Rispeta el don dela vita

1. Chi ne ga dato la vita?

GEOVÀ “l’è el Dio vivente”. (Jeremias 10:10) Lu l’è el nostro Creador e el ne ga dato la vita. La Bìblia la dise: “Te ghè creà tute le robe, e par la to volontà le ze vegneste a esister e le ze state creade.” (Apocalipse 4:11) La vita la è pròpio un pressioso don de Dio. —Lesi Salmo 36:9.

2. Cossa gavemo de far par esser felice?

² Geovà el ne dà tuto quel che ne ocore par viver, cose come el magnar e l’àqua. (Atos 17:28) Ancora par sora, Lu el vol che godemo la vita. (Atos 14:15-17) Par esser felice, gavemo de obedir ale legi de Dio. —Isaías 48:17, 18.

COME DIO EL CONSIDERA LA VITA?

3. Cossa Geovà el ga fato quando Cain el ga copà Abel?

³ La Bìblia la insegna che la vita la è pressiosa par Geovà. Par esémpio, quando Cain, fiol de Adamo e Eva, el se ga inrabià con so fradel Abel, Geovà el ga avisà Cain che lu el gavea de controlar la so ràbia. Ma Cain no’l ga mia scoltà e el se ga inrabià ancora de pi. Par quela, el “ga atacà so fradel Abel e lo ga copà.” (Gênesis 4:3-8) Geovà el ga dato una punission a Cain parché el gavea copà Abel. (Gênesis 4:9-11) Podemo dir che la ràbia e el òdio i ze pericolosi parché i pol farne deventar violenti o crudeli. Una persona che la è cossita no la pol mia viver par sempre. (Lesi 1 João 3:15.) Par far Geovà contento, gavemo de imparar a amar tute le persone. —1 João 3:11, 12.

4. Cossa ne insegna una dele legi che Dio el ga dato ai israeliti?

⁴ Miliari de ani dopo, Geovà el ga mostrà nantra volta che Lu el considerea pressiosa la vita. Un dei Diese Comandamenti che Geovà el ga dato a Moisè el dise: “No te ghè de assassinar.” (Deuteronômio 5:17) Se qualchedun el copasse una persona aposta, lu el saria condanà a morte.

5. Cossa Dio el pensa sora el aborto?

⁵ Cossa Dio el pensa del aborto? Fin la vita de un bambino vanti de nasser la è pressiosa par Geovà. Ntela Lege che Geovà el ga dato ai israeliti, Lu el ga dito che, se qualchedun el fesse mal a una mare che la è drio spetar un fiol e par via de quel el fiol el morisse, la persona la gavaria de morir. (Lesi Êxodo 21:22, 23; Salmo 127:3) Questo el ne insegna che el aborto l’è sbalià. —Vedi la Nota Final 28.

6, 7. Come podemo mostrar che consideremo pressiosa la vita?

⁶ Se consideremo pressiosa la vita cossita come Geovà, no ndaremo far gnente che pol meter in rìscio la nostra vita e la vita dele altre persone. Par quela, mai ndaremo doperar el tabaco o altre droghe parché le ne fà mal e le pol anca coparne.

⁷ Dio el ne ga dato la vita e un corpo, par quela gavemo de doperarli come Lu el vol e gavemo de tender ben el nostro corpo. Se femo cossita, continuaremo puri ai oci de Geovà. (Romanos 6:19; 12:1; 2 Coríntios 7:1) Par adorar a Geovà, gavemo de considerar pressiosa la vita. Anca se no l’è mia fàcile assar sti vissi, Geovà el ne giutarà se femo la nostra parte.

8. Cossa gavemo de far par no meter in rìs-cio la nostra vita e la vita dei altri?

⁸ Gavemo imparà che la vita la è un don pressioso. Geovà no’l vol che metemo in rìs-cio la nostra vita e la vita dei altri. Alora, gavemo de star atenti quando semo drio guidar un automòbile, una moto o nantro veìcolo. Anca gavemo de evitar sporti violenti o pericolosi. (Salmo 11:5) Nantra roba che gavemo de dar­ghe atension la è la sicuressa dela nostra casa par evitar assidenti. Geovà el ga ordinà ai israeliti: “Se te fè una casa nova, te toca far anca un parapeto [o un pìcolo muro] par la to terassa, cossita ti no te ndarè meter la colpa de sàngue sora la to casa, se qualchedun el casca zo.” —Deuteronômio 22:8.

9. Come gavemo de tratar i animai?

⁹ Geovà anca el se importa cola maniera che tratemo i animai. Lu el ne assa copar i animai par magnar e par vestirse o par protègerse. (Gênesis 3:21; 9:3; Êxodo 21:28) Ma no podemo esser crudeli coi animai e gnanca coparli sol par sporte. —Provérbios 12:10.

RISPETA LA SANTITÀ DELA VITA

10. Come savemo che el sàngue el rapresenta la vita?

¹⁰ Par Geovà, el sàngue l’è santo parché el rapresenta la vita. Dopo che Cain el ga copà Abel, Geovà el ga dito a Cain: “El sàngue de to fradel l’è drio osar a mi dala tera.” (Gênesis 4:10) El sàngue de Abel el rapresentea la so vita, par quela Geovà el ga dato una punission a Cain. Dopo del Dilùvio dei giorni de Noè, Geovà el ga mostrà nantra volta che el sàngue el rapresenta la vita. Geovà el ga assà Noè e la so fameia magnar la carne dei animai. Lu el ga dito: “Valtri podé magnar de tuti i animai che i se move e che i ze vivi. Cossita come ve go dato la vegetassion verde, anca ve dao tuti lori.” Ancora cossita, Geovà el ga dato nantra òrdine: “Sol no gavé de magnar la carne col so sàngue, che l’è la so vita.” —Gênesis 1:29; 9:3, 4.

11. Che òrdine sora el sàngue Geovà el ga dato ala nassion de Israel?

¹¹ Intorno de 800 ani dopo che Geovà el ga dito a Noè de no magnar el sàngue, Lu el ga ordinà nantra volta al so pòpolo: “Se un israelita o un straniero che el vive intrà de valtri l’è drio cassar e el ciapa un animal selvàgio o un osel che se pol magnar, lu el ga de spander el sàngue par tera e coèrzerlo cola polver.” E ancora el ga dito: “No gavé de magnar el sàngue.” (Levítico 17:13, 14) Geovà ancora el volea che el so pòpolo el seitasse considerar el sàngue santo. Lori i podea magnar la carne ma nò el sàngue. Quando i copea un animal par magnarlo, lori i gavea de spander el sàngue par tera.

12. Come i cristiani i considera el sàngue?

¹² Arquanti ani dopo dela morte de Gesù, i apòstoli e i ansiani dela congregassion cristiana in Gerusaleme i se ga riunio par dessider che parti dela lege data ai israeliti i cristiani i gavea ancora de obedir. (Lesi Atos 15:28, 29; 21:25) Geovà li ga giutà a capir che el sàngue l’era ancora pressioso par Lu e che lori i gavea de continuar a considerar el sàngue come santo. I primi cristiani no i magnea e no i bevea sàngue. Lori gnanca i magnea la carne che no la era stata svenada. Se lori no i fesse cossita, l’era tanto sbalià quanto adorar ìdoli o far imoralità sessual. Fin ancoi, i veri cristiani no i aceta magnar o bever sàngue. Geovà el vol che consideremo el sàngue santo.

13. Parché i cristiani no i aceta le trasfusion de sàngue?

¹³ Sarà che questo vol dir che i cristiani no i ga gnanca de acetar le trasfusion de sàngue? Sì, pròpio cossita! Geovà el ga dito che no gavemo de magnar e gnanca bever el sàngue. Se un dotor el te disesse par no bever alcol, sarà che ti te lo meteria ntele vene? Sicuro che nò! Dela medèsima maniera, la òrdine de no magnar o bever el sàngue vol dir che no podemo mia acetar le trasfusion de sàngue. —Vedi la Nota Final 29.

14, 15. Parché l’è importante par un cristiano obedir a Geovà e rispetar la vita?

¹⁴ Se el dotor el te disesse che te vè morir se no te aceti una trasfusion de sàngue, cossa ti te ndaria far? Cada persona la ga de dessider cossa far. I cristiani i ga profondo rispeto par el don dela vita che Dio el ga dato. Par quela, ndemo in serca dei tratamenti alternativi par continuar a viver. Mai acetaremo una trasfusion de sàngue.

¹⁵ Noantri volemo mantegner una bona salute, ma no acetaremo mia una trasfusion de sàngue. L’è pi importante obedir a Geovà che desobedirlo sol par proar salvar la nostra vita. Gesù el ga dito: “Tuti quei che i vol salvar la so vita i la perderà, ma tuti quei che i perde la so vita par via de mi i la catarà.” (Mateus 16:25) Volemo obedir a Geovà parché lo amemo. Geovà el sa quel che l’è meio par noantri. Par quela, gavemo de considerar la vita pressiosa e santa come Geovà la considera. —Hebreus 11:6.

16. Parché i servi de Dio i ghe obedisse?

¹⁶ I servi fedeli de Geovà i ze determinadi a no magnar e bever sàngue, e gnanca acetarlo come tratamento mèdico.a Ma lori i aceta altri tratamenti par proar salvar la so vita. I ze sicuri che el Creador dela vita e del sàngue el sa quel che l’è meio par lori. E ti, te credi che Geovà el sa quel che l’è meio par ti?

LA ÙNICA MANIERA GIUSTA DE DOPERAR EL SÀNGUE

17. Qual la era la ùnica maniera che Geovà el assea i israeliti doperar el sàngue?

¹⁷ Ntela Lege che Dio el ga dato a Moisè, Geovà el ga dito ai israeliti: “La vita dela carne la è ntel sàngue e mi stesso lo go dato a valtri sora el altar par far spiassion [o domandar perdon] par valtri stessi, parché l’è el sàngue che el fà spiassion.” (Levítico 17:11) Quando i israeliti i pechea, lori i podea domandar el perdon a Geovà. Lori i gavea de sacrificar un animal e domandar al sacerdote par spander un pochetin del sàngue sora el altar del témpio. Geovà el assea i israeliti doperar el sàngue sol de sta maniera.

18. Che benefissi gavemo par meso del sacrifìssio de Gesù?

¹⁸ Gesù el ga dato la so vita, o sàngue, par el perdon dei nostri pecadi. Par quela no gavemo pi bisogno de far sacrifissi de animai. (Mateus 20:28; Hebreus 10:1) La vita de Gesù la era tanto pressiosa che, dopo dela so ressuression, Geovà el podea dar a tuti i umani la oportunità de viver par sempre. —João 3:16; Hebreus 9:11, 12; 1 Pedro 1:18, 19.

19. Cossa gavemo de far par esser ‘neti del sàngue de tuti i òmini’?

¹⁹ Semo grati a Geovà par el maraveioso don dela vita! Noantri amemo le persone. Par quela, volemo far tuto quel che podemo par insegnarle che, se le ga fede in Gesù, le pol viver par sempre. (Ezequiel 3:17-21) Alora si, compagno el apòstolo Paolo, poderemo dir: “Mi son neto del sàngue de tuti i òmini, parché mi no me son tirà indrio de parlarve sora tuta la volontà de Dio.” (Atos 20:26, 27) Quando parlemo ai altri sora Geovà e sora quanto pressiosa la è la vita par Lu, semo drio mostrar profondo rispeto par la vita e par el ­sàngue.