tante robe rugne ai altri. Arquanti i pensa sol in lori stessi, i conta busie, ghe dise su ai altri e no i fà polito nei negossi. Altri i tradisse so omo o so dona. Par quela, tanti i se domanda: ‘Cossa pròpio vol dir esser un cristiano?’

Cossa pròpio vol dir esser un cristiano?

L’è fàcile par una persona dir che la ze cristiana. Ma no basta sol dirlo. La Bìblia la mostra che un cristiano l’è un dissìpolo de Gesù Cristo. (Ati 11:26) Varda quel che lu el ga dito che un dissìpolo suo el fà: “Se valtri obedì a quel che mi insegno, sì pròpio me dissìpoli.” (Gioani 8:31) Savemo che no semo boni de ndar drio a tuto quel che Gesù el ga dito. Ma un cristiano el se sforsa de far nela so vita quel che Gesù el ga insegnà. Varda arquanti esempi.

Un cristiano el mostra vero amor

Cossa che Gesù el ga dito: “Mi ve dao un novo comandamento: gavé de amarve un al altro. Cossita come mi ve go amà, anca valtri gavé de amarve un al altro. Par meso de questo tuti i saverà che valtri sì i me dissìpoli: se gavé amor intrà de valtri.” — Gioani 13:34, 35.

Cossa che Gesù el ga fato: Gesù el mostrea amor a tuti, no importa quanti soldi i gavea, quanto importanti i era o de ndove i era vegnesti. Lu el ga curà i maladi, el ga dato de magnar a quei che i gavea fame e l’è fin morto par salvar le persone. — Mateo 14:14-21; 20:28.

Cossa che un cristiano el ga de far: I cristiani i mostra vero amor parché i ze generosi, i perdona i altri e i trata tuti compagno. Lori i fà tuto quel che i pol par giutar le persone in quel che le ga de bisogno. — 1 Gioani 3:16.

Un cristiano el fà tuto polito

Cossa che Gesù el ga dito: “Mi son . . . la verità.” — Gioani 14:6.

Cossa che Gesù el ga fato: Gesù sempre el disea la verità e el fea tuto polito. Lu no’l ga mai proà imbroiar i altri. Le persone lo cognossea come qualchedun che sempre el disea la verità e el fea tuto polito, anca quando i so nemighi i podaria ndarghe contra. — Mateo 22:16; 26:63-67.

Cossa che un cristiano el ga de far: I cristiani no i dise busie. Lori i paga i imposti, i ze bravi laoradori e no i ciava dei altri. (Romani 13:5-7; Efesi 4:28) Lori no i imbroia i altri, no i copia le risposte dei altri nte una prova gnanca i proa imbroiar el paron de una empresa par ciapar un laoro. — Ebrei 13:18.

Un cristiano l’è bondoso

Cossa che Gesù el ga dito: “Vegné a mi, tuti valtri che sì stufi e soracaricadi e mi ndarò reanimarve. Ciapé sora valtri la me canga e imparé de mi, parché mi son manso e ùmile de cuor, e gavaré ànimo par valtri stessi. Parché la me canga la ze fàcile de portar e la me carga la ze leviana.” — Mateo 11:28-30.

Cossa che Gesù el ga fato: Gesù el mostrea bontà a tuti. Le persone le se sentia ben darente de lu. Lu el tratea ben i tosatei, el ghe dea consolo a quei che i era drio sofrir e el tratea a tuti con rispeto. — Marco 10:13-15; Luca 9:11.

Cossa che un cristiano el ga de far: Un cristiano el parla a tuti con bontà e no el ghe dise su ai altri. (Efesi 4:29, 31, 32) Lu el se preocupa cole persone e el proa catar fora maniere de giutarle. — Gàlati 6:10.

Un cristiano el seita fedele al so omo o la so dona

Cossa che Gesù el ga dito: “Par quela, quel che Dio el ga unio, el omo no’l ga de spartir.” — Marco 10:9.

Cossa che Gesù el ga fato: Anca se Gesù no’l se gavesse mai maridà, lu el ga insegnà che i maridadi i ga de seitar fedeli un al altro. (Mateo 19:9) Lu anca el ga parlà de robe che podaria far la persona tradir el so omo o la so dona e cossita rovinar el so matrimònio. — Mateo 5:28.

Cossa che un cristiano el ga de far: I cristiani i se sforsa de no far gnente che pol disgustar so omo o so dona. (Ebrei 13:4) Lori i trata un al altro con amor e rispeto. — Efesi 5:28, 33.