Publicassion par pareciarse par la Riunion Vivemo e Insegnemo
Idee par parlar sora la Bìblia
Simon Piero el ga rispondesto: “Ti te sì el Cristo, el Fiol del Dio che el vive.”
Cossita come el Fiol del omo l’è vegnesto, nò par esser servio, ma par servir e dar la so vita par salvar tante persone.
7-13 DE MARSO
LESSION PRESSIOSE DELA BÌBLIA | 1 SAMUEL 12-13
“Te gavarè problemi se te sì orgolioso”
Sentinela 01/08/00 pàg. 13 paràg. 17
Te gavarè problemi se te sì orgolioso
17 Quando te ghè un motivo giusto par far qualcossa, no l’è mia sbalià farla invesse de spetar che altri i la fae. Quel che Saul el ga fato ghe parea giusto parché lu el gavea un motivo. Ma, ghemo de ricordarse che Geovà el vede quel che ghemo nel cuor e el sà dele nostre motivassion. (1 Sam. 16:7) Pol esser che Geovà el ga visto che Saul no’l ga portà passiensa parché l’era orgolioso. Saul l’era el rè e fursi el pensea che Samuel l’era sol un profeta vècio che la smulinea. Cossita, l’è restà inrabià parché ghe tochea spetarlo. Samuel no l’era gnancora rivà, alora Saul no’l ga obedio le orientassion e el ga dessidio cossa far. Invesse de lodar quel che Saul el gavea fato, Samuel lo ga avisà che el so regno no’l duraria par tanto tempo parché l’è stà desobediente. (1 Sam. 13:13, 14) Quei che i ze orgoliosi sempre i ga problemi.
Sentinela 15/06/07 pàg. 27 paràg. 8
Geovà ghe piase quando semo obedienti
8 Samuel el gavaria de far sacrifissi e darghe de pi istrussion vanti che Saul el ndesse contra i filistei. Magari, Samuel no l’è rivà nela ora giusta e el pòpolo el ga scominsià a ndar via. Alora, Saul el ga fato el sacrifìssio brusà e el ga disgustà a Geovà. Quando Samuel l’è rivà, el rè el ga proà catar una scusa e el ga dito che ghe gavea tocà far el sacrifìssio par piaserghe a Geovà parché Samuel no l’era mia rivà. Saul el catea che far el sacrifìssio l’era pi importante che obedir quela orientassion. Alora, Samuel el ghe ga dito che, come Saul no’l gavea obedio ale orientassion de Geovà, lu no’l saria pi rè. — 1 Sam. 10:8; 13:5-13
Va in serca de lession pressiose dela Bìblia
Sentinela 15/07/11 pàg. 13 paràg. 15
Veto obedir ale orientassion de Geovà?
15 Fursi quei israeliti i pensea che saria tanto meio se un omo fusse el so rè parché i podaria vederlo e cossita, i ndaria fidarse de lu. Pol esser che i pensea che, questo rè ndaria giutarli de pi che Geovà. Se l’è stà cossita che lori i pensea, i era drio creder nte una busia e i podaria creder anca in altre busie de Sàtana. Se un omo fusse el so rè, saria fàcile che lu influensiesse el pòpolo a praticar la idolatria. Quei che i ze idòlatri i pensa che i so dei pol giutarli de pi che Geovà, el Dio che no se pol mia vederlo e che el ga creà tute le robe. Ma come el apòstolo Paolo el ga dito, ‘i ìdoli no i ze gnente’. (1 Cor. 8:4) Questi ìdoli no i pol veder, sentir, parlar e gnanca far gnente. Ti te pol vederli e anca tocarli, ma se te adori questi dei, te sì drio creder nte una busia e questo saria pròpio bruto. — Sal. 115:4-8
14-20 DE MARSO
LESSION PRESSIOSE DELA BÌBLIA | 1 SAMUEL 14-15
“Obedir l’è meio che un sacrifìssio”
Sentinela 15/06/07 pàg. 26 paràg. 4
Geovà el ghe dà tanto valor ala nostra obediensa
4 Ancora che Geovà el sìpia el Creador e paron de tuto, podemo dar a lu una roba tanto importante. Proverbi 27:11 dise: “Sìpia sàbio, me fiol, e fà contento el me cuor. Cossita, risponderò a quel che me sfida.” Quel che podemo darghe l’è la nostra obediensa. Ancora che semo stati slevadi in posti difarenti e de maniere difarente, tuti noantri podemo obedir a Geovà. Cossita, podemo darghe una risposta a Sàtana che el ga dito che gnanca una persona la saria leal a Geovà se gavesse provassion. Questo l’è pròpio un grando onor!
Perspicaz vol. 2 pàg. 500 paràg. 2
Obediensa
No ghen’è come contentar a Geovà se no semo obedienti. Una persona che la ze desobediente, la mostra che no la crede, no la se fida e no la ga fede in Dio gnanca nela so Parola. Quei che no i aceta e gnanca obedisse la Parola de Dio, i ze compagno a una persona che la fà indovinassion o la adora altri dèi. (1 Sam. 15:23; fà la comparassion con Romani 6:16.) Lori i ze drio far dispeti contra Dio. (Mat. 21:28-32) Par quela, se scoltemo e semo de acordo che le orientassion de Dio le ze giuste, ma no femo gnente par meterle in pràtica, sarìssino drio imbroiar a noantri stessi. (Tia. 1:22-25) El Fiol de Dio, Gesù, el ga spiegà che, se una persona fà una roba che la par giusta, ma dela maniera e cola motivassion sbaliada, no’l gavarà la so aprovassion gnanca ndarà rento el Regno de Dio. — Mat. 7:15-23
Va in serca de lession pressiose dela Bìblia
Perspicaz vol. 1 pàg. 519 paràg. 8
Compassion
No podemo assar che una situassion la ne fae pecà se questo l’è contra la volontà de Geovà. Senò, gavaremo brute consequense. L’è stà questo che ga sucedesto col rè Saul. Geovà el ndea far el so giulgamento contra i amalechiti. Dio el ga dito che Saul el gavea de finir fora con tuti, e no i gavea de farghe pecà. Ma i israeliti i seitea domandar a Saul de no far cossita. Lu li ga scoltadi e el ga desobedio a Geovà. Alora, Geovà el ga dito a Saul che lu no’l podaria pi esser el rè! (1 Sam. 15:2-24) Se ghe demo valor a quel che Geovà el ne insegna e semo leai a lu prima de tuto, mai ndaremo far compagno el bruto esémpio de Saul e gnanca ndaremo disgustar Geovà.
21-27 DE MARSO
LESSION PRESSIOSE DELA BÌBLIA | 1 SAMUEL 16-17
“La batàlia la ze de Geovà”
Sentinela no. 5 de 2016 pàg. 11 paràg. 2-3
“La batàlia la ze de Geovà”
Davi el gavea una forte fede in Geovà par via de quel che el savea e de quel che ghe gavea sucedesto. Par far che Saul lo assesse infrontar Golia, Davi ghe ga contà che, quando el ga copà un leon e un orso, sol l’era stà bon de farlo parché el ga bio el aiuto de Geovà. Alora, Saul lo ga assà ndar. — 1 Sam. 17:37
Davi el gavea fede, nò parché el credea in qualche roba o in storiete, ma par causa dele robe che el gavea imparà e de quel che gavea sucedesto con lu. Davi el savea che Geovà l’è tanto amoroso, protege i so servi e fà tuto quel che el promete. Se volemo una fede compagno a quela de Davi, ghemo de seitar a imparar sora Geovà. Se obedimo a Geovà, sicuro che gavaremo una vita ancora pi felice e la nostra fede la restarà cada volta pi forte. — Ebr. 11:1
Sentinela no. 5 de 2016 pàg. 11 paràg. 8-9
“La batàlia la ze de Geovà”
Davi el ga vardà Golia e el ghe ga dito con coraio: “Te vien contra mi con armamenti de guera, ma mi vao contra ti nel nome de Geovà dei esèrsiti, el Dio dei esèrsiti de Israel, quel che te ghè sfidà.” La forsa e le arme de Golia no le era gnente par Davi. Golia el gavea ofendesto a Geovà. Alora, l’era Geovà che ndaria contra lu. Par quela, Davi el ga dito “la batàlia la ze de Geovà”. — 1 Sam. 17:45-47
Davi el gavea visto che Golia l’era pròpio grando e tanto forte, ma no’l se ga tirà indrio compagno el rè Saul e i so soldadi. Davi no’l ga fato comparassion intrà lu stesso e Golia. Pitosto, el ga fato comparassion intrà Golia e Geovà. Golia l’era alto 3 metri e lu l’era el pi forte de tuti i òmini lì. Ma Geovà l’era ancora pi forte e poderoso che lu. Noantri semo come formighete darente de Geovà. Alora, Golia l’era sol una formigheta un pochetin pi granda e Geovà el ndaria suito pestarghe dosso!
Sentinela no. 5 de 2016 pàg. 12 paràg. 4
“La batàlia la ze de Geovà”
Ancoi noantri no ndemo in batàlie. Ma, pol esser che ghemo de infrontar problemi grandi come ga sucedesto con Davi. (Mat. 26:52) Alora, ghemo de far compagno ala so fede. Geovà el ga tanto poder e i nostri problemi i ze pìcoli in comparassion con lu. Par quela, toca veder Geovà come el ùnico che mèrita esser lodà e adorà. Se noantri scoliemo servir a Geovà e se fidemo in lu compagno Davi, no gavaremo paura de gnente. El poder de Geovà l’è tanto pi grando in comparassion con qualche problema.
Va in serca de lession pressiose dela Bìblia
Perspicaz vol. 2 pàg. 974 paràg. 5
Saul
Saul el ga desobedio a Geovà parché el gavea brute motivassion, nela mente e nel cuor. Par quela, Geovà el ga cavà via el so spìrito de lu. Cossita, Saul no’l gavea pi la so protession e gnanca l’era bon de resistir a quel spìrito rugno. Lu no’l gavea pi pace e no’l catea pi réchia. Alora, questo spìrito el podea esser ciamà de un spìrito rugno dela parte de Geovà parché lu el gavea cavà via la so protession de Saul, e cossita, el ga assà che un spìrito rugno lo controlesse. Saul l’era tanto aflito che el ga mandà ciamar Davi par sonar mùsica e farlo restar pi calmo. — 1 Sam. 16:14-23; 17:15
28 DE MARSO–3 DE APRIL
LESSION PRESSIOSE DELA BÌBLIA | 1 SAMUEL 18-19
“Sìpia sempre ùmile”
Sentinela 01/04/04 pàg. 15 paràg. 4
Fìdate in Geovà quando sucede cambiamenti ntela to vita
4 El rè el ga ciamà Davi par servirlo e sonar la arpa par lu. Davi el ga copà Golia, un gueriero gigante e pròpio rugno che fea paura fin a brai soldadi israeliti. Lu l’è stà scoliesto par guidar òmini de guera e, tante volte, el ga vinsesto i filistei. El pòpolo el ghe volea tanto ben a Davi e el ga fin fato mùsiche par lodarlo. Un che laorea par el rè Saul el ga dito che Davi l’era tanto brao de sonar la arpa, e anca l’era un omo poderoso con tanto coraio, un omo de guera che parlea ben e l’era tanto bel. — 1 Samuel 16:18; 17:23, 24, 45-51; 18:5-7
Sentinela 01/18 pàg. 28 paràg. 6-7
Vèdito la difarensa?
6 Arquanti i deventa orgoliosi parché i ze bei, i ga forsa o autorità. Altri, parché i sà cantar, sonar ben un istrumento o parché tanta gente li ghe vol ben. Davi el gavea tuto questo e, ancora cossita, l’è stà bon de seitar ùmile tuta la so vita parché el tegnea ben in mente che tuto quel che el gavea vegnea de Geovà. (Vedi anca 1 Corinti 4:7.) Davi el gavea questi privilegi e abilità parché Geovà l’è stà ùmile e el ga vardà do. — Sal. 113:5-8
7 El pòpolo de Geovà el proa esser ùmile compagno Davi. Cossa che ne giuta a esser ùmili? Prima, el esémpio de Geovà. Lu l’è la persona pi importante del universo e, ancora cossita, l’è ùmile. (Sal. 18:35) Seconda, meter in pràtica el consìlio dela Bìblia: “Gavé de vestirve de terna compassion, bontà, umiltà, brandura e passiensa.” (Col. 3:12) Nantra qualità che ne giuta l’è el amor, “che no’l se fà veder, no l’è orgolioso”. (1 Cor. 13:4) Quando semo ùmili, podemo giutar altri a imparar sora Geovà e esser so amighi. — 1 Pie. 3:1
Va in serca de lession pressiose dela Bìblia
Perspicaz vol. 2 pàg. 727 paràg. 2
Profeta
L’era par causa del spìrito de Geovà che i profeti i era boni de parlar el messàgio de Dio. (Eze. 11:4, 5; Mic. 3:8) Cossita, lori i proclamea el so messàgio. (1 Sam. 10:10; Ger. 20:9; Amòs 3:8) Lori i fea robe strànie e, par meso dei so moti e de quel che i fea, se vedea come l’era forte quel che i sentia. Questa la era una dele robe che una persona la fea quando la se ‘comportea come profeta’. (1 Sam. 10:6-11; 19:20-24; Ger. 29:24-32; fà la comparassion con Ati 2:4, 12-17; 6:15; 7:55.) Quando Saul l’era in serca de Davi, lu el ga scominsià a ‘comportarse come profeta’. Lu el se ga cavà do le robe, el se ga butà in tera e l’è restà lì, sensa roba, tuta quela giornada e quela note. Cossita, Davi l’è stà bon de scampar. — 1 Sam. 19:18–20:1
4-10 DE APRIL
LESSION PRESSIOSE DELA BÌBLIA | 1 SAMUEL 20-22
“Sìpia un bon amigo”
Sentinela 11/19 pàg. 7 paràg. 18
Fà pi forte le to amicìssie vanti che vegna el fin
18 Ancoi i fradei i infronta tante dificoltà e, dele volte, no savemo cossa far o dirghe quando i ze desanimadi. Ma, tuti noantri podemo far qualcossa. Par esémpio, podemo passar tempo insieme, scoltarli con atension intanto che i parla e leder un testo che ne ga piasesto e che dà consolo. Nantra roba che podemo far l’è pregar che Geovà el giute questo fradel o sorela. (Isa. 50:4) L’è tanto importante esser dela banda de nostri amighi quando i ga de bisogno. — Ledi Proverbi 17:17.
Sentinela 15/02/08 pàg. 8 paràg. 7
Obedissi a quel che Geovà el dise
7 Geovà el vol che semo amighi de fidarse. (Pro. 17:17) Gionatan, fiol de Saul, l’è deventà amigo de Davi. Lu el ghe ga avisà quando so pare el volea coparlo. Dopo che Davi el ga scampà, Gionatan l’è ndà catarse con lu e lori i ga fato un acordo. Gionatan el ga fin riscià de morir quando el ga parlà de Davi par Saul. Ma lori due i se ga catà nantra volta e i ga prometesto che i seitaria esser amighi. (1 Sam. 20:24-41) Ntela ùltima volta che i se ga catà, Gionatan el ga incoraià Davi a fidarse in Geovà. — 1 Sam. 23:16-18
Sentinela 15/10/09 pàg. 19 paràg. 11
Come esser boni amighi nte un mondo sensa amor
11 Sìpia leal. Salomon el ga scrito: “Un vero amigo el ama tuto el tempo, e el deventa come un fradel quando ghen’è situassion difìcile.” (Pro. 17:17) Quando el ga scrito queste parole, pol esser che Salomon el gavea pensà ntela amicìssia de so pare Davi con Gionatan. (1 Sam. 18:1) El rè Saul el volea che so fiol, Gionatan, el deventesse rè. Ma Gionatan el savea che Geovà el gavea scoliesto Davi. Alora, el ga acetà la dessision de Geovà. Quando tuti i ga lodà Davi par la benedission che lu el gavea ricevesto, Saul l’è restà con invìdia, ma Gionatan nò. Quando Saul el ga parlà busie contra Davi, Gionatan no’l ghe ga credesto. (1 Sam. 20:24-34) Sarà che femo compagno Gionatan? Quando un amigo el riceve un privilègio, restemo contenti par lu? Quando lu l’è drio infrontar dificoltà, ghe demo aiuto e consolo? Se qualchedun el parla mal de un amigo, ghe credemo o femo compagno Gionatan e lo difendemo?
Va in serca de lession pressiose dela Bìblia
Sentinela 15/03/05 pàg. 24 paràg. 4
Punti interessanti del libro de Primo Samuel
Primo Samuel 21:12, 13. Quando infrontemo dificoltà ntela vita, Geovà el vol che pensemo ben e doperemo quel che savemo par darghene fora cole situassion. Par quela che Geovà el ne ga dato la so Parola, la Bìblia, che la ne giuta a gaver la cognossensa, esser boni de capir e de pensar. (Pro. 1:4) Ghemo anca el aiuto dei ansiani.
18-24 DE APRIL
LESSION PRESSIOSE DELA BÌBLIA | 1 SAMUEL 23-24
“Gàpia passiensa e fìdate in Geovà”
Sentinela 01/04/04 pàg. 16 paràg. 8
Fìdate in Geovà quando sucede cambiamenti ntela to vita
8 Pitosto de voler farghe mal a Saul, Davi l’è stà passiente e el se ga fidà che Geovà ndaria risolver la situassion. (1 Sam. 24:12) Davi el savea che Saul l’era sbalià. Ma ancora cossita, no’l ga volesto vingarse de lu, darghe contra o farghe dispeti. Invesse de proar far quel che ghe parea giusto, el ga spetà che Geovà el metesse tuto a posto. — 1 Sam. 25:32-34; 26:10, 11
Sentinela 01/06/04 pàg. 22 paràg. 5-6
Sito bon de far sempre quel che l’è giusto?
5 La tersa roba che imparemo la ze sempre fidarse in Geovà invesse de far qualcossa difarente de quel che dise la Bìblia. Tiago el ga scrito: “La perseveransa la ve insegne del tuto. Cossita valtri saré completi, giusti in tute le robe e sensa sbàlio.” (Tia. 1:4) La nostra perseveransa la ndarà ‘insegnarne’ e farne “completi” se perseveremo fin ala fin, invesse de far qualcossa che va contra la Bìblia par darghene fora con una situassion. Quando infrontemo dificoltà e seitemo fedeli, la nostra fede la resta pi forte. Par esémpio, Giusepe e Davi no i ga proà risolver i so problemi de una maniera che disgustesse a Geovà e i ga mostrà perseveransa. Lori i se ga fidà in Geovà e par quela, i ga ricevesto tante benedission, come esser doperadi par giutar el pòpolo de Dio. — Gén. 41:39-41; 45:5; 2 Sam. 5:4, 5
6 Anca noantri ghemo de seitar fedeli quando infrontemo dificoltà. Par esémpio, sito disgustà parché no te ghè gnancora catà qualchedun par maridarse? Alora, no stà desobedir la òrdine de Geovà de maridarse sol con un che “serve al Signor”. (1 Cor. 7:39) Gheto problemi nel to matrimònio? Invesse de divorsiarse, proé risolver i vostri problemi insieme. (Mal. 2:16; Efe. 5:21-33) Càtito che l’è fadiga mantegner la to fameia? Fìdate in Geovà e no stà far qualcossa sbaliada par guadagnar soldi. (Sal. 37:25; Ebr. 13:18) Ghemo de far el meio in qualche situassion. Cossita, Geovà ndarà benedir i nostri sforsi e ne giutarà a darghene fora con qualche problema. — Mic. 7:7
Va in serca de lession pressiose dela Bìblia
Sentinela 11/17 pàg. 27 paràg. 11
No stà mia perder el prémio
11 Se semo amorosi e bondosi coi altri, no saremo gelosi e gnanca invidiosi. La Bìblia la dise che ‘el amor l’è passiente e bon, e no l’è geloso’. (1 Cor. 13:4) Ghemo de veder i altri come Geovà li vede. Par lu, tuti noantri semo parte del medèsimo corpo. Alora, restemo contenti quando i fradei i riceve privilegi. Ghemo de far come dise la Bìblia: “Se una parte la riceve lode, tute le altre parte Ie resta contente insieme.” (1 Cor. 12:16-18, 26) L’è questo che Gionatan, fiol del rè Saul, el ga fato. Davi l’era stà scoliesto come rè. Invesse de Gionatan restar geloso, lu el ga giutà e incoraià Davi. (1 Sam. 23:16-18) Ghemo de far compagno Gionatan e dimostrar amor e bontà a tuti.
25 DE APRIL–1 DE MAIO
LESSION PRESSIOSE DELA BÌBLIA | 1 SAMUEL 25-26
“Feto le robe sensa pensarghe sora?”
Imite pàg. 78 paràg. 10-12
Ela la ga fato bone dessision
10 Quei soldadi i era brai parché i tendea e protegea quei pastori e le so piégore come se fusse una muràlia. Lori mai i ga fato qualcossa contra quei pastori, come ciapar una piégora, anca se fusse una roba fàcile de far. — Ledi 1 Samuel 25:15, 16.
11 Par Davi, l’era un laorasso catar de magnar par tuti quei soldadi nel deserto. Par quela, lu el ga mandà diese dei so òmini par domandar aiuto a Nabal. Davi el ga fato questo nel tempo giusto. L’era la època de tosar la lana dele piégore e tuti i gavea costume de far feste e mostrar generosità ai altri. Davi anca el ga doperà bele parole. El ga parlà de si stesso come “to fiol Davi”, parché Nabal l’era pi vècio de lu. Cossa che Nabal el ga fato? — 1 Sam. 25:5-8
12 Nabal l’è restà cativo e el ghe ga dito su a quei òmini. Fursi, el catea che so pan, so àqua e so carne le gavea massa valor par darghe a quele persone. Lu l’era pròpio un tirano. Nabal el ga ridesto drio a Davi, el ghe ga dito che el valea poco gnente e che l’era sol un schiavo rebelde che gavea scampà del so signor. Anca Saul el pensea cossita. Ma Geovà amea Davi e lo vedea come futuro rè de Israel. — 1 Sam. 25:10, 11, 14
Imite pàg. 80 paràg. 18
Ela la ga fato bone dessision
18 Abigail la se ga ciapà la colpa e la ga domandà che Davi la perdonesse. Ela la savea che so omo l’era stùpido, pròpio come so nome volea dir. La ga dito che Davi no l’era tristo come so omo e par quela, lu no’l gavea de vingarse de Nabal. Abigail la ga mostrà che se fidea che Geovà el gavea scoliesto Davi par lotar le so batàlie. La ga dito anca che la savea dela promessa de Geovà de che Davi saria rè. Ela la ga domandà a Davi de no far gnente che podaria portarghe colpa de sangue o che lo faria ciamarse gramo. — Ledi 1 Samuel 25:24-31.
Va in serca de lession pressiose dela Bìblia
Imite pàg. 80 paràg. 16
Ela la ga fato bone dessision
16 Sarà che Abigail la ze ndata contra la autorità de so omo? Nò! Nabal el gavea fato una bruta roba contra Davi, quel che Geovà el gavea scoliesto. Tante persone dela casa de Nabal, che no le gavea colpa de gnente, le podea esser state copade par causa de quel che Nabal el gavea fato. Alora, Abigail la ga obedio Geovà invesse de so omo.