Una ilustrassion de un omo, ndove no se pol gaver gnanca un Regno rento

Sarà che el Regno de Dio l’è qualcossa rento del nostro cuor?

La risposta dela Bìblia

Nò, el Regno de Dio no l’è qualcossa rento el cuor dei cristiani.a La Bìblia la mostra ndove l’è questo Regno quando lo ciama de “el regno dei cieli”. (Mateo 4:17) Varda come la Bìblia la mostra che el Regno l’è un governo che l’è ntel cielo.

El Regno de Dio el ga quei che governa, quei che i ze governadi, lege e el ogetivo de far la volontà de Dio ntel cielo e ntela tera. — Mateo 6:10; Apocalisse 5:10.
El governo, o Regno de Dio, el governarà sora “tuti i pòpoli, nassion e léngue” dela tera. (Daniel 7:13, 14) La autorità del Regno la vien de Dio, e nò dele persone. — Salmo 2:4-6; Isaia 9:7.
Gesù el ga dito che i so apòstoli fedeli i saria rè insieme de lu nel Regno dei cieli. — Luca 22:28, 30.
El Regno el ga nemighi, ma el finirà fora con tuti lori. — Salmo 2:1, 2, 8, 9; 110:1, 2; 1 Corinti 15:25, 26.

Arquanti i crede che el regno de Dio l’è rento el cuor de una persona quando la obedisse a Dio, ma no l’è questo che la Bìblia la insegna. Invesse, ela la insegna che scoltar sora el Regno, o scoltar le bone notìssie del Regno, pol e ga de influensar el nostro cuor. — Mateo 13:19; 24:14.

Cossa vol dir la frase “el Regno de Dio l’è rento de valtri”?

Un dei motivi de tante persone far confusion sora ndove l’è el Regno, l’è la maniera che arquante Bìblie le traduse Luca 17:21. Par esémpio, la Almeida, revista e atualizada, la dise: “El Regno de Dio l’è rento de valtri.” Par capir questo testo dela maniera giusta, gavemo de darghe atension a tuto quel che l’è intorno.

Arquanti dei lìderi religiosi che i era contra Gesù — El Regno de Dio no l’era rento el cuor dei nemighi de Gesù, che i era orgoliosi e i lo ga copà.

Gesù l’era drio parlar coi farisei, un grupo de lìderi religiosi che i era so nemighi e che poco tempo dopo lo ga copà. (Mateo 12:14; Luca 17:20) Càtito che Gesù el ndaria dir che el regno l’era rento el cuor pien de orgòlio de quei farisei? Gesù el ga dito a lori: “Par rento valtri si pieni de ipocrisia e de quel che l’è rugno.” — Mateo 23:27, 28.

Altre tradussion le ne giuta a capir de maniera giusta quel che Gesù el ga dito in Luca 17:21: “El Regno de Dio l’è intrà de valtri.” (Nova Versão Internacional) “El Regno de Dio l’è in meso de valtri.” (Tradução do Novo Mundo) El Regno dei cieli l’era “intrà” o “in meso” dei farisei parché Gesù, quel che Dio el ga scoliesto par governar come rè, l’era lì davanti de lori. — Luca 1:32, 33.

a Tante religion cristiane le insegna che el Regno de Dio l’è rento cada persona o rento el so cuor. Par esémpio, nei Stati Unidi, la Convension Batista del Sud la dise che “el Regno de Dio l’è la influensa de Dio come rè nel cuor e nela vita dela persona.” Dela medèsima maniera, el Papa Bento XVI el ga dito nel so libro Gesù de Nazarè che “el Regno de Dio el vien sora el cuor de quei che scolta”.