Parché un prete el ga abandonà la Ciesa

Te pol dir come che te sì stà slevà?

Son nassesto nela Itàlia nel ano 1943. Mi, me fradei e me sorele semo stati slevadi nte un pìcolo paeseto e me pare el laorea ntela colònia e l’era anca marangon. I nostri genitori i ne ga insegnà a esser boni catòlichi.

Parché che te ghè volesto deventar prete?

Quando mi ero gióveno, me piasea tanto scoltar i preti nela ciesa. Me piasea tanto scoltar la voce de lori e restea maraveià con quel che i fea nela messa. Par quela che mi gavea tanta voia de esser prete. Quando mi gavea 13 ani, me mare la me ga metesto nte una scola che la pareciea gióveni che i volesse studiar par deventar preti.

In questa scola, te studiei la Bìblia?

Nò come che ghe volea. Quando che gavea 15 ani, un dei me maestri el me ga dato una còpia dei Vangeli, la stòria dela vita e del ministero de Gesù, e lo go ledesto arquante volte. Quando mi gavea 18 ani, mi son ndato a Roma par studiar nele università che el Papa el controlea. Mi go studià latin, greco, filosofia, stòria, psicologia e teologia. Noantri diseino su drio man versìcoli bìblichi e scolteino la letura dela Bìblia nela messa de doménega ma, de verità, no studieino mia la Bìblia.

Te eri deventà reitor. E anca insegneito?

Mi laorea de pi nela aministrassion ma mi anca insegnea sora le lege del Secondo Consìlio del Vaticano.

Parché che te ghè bio dubi dela Ciesa?

Ghen’era tre robe che le me intrighea. La Ciesa la se metea nela polìtica e ela la acetea la maniera sbaliada de viver de quei che i gavea autorità nela Ciesa e dei parochiani. E arquante dotrine dela Ciesa le me parea sbaliade. Par esémpio, parché un Dio de amor el fà tribolar par sempre le persone che le ze morte? Anca, sarà che Dio el vol che noantri disemo su drio man el rosàrio par pregar a Dio?a

Cossa gheto fato?

Piandendo go pregà a Dio domandàndoghe orientassion. Anca go comprà una Bìblia catòlica in italiano che la era pena stata publicada. La era la Bìblia de Gerusalen e mi go scominsià a léderla. Alora, una doménega de matina, intanto che ero drio picar su le me robe dela messa, due òmini che i era Testimònie de Geovà i ze vegnesti nel seminàrio. Ghemo parlà de pi de una ora dela Bìblia e sora quel che ela la dise par saver quala che la ze la vera religion.

Cossa gheto pensà dei òmini che i ze vegnesti catarte?

Mi son restà maraveià de veder come che lori i era sicuri de quel che i insegnea e con la facilità che lori i doperea la Bìblia catòlica. Dopo, nantra Testimònia de Geovà la ga scominsià a visitarme. El so nome l’era Màrio. Lu el gavea tanta passiensa e el fea sempre quel che el disea. Tuti i sabi ale nove dela matina, piovesse o fesse sol, lu el sonea la campanela del seminàrio.

Cossa che quelaltri preti i pensea del to stùdio dela Bìblia?

Mi li convidea par star insieme quando studieino, ma gnanca un de lori el vedea el stùdio dela Bìblia come una roba importante. Ma mi me piasea tanto del me stùdio parché ero drio imparar robe maraveiose. Par esémpio, mi go capio parché Dio el assea suceder el mal e el sofrimento. Fea tempo che questo el me assea intrigà.

Quei che i gavea autorità sora ti gali proà fermarte de studiar la Bìblia?

Nel ano 1975, son ndato tante volte a Roma par spiegarghe quel che mi gavea imparà. Quei che i gavea autorità sora mi i ga proà cambiar la me maniera de pensar, ma no i ga mai doperà la Bìblia par far questo. Alora, nel giorno 9 de genaro de 1976, mi go scrito a Roma disendo che mi no me considerea pi catòlico. Due giorni dopo, son ndato via del seminàrio e go ciapà un tren par ndar ala me prima riunion cole Testimònie de Geovà, che in verità la era una assemblea con arquante congregassion. L’era tuto tanto difarente de quel che mi ero costumà! Tute le persone le gavea la so pròpia Bìblia par seghir quel el orador el disea.

Cossa che la to fameia la ga pensà de tuto questo?

Quasi tuti i ze restadi cativi e contra mi. Ma go savesto che un dei me fradei l’era drio studiar la Bìblia cole Testimònie de Geovà nela Lombardia, nela Itàlia. Son ndato farghe una vìsita, e lì le Testimònie de Geovà le me ga giutà a catar un laoro e un posto par ndar de star. Pi tardi, in quel ano son stà batesà come Testimònia de Geovà.

Te ciàmito gramo de gaver fato tuto questo?

Imaginàrsela! Quel che mi sò sora Dio l’è baseà nela Bìblia, e nò nela filosofia gnanca nele dotrine dela Ciesa. E questo me assa pròpio pi darente de lu. Adesso posso insegnar ai altri con sicuressa e sensa dir busie.