Come rivar al cuor dei nostri parenti che no i ze Testimònie de Geovà

Gesù el ga dito: “Torna ala to fameia e ala to casa. Contaghe tuto quel che Geovà el ga fato par ti e la misericòrdia che el te ga mostrà.” Fursi Gesù l’era nela region de Gadara, nela parte sudeste del mar dela Galilea, quando el ga dito queste parole a un omo che el volea esser so seghidor. Lu el savea che le persone ghe piase contarghe ai altri sora le robe interessante e importante par lore. — Marco 5:​19.

Ancora che far questo sìpia pi comun in arquante culture, quando una persona la impara sora Geovà ela la ga tanta voia de contarghe ai altri. Ma, quala che la ze la meio maniera de parlar con lori? E se el nostro parente belche el ga una religion o no’l crede in Dio, come che podemo rivar al so cuor? Vedemo arquanti consili che la Bìblia la ne dà par giutarne.

“GHEMO CATÀ EL MESSIA”

Nel primo sècolo, Andrè l’è stà un dei primi che i ga capio che Gesù l’era el Messia. Suito che lo ga savesto, l’è ndato contarghe prima al so fradel Simon Piero. Lu el ghe ga dito: “Ghemo catà el Messia”, che anca vol dir Cristo. Alora, Andrè el ga menà el so fradel Piero fin Gesù par darghe la oportunità de deventar so dissìpolo. — Gioani 1:​35-​42.

Intorno de 6 ani dopo, quando Piero l’era in Giope, lu el ga ricevesto la orientassion de ndar a Cesarea par catarse con Cornèlio, un ofissial del esèrsito. Quando Piero e quei che i era con lu i ze rivadi là, Cornèlio li spetea tanto premoso che el gavea fin convidà i so parenti e i so amighi. Cossita, Cornèlio el ghe ga dato ai so parenti la oportunità de scoltar Piero e far una dessision de acordo con quel che i gavea imparà. — Ati 10:22-​33.

Che lession imparemo de quel che Cornèlio e Andrè i ga fato par giutar la so fameia?

Lori due i ga fato tuto quel che i podea par giutar la so fameia. Andrè el ga menà Piero fin Gesù par cognosserlo e Cornèlio el ga convidà la so fameia par scoltar quel che Piero el volea insegnarghe. Lori no i ga proà obrigar la so fameia gnanca i ga controlà la situassion dela so maniera par farghe deventar seghidori de Gesù. Cossa imparemo de questo? Podemo parlar ai nostri parenti sora quel che credemo e darghe la oportunità de cognosser la verità e i fradei dela congregassion. Ma ghemo de rispetar el so dirito de scòlier e no proar obrigarli a far qualcossa. Par saver come giutar i nostri parenti, vedemo adesso el esémpio de Jürgen e Petra, un casal dela Alemagna.

Petra la ga studià la Bìblia e la se ga batesà. El so omo, Jürgen, l’era un ofissial de esèrsito e lu no’l ghe ga piasesto la so dessision. Ma col tempo, lu el ga visto che le Testimònie de Geovà le insegna la verità sora la Bìblia. Alora, anca lu el se ga dedicà a Geovà e ancoi el serve come ansiano de una congregassion. Che consìlio lu el dà par quei che i ga parenti che no i ze Testimònie de Geovà?

Jürgen el ga dito: “No stà proar obrigarli a discorer o farghe la prèdica. Senò, lori i pol restar massa stufi. L’è meio parlarghe sora la verità pin pianeto e sempre ndar cole bone. Anca l’è bon presentarghe ai fradei che i ga la medèsima età o ghe piase dele medèsime robe che lori. Se te fè cossita, lori i va sentirse tanto ben.”

In poco tempo, Piero e la fameia de Cornèlio i ga acetà el messàgio dela Bìblia. Ma altre persone dei so giorni i ga metesto pi tempo par acetar la verità.

I FRADEI DE GESÙ

Arquanti dela fameia de Gesù i ga acetà la verità quando che lu l’era ntela Tera. I apòstoli Tiago e Gioani fursi i era so cusini e so mare de lori, Salomè, so zia. Pol esser che la era intrà le done che doperea le so robe de valor par giutar Gesù e i apòstoli. — Luca 8:​1-3.

Ma, arquanti dela fameia de Gesù no i ga bio fede in lu suito. Par esémpio, de pi de un ano dopo che lu l’è stà batesà, arquante persone le ze ndate nte una casa par scoltarlo ma i so parenti i disea che ‘lu l’era deventà mato’. Un tempo dopo, i fradei de Gesù i ghe ga domandà sora un viaio che lu ndaria far, ma no’l ghe ga dato una risposta ciara parché ‘lori no i gavea fede in lu’. — Marco 3:​21; Gioani 7:5

Cossa che podemo imparar de come Gesù el tratea la so fameia? Quando arquanti i ga dito che lu l’era deventà mato, lu no’l se ga ofendesto. Invesse, dopo che l’è stà copà e ressussità, Gesù el ga incoraià la so fameia. Lu el se ga mostrà al so meso fradel Tiago, e cossita, Tiago e i so fradei i ze stati sicuri che Gesù l’era pròpio el Messia. Par quela, lori i era nte una casa in Gerusalen insieme ai apòstoli e i ga ricevesto spìrito santo. Dopo, Tiago e Giuda, nantro meso fradel de Gesù, i ga ricevesto tanta responsabilità nela congregassion. — Ati 1:​12-​14; 2:​1-4; 1 Corinti 15:7.

ARQUANTI I GA BISOGNO DE PI TEMPO

Cossita come ga sucedesto nel passà, arquanti ancoi ghe meterà pi tempo par acetar la verità. Varda el esémpio de Roswhita che la era una catòlica devota e sicura de quel che la credea. Quando el so omo el se ga batesà, in 1978, ela la ze ndata contra. Ma col tempo, ela la ga visto che le Testimònie de Geovà le insegna la verità e alora, no la ze pi ndata contra. Nel ano de 2003, ela la ze stata batesada. Cossa che la ga giutada a cambiar? Lu no’l se ga disgustà par causa dela so oposission. Invesse, el ghe ga dato tempo a ela par cambiar de idea. Che consìlio Roswhita la ne dà ancoi? Ela la dise: “Una roba che giuta tanto l’è sempre portar passiensa cola fameia.”

Nantro esémpio l’è de Monika. Ela la ze stata batesada in 1974 e i so fioi i se ga batesà diese ani dopo. El so omo, Hans, mai l’è ndà contra le Testimònie de Geovà, ma lu el se ga batesà sol in 2006. La fameia de Hans sempre la ga mostrà tanto amor par lu e mai la ga perso la speransa che un giorno lu el podaria imparar la verità. Pensando in quel che ga sucedesto, cossa che questa fameia la dise? “Seita sempre leal a Geovà. E ricòrdate che l’è pi importante contentar a Lu che ala to fameia.”

GIUTA LA TO FAMEIA A PIASERGHE DELA VERITÀ

Gesù el ga dito che la verità la ze come una àqua che la dà la vita eterna. (Gioani 4:13, 14) Noantri volemo che questa àqua pura anime e giute la nostra fameia. Ma no volemo darghe tanto de questa àqua e gnanca obrigarli a beverla, parché questo podaria farli “sofegarse”. Par quela, l’è importante spiegarghe la verità dela maniera giusta. La Bìblia la dise che el giusto el pensa nel so cuor vanti de risponder. Anca la dise che el sàbio nel so cuor mostra sabedoria par meso de quel che el dise e le so parole le ze bone de convinser. Come che podemo meter in pràtica questi consili? — Proverbi 15:28; 16:23.

Par esémpio, fursi una dona la vol spiegar quel che la crede al so omo. Vanti de risponder, ela la pensa ben in quel che la ndarà dir e la speta la ora giusta de parlar. Ma no la ga de parlar come se la fusse meio che lu o come se sempre la gavesse rason. Quando la dopera bone parole la so fameia se sentirà ben e in pace. L’è importante che la se domande: ‘Quando che el me omo l’è pi tranquilo e quando saria meio parlar con lu? Sora cossa che lu el ghe piase de parlar o leder? Lu el ghe piase de siensa, polìtica o sporte? Come che mi posso assarlo curioso par saver qualcossa dela Bìblia e ancora cossita mostrar rispeto par quel che lu el pensa e el sente?’ Pensar in queste domande giutarà la dona a mostrar sabedoria in quel che la parla e la fà.

Par rivar al cuor dei nostri parenti, no basta sol spiegar quel che credemo dela maniera giusta, ma ghemo de far tuto polito de acordo con quel che parlemo.

FÀ TUTO POLITO SEMPRE

Jürgen el ga dito: “Viva de acordo coi prinsipi dela Bìblia, cossita quei dela to fameia i pol veder che te ghè cambià, anca se no i parle gnente.” Hans, che el se ga batesà intorno de 30 ani dopo dela so dona, el ga dito: “L’è importante far polito come un vero seghidor de Cristo par darghe un bon esémpio ala to fameia. Alora, la to fameia la vederà che la verità la ga fato ben par ti.” Nostri parenti i ga de veder che semo difarenti par causa de quel che credemo, ma ghemo cambià par meio e nò par pedo.

El apòstolo Piero el ga dato boni consili ale sorele: “Anca ti, sposa, te ghè de star soto la autorità del to sposo. Cossita, se lu no l’è obediente ala parola, che el sìpia guadagnà sensa parole, par meso dela to condota, parché el vede coi so oci la condota pura e el grando rispeto che te ghè.” Anca, lu el ga dito che le done no le ga de farse bele con quel che se pol veder, o sia, cole dresse nei cavei, con gioie de oro e con robe de vestir che costa tanto. Invesse, le ga de esser sempre calme e ùmile parché la belessa che no la se rovina la ga de vegner del cuor e la ga tanto valor par Dio.” — 1 Piero 3:​1-4.

Cossita, Piero el ga mostrà come la dona la ga de far par giutar el so omo a acetar la verità. Christa, che la ze stata batesada nel ano 1972, la ga seità a meter in pràtica questo consìlio. El so omo el ga belche studià la Bìblia, el va a arquante riunion e l’è amigo dei fradei, ma no’l ga dessidio gnancora esser una Testimònia de Geovà. Ancora cossita, i fradei sempre i ga rispeto par quel che lu el pensa. Come che Christa la proa far la verità rivar al cuor del so omo?

Ela la ga dito: “Mi vui sempre obedir a Geovà. Ma vui anca giutar el me omo par meso de quel che mi fao, sensa dirghe gnente. Se vien fora qualche situassion che no la va contra i prinsipi dela Bìblia, mi proo far quel che ghe piase a lu. Mi rispeto la so libertà de scòlier e asso che Geovà el tenda dela situassion.”

El esémpio de Christa ne insegna tanto. Christa la seita cola so adorassion a Geovà. Ela la va sempre ale riunion e ala predicassion. Ma la proa capir el so omo e la sà che lu el ga el dirito de voler el so amor, el so tempo e la so atension. Se noantri ghemo parenti che no i ze Testimònie de Geovà, l’è importante proar capir quel che lori i sente e no far sol quel che volemo. La Bìblia la dise che ghen’è un tempo giusto par far cada roba. Anca se la nostra fameia no la crede in quel che credemo, ghemo de passar tempo con lori, ancora de pi col nostro omo o la nostra dona. Alora, se sempre ghe demo atension ai nostri parenti, sarà pi fadiga che i se sinta soli, abandonadi o che i reste gelosi. — Eclesiasti 3:1.

NO STÀ MAI PERDER LA SPERANSA

Holger, che el ga visto el so pare batesarse sol 20 ani dopo de arquante persone dela so fameia, el dise: “L’è importante mostrar ai nostri parenti che ghe volemo ben e che preghemo par lori”. Christa la dise che mai ga perso la speransa de veder el so omo dessider acetar la verità e servir a Geovà. Ghemo de esser sempre positivi e mai perder la speransa quando pensemo nei nostri parenti che no i ze Testimònie de Geovà.

Ghemo de tratar ben i nostri parenti, darghe la oportunità de imparar la verità e giutar che la verità la rive rento el so cuor. E mai ghemo de desmentegarse de parlar sempre “con brandura e tanto rispeto.” — 1 Piero 3:​15.