Quel che l’è drio suceder ne dà speransa

“Ma te ghè de saver che nei ùltimi giorni ghen sarà tempi crìtichi, difìcili de soportar.” —2 TIMÒTEO 3:⁠1.

TE GHÈ BELCHE VISTO suceder una de queste robe?

● Una bruta malatia la copa tante persone.

● Sentene de persone le more par causa dela fame.

● Un teremoto el copa miliari de persone e el assa tante sensa un posto de star.

Questa revista la ndarà parlar sora queste robe e parché che l’è importante pensarghe sora. Te ndarè anca capir che la Bìblia la ga dito che queste robe le ndaria suceder nei “ùltimi giorni”.

Sicuro che te sè che semo drio viver in tempi bruti, ma questa revista la ze stata fata par darte speransa e assarte sicuro che queste robe suito le ndarà finirse. Te ndarè anca imparar sora sei professie che le ne giuta a capir che semo drio viver nel fin dei “ùltimi giorni”. Te ndarè anca veder arquante robe che le persone le parla sora questo e parché che podemo esser sicuri che bele robe suito le ndarà suceder.

Professia 1. Teremoti

“Ghen sarà grandi teremoti.” — LUCA 21:11.

● Winnie, una toseta de un ano e quatro mesi la era in meso dele rovine de un teremoto nel Haiti. Persone che le era lì par far una gravassion de television le ga sentio che la era là in meso. Ela no la ze mia morta, ma i so genitori si.

COSSA CHE GA SUCEDESTO? Nel mese de genaro de 2010, ga sucedesto un teremoto nel Haiti cola forsa de 7.0, le ze morte de pi de 300 mila persone. Anca, 1,3 milione de persone le ze restade sensa le so case. Questo teremoto l’è stato tanto forte, ma intrà april de 2009 e april de 2010, ga sucedesto 18 grandi teremoti in tuto el mondo.

COSSA CHE TANTE PERSONE LE DISE? Sempre ga sucedesto teremoti, sol che ancoi l’è pi fàcile de saver quando lori sucede parché ghemo de pi informassion che una volta.

SARÀ CHE L’È PRÒPIO COSSITA? La Bìblia no la dise quanti teremoti ndaria suceder nei ùltimi giorni. Ma la dise che ghen saria “grandi teremoti . . . nte un posto dopo l’altro”. L’è par quela che i teremoti i ze una prova che semo drio viver nei ùltimi giorni. — Marco 13:⁠8; Luca 21:⁠11.

COSSA CHE TE PENSI? Sarà che l’è drio suceder grandi teremoti pròpio come la Bìblia la ga dito?

Arquante persone le pensa che i teremoti no i ze una prova che semo drio viver nei ùltimi giorni. Ma questa la ze sol una dele robe che ndaria suceder. Vedemo nantra.

[Comentàrio nela pàgina]

“Par noantri [studiosi de quel che sucede cola Tera] ga sucedesto sol un teremoto. Ma par le persone ga sucedesto una desgràssia.” — KEN HUDNUT, PESCHISADORI DE GEOLOGIA DEI STATI UNIDI.

[Crèdito dele stampe]

© William Daniels/​Panos Pictures

Professia 2. Fame

“Ghen sarà mancansa de magnar.” — MARCO 13:8.

● Un omo el va in serca de protession nel pìcolo paeseto de Quaratadji, nel Nìger. Anca i so parenti, fradei e sorele i ze ndati via par causa dela fame. Questo omo l’è butà do in tera. Parché? Sidi, el paron del pìcolo paeseto, el ga dito: “Parché lu no l’è bon de darghe de magnar ala so fameia e el ga perso el coraio de vardarghe in fàcia.”

COSSA CHE GA SUCEDESTO? In tuto el mondo, quasi una de cada 7 persone no la ga de magnar tuti i giorni. Nela pi granda parte dela Àfrica, la situassion la ze ancora pedo. Una de cada tre persone la ze pròpio malada parché no la ga de magnar. Par capir meio, imagina una fameia che la ga el pare, la mare e un bambin. Se ghen’è de magnar sol par due persone, chi che ndarà restar sensa magnar? El pare? La mare? El bambin? Tante fameie le ga de far queste scólie tuti i giorni.

COSSA CHE TANTE PERSONE LE DISE? Tante le dise che ghen’è de magnar par tuti, ma che no l’è spartio dela maniera giusta.

SARÀ CHE L’È PRÒPIO COSSITA? Adesso l’è pi fàcile piantar e portar el magnar a tuti i posti. I governi i podaria far qualcossa par che tuti i gavesse de magnar e cossita i ndaria finir col problema dela fame. Ma fin ancoi no i ze stati boni de far questo.

COSSA CHE TE PENSI? Sarà che quel che l’è scrito nel testo de Marco 13:⁠8, l’è drio suceder? Anca che la situassion la ze meio adesso, sarà che ancora ghen’è fame nel mondo?

Par causa dei teremoti e dela fame, ghen’è tanti altri problemi. Vedemo nantra professia che fà parte dei ùltimi giorni.

[Comentàrio nela pàgina]

“Quasi due de cada tre tosatei i more de malatie nei palmoni e altre malatie parché i magna pròpio poco.” — ANN M. VENEMAN, CHE LA ERA DIRETORA DEL FUNDO DELA ONU PAR I TOSATEI.

[Crèdito dele stampe]

© Paul Lowe/​Panos Pictures

Professia 3. Malatie

‘Ghen sarà . . . brute malatie.’ — LUCA 21:⁠11.

● Nte un paese dela Àfrica, che el sofria tanto par causa dela guera, tanti òmini che i laorea nele mine i era drio morir par causa del Marburg,a che l’è una malatia che la dà fiévera e se perde tanto sangue. Bonzali, un omo che el laorea par tender dela salute del pòpolo el ga domandà aiuto par le autorità de una cità pi granda, ma no i ghe ga dato suito aiuto. Quatro mesi dopo, lori i ga dato una risposta. Ma Bonzali l’era belche morto parché el gavea ciapà la malatie de quei che i laorea nele mine.

COSSA CHE GA SUCEDESTO? Ghen’è tante brute malatie. Par esémpio, le malatie dei palmoni, malatie del intestino, ­HIV/aids, tuberculose e malària. Fà poco che 10,7 milioni de persone le ze morte par causa de queste malatie. Questo vol dir che a cada tre secondi, intorno de una persona la more tuti i giorni del ano.

COSSA CHE TANTE PERSONE LE DISE? Come ghen’è cada volta de pi persone nel mondo, sicuro che ghen sarà de pi persone malade.

SARÀ CHE L’È PRÒPIO COSSITA? Adesso ghen’è de pi persone, ma anca ghen’è de pi robe par dàrghene fora cole malatie. Par esémpio, se pol far esame, tratamenti e controlar le malatie. Alora, ghen saria manco malatie e manco maladi. Ma no l’è mia drio suceder questo.

COSSA CHE TE PENSI? Sarà che l’è drio suceder quel che la Bìblia la ga dito sora le malatie?

Tante persone le sofre par causa de teremoti, fame e malatie. Ma tante altre le sofre par causa dela mancansa de amor. Varda cossa che la Bìblia belche la disea sora questo.

[Nota]

[Comentàrio nela pàgina]

“L’è tanto bruto infrontar una malatia e veder anca le altre persone sofrir. Questo se someia a esser ciapà par un leon o nantra bèstia cativa.” — DOTOR MICHAEL OSTERHOLM.

[Crèdito dele stampe]

© William Daniels/​Panos Pictures

Professia 4. Sensa amor

“Le persone . . . no le gavarà amor par la fameia.” — 2 TIMÒTEO 3:⁠1-⁠3, Nova Versão Internacional.

● Chris la giuta a quei che i sofre qualche tipo de violensa rento casa nel nort del Paese de Gales. Ela la ga dito: “Me ricordo de una dona che la ze vegnesta domandarne aiuto. Mi la cognossea, ma ela la gavea ciapà tante bote che no son mia stata bona gnanca de ricognosserla. Tante done le sofre tanto che no le ze gnanca bone de vardarte in fàcia.”

COSSA CHE GA SUCEDESTO? Nte un paese dela Àfrica, intorno de 1 a cada 3 done la ze stata violentada quando la era picinina. Una peschisa fata nel medèsimo paese la ga mostrà che de pi de 1 a cada 3 òmini el pensea che no l’era mia sbalià darghe bote ala so dona. Ma no le ze mia sol le done che ciapa bote. Par esémpio, nel Canadà, quasi 3 a cada 10 òmini i ga belche ciapà bote o i ga sofrio altro tipo de violensa dele so done.

COSSA CHE TANTE PERSONE LE DISE? Le persone le ga sempre sofrio qualche tipo de violensa casa. Ma adesso, se parla de pi sora questo che una volta.

SARÀ CHE L’È PRÒPIO COSSITA? L’è vera che nei ùltimi ani le persone le parla de pi sora questo. Ma ancora cossita questo seita suceder. Le persone le ga cada volta manco amor intrà de lore.

COSSA CHE TE PENSI? Le parole de 2 Timòteo 3:⁠1-⁠3 le ze drio suceder? Pénsito anca ti che le persone no le mostra el amor che le gavaria de mostrar ala so fameia?

Nantra professia che la ze drio suceder ancoi, la ze sora la Tera. Varda cossa la Bìblia la dise sora questo.

[Comentàrio nela pàgina]

“Ancoi, la violensa rento casa la ze una dele robe che le sucede de pi e che poche persone le domanda aiuto. Una dona la ndarà in serca del aiuto dela polìssia sol dopo de gaver ciapà bote intorno de 35 volte del so omo.” — RAPRESENTANTE DE QUEI CHE GIUTA LE PERSONE CHE LE SOFRE VIOLENSA CASA DEL PAESE DE GALES.

Professia 5. La tera la saria rovinada

“[Dio el ndarà] finir fora quei che i rovina la tera.” — APOCALISSE 11:18.

● Pirri l’è un omo che el laora in Kpor, nela Nigèria. Lu el cava via el suco dele palmere che se dopera par far vin. Ma dopo che i ga molà petròleo nela àqua, lu no l’è pi bon de laorar come prima. Lu el ga dito: “Questo l’è drio copar i pessi, farne mal ala salute e l’è drio sporcar i rii. No son mia bon de ciapar quel che ghemo de bisogno par viver.”

COSSA CHE GA SUCEDESTO? Arquanti peschisadori i ga dito che tuti i ani l’è butà via 6.5 milioni de tonelade de sporchìssie nel mar. Anca i dise che 50 par sento de queste sporchìssie le ze plàstico e le restarà sentene de ani fin che se smarsisse. I umani i ze anca drio finir presto cole robe che le vien dela Tera. Le peschise le mostra che la Tera la ga bisogno de un ano e sinque mesi par meter a posto quel che le persone le rovina nte un ano. El giornal Sydney Morning Herald, dela Austràlia, el ga dito: “Se le robe le seita cossita, nel ano de 2035 gavaremo de bisogno de due Tere.”

COSSA CHE TANTE PERSONE LE DISE? I umani i ze inteligenti. Podemo dàrghene fora con questi problemi e salvar la Tera.

SARÀ CHE L’È PRÒPIO COSSITA? Tanti i proa farghe le persone capir che no le ga de sporcar la Tera, ma ancora cossita, quasi tuti i seita a far questo.

COSSA CHE TE PENSI? Sarà che ghemo bisogno che Dio el fae qualcossa par fermar le persone de rovinar la Tera?

La Bìblia anca la ga dito che robe bone le ndaria suceder nei ùltimi giorni. Varda una de queste robe.

[Comentàrio nela pàgina]

Mi gavea un pìcolo paradiso, ma adesso go un posto pien de sporchìssie.” — ERIN TAMBER, UN OMO CHE L’È DE STAR NEI STATI UNIDI. LU EL GA PARLÀ SORA COSSA CHE GA SUCEDESTO PAR CAUSA DEL PETRÒLEO CHE I GA MOLÀ NEL MÈSSICO NELA ANO DE 2010.

[Crèdito dele stampe]

U.S. Coast Guard photo

Professia 6. Predicassion in tuto el mondo

“E queste bone notìssie del Regno le sarà predicade in tuta la tera abitada.” — MATEO 24:⁠14.

● Vaiatea la ze de star nte una ìsola de Tuamotu nel Osseano Passìfico. In Tuamotu ghen’è intorno de 80 pìcole ìsole in de pi de 800 mila chilòmetri quadri e de pi de 16 mila persone le ze de star lì. Stesso che sìpia un posto distante, le Testimònie de Geovà le fà vìsite par Vaiatea e i so visigni. Parché? Parché lore le vol predicar le bone notìssie del Regno a tute le persone.

COSSA CHE GA SUCEDESTO? Le Testimònie de Geovà le ze drio predicar le bone notìssie del Regno in tuta la Tera. Nel ano de 2010, le Testimònie de Geovà le ga doperà 1,6 bilioni de ore par parlar cole persone sora el Regno in 236 paesi. Alora, cada una la ga doperà intorno de 30 minuti par giorno nel laoro de predicassion. Nei ùltimi diese ani, le Testimònie de Geovà le ga fato e le ga assà par le persone de pi de 20 milioni de publicassion par giutarghe a capir la Bìblia.

COSSA CHE TANTE PERSONE LE DISE? Le persone sempre le ga parlà sora quel che ghen’è nela Bìblia.

SARÀ CHE L’È PRÒPIO COSSITA? L’è vero che tanti i ga belche proà insegnar qualcossa sora la Bìblia. Ma la pi granda parte i ga fato questo par poco tempo e par poche persone. Invesse, le Testimònie de Geovà le ze drio far un laoro de predicassion de maniera organisada in tuto el mondo. Lore le seita a far questo laoro anca quando le pi importante e le pi rugne autorità le proa fermarle. (Marco 13:⁠13) Le Testimònie de Geovà le fà questo laoro sensa cobrar gnente. Le publicassion che lore le assa par le persone leder anca l’è par gnente. Tuto el so laoro l’è mantegnesto par meso de donativi.

COSSA CHE TE PENSI? Le “bone notìssie del Regno” le ze drio esser predicade in tuto el mondo? Sarà che questo vol dir che suito ndaremo viver nte un mondo meio?

[Comentàrio nela pàgina]

“Seitaremo a predicar le bone notìssie del Regno dela meio maniera che podemo, doperando tuto quel che ghemo fin che Geovà el dise che l’è par fermarse.” — ANUÀRIO DELE TESTIMÒNIE DE GEOVÀ DE 2010.

Bele robe suito le ndarà suceder!

Ancora un poco, e i rugni no i ghen sarà pi . . . Ma i mansi i sarà paroni dela tera, e i gavarà tanta alegria par via dela granda pace.” — SALMO 37:⁠10, 11.

TE piaserissi veder questa promessa dela Bìblia suceder? Sicuro che si! La Bìblia la ne assa sicuri che suito questo ndarà suceder.

Le professie che te ghè visto prima le mostra che semo drio viver “nei ùltimi giorni”. (2 Timòteo 3:⁠1-⁠5) Dio el ga doperà i òmini par scriver queste professie nela Bìblia parché el vol dar ale persone una speransa. (Romani 15:⁠4) Le professie che le ze drio suceder le prova che suito el sofrimento el ndarà finirse.

Cossa che sucederà dopo dei ùltimi giorni? El Regno de Dio ndarà governar tuta la Tera. (Mateo 6:⁠9) Varda cossa la Bìblia la dise sora questo:

● No ghen sarà pi fame. “Ghen sarà una abondansa de grani nela tera; su i monti ghen sarà ancora de pi.” — Salmo 72:16.

● No ghen sarà pi malatie. “E gnanca una persona dirà: ‘Son malà.’” — Isaia 33:24

● Tuta la tera la sarà un paradiso. “Che sìpia contenti el deserto e la tera suta, e che el deserto el reste contento che el fiorissa come el assafron.” — Isaia 35:1

Ghen’è anca tante altre professie che suito le ndarà suceder. Se te vol esser sicuro de questo, te pol domandar el aiuto dele Testimònie de Geovà.