Cossa far se i altri i ze drio sbetegar sora mi?

Parché te resti tanto disgustà?

Arquante sbéteghe le ze pròpio brute. Le ze busie contade aposta par far i altri pensar mal de ti. Ma anca quando no le ze tanto brute le pol assarte disgustà, ancora de pi quando l’è stà un amigo che le ga contade! — Salmo 55:12-14.

“Go savesto che una amiga la era drio sbetegar sora mi. Ela la disea che mi sol pensea in mi stessa. No ero bona de capir parché che la ga dito una roba cossita. Son restada tanto disgustada!” — Ashley.

Verità: No te vè mai restar contento de saver che qualchedun ga sbetegà sora ti, no importa se la persona la ze to amiga o nò.

La bruta notìssia: i altri i va parlar sora ti

Parché che le persone le parla dei altri?

Parché le se interessa par i altri. Tuti noantri ne piase ciacolar. Alora, l’è normal parlar un colaltro e sora i altri. Infati, la Bìblia la dise che femo ben de preocuparse coi altri. — Filipensi 2:4.

“El meio assunto par ciacolar l’è sora le persone!” — Bianca.

“Par dir la verità, me piase saver cossa l’è drio suceder cole persone e de parlar sora questo assunto coi altri. No sò parché, ma me piase.” — Katie.

Par gaver qualcossa de far. Nei tempi bìblichi, ghen’era persone che ghe piasea de ‘doperar el so tempo par contar e par saver le novità’. (Ati 17:21) E l’è cossita fin ancoi!

“Dele volte, quando no ghen’è gnente de interessante drio suceder, le persone le cata fora qualcossa par parlarghe sora.” — Joanna.

No le pensa che le ze brave. No l’è par gnente che la Bìblia la dise che no ghemo mia de far comparassion cole altre persone. (Gàlati 6:4) Ma ancora cossita, ghen’è de quei che i parla mal dei altri sol par sentirse meio.

“Dele volte, se pol saver tanto sora una persona par meso de quel che la parla sora i altri. Par esémpio, pol mostrar che el sbetegon el ga invìdia dela persona de chi el ga parlà. Lu el sbétega sora l’altra persona par proar sentir che lu l’è meio che ela.” — Phil.

Verità: No importa se te piase o nò, le persone le va parlar sora i altri, anca sora ti.

La bona notìssia: te pol controlar quel che ti te vè far

No te pol mia controlar quel che i altri i va parlar sora ti. Ma te pol controlar quel che ti te vè far. Se te ghè savesto che qualchedun ga sbetegà sora ti, ghen’è al manco due robe che te pol far.

OPSION 1: Assa star. Tante volte, la meio roba che te pol far l’è sol no badar la persona, ancora de pi se quel che la ze drio parlar sora ti no l’è tanto importante. Meti in pràtica el consìlio dela Bìblia: “No stà mia ofénderte suito”. — Eclesiasti 7:9.

“Ghen’è stà un colpo che i ga parlà in volta che mi ero drio smorosar un toso che mi gnanca lo cognossea! L’era una stòria tanto stùpida che gnanca go badà, go sol ridesto.” — Elise.

“Anca se una persona la parla una roba bruta sora ti, ciare persone va crederghe, parché lore le sà la verità sora ti.” — Allison.

Proa far cossita: Scrivi do (1) quel che i ga parlà sora ti e (2) come te te ghè sentio. Dopo de ‘parlar nel to cuor’ sora el assunto, o sia, dopo de pensarghe sora, fursi te catarè pi fàcile assar star. — Salmo 4:4.

OPSION 2: Va parlar cola persona che la ga scominsià la sbétega. In arquante situassion, fursi la sbétega la ze stata tanto bruta che te ocore ndar parlar cola persona che la ga scominsiada.

“Se te vè parlar cole persone che le ze drio sbetegar sora ti, te pol giutarle a capir che, una ora o l’altra, i altri i va saver che semo drio parlar de lori. Te pol mostrarghe la verità sora el assunto o fin risolver el problema.” — Elise.

Ma vanti de ndar parlar con qualchedun che ga scominsià una sbétega sora ti, pensaghe sora questi consili dela Bìblia e sora queste domande.

• “Quel che risponde vanti de scoltar i fati l’è stùpido”. (Proverbi 18:13) ‘Sarà che mi sò de tuto quel che ga sucedesto? Sarà che la persona che la me ga parlà sora la sbétega no la ga capio mal qualcossa?’

• “Tuti i ga de esser pronti par scoltar, ma i ga de esser lenti par parlar e lenti par restar inrabiadi”. (Tiago 1:19) ‘Sarà che adesso l’è la meio ora par parlar cola persona? Sonti sicuro che sarò bon de parlar con calma sora el assunto? O saria meio spetar un pochetin fin che mi resto pi calmo?’

• “Tute le cose che volé che i òmini ve fae a valtri, anca valtri gavé de farghe dela medèsima maniera a lori”. (Mateo 7:12) ‘Come me piaseria che la persona la parlesse con mi? Quando me piaseria che la vegnesse? Con che parole e de che maniere me piaseria che la parlesse con mi?’

Proa far cossita: Vanti de ndar parlar cola persona, scrivi do quel che te vol dirghe. Dopo, speta una o due stimane, ledi nantra volta quel che te ghè scrito e pensa se ghen’è qualcossa che te parlarissi de nantra maniera. Anca, parla coi to genitori o con un amigo pi speriente sora quel che te vol far e domandaghe consili.

Verità: Come tante altre robe nela vita, le sbéteghe le ze una roba che no te pol mia controlar. Ma te pol controlar quel che ti te vè far quando i parla de ti!