Speransa — Gala pròpio una influensa nela nostra vita?

DANIEL el gavea sol 10 ani, ma fea belche un ano che el gavea un càncaro. I dotori e anca la so fameia i gavea belche perso la speransa. Ma Daniel el se tegnea nela so speransa. Quando lu el vegnesse grando, el volea esser un peschisador par catar la cura del càncaro. Lu l’era drio spetar la consulta de un dotor che el cognossea el tipo de càncaro che lu el gavea e questo ghe dea confiansa. Ma quando l’è rivà el giorno, el dotor no’l ga podesto ndar far la consulta par causa del tempo rugno. Dopo de quel giorno, Daniel el se ga pròpio desanimà. Alora, par la prima volta el ga perso la alegria de viver e pochi giorni dopo l’è morto.

Questa stòria la ze stata contada par un dotor che el ga studià che gaver speransa o no gaverla pol influensar la vita dele persone. Pol esser che te gàpia belche scoltà stòrie come queste. Una persona de età, par esémpio, la ze drio morir ma la ze ansiosa drio spetar la vìsita de un amigo, un parente o la selebrassion de un di importante. Poco tempo dopo che questo giorno el riva, la persona la more. Ma cossa che fà suceder queste robe? Sarà che la speransa la ga tuta questa forsa par giutar le persone come arquanti i crede?

Cada volta de pi dotori i dise che pensar nela speransa e pensar nele robe bone e nò nele rugne fà ben par la vita e la salute dele persone. Ma gnanca tuti i pensa cossita. Arquanti peschisadori i pensa che no ghen’è queste robe. I crede che le malatie le vien sol de maniera fìsica.

Fà tanto tempo che se mete in dùbio el poder dela speransa. Fà de pi de due mila ani che i ga domandà al filòsofo greco Aristòteles cossa che ghe vol dir la speransa e lu el ga rispondesto che l’è come un omo drio insognarse desmissià. Un tempo indrio, una autorità dei Stati Unidi, Benjamin Franklin, drio riderghe drio de quei che i ga speransa, el ga dito: “Quei che i vive de speransa i more de fame.”

Alora, quala la ze la verità sora la speransa? Sarà che l’è sol creder nela nostra imaginassion e ndar in serca de consolo nte una roba che no la ghen’è? Sarà che podemo dir che la speransa la ze una roba bona, che la ga senso e che pol giutarne a gaver salute e felicità?

Parché che ne ocore de speransa?

COSSA CHE podea gaver sucedesto con Daniel, el tosatel che el gavea un càncaro che ghemo parlà ntel artìcolo vanti, se no’l gavesse perso la speransa? Sarà che el se gavaria curà? El saria ancora vivo fin ancoi? Gnanca quei che i crede che la speransa la pol sanar i ze sicuri de questo. Questo el ne insegna una roba importante par noantri. No ghemo de dar ala speransa de pi valor de quel che pròpio la ga, come se la sanesse tute le malatie e la fusse la solussion de tuti i problemi.

El dotor Nathan Cherney, parlando nela TV CBS News, el ga avisà sora el perìcolo de darghe massa valor ala speransa quando se trata le brute malatie: “Ga sucedesto che sposi i ga dito su tanto ale so spose parché no le gavea pensà sora robe positive quanto che ghe volea.” Lu anca el ga dito: “Questa maniera de pensar ga creà una idea sbaliada nele persone che la speransa la pol fermar un càncaro de cresser. Par quela, le pensa che la malatia la resta pedo parché la persona no la ze stata bona de pensar positivo, e questo no l’è mia giusto.”

Savemo che quei che i tribula con una malatia che i sa che i va morir i resta strachi e sensa forsa. La ùltima roba che i so cari parenti e la fameia i vol far l’è meterghe nantra carga sora lori e farli pensar che lori i ga la colpa. Alora, ghe vol dir che la speransa no la val gnente?

Sicuro che nò! El pròpio dotor Cherney l’è un spessialista che no’l trata la malatia e gnanca no’l proa far con che la persona la viva de pi, ma lu el giuta le persone malade parché le gàpie una vita meio e alìvio fin che le vive. I dotori i crede che questo tratamento el giuta tanto la persona malada e questo la assa pi felice, anca se la ga una bruta malatia. Ghen’è tante prove che la speransa la pol far questo e anca de pi.

El valor dela speransa

El dotor e giornalista W. Gifford-Jones el garante che “la speransa l’è un rimèdio poderoso”. Lu el ga visto el risultado de diversi studi che i mostra che dar apoio emossional ale persone che le ze malade e che le sa che le va morir funsiona pròpio. Se pensa che questo apoio emossional giuta la persona a gaver de pi speransa e un pensamento positivo. Un stùdio fato nel ano 1989 el ga mostrà che le persone che le ga ricevesto questo tipo de apoio le ga vivesto de pi tempo, anca se studi fati dopo no i ga bio i medèsimi resultadi. No importa el caso, i studi i mostra che quei che i ga questo apoio i se sente meio e i ga manco depression de quei che no i riceve questo apoio.

L’è stà fato nantro stùdio che el ga mostrà come che i pensamenti positivi e negativi i influensa le malatie dele vene del cuor. I ga fato el stùdio con de pi de 1.300 òmini par saver se i gavea un pensamento positivo o negativo dela vita. Diese ani dopo, i ga fato nantra volta questo stùdio coi medèsimi òmini. E questo el ga mostrà che 12% de lori i ga bio malatie nele vene del cuor. Intrà lori, ghen’era due volte de pi quei che i pensea negativo de che quei che i pensea positivo. Laura Kubzansky, una professora de salute e comportamento sossial dela Scola de Salute Pùblica de Harvard, la ga dito: “Fin adesso, ghen’era poche prove e peschise sientìfiche de che gaver ‘pensamento positivo’ giuta a gaver una bona salute. Ma questo stùdio el ga mostrà che gaver pensamenti positivi el giuta nele malatie del cuor.”

Arquanti studi i ga mostrà che quei che i considera fiaca la so salute i ghe mete de pi a star meio dopo de una operassion e quei che i pensa che la so salute la ze bona i ghe mete manco. I ga visto che quei che i ga pensamenti positivi i vive de pi. Un stùdio el ga mostrà che pensar positivo o negativo sora deventar vèci el ga poder sora le persone de età. Arquante persone de età le ga bio de pi volontà par caminar dopo che le ga ricevesto messagi che i parlea che deventar vèci dà de pi saver e speriensa. L’è stà tanto bon par queste persone, che l’è stà come se le gavesse fato 12 stimane de esersissi!

Alora, parché che la speransa e el pensamento positivo i par che i fà ben par la salute? Pol esser che i dotori e i sientisti ancora no i capisse ben come che funsiona el corpo e la mente umana par poder dar una risposta a questa domanda. Ma spessialisti che i stùdia questo assunto, i pol dar una risposta baseada nela speriensa, nela cognossensa e nele informassion. Par esémpio, un dotor che el stùdia el servel el dise: “Fà ben esser felice e gaver speransa. La ze una maniera de viver con manco pensieri e cossita el corpo el laora meio. Questo l’è una roba che le persone le pol far lore stesse par proar tender dela so salute.”

Pol esser che par i dotori, psicologhi e sientisti, questa la sìpia una roba nova, ma no l’è gnente de novo par quei che i stùdia la Bìblia. Tre mila ani indrio, el Rè Salomon che l’era un omo sàbio l’è stà ispirà a scriver sora questo: “Un cuor contento l’è un bon rimèdio, ma el spìrito desanimà el finisse cole forse dela persona”. (Proverbi 17:22) Questo testo el mostra echilìbrio. El testo no’l dise che el cuor contento el va sanar qualche malatia, ma el dise che l’è sol “un bon rimèdio”.

Sora tuto questo, alora te pol pensar: se la speransa la fusse un rimèdio, tuti i dotori i la racomandaria. Ma la speransa la dà altri benefissi, nò sol par la salute.

Pensamenti positivi, pensamenti negativi e la to vita

Peschisadori i ga descobrio che le persone positive le ga tanti benefissi. E queste persone le va meio nel laoro, nela scola e nei esersissi fìsichi. Vedemo, par esémpio, un stùdio fato con tose de una echipe de atletismo. Quei che le trenea i osservea le so abilità. Al stesso tempo, i ga fato interviste cole tose e l’è stà registrà la confiansa de lore. I resultadi i ga mostrà che la confiansa che lore le gavea la ga influensà el so laoro de pi de che quel che i trenadori i gavea parlà sora le so abilità. Parché che la confiansa e pensar positivo ga tanto poder sora noantri?

Se ga imparà tanto studiando el contràrio del pensamento positivo, o sia el pensamento negativo. Nei ani 60 i ga fato speriense con bèstie. El resultado l’è stà tanto difarente de quel che i spetea. I peschisadori i ga visto che le bèstie, anca se le gavesse la oportunità de scampar via dopo de passar par una situassion negativa, lore no le ndea. Alora i ga visto che questo anca podea suceder cole persone. Par esémpio, i ga fato un stùdio ndove che le persone le scoltea un baruio fastidioso. I ga spiegà ale persone che le podea finir col baruio se le fusse bone de strucar i botoni de una maniera giusta. E lore le ze state bone de finir con quel baruio.

La medèsima roba la ze stata contada a altre persone. Ma par queste persone, strucar i botoni no’l servia par gnente. L’è restà ciaro che queste ùltime persone le se ga sentio perse e sensa saver cossa far. Nel medèsimo giorno i ga fato altre speriense, e le persone no le ga pi seghio le istrussion. Dopo de tuto questo, lore le pensea che quel che le fea no’l servia par gnente. Ma anca in questo caso, quei che i gavea pensamenti positivi i ga fato de tuto par no sentirse persi e sensa saver cossa far.

El dotor Martin Seligman, che el ga giutà in arquante de queste speriense, el ga dessidio laorar nel stùdio del pensamento positivo e del pensamento negativo. Lu el ga fato un stùdio profondo dela maniera de pensar dele persone che le se sente perse e sensa saver cossa far. Lu el ga capio che la maniera de pensar sora le robe negative le intriga le persone in tante atività dela vita e pol far con che lore no le fae pi gnente. El dotor Seligman l’è rivà a questa conclusion sora i efeti de pensar de maniera negativa: “Dopo de gaver fato questo stùdio par 25 ani, son bon de veder che, se ghemo sempre el pensamento negativo che le robe le va mal par colpa nostra, anca che no se pol cambiarle e che le finisse con tuto quel che ghemo fato, alora sì le robe le va pròpio pedo de che se gavéssino un pensamento difarente”.

Come ghemo belche dito, questo el par una roba nova par arquanti ancoi, ma no l’è gnente de novo par quei che i stùdia la Bìblia. Varda cossa che dise el proverbio: “Se te sì desanimà quando te infronti dificoltà, no te gavarè pi forsa”. (Proverbi 24:10) Come podemo veder, la Bìblia la spiega de maniera ciara che se te sì desanimà e te ghè pensamenti negativi, te mancarà la forsa par far qualche roba. Alora, cossa che te pol far par lotar contra i pensamenti negativi e viver con de pi pensamenti positivi e speransa?

[Stampa nela pàgina]

La speransa la fà ben

Te pol lotar contra i pensamenti negativi

COME vedito i to disgusti? Tante persone che le stùdia questo assunto le dise che la risposta de questa domanda la mostra se te ghè pensamenti positivi o negativi. Tuti noantri passemo par momenti difìcili ntela nostra vita, qualchedun de pi e qualchedun de manco. Arquanti i se ricupera del problema e i resta pronti par infrontar altre dificoltà. Altri, quando vien fora pìcole dificoltà, i se ferma de ndar avanti. Parché?

Par esémpio, pensa che te sì drio ndar in serca de un laoro. Ti te vè nte una intervista, ma no i te dà el laoro. Cossa pénsito? Fursi te pensi che ti te sì el problema e che la situassion la ze sempre cossita. Alora ti te disi a ti stesso: ‘Nissuni ghe daria laoro a una persona come mi. No ndarò mai catar un laoro.’ O pedo ancora, pol esser che questo ùnico disgusto el pol farte veder che tute le robe nela to vita le ze sbaliade. Cossita te resti drio pensar: ‘No son bon de far gnente. Mi no valo gnente.’ Queste due maniere de pensar le ze negative.

Come lotar contra el pensamento negativo

Cossa che te pol far? La prima roba pi importante l’è saver quai che i ze i pensamenti negativi. E dopo, l’è lotar contra questi pensamenti. Pensa in altre robe che te sì bon de far. Par esémpio, sarà che no i te ga dato el laoro par causa dela persona che te sì? O sarà che la persona che la volea darte el laoro la gavea bisogno de una persona con altre abilità?

Se te pensi nela situassion, te vedi che te ghè pensa massa negativo e de pi de quel che ghe volea. Sarà che sol parché i te ga dito de nò una volta, ghe vol dir che no te sì mia bon de far gnente? Te sì bon ricordar de altre robe che sucede nela to vita, come le atività spirituai, la to fameia, i to amighi, ndove che le robe le te va ben? No stà badar le robe che pol esser che no le va gnanca suceder. E pensa in questo: come che te pol esser sicuro che no te vè mai catar un laoro? Te pol far ancora de pi par trar via i pensamenti negativi.

Pensamento positivo par rivar ai nostri ogetivi

Ani in qua, i peschisadori i ga catà fora cossa che ghe vol dir la speransa. E lori i dise che una persona che la ga speransa la crede che la ze bona de rivar ai so ogetivi. Nel pròssimo artìcolo vederemo che la speransa la ghe vol dir ancora de pi de che questo. In questo artìcolo, ndemo consentrarse in come che la speransa la pol giutarne a gaver pensamenti pi positivi e a rivar ai nostri ogetivi.

Par noantri creder che semo boni de rivar ai nostri ogetivi, ghemo de pensar nei ogetivi che semo belche stati boni de rivar. Se te pensi che questo nol sucede con ti, saria meio che te pensessi nei ogetivi che te ghè. Prima de tuto, gheto ogetivi? L’è fàcile gaver la tendensa de far sempre le medèsime robe, par causa de tante robe che ghemo de far. Fursi no pensemo gnanca in quel che ghemo pròpio de far dela nostra vita gnanca in quel che l’è pi importante par noantri. Sora el prinsìpio de gaver ogetivi, nantra volta, tanto tempo indrio, la Bìblia la ne dà una bela lession: ‘sìpie sicuri de quale che le ze le robe pi importante’. — Filipensi 1:10.

Quando ghemo dessidio i nostri ogetivi pi importanti, resta pi fàcile catar altri ogetivi in altre robe, come nela nostra vita spiritual, nela fameia e nel laoro. L’è tanto importante no gaver massa ogetivi nel scomìnsio. Anca, l’è meio gaver i ogetivi che savemo che semo boni de rivar sensa tante dificoltà. Se ghemo un ogetivo massa difìcile de rivar, podemo restar desanimà e fursi desistemo. Invesse de gaver ogetivi che ghe vol pi tempo par rivar, l’è meio gaver pìcoli ogetivi, che no ghe vol tanto tempo par rivar.

“Voler l’è poder.” Cossita i disea sti ani, e pol esser che queste parole le sìpia vere. Quando ghemo ogetivi nela nostra mente, ghemo bisogno de voia e esser determinadi a gaver forsa par rivar ai ogetivi. La nostra determinassion la resta pi forte quando pensemo nela importansa dei nostri ogetivi e nele ricompense che guadagnemo quando semo boni de rivar ai ogetivi. L’è vera che pol vegner fora dificoltà, ma ghemo de veder queste dificoltà nò come una sfida par rivar ntei nostri ogetivi, ma si come una roba che podemo superar.

Noantri anca gavemo de pensar nele maniere che volemo rivar ntei nostri ogetivi. El scritor C. R. Snyder el ga fato un grando stùdio sora el valor dela speransa. E lu el ga dito che ghemo de pensar in diverse maniere par rivar ntei nostri ogetivi. Cossita, quando una maniera no la va ben, ghemo altre maniere par rivarghe, e cossita avanti.

Snyder anca el ga dito che ghemo de saver quando ndar a nantro ogetivo. Se noantri vedemo che no semo boni de rivar al nostro ogetivo, pensar che no semo mia boni ne assarà stufi. Ma se cambiemo un ogetivo che no semo mia boni par nantro che semo boni, pol darne nantra volta un motivo par gaver speransa.

La Bìblia la ga un esémpio che ne giuta capir questo. El Rè Davi el gavea tanto caro de far su un témpio par el so Dio, Geovà. Sol che Dio el ghe ga dito che no saria lu che ndaria farlo, ma che saria el so fiol, Salomon. Invesse de restar disgustà o no esser d’acordo con Dio quando el ga savesto de questo, Davi el ga cambià i so ogetivi. Lu el se ga consentrà in tor su le cose che el so fiol el gavaria de bisogno par far su el témpio. — 1 Rè 8:17-19; 1 Cróniche 29:3-7.

Pol esser che semo ndati ben ntela nostra vita gavendo speransa e che ghemo lotà contra i pensamenti negativi. E anca pensemo positivo quando volemo rivar ntei nostri ogetivi. Ma fursi, ancora ne manca speransa se vardemo el mondo intorno de noantri. Parché? La sensassion de no saver cossa far e gnanca poder far, tante volte la vien de robe che no ghemo el controlo. Quando se fermemo par pensar ntei bruti problemi che i tormenta le persone, come le dificoltà che i ga i poareti, le guere, le ingiustìssie, la paura de malarse e morir, vien fora la domanda: come che podemo, ancora cossita, gaver speransa?

[Stampa nela pàgina]

Se no te sì stà bon de catar laoro, te pensi che no te ndarè mai catarlo?

[Stampa nela pàgina]

El Rè Davi l’è stà bon de adatarse e el ga cambià i so ogetivi

Ndove che te pol catar la vera speransa?

El to relògio el se ga fermà de laorar e pol esser che el se gàpia spacà. Alora, quando che te vol rangiarlo te ghè tanti posti ndove che te pol ndar. Propagande ghen’è par tuto, tuti i dise che i fà un bel laoro, fin i dise de pi de quel che l’è. Cossa farìssito se te vien saver che quel che el ga inventà el to relògio l’è de star darente de ti? E nantra roba: te scolti che lu el vol giutarte sensa voler gnente par far questo laoro. Cossita resta fàcile saver ndove che te pol rangiar el to relògio, mia vera?

Alora fà una comparassion intrà questo relògio roto e la to capacità de gaver speransa. Se te pensi che te sì drio perder la speransa, come l’è drio suceder con tante persone in questo tempo, ndove che te pol ndar in serca de aiuto? Ghen’è tanti che i dise che i pol gaver la solussion del problema ma no i va d’acordo intrà de lori, e tanto de quel che i dise no l’è ciaro. Alora, no saria meio ndar in serca de quel che el ne ga fato e che el ne ga dato la capacità de gaver speransa? La Bìblia la dise che lu ‘no l’è distante de cada un de noantri’ e lu el resta contento de giutarne. — Ati 17:27; 1 Piero 5:7.

Cossa che pròpio ghe vol dir la speransa?

Quel che la Bìblia la dise sora speransa l’è tanto de pi e pi profondo de che quel che i dotori, sientisti e psicologhi i dise ancoi. Le parole nele léngue originai doperade nela Bìblia e traduside par la parola “speransa” le ghe vol dir spetar con ansietà una roba bona. La speransa la ze fata de due robe: la voia de gaver una roba bona e la base par creder che la sucederà. La speransa che la Bìblia la dà no la ze far finta de veder la realità o voler viver nte un mondo che no’l ghen’è. La ga base nei fati e vere prove.

In questo la speransa la se someia cola fede, che la ga de gaver base in prove e nò in creder in qualche roba. (Ebrei 11:1) Ma nela Bìblia ghen’è difarensa intrà la fede e la speransa. — 1 Corinti 13:13.

Par esémpio, quando te ghe domandi un favor a un amigo che ti te te fidi, l’è sicuro che te gavarè la speransa che lu el va giutarte. Questa speransa no la ze sensa base parché te ghè fede in lu, ti te lo cognossi ben e te ghè belche visto che el te ga tratà con considerassion e generosità altre volte. La speransa e la fede le ga una relassion tanto granda una colaltra, fin le depende una delʼaltra, ma le ze due robe difarente. Come che ti te pol gaver questa speransa in Dio?

La base par gaver speransa

La vera speransa la vien de Dio. Nei tempi bìblichi, Geovà l’era ciamà de “la speransa de Israel”. (Geremia 14:8) Qualche speransa che el pòpolo el gavea la vegnea de lu, cossita lu l’era la speransa de lori. Questa speransa no la ghe volea dir sol voler che sucedesse qualcossa. Dio el ghe ga dato una bona base par gaver speransa. In tuti i ani che Dio l’era col so pòpolo, el se ga fato una reputassion de che lu el fà tuto quel che el dise. El lìder dela nassion de Israel, Giosuè, el ga dito al pòpolo: “Valtri savé ben  . . . che Geovà, el vostro Dio, no’l ga assà de far gnanca una dele bone robe che el ga prometesto.” — Giosuè 23:14.

Tanti ani dopo, la reputassion de Dio la ze ancora la medèsima. La Bìblia la ze piena dele bele promesse de Dio e anca un vero registro de come che le se ga realisà. Se pol fidarse tanto nele promesse de Dio sora el futuro che arquante le ze state registrade come se le gavesse belche sucedesto nela època che le ze state fate.

L’è par quela che podemo ciamar la Bìblia de “libro dela speransa”. Intanto che te studi la relassion de Dio cole persone, i to motivi par gaver speransa in Dio i restarà cada volta pi grandi. El apòstolo Paolo el ga scrito: “Tuto quel che l’è stà scrito nel passà l’è stà scrito par insegnarne, cossita par meso dela perseveransa e del consolo dele Scriture noantri ghemo speransa.” — Romani 15:4.

Che speransa Dio el ne dà a noantri?

Se nicordemo che gavemo de pi bisogno de gaver speransa quando romai semo drio morir. Sol che par tanti l’è pròpio in questa ora, quando more qualchedun che amemo, che el par che no ghen sìpia speransa. Te sarè d’acordo che la morte la ze una roba che la ne assa pròpio sensa speransa, mia vera? Nissuni pol scampar dela morte. Dele volte podemo viver un poco de pi ma no podemo mia fermarla. E l’è par causa de questo che la Bìblia la ciama la morte del “ùltimo nemigo”. — 1 Corinti 15:26.

Alora, come che podemo gaver speransa quando semo quasi drio morir? Questo versìcolo bìblico che el ciama la morte de nemigo anca el dise che ela la sarà “finida fora”. Geovà Dio el ga de pi poder che la morte. E lu el ga belche dimostrà questo diverse volte. Come? Ressussitando i morti. La Bìblia la parla de nove volte che Dio el ga doperà el so poder par ressussitar persone.

Una roba tanto spessial l’è stà quando Geovà el ga dato poder al so fiol, Gesù Cristo, par ressussitar el so grando amigo, Làsaro. Lu l’era morto fea quatro giorni. Gesù no’l ga fato questo sconto, ma sì, davanti de tante persone. — Gioani 11:38-48, 53; 12:9, 10.

Fursi te te domandi: ‘Parché che ze state fate queste ressuression? Queste persone no le ze deventade vècie e dopo le ze morte nantra volta?’ Questo l’è vera. Ma, par causa dei registri che se pol fidarse, ghemo la voia che i nostri cari i ressussite e anca ghemo la base par creder che questo el va suceder. Parlando con altre parole, ghemo vera speransa.

Gesù el ga dito: “Mi son la ressuression e la vita”. (Gioani 11:25) Geovà el va darghe poder a Gesù par ressussitar persone in tuto el mondo. Gesù el ga dito: “Vien la ora in che tuti quei che i ze ntele tombe memoriai i scoltarà la so voce [la voce de Gesù] e i vegnerà fora”. (Gioani 5:28, 29) Alora semo sicuri che tuti quei che i ze drio dormir nela morte i ndarà ressussitar par viver nte un paradiso qua ntela Tera.

El profeta Isaia el ga scrito queste parole che le ne riva nel cuor sora la ressuression: “I to morti i viverà. I cadàveri del me pòpolo i se levarà su. Desmissieve e osé de alegria, valtri che sì de star nela polver! Parché el to sguasso l’è come el sguasso dela matina, e la tera la assarà che quei che no i ga poder nela morte i torne a viver.” — Isaia 26:19.

No te cati che questa promessa la dà consolo? I morti i ze ntela meio situassion che ghen’è, come un tatin che ga la protession ntela pansa dela so mama. Quei che i ze drio riposar nela morte i ze ntela memòria che no la ga lìmite del Dio tuto poderoso. (Luca 20:37, 38) Ghe manca poco tempo par i morti viver nantra volta. Lori i va esser ben ricevesti nte un mondo felice, cossita come un tatin, quando che tuti i ze premosi che el rive par ténderlo. Cossita, anca quando semo drio morir, ghen’è speransa.

Cossa che la speransa la pol far par ti

Imparemo tanto dela speransa col apòstolo Paolo. Lu el ga parlà de una parte tanto importante dela armadura spiritual, el capassete. (1 Tessalonissensi 5:8) Cossa che lu el volea dir con questo? Nei tempi bìblichi, i soldadi che i ndea par la batàlia, i doperea un capassete de metal che el gavea un feltro de tessido o de coro, come protession. Par causa del capassete, quando i ricevea colpi, no i moria. Paolo l’era drio dir che, cossita come el capassete el protege la testa, la speransa la protege la mente, o la capacità de pensar. Se ti te ghè una speransa con base nei propòsiti de Dio, sempre te gavarè pace mental, mai te restarè desesperà o sensa saver cossa far quando te infronti problemi difìcili. Tuti noantri ghemo bisogno de un capassete cossita, mia vera?

Paolo el ga doperà nantro esémpio par parlar dela speransa de quel che Dio el va far. Lu el ga scrito: “Ghemo questa speransa come una àncora par la ànima, tanto sicura quanto firme.” (Ebrei 6:19) Paolo el se ga salvà de pi de una volta quando la barca la se ga sfondà, par quela lu el savea che una àncora la podea salvar una vita. Quando che vegnea una tempesta, i òmini nela barca i butea la àncora ntel’àqua. Se ela la restesse pròpio firme nel fondo del mar, la barca no la ndaria de qua in là contra i sassi, ma la restaria in sicuressa.

Se la nostra speransa nele promesse de Dio la ze come questa àncora ‘sicura e firme’, saremo boni de infrontar i problemi de ancoi che i ze come una tempesta. Geovà el promete che presto rivarà el tempo che i umani no i va pi sofrir par causa dele guere, del crime, disgusti e fin dela la morte. (Varda el quadro.) Tégnerse in questa speransa el va giutarne a restar distante del perìcolo e anca ne giutarà a viver d’acordo con quel che Dio el vol, invesse de far le robe sbaliade compagno a questo mondo.

Geovà el te dà questa speransa anca par ti, che te sì drio leder questo. Lu el vol che te godi la vita che lu el ga parecià par ti. Lu el vol che “tuti i tipi de persone i sìpie salvi”. Come? Primo, el vol che cada un el ‘gàpia la cognossensa giusta dela verità’. (1 Timòteo 2:4) Quei che i ga parecià queste informassion i ga pròpio caro che te gàpia questa cognossensa dela verità dela Bìblia che pol darte la vera vita. Par meso de questa cognossensa Dio el te dà una speransa pi granda de qualche speransa che el mondo el podaria darte.

Se te ghè questa speransa no te restarè mai sensa saver cossa far. Te sarè sicuro che Dio el te darà la forsa che te ghè de bisogno par rivar ai to ogetivi che i ze d’acordo cola volontà de Dio. (2 Corinti 4:7; Filipensi 4:13) No la ze questa la speransa che te ghè de bisogno? Alora se te pensi de sì, e te sì drio ndar in serca de questa speransa, no stà mia fermarte. Te pol gaverla. Te pol catarla.

[Quadro nela pàgina]

Motivi par gaver speransa

Le verità dela Bìblia scrite qua soto le pol giutarte a gaver una speransa pi forte:

◼ Dio el promete un futuro felice.

La so Parola la dise che tuta la Tera la sarà un paradiso e quei che i viverà lì i sarà una fameia unida e felice. — Salmo 37:11, 29; Isaia 25:8; Apocalisse 21:3, 4.

◼ Dio no’l pol dir busie.

Lu el òdia tute le busie. Lu l’è santo, o puro, par quela no’l pol mai dir una busia. — Proverbi 6:16-19; Isaia 6:2, 3; Tito 1:2; Ebrei 6:18.

◼ Dio el ga poder che no’l se finisse mai.

Sol Geovà l’è tuto poderoso. Gnente e gnanca nissuni nel Universo pol fermarlo de realisar le so promesse. — Ésodo 15:11; Isaia 40:25, 26.

◼ Dio el vol che te vivi par sempre.

— Gioani 3:16; 1 Timòteo 2:3, 4.

◼ Dio el speta sempre el nostro meio.

Lu el scòlie consentrarse nei nostri sforsi e quel che ghemo de bon invesse de consentrarse nei nostri sbali o difeti. (Salmo 103:12-14; 130:3; Ebrei 6:10) Lu el se fida che noantri semo boni de far quel che l’è giusto e el resta felice quando femo le robe de questa maniera. — Proverbi 27:11.

◼ Dio el promete giutarte a rivar nei to ogetivi che i ze d’acordo cola so volontà.

Le persone che le serve a Dio no le ga motivi par sentirse perse o sensa saver cossa far. Lu el dà el so spìrito santo de maniera generosa. — Filipensi 4:13.

◼ La speransa in Dio la ne giuta sempre.

Noantri podemo fidarse del tuto in lu, parché lu l’è fedele e no’l ndarà mai abandonarne. — Salmo 25:3.

[Stampa nela pàgina]

La speransa la protege la mente, compagno un capassete el protege la testa

[Stampa nela pàgina]

Una speransa che la ga base la pol dar sicuressa, compagno una àncora

[Crèdito dele stampe]

Cortesia de René Seindal/Su concessione del Museo Archeologico Regionale A. Salinas di Palermo