Publicassion par pareciarse par la Riunion Vivemo e Insegnemo
Idee par parlar sora la Bìblia
Dopo Dio li ga benedidi e el ghe ga dito: “Gàpie tanti fioi. Gavé de impienir la tera e gavé de esser paroni dela tera. Gàpie autorità sora i pessi del mar, sora i osei del cielo e sora tuto quel che vive e che se move sora la tera.”
Cossita la sarà la me parola che la vien fora dela me boca: ela no la tornarà a mi sensa resultadi, ma sicuro che la realisarà quel che mi vui, e sicuro la farà quel che mi go mandà far.
4-10 DE LÙLIO
LESSION PRESSIOSE DELA BÌBLIA | 2 SAMUEL 18-19
“Barzilai l’è stà un bel esémpio de modèstia”
Sentinela 15/07/07 pàg. 14 paràg. 5
Barzilai el savea quel che el saria bon de far
L’è sicuro che Davi ghe gavea piasesto tanto el aiuto de Barzilai. Lu el gavea bele qualità e fursi, l’è stà par quela che Davi el volea che el restesse insieme nel palàssio. Barzilai el podaria goder de bele robe parché l’era amigo del rè e questo saria un grando onor par lu.
Sentinela 15/07/07 pàg. 14 paràg. 7
Barzilai el savea quel che el saria bon de far
Pol esser che Barzilai no’l gàpia acetà el convite de Davi parché deromai l’era vècio e el savea che no’l saria bon de far arquante robe. Fursi, lu el ga pensà che no’l viveria pi tanto tempo. (Sal. 90:10) Lu el gavea fato tuto quel che el podea par giutar Davi. Se el acetesse el convite, el saria una persona importante e el podaria goder de bele robe. Ancora cossita, no’l ga assà che questa idea lo fesse acetar qualcossa che no’l saria bon de far. Barzilai el ga mostrà sabedoria e modèstia. — Pro. 11:2
Sentinela 15/07/07 pàg. 15 paràg. 1-2
Barzilai el savea quel che el saria bon de far
El esémpio de Barzilai ne insegna due lession tanto importante. Prima, no ghemo de dir de nò a un privilègio, o no sforsarse par gaverlo, parché catemo che no saremo boni o parché semo pacìfichi. Invesse, bisogna fidarse in Geovà par gaver forsa e sabedoria parché lu el darà quel che ghemo de bisogno. — Fil. 4:13; Tiago 4:17; 1 Pie. 4:11
Nantra lession che imparemo l’è che ghemo de saver quel che semo boni de far o nò. Pol esser che un fradel el gàpia belche tanto de far nela organisassion de Geovà. Ma lu el sà che, se el aceta far de pi, fursi no’l sarà bon de far altre robe importante come tender dela so fameia. Lu el mostra che l’è modesto e che el capisse ben quel che l’è bon de far se no’l aceta queste nove responsabilità. — Fil. 4:5; 1 Tim. 5:8
Va in serca de lession pressiose dela Bìblia
Sentinela 04/20 pàg. 30 paràg. 19
“Finissi la carera”
19 Pol esser che infrontemo problemi de salute e le persone no le capisse quel che semo drio passar. Alora, el esémpio de Mefibosete el pol giutarne a gaver pi forsa. (2 Sam. 4:4) Mefibosete l’era desgrassià, e el rè Davi el ga fato una ingiustìssia con lu. Mefibosete no’l gavea fato gnente de sbalià. Ancora cossita, no’l ga seità pensar in brute robe. Invesse, el se ga consentrà in quel che ghe gavea sucedesto de bon. Lu el ringrassiea tanto el aiuto che Davi ghe gavea dato nel passà. (2 Sam. 9:6-10) Par quela, quando el ga sofrio quela ingiustìssia, lu no’l ga pensà sol in lu stesso. Mefibosete no l’è deventà una persona amara par causa del sbàlio de Davi contra lu, gnanca el ga dato la colpa a Geovà. Mefibosete el se ga consentrà in quel che el podaria far par giutar el rè che Geovà el gavea scoliesto. — 2 Sam. 16:1-4; 19:24-30
11-17 DE LÙLIO
LESSION PRESSIOSE DELA BÌBLIA | 2 SAMUEL 20-21
“Geovà l’è un Dio de giustìssia”
Perspicaz vol. 1 pàg. 1059 paràg. 1
Gibeon
Saul el ga proà finir fora coi gibeoniti, ma no l’è stà bon de farlo. Lori i ga portà passiensa intanto che i spetea la giustìssia de Geovà. Intanto che Davi l’era rè, Geovà el ga fato vegner una fame de tre ani. Davi el ga domandà a Geovà parché che l’era drio suceder quela roba e el ga savesto che l’era par causa de una colpa de sangue. Par quela, Davi l’è ndato parlar coi gibeoniti par saver cossa che el podaria far par finir con quel problema. I gibeoniti i ga dito che no se podea mia doperar “argento o oro” parché, de acordo cola lege, no se podea acetar risgate par una persona che la gavesse copà nantra. (Nùm. 35:30, 31) Ma lori anca i savea che sol i podaria copar qualchedun se i gavesse autorisassion. Par quela, i ga domandà che se copesse sete “fioi” de Saul. Lu el gavea la colpa ma anca i so “fioi”. (2 Sam. 21:1-9) Cossita, i fioi no i ndaria morir par causa del pecato de so pare. (Deu. 24:16) Invesse, questa la saria la giustìssia de Geovà de acordo cola lege “vita par vita”. — Deu. 19:21
Va in serca de lession pressiose dela Bìblia
Sentinela 15/01/13 pàg. 31 paràg. 14
I ansiani ‘i laora insieme par la nostra alegria’
14 Dele volte infrontemo problemi tanto grandi come Golia, ma noantri se fidemo nel aiuto de Geovà par darghene fora. Magari, infrontemo tante pression del mondo che restemo stufi e desanimadi. E quando semo fiachi, deventa fadiga darghene fora con un problema che fursi saria fàcile de infrontar. Ma i ansiani i pol giutarne a gaver alegria e forsa nantra volta. Infati, lori i ga belche giutà tanti dei nostri fradei.
18-24 DE LÙLIO
LESSION PRESSIOSE DELA BÌBLIA | 2 SAMUEL 22
“Fìdate nel aiuto de Geovà”
Achegue-se pàg. 19 paràg. 11
Podemo pròpio rivarse “darente de Dio”?
11 Imagina sol quando Geovà el ga verto el rabalton de àqua in meso el mar. Lu el ga fato passar 3 milioni de persone in meso el mar in tera suta. Ghen’era due muri de àqua ferma pròpio alti dele due bande. (Éso. 14:21; 15:8) Pensa sora come Geovà el ga tendesto del so pòpolo nel deserto. Lu el ga fato vegner fora àqua de una ròcia e el ghe ga dato un tipo de magnar che parea semense bianche. (Éso. 16:31; Nùm. 20:11) Cossita, Geovà el ga mostrà che el ga tanto poder e che lo dopera par giutar el so pòpolo. L’è tanto bon saver che un Dio poderoso el scolta le nostre orassion, e che lu “l’è nostra protession e la nostra forsa. Noantri podemo sempre ricever el so aiuto in tempi de dificoltà”. — Sal. 46:1
Sentinela 01/06/10 pàg. 26 paràg. 4-6
Te sì leal
La vera lealtà la vien del amor. Geovà l’è darente a quei che i ze leai a lu parché li ama tanto.
La lealtà no la ze mia sol un sentimento, bisogna mostrarla par meso de quel che femo. Davi el ga visto che Geovà el mostra lealtà parché el ga passà par brute situassion, e Geovà lo ga sempre giutà. Lu l’era un rè fedele, par quela che Geovà lo ga protegesto e el ghe ga dato orientassion. Davi sempre el ringrasssiea par quel che Geovà el ghe gavea fato, parché lu lo ga protegesto “de tuti so nemighi.” — 2 Sam. 22:1
Cossa imparemo de quel che Davi el ga dito? Che Geovà sempre el fà de acordo coi so prinsipi e l’è fedele a quel che el promete. (Tiago 1: 17) In nantro Salmo, Davi el ga scrito: “Geovà mai el abandonarà quei che i ze leai a lu.” — Sal. 37:28
Va in serca de lession pressiose dela Bìblia
Sentinela 15/11/12 pàg. 17 paràg. 7
Sfòrsate par comportarte come qualchedun manco importante
7 Davi l’era tanto importante in Israel gràssie ala umiltà de Geovà. Lu el ga mostrà umiltà parché el vardea in do par darghe atension a Davi. (Sal. 113:5-7) Anca con noantri l’è cossita. Tute le nostre qualità, quel che semo boni de far e i nostri privilegi nela organisassion li gavemo parché Geovà el ne ga dato. (1 Cor. 4:7) Geovà el ghe dà tanto valor a quel che se comporta come manco importante. — Luc. 9:48
25-31 DE LÙLIO
LESSION PRESSIOSE DELA BÌBLIA | 2 SAMUEL 23-24
“Sito drio sforsarte par far sacrifissi a Geovà?”
Perspicaz vol. 1 pàg. 177 paràg. 2
Araùna
Araùna el ga volesto dar a Davi i boi, el legno e un posto par far sacrifìssio sensa cobrarghe gnente. Ancora cossita, Davi el ga dito che el ndaria darghe soldi par quele robe. In 2 Samuel 24:24, dise che Davi el ga pagà 50 sicli de argento (110 dòlari) par i boi e un toco de tera. Ma, in 1 Cróniche 21:25 dise che Davi el ga pagà 600 sicli de oro (intorno de 77 mila dòlari) par quel posto. Alora, se capisse che con 600 sicli de oro, Davi el ga pagà tuto el posto ndove l’è stà fato el témpio, e nò sol el toco de tera ndove el ga fato el altar.
Sentinela 15/01/12 pàg. 18 paràg. 8
Impara del ‘fondamento dela verità’
8 I seghidori de Gesù no i fà sacrifissi come mandea la lege che Dio el gavea dato a Moisè. Invesse, lori i dopera el so tempo, la so forsa e quel che i ga par servir a Geovà. El apòstolo Paolo el ga dito che parlar ai altri dela nostra speransa, far el ben e spartir coi altri quel che ghemo i ze sacrifissi che ghe piase a Dio. (Ebr. 13:15, 16) Podemo mostrar che ghe demo valor e che ne piase quel che Geovà el ne dà par via del sforso che ghe metemo par far questi sacrifissi.
Va in serca de lession pressiose dela Bìblia
Sentinela 15/05/05 pàg. 19 paràg. 6
Punti interessanti del libro de Secondo Samuel
Secondo Samuel 23:15-17. Davi el gavea tanto rispeto par la Lege de Geovà sora la vita e el sangue. Par quela, no’l ga volesto far gnente che podesse ndar contra questa lege. Anca noantri podemo far compagno a Davi e mostrar tanto rispeto par la lege de Dio.
1-7 DE AGOSTO
LESSION PRESSIOSE DELA BÌBLIA | 1 RÈ 1-2
“Te impari dei to sbali?”
Perspicaz vol. 2 pàg. 914 paràg. 1
Salomon
Adonia el ga sentio la mùsica che la vegnea de Gion e el pòpolo che el osea: “Viva el rè Salomon!”. Alora, Adonia e quei che i era insieme a lu contra el governo no i savea cossa far e i ga scampà via spauradi. Lu l’è ndà al santuàrio in serca de protession. Alora, Salomon el ga domandà che i lo menesse indrio. Salomon el ghe ga dito che no’l ndaria coparlo se lu no’l fesse gnente de sbalià, e dopo lo ga mandà casa. — 1 Rè 1:41-53
Perspicaz vol. 1 pàg. 53
Adonia
Dopo dela morte de Davi, Adonia l’è ndato parlar con Bate Seba. Lu el ghe ga domandà che ela la parlesse con Salomon parché el volea maridarse con Abisaghe, la gióvena che la tendea de Davi e ghe fea compagnia. Quel che Adonia el ga fato mostra che lu el volea de pi de quel che el gavea dirito, ancora che el gàpia dito che Geovà el gavea scoliesto el rè. (1 Rè 2:13-21) Nel passà, nel oriente, la lege la era che le done o concubine de un rè sol le podaria maridarse con quel che el deventesse rè nel so posto. (Fà la comparassion con 2 Sam. 3:7; 16:21.) Par causa de quel che Adonia el ga domandà par meso de Bate Seba, Salomon el ga visto che lu el volea esser rè nel so posto. Alora, el ga mandà che Benaia el copesse Adonia. — 1 Rè 2:22-25
Va in serca de lession pressiose dela Bìblia
Sentinela 01/07/05 pàg. 30 paràg. 1
Punti interessanti del libro de Primo Rè
Primo Rè 2:37, 41-46. L’è pericoloso pensar che podemo far quel che no ghemo el dirito sensa gaver qualche punission. Quei che i fà aposta robe sbaliade e che no i seita nela “strada che la mena ala vita” i ndarà gaver brute consequense. — Mat. 7:14
8-14 DE AGOSTO
LESSION PRESSIOSE DELA BÌBLIA | 1 RÈ 3-4
“La sabedoria la ze tanto valiosa”
Sentinela 15/12/11 pàg. 8 paràg. 4-6
Elo bel o bruto el so esémpio?
4 Nel scomìnsio del so governo, Salomon l’era drio insognarse quando Dio el ga parlà con lu. (Ledi 1 Rè 3:5-9.) Dio el ghe ga dito che el podea domandar quel che el volesse. Salomon el savea che el gavea poca speriensa, alora el ga pregà par gaver sabedoria. Dio l’è restà contento che lu no’l ghe ga domandà richesse e glòria. Alora, el ghe ga dato “un cuor sàbio e cognossensa”, e anca richesse. — 1 Rè 3:10-14
5 Salomon el ga dito che “Geovà el dà sabedoria”. Ma toca sforsarse par gaver questa bela qualità che vien de Dio, parché no podemo esser sabi par meso de un miràcolo. Salomon el ga insegnà che ne toca domandarla, e anca seitar ndar in serca de sabedoria. (Pro. 2:1-6) Alora, sicuro che se pol gaver sabedoria.
6 Saria bon domandarse: ‘Fao compagno el esémpio de Salomon e ghe dao valor ala sabedoria che la vien de Dio?’ La situassion econòmica la pol cambiar de colpo. Par quela, tanti i se consentra nel laoro e nei soldi e i desside ndar in serca de una bona educassion o de studiar de pi. Pensaghe sora ti e la to fameia. Sarà che la scòlia che fè mostra che ghe dè valor ala sabedoria de Dio e che ndé in serca de gaverla? Se valtri fesse cambiamenti nela maniera de pensar o nei vostri ogetivi, sarà che sarissi boni de gaver pi sabedoria? Infati, gaver sabedoria e meterla in pràtica farà che tuto vae ben con noantri par sempre. Salomon el ga scrito che ‘cossita ndaremo capir quel che l’è giusto e bon. Tuta la strada del ben’. — Pro. 2:9
Va in serca de lession pressiose dela Bìblia
Sentinela 01/02/98 pàg. 11 paràg. 15
Geovà l’è un Dio che el fà acordi coi so servi
15 Nel ano 1473 vanti de Cristo, Giosuè, che l’è restà nel posto de Moisè, el ga guidà Israel fin Canaan. Geovà el gavea prometesto dar quela tera ala dissendensa de Abraon e, quando i ga spartio la tera intrà le tribo, questa promessa la se ga realisà. Nela època de Salomon, fiol de Davi, una tersa parte del acordo che Geovà el gavea fato con Abraon gavea belche sucedesto. Nela Bìblia, in 1 Rè 4:20, dise che “Giudà e Israel i era in tanti, una mùcia de gente, e che i era come i grani de areia del mar. I magnea e i bevea, e i restea contenti”. — 1 Rè 4:20
15-21 DE AGOSTO
LESSION PRESSIOSE DELA BÌBLIA | 1 RÈ 5-6
“Con amor, i ga laorà tanto par farlo su”
Sentinela 01/02/11 pàg. 15 paràg. 5
Seto questo?
El cedro del Lìbano l’è un legno che dura tanti ani, l’è bel, el ga un bon profumo e l’è fadiga che i bisseti i lo magne. Par quela che Salomon el ga doperà questo legno e le meio robe che el gavea par far su el témpio.
Perspicaz vol. 1 pàg. 461 paràg. 3
Cedro
Tanti cedri i ze stati doperadi par far su el témpio. Par quela, ghen’era bisogno de tante persone par far el laoro. I gavea de taiar le piante, dopo portarle fin Tiro o Sìdon, che l’era dela banda del mar Mediteràneo. Lì, lori i lighea el legno e i lo fea rivar a Giope par via del mar. Dopo i israeliti i ciapea el legno e i lo portea fin Gerusalen par via dela tera. Questo l’era un acordo che Salomon el gavea fato con Iron. — 1 Rè 5:6-18; 2 Cró. 2:3-10
Perspicaz vol. 2 pàg. 1092 paràg. 6
Témpio
Par organisar el laoro, Salomon el ga ciamà 30 mila òmini de Israel. Lu el mandea un grupo de 10 mila òmini cada mese fin el Lìbano. Quando questi òmini i finia el laoro de un mese, i podea tornar casa e restar due mesi vanti de tornar nantra volta. (1 Rè 5:13, 14) Lu el ga ciamà 70 mila òmini “stranieri” del paese par cargar, e altri 80 mila par taiar. (1 Rè 5:15; 9:20, 21; 2 Cró. 2:2) Salomon el ga metesto 550 òmini par esser paroni e altri 3.300 par tender dei laoradori. (1 Rè 5:16; 9:22, 23) De questi òmini, 250 i era israeliti e 350 i era “stranieri” in Israel. — 2 Cró. 2:17, 18
Va in serca de lession pressiose dela Bìblia
Despertai! 05/12, quadro nela pàg. 17
La Bìblia, un libro de professie — Parte 1
EL TEMPO L’È CONTÀ DE MANIERA GIUSTA NELA BÌBLIA
La Bìblia la mostra un esémpio de come la conta el témpio de una maniera giusta nel testo de 1 Rè 6:1, che parla de quando Salomon el ga scominsià a far su el témpio in Gerusalen. Questo testo el dise che ‘nel ano 479, dopo che i israeliti i ze ndati via del Egito, i ga scominsià a far su la casa de Geovà. L’era el quarto ano che Salomon l’era rè sora Israel nel mese de zive, el secondo mese’.
De acordo cola Bìblia, el quarto ano che Salomon el ga governà l’era el ano 1034 vanti de Cristo. Alora se femo la conta de 479 ani pi 1034, rivemo al ano 1513 che l’è stà quando i israeliti i ze ndati via del Egito.
22-28 DE AGOSTO
LESSION PRESSIOSE DELA BÌBLIA | 1 RÈ 7
“Cossa che imparemo dele due colone?”
Sentinela 01/12/13 pàg. 13 paràg. 3
’De queste montagne te ndarè tirar via rame’
Nela entrada del témpio ghen’era due colone de rame pròpio alte. Le era larghe 2 metri, alte 8 metri e, anca se le fusse vode, la so strutura la era grossa 7 sentìmetri. Su de sora cada colona ghen’era un capitel che l’era alto de pi de 2 metri. (1 Rè 7:15, 16; 2 Cró. 4:17) I ga doperà tanto rame par far queste due colone.
Perspicaz vol. 1 pàg. 370 paràg. 4
Boaz, II
Davanti el grando témpio de Salomon ghen’era due colone. Quela pi al nort la gavea nome Boaz che vol dir “cola forsa”, “con forsa” o “par la forsa”. Quel’altra colona che la era pi al sud, la gavea nome Giachin, che vol dir “che Geovà lo fae su firme”. Se metemo questi nomi insieme e li ledemo dela drita par la sanca, ghemo la idea ‘Che Geovà el fae su [el témpio] firme e con forsa’. — 1 Rè 7:15-21; vedi CAPITEL.
Va in serca de lession pressiose dela Bìblia
Perspicaz vol. 1 pàg. 288 paràg. 9
Lavarse
Ghemo de esser neti par adorar a Geovà de una maniera santa e pura. Vedemo che l’è importante esser neti par via dela maniera che l’era fato el laoro nel tabernàcolo e nel témpio. Quando i ga fato la serimònia par Aron e so fioi scominsiar el laoro de sasserdote, lori i se ga lavà vanti de meter su le robe de sasserdote. (Éso. 29:4-9; 40:12-15; Lev. 8:6, 7) Par lavarse le man e i pié, i sasserdoti i doperea la àqua del cadin de rame nel cortivo del tabernàcolo. Pi tardi, nel témpio de Salomon, i se lavea cola àqua del grando mar de metal fondio. (Éso. 30:18-21; 40:30-32; 2 Cró. 4:2-6) Nel Giorno de Domandar Perdon dei Pecati el somo sasserdote el se lavea due volte. — Lev. 16:4, 23, 24
29 DE AGOSTO–4 DE SETEMBRE
LESSION PRESSIOSE DELA BÌBLIA | 1 RÈ 8
“Salomon el ga pregà con umiltà e de tuto el cuor”
Sentinela 15/11/09 pàg. 9 paràg. 9-10
Studiar la Bìblia ne giuta a far meio le nostre orassion
9 Se volemo che Geovà el scolte le nostre orassion, ghemo de pregar de cuor. Salomon el ga pregà cossita quando el ga fato la orassion de dedicassion del témpio, che ledemo in 1 Rè capìtolo 8. Lu l’era davanti el pòpolo quando el ga pregà par dedicar el témpio nel ano 1026 vanti de Cristo. Quando la arca del acordo la ze stata metesta rento el Santìssimo, la nùvola de Geovà la ga impienio el témpio e Salomon el ga pregà par lodar a Dio.
10 Salomon el ga pregà de cuor a Geovà. Lu el ga dito che sol Geovà el sà quel che ghen’è rento el cuor dele persone. (1 Rè 8:38, 39) Salomon anca el ga dito che ghen’è speransa par una persona che la fà un pecato, la se ciama grama e ‘la torna a Dio de cuor’. Se un nemigo el ciapesse quei del pòpolo de Dio, e lori i domandasse el aiuto de Geovà, lu li scoltaria se i preghesse de tuto el cuor. (1 Rè 8:48, 58, 61) Alora, le nostre orassion le ga de esser fate de tuto el cuor.
Sentinela 15/01/99 pàg. 17 paràg. 7-8
Alsa le to man fedele in orassion
7 La Bìblia la ne fà ricordar che l’è importante esser ùmili quando preghemo davanti i altri o quando preghemo noantri soli. (2 Cró. 7:13, 14) El rè Salomon el ga pregà con umiltà quando el ga fato la dedicassion del témpio in Gerusalen. Salomon el gavea pena finio de far su la costrussion pi bela che ghen’è stà qua ntela Tera. Ancora cossita, el ga pregà con tanta umiltà. — 1 Rè 8:27
8 Quando rapresentemo altri in orassion, ghemo de pregar con umiltà compagno Salomon. Mostremo umiltà par via dela maniera che parlemo nele nostre orassion. Noantri no volemo farse veder quando preghemo ma volemo dar onor a Geovà. (Mat. 6:5) Mostremo umiltà anca par meso de quel che disemo quando preghemo. Se preghemo con umiltà, no volaremo che Dio el fae le robe dela nostra maniera. Invesse, ghemo de domandar che lu el fae quel che l’è de acordo cola so volontà. — Luc. 18:9-14
Va in serca de lession pressiose dela Bìblia
Perspicaz vol. 1 pàg. 472 paràg. 10
Cielo
Quel che Salomon el ga dito no vol mia dir che Dio no’l ga un posto de star. Gnanca che lu l’è de star in tuti i posti e in tute le robe. Ma quando Salomon el ga dito che Geovà el ga un ‘posto de star nel cielo’, el volea dir che lu l’è de star insieme cole creature spirituai. — 1 Rè 8:30, 39