Publicassion par pareciarse par la Riunion Vivemo e Insegnemo
Idee par parlar sora la Bìblia
I giusti i sarà paroni dela tera e i viverà par sempre ntela tera.
Tuta la Scritura la ze ispirada par Dio e la ze bona par insegnar, par coreger, par indrissar le cose e par dissiplinar con giustìssia. 17 Cossita el omo de Dio el sarà bon de far tuto, del tuto parecià par tuti i boni laori.
Lu el fà che ghen sìpia el cielo nel vodo e el fà che no ghen sìpia gnente par tegner la tera.
5-11 DE SETEMBRE
LESSION PRESSIOSE DELA BÌBLIA | 1 RÈ 9-10
“Loda a Geovà par la so sabedoria”
Sentinela 01/07/99 pàg. 30 paràg. 6
Una vìsita che la ga portà tanti presenti
Quando la regina de Sabà la se ga catà con Salomon, la ga scominsià a farghe domande difìcile de risponder. (1 Rè 10:1) Pol esser che ela la gàpia discoresto con Salomon sora robe che le era fadiga de capir par veder se lu el gavea pròpio tanta sabedoria. La Bìblia la dise che ela “la ga parlà de tuto quel che la gavea rento el so cuor” e che “Salomon l’è stà bon de risponderghe a tute le so domande. No ghen’era gnente che fusse massa fadiga par el rè spiegarghe”. — 1 Rè 10:2b, 3
Sentinela 01/11/99 pàg. 20 paràg. 6
Ghen’era tanta generosità
La regina de Sabà la ga dito che i servi de Salomon i era benedidi parché i podea sempre scoltar la sabedoria che el gavea ricevesto de Dio. Ela la ga dato tanto valor a quel che la ga scoltà de Salomon. Par quela, la ze un bel esémpio par i servi de Dio che sempre i scolta la sabedoria del nostro Creador e de so Fiol, Gesù Cristo!
Sentinela 01/07/99 pàg. 30 paràg. 7
Una vìsita che la ga portà tanti presenti
Quando la regina de Sabà la ga visto tuta la sabedoria de Salomon e come ndea ben el so regno, ela la ze restada “sensa parole”. (1 Rè 10:4, 5) Arquanti i dise che questo vol dir che ghe ga mancà el fià e un studioso el ga dito che fursi la ga fin desmaià. Ela la ga dito che i servi de Salomon i era pròpio felici de scoltar la so sabedoria, e la ga lodà a Geovà par gaver scoliesto Salomon come rè. Dopo, la ghe ga dato presenti che costea tanto che, se fusse ancoi, sol el oro el costaria intorno de 202 milioni de reai. — 1 Rè 10:6-13
Va in serca de lession pressiose dela Bìblia
Sentinela 01/11/08 pàg. 22 paràg. 4-6
Seto questo?
Quanto oro el rè Salomon el gavea?
La Bìblia la dise che el rè Iron, de Tiro, el ga dato 4 tonelade de oro a Salomon. La regina de Sabà la ghe ga dato pi o manco la stessa quantità. Diversi navii de Salomon i ga portà de Ofir pi de 15 tonelade de oro. La Bìblia la dise anca che, nte un ano, el oro che Salomon el ga imucià el pesea de pi de 25 tonelade. (1 Rè 9:14, 28; 10:10, 14) Ma sarà che questo l’è pròpio vera? Quanto oro i rè de quel tempo i gavea?
I studiosi i ga catà un registro de intorno de 2 mila ani vanti de Cristo che mostra che el Faraò Tutmès III, del Egito, el ga dato de pi de 13 tonelade de oro par el témpio de un dei so dio. Intorno de 800 ani vanti de Cristo, Tiro el ga dato come imposto de pi de 4 tonelade de oro a un rè dela Assìria. E Sargon II el ga dato pi o manco la stessa quantità de presente ai falsi dèi de Babilònia. Se dise anca che el rè Filipe II, dela Massedònia, el tolea de pi de 28 tonelade de oro al ano dele mine de Pangeo.
El fiol de Filipe, Alessandre, el Grando, el ga portà via intorno de 1.180 tonelade de oro dela cità de Susa, e quasi 7 mila tonelade de oro de tuta la Pèrsia. Cossita, podemo creder in quel che la Bìblia la dise sora el oro che el rè Salomon el gavea.
12-18 DE SETEMBRE
LESSION PRESSIOSE DELA BÌBLIA | 1 RÈ 11-12
“Scoli ben con chi te ndarè maridarte”
Sentinela 07/18 pàg. 18 paràg. 7
“Chi che ze dela banda de Geovà?”
7 La lege la disea che el rè no’l gavea de ciapar tante done come sposa, senò lu el podaria assar de servir a Geovà. (Deu. 17:17) Magari, Salomon el se ga maridà con 700 done e el gavea 300 concubine. (1 Rè 11:3) Tante de queste done no le era israelite e le adorea falsi dio. Cossita, Salomon el ga desobedio anca ala lege de maridarse sol con done israelite. — Deu. 7:3, 4
Sentinela 01/19 pàg. 15 paràg. 6
Come che te pol proteger el to cuor?
6 Sàtana no l’è bon de controlar quel che pensemo o femo. Cossita, lu el proa assar persone che le pensa come lu intorno de noantri e el vol che stemo insieme de lore. (1 Gio. 5:19) Salomon l’è cascà in questa tràpola. Lu el se ga maridà con done che no le adorea a Geovà e le so influense lo ga fato assar de servir a Dio. — 1 Rè 11:3
Sentinela 07/18 pàg. 19 paràg. 9
“Chi che ze dela banda de Geovà?”
9 Geovà el sà quando qualchedun el fà una roba sbaliada e, par quela, no’l ga pi benedio Salomon. I rè che i ze vegnesti dopo de Salomon no i ga bio un regno tanto grando e i ga bio tanti problemi. — 1 Rè 11:9-13
Va in serca de lession pressiose dela Bìblia
Sentinela 06/18 pàg. 14 paràg. 3, 4
Lu podaria esser stà amigo de Dio
Cossa che imparemo? L’è sempre meio obedir ale orientassion de Geovà, anca se sentimo vergogna de quel che i altri ndarà pensar de noantri. Ma se semo obedienti, Geovà el ne benedisse. — Deu. 28:2
Roboan l’è stà obediente a Geovà. Cossita, Geovà el ga fato el so regno pi forte e lu el ga seità come rè de Giudà e Bengiamin.
19-25 DE SETEMBRE
LESSION PRESSIOSE DELA BÌBLIA | 1 RÈ 13-14
“Parché bisogna star contenti con quel che ghemo e esser modesti?”
Sentinela 15/08/08 pàg. 8 paràg. 4
Sìpia leal de tuto el cuor
4 Se quel profeta de Dio el gavesse nel cuor la voia de gaver robe materiai, pol esser che saria fadiga dirghe de nò a quei presenti del rè. Magari, Geovà el ghe gavea belche dito che ‘no l’era par magnar pan o bever àqua’ e che l’era par tornar indrio par nantra strada. Alora, el profeta l’è stà obediente. Lu el ga rispondesto al rè che, ‘gnanca se el ghe desse metà dela so casa, lu no’l ndaria mia insieme par magnar gnanca par bever’. (1 Rè 13:8-10) Cossa che la dessision del profeta ne insegna sora esser leal de tuto el cuor? — Rom. 15:4
Sentinela 15/08/08 pàg. 11 paràg. 15
Sìpia leal de tuto el cuor
15 Quel profeta, che l’era de Giudà, el se ga fidà in si stesso invesse de fidarse in Geovà come el gavea fato vanti. Par quela, el ga perso la bela amicìssia che el gavea con Dio. El esémpio de questo profeta, mostra come l’è importante esser sempre modesti e leai a Geovà, come dise Proverbi 3:5: “Fìdate in Geovà de tuto el to cuor, no stà fidarte nel to pròpio saver.”
Sentinela 15/08/08 pàg. 9 paràg. 10
Sìpia leal de tuto el cuor
10 El profeta el podaria ver domandà de pi istrussion a Geovà. Ma, nela Bìblia no catemo gnente che mostre che el gàpia fato questo. Invesse, lu l’è tornà indrio con quel profeta pi vècio par magnar e bever. Geovà no ghe ga piasesto e, intanto che el profeta l’era drio tornar a Giudà, un leon lo ga copà. — 1 Rè 13:19-25
Va in serca de lession pressiose dela Bìblia
Sentinela 01/07/10 pàg. 29 paràg. 5
Geovà el vede quel che l’è bon in noantri
Geovà l’è ndato in serca fin che el ga catà una roba bona rento el cuor de Abia. Pol esser che fusse una roba pròpio pìcola. Ma lu el ga dato valor a quel che el ga visto e lo ga tratà con misericòrdia, ancora che Abia el fusse de una fameia pròpio trista. Alora, 1 Rè 14:13 ne insegna che Geovà el va in serca de qualcossa de bon in noantri.
26 DE SETEMBRE–2 DE OTOBRE
LESSION PRESSIOSE DELA BÌBLIA | 1 RÈ 15-16
“Gheto coraio come Asa el ga bio?”
Sentinela 15/08/12 pàg. 8 paràg. 4
“Ghen sarà una ricompensa par quel che te fè”
Quando Asa l’è deventà rè nel ano 977 vanti de Cristo, arquanti dela so casa i era drio adorar i dèi che i cananei i adorea. Ancora cossita, lu el ga obedio al so Dio, Geovà. Asa ‘el ga tirà via i altari dei dèi stranieri e i posti ndove i adorea falsi dio. El ga finio fora cole colone sacre e el ga trato do i palanchi sacri’. (2 Cró. 14:2, 3) Lu el ga parà via de Giudà i òmini che i fea imoralità nela so adorassion falsa come prostituti de un témpio. Lu anca el ga incoraià le persone a ‘ndar in serca de Geovà, el Dio dei so antenati, e a obedir ala So lege’. — 1 Rè 15:12, 13; 2 Cró. 14:4
Sentinela 03/17 pàg. 19 pàg. 7
Sirva a Geovà de tuto el cuor!
7 Asa ghe ga tocà ver tanto coraio par tirar via la autorità che so nona la gavea. Fursi anca noantri gavaremo bisogno de tanto coraio. Par esémpio, metemo dir che qualchedun dela to fameia o un amigo el ga fato un bruto pecato, no’l se ga ciamà gramo e l’è stà desassossià. Sarà che seitaremo insieme questa persona? Cossa che to cuor te motivarà a far?
Perspicaz vol. 1 pàg. 225 paràg. 1
Asa
Arquante volte, Asa no’l ga mostrà sabedoria nele so dessision. Ancora cossita, el gavea bone qualità e mai el ga praticà adorassion falsa. Par quela, la Bìblia la dise che lu l’è stà un dei rè fedeli de Giudà, parché quel che el ga fato de bon l’è stà pi importante che i so sbali. — 2 Cró. 15:17
Va in serca de lession pressiose dela Bìblia
Sentinela 15/09/98 pàg. 21 paràg. 8
Te cati che ghen’è Dio?
In Giosuè 6:26 vedemo la professia de Geovà che Giosuè el ga fato. La disea che se qualchedun el proesse far su nantra volta la cità de Gericò, so fiol pi vècio e anca so fiol pi gióveno i saria morti. In 1 Rè 16:34 vedemo che 500 ani dopo ga sucedesto pròpio cossita! Sol el vero Dio el pol dir quel che ndarà suceder e far queste professie realisarse!
3-9 DE OTOBRE
LESSION PRESSIOSE DELA BÌBLIA | 1 RÈ 17-18
“Fin quando valtri no saré sicuri de cossa che ndaré far?”
Sentinela 03/17 pàg. 14 paràg. 6
Fìdate in Geovà e fà bone dessision
6 Quando i israeliti i era de star nela Tera Prometesta, lori i gavea de dessider se i ndea adorar a Geovà o ai falsi dio. (Ledi Giosuè 24:15.) Nela època del profeta Elia, nantra volta i israeliti ghe ga tocà scòlier intrà adorar a Geovà o a Baal. Nissuni gavaria de ver dùbio sora questo. Ancora cossita, el pòpolo no l’era bon de far una dessision sora chi che ndaria adorar. (1 Rè 18:21) Elia el ga ciamà atension de lori parché i gavea de dessiderse, e li ga insentivadi a scòlier adorar a Geovà, el ùnico vero Dio.
Imite pàg. 88 paràg. 15
Elia el ga difendesto la vera adorassion
15 I sasserdoti de Baal i volea tanto che so dio el parlesse con lori che no i savea gnanca pi cossa far. Lora, ‘i ga osà con tuta la so forsa e i se ga fato taii nel so corpo’ fin che i ze restadi sporchi de sangue. Ma no ghen’era gnanca un Baal. Lu l’era sol una busia de Sàtana par farli restar distante de Geovà. Questo mostra che, quando scoliemo un dio che no’l sia Geovà, ndaremo restar disgustadi e passaremo fin vergogna. — Ledi Salmo 25:3; 115:4-8.
Imite pàg. 90 paràg. 18
Elia el ga difendesto la vera adorassion
18 Dopo che Elia el ga pregà, tuti i ga visto quel che l’era vera. La Bìblia la dise che ‘Geovà el ga fato vegner de colpo un fogo che ga brusà fora el sacrifìssio, el legno, i sassi, el polver e la àqua che ghen’era nel buso’. — 1 Rè 18:38
Va in serca de lession pressiose dela Bìblia
Sentinela 01/04/08, quadro nela pàg. 19
Lu el ga vardà e el ga spetà
Nel Israel del passà, la staion dela seca la podaria esser fin de sei mesi. Quando Elia l’è ndato parlar con Acabe, fursi l’era belche sei mesi che no piovea pi. Dopo de “tre ani”, Elia l’è ndato parlar con Acabe nantra volta. Alora, quando le persone le se ga riunio nel monte Carmelo, i “tre ani e sei mesi” de seca i era belche passadi.
10-16 DE OTOBRE
LESSION PRESSIOSE DELA BÌBLIA | 1 RÈ 19-20
“Va in serca de Geovà par gaver consolo”
Sentinela 06/19 pàg. 15 paràg. 5
Fìdate in Geovà quando te sì ansioso
5 Quando Gesabel la ga dito che la ndaria copar Elia, lu l’è restà tanto spaurà che el ga scampà via par la region de Berseba. Elia l’è restà tanto disgustà che el ga fin volesto morir. Parché che el se ga sentio cossita? “Elia l’era un omo con sentimenti compagno a noantri.” (Tiago 5:17) Fursi, lu l’era ansioso e stufo. Pol esser che Elia el gàpia pensà che tuto el sforso che el gavea fato par la adorassion pura l’era stà par gnente. Lu el pensea che l’era la ùnica persona in tuto el Israel che l’era drio adorar a Geovà. — 1 Rè 18:3, 4, 13; 19:10, 14
Imite pàg. 103 paràg. 13
El so Dio lo ga consolà
13 Quando Elia l’era drio dormir, Geovà el ga mandà un àngelo che lo ga desmissià de maniera bondosa e el ghe ga dito: ‘Leva su e magna.’ Quel àngelo el ghe gavea portà un magnar sémplisse, pan caldo e àqua fresca. Alora, Elia el ga magnà e l’è tornà a dormir. Fursi l’era de matina quando el àngelo lo ga desmissià nantra volta e el ghe ga dito ancora: ‘Leva su e magna parché el viaio sarà massa fadiga par ti.’ — 1 Rè 19:5-7
Imite pàg. 106 paràg. 21
El so Dio lo ga consolà
21 Geovà el ga doperà la naturesa par mostrar so grando poder. Ma la Bìblia la assa ciaro che Geovà no l’era lì. Come che veder queste robe ga giutà Elia? Vanti lu el gavea tanta paura. Ma con Geovà, un Dio tanto poderoso dela so banda, Elia no ghe ocorea ver paura de Acabe o de Gesabel. — Ledi Salmo 118:6.
Imite pàg. 106 paràg. 22
El so Dio lo ga consolà
22 Geovà el ga consolà Elia quando el ghe ga dito che lu l’era tanto pressioso e el ghe ga contà quel che el ndaria far contra la adorassion de Baal in Israel. No l’è stà par gnente tuto el laoro de Elia! Geovà el gavea un ogetivo e sicuro che ndaria far la so volontà. Lu el ga dito a Elia che volea doperarlo ancora. Par quela, el ghe ga dato istrussion de cossa far par seitar col so laoro. — 1 Rè 19:12-17
Va in serca de lession pressiose dela Bìblia
Sentinela 01/11/97 pàg. 31 paràg. 2
El bel esémpio de quei che i fà de pi par Geovà e i ze leai
Tanti servi de Geovà ancoi i ze drio assar i so “campi”, o sia el so laoro, par predicar in posti distanti o anca par laorar in Betel. Arquanti i viaia par altri paesi par giutar in progeti de costrussion, anca se l’è par far laori pi ùmili. Geovà l’è contento con quei che i laora par lu de volentiera, e el benedisse so sforso de far de pi. — Mar. 10:29, 30
17-23 DE OTOBRE
LESSION PRESSIOSE DELA BÌBLIA | 1 RÈ 21-22
“Fà compagno la maniera de Geovà doperar la so autorità”
Perspicaz vol. 2 pàg. 53 paràg. 6
Geovà dei esèrsiti
El profeta Micaia el ga dito ai rè Acabe e Geosafà che el gavea visto Geovà sentà do nel so trono e tuti i esèrsiti del cielo intorno de lu. Micaia l’era drio parlar dei fioi de Geovà che i era de star nel cielo. (1 Rè 22:19-21) Questi fioi de Geovà, o sia cherubini, serafini e àngeli, i ze spartidi in grupi organisadi. Quando la Bìblia la dise “Geovà dei esèrsiti” la mostra che Geovà el ga de pi de un esèrsito. (Isa. 6:2, 3; Gén. 3:24; Apo. 5:11) Par quela che Gesù el gavea dito che Geovà el podaria mandar de pi de 12 esèrsiti de àngeli par giutarlo. — Mat. 26:53
Sentinela 02/21 pàg. 4 paràg. 9
“Cristo el ga la autorità sora el omo”
9 Umiltà. Geovà l’è la Persona che la ga de pi saver che tute le altre. Ma ancora cossita, lu el assa che i so servi i parle quel che i pensa e lu li scolta. (Gén. 18:23, 24, 32; 1 Rè 22:19-22) Geovà l’è perfeto, ma no’l speta questo dei so servi. Invesse, lu li giuta a far el meio che i pol par servirlo. (Sal. 113:6, 7) Par quela che la Bìblia la dise che Geovà l’è ‘quel che el ne giuta’. (Sal. 27:9; Ebr. 13:6) Par esémpio, el rè Davi el ga capio che lu l’è stato bon de far un grando laoro sol par causa dela umiltà de Geovà. — 2 Sam. 22:36
Perspicaz vol. 2 pàg. 354 paràg. 7
Busia
Geovà Dio el assa che ‘una influensa la imbroie’ le persone che ghe piase de pi dela busia. Cossita, lore le seita a creder nela busia invesse de creder nele bone notìssie sora Gesù Cristo. (2 Tes. 2:9-12) Questo ga sucedesto tanto tempo indrio con Acabe, rè de Israel. Geovà el ga assà che un àngelo el doperesse so poder par imbroiar i profeti de Acabe. Cossita, lori no i ga dito la verità, ma quel che i volea dir e quel che Acabe el volea scoltar. Acabe l’è stà avisà de quel che ndaria suceder, ma el ga scoliesto creder in quele busie e par quela l’è morto. — 1 Rè 22:1-38; 2 Cró. 18
Va in serca de lession pressiose dela Bìblia
Sentinela 10/21 pàg. 3 paràg. 4-6
Come qualchedun el mostra che se ga pròpio ciamà gramo?
4 Alora, Geovà el ga visto che l’era la ora de far qualcossa. Lu el ga mandà che Elia el ndesse dir a Acabe e a Gesabel che lori i saria castigadi. Come? Tuta la so fameia la saria morta. Alora Acabe, che l’era tanto orgolioso, l’è restà tanto disgustà par causa de quel che l’era drio far. — 1 Rè 21:19-29
5 Acabe el ga mostrà che l’era tanto disgustà par causa de quel che el gavea fato. Ma le robe che el ga fato dopo ga mostrà che no’l se gavea pròpio ciamà gramo. Par esémpio, lu no’l ga proà finir fora cola adorassion a Baal e gnanca el ga incoraià el pòpolo a adorar a Geovà. E Acabe el ga mostrà che no’l se gavea ciamà gramo anca par causa de altre robe.
6 Pi tardi, Acabe el ga scominsià a far guera contra la Sìria e el ga domandà che Geosafà, el rè de Giudà, lo giutesse. Geosafà l’era un bon rè e el ga dito che lori i gavea de domandar el aiuto de un profeta de Geovà. Ma Acabe no’l volea mia far questo. Lu el ga dito: ‘Ghen’è nantro omo che podemo doperar par domandar el aiuto de Geovà. Ma mi lo òdio parché sempre el parla che ndarà suceder robe rugne con mi.’ Anca cossita lori i ze ndati domandar aiuto al profeta Micaia. E el profeta el ga pròpio dito che robe rugne le ndaria suceder con Acabe. Acabe el podaria ciamarse gramo e ndar in serca del perdon de Geovà. Ma lu no lo ga fato. Invesse, el ga mandà che questo profeta el fusse metesto in preson. (1 Rè 22:7-9, 23, 27) L’è vera che Acabe l’è stà bon de meter el profeta de Geovà in preson. Ma quel che Micaia el ga dito ga pròpio sucedesto a Acabe parché l’è morto nela guera. — 1 Rè 22:34-38
24-30 DE OTOBRE
LESSION PRESSIOSE DELA BÌBLIA | 2 RÈ 1-2
“Un bel esémpio de trenamento”
Sentinela 15/04/15 pàg. 13 paràg. 15
Come che i ansiani i dà trenamento par i altri?
15 Quando imparemo sora Eliseo, che l’è restà nel posto de Elia, vedemo come mostrar rispeto ai ansiani che i ga de pi speriensa. Una volta, lori due i ze ndati fin el rio Giordon. Lì, ‘Elia el ga ciapà la so roba de pel, la ga batesto nela àqua e le àque le se ga spartio’. Eliseo l’era atento a tute le orientassion che el gavea ricevesto. Dopo, Elia l’è stà portà via in meso un forte vento. Pi tardi, quando Eliseo l’è tornà al rio Giordon el ga ciapà la roba de pel, che la era de Elia, la ga batesto nela àqua e el ga dito: “Ndove l’è Geovà, el Dio de Elia?” Nantra volta, le àque le se ga spartio. — 2 Rè 2:8-14
Sentinela 15/04/15 pàg. 13 paràg. 16
Come che i ansiani i dà trenamento par i altri?
16 Adesso che Eliseo el gavea autorità, lu no’l ga pensà che el podea far le robe come che volea lu. Invesse, el ga seità far el so laoro compagno Elia. Cossita, el ga mostrà tanto rispeto par quel che lo gavea insegnà. Par quela, i altri profeti i se ga fidà in lu. (2 Rè 2:15) Eliseo el ga laorà come profeta par 60 ani, e Geovà ghe ga dato poder par far pi miràcoli che Elia.
Va in serca de lession pressiose dela Bìblia
Sentinela 01/08/05 pàg. 9 paràg. 1
Punti interessanti del libro de Secondo Rè
Secondo Rè 2:11 — Elia l’è ndà su in meso un forte vento. Ndove lu l’è ndato? “El cielo” par ndove Elia l’è ndà su vol dir el cielo che podemo veder. (Sal. 78:26; Mat. 6:26) Elia l’è stà portà par via del cielo nte una careta de fogo fin nantra parte dela tera. Savemo che lu el ga vivesto là par un tempo parché arquanti ani dopo, Elia el ga scrito una carta par el rè Georon, rè de Giudà. — 2 Cró. 21:1, 12-15
31 DE OTOBRE–6 DE NOVEMBRE
LESSION PRESSIOSE DELA BÌBLIA | 2 RÈ 3-4
“Ciapa to fiol”
Sentinela 12/17 pàg. 4 paràg. 7
“Mi sò che lu el tornarà a viver”
7 Eliseo el ga fato la seconda ressuression che ghen’è scrito nela Bìblia. Una dona siora, che la era de Sunèn, la gavea tratà tanto ben a Eliseo. Alora, Geovà el ga benedio con un fiol questa dona e so sposo, che deromai l’era vècio. Arquanti ani dopo, questo fiol l’è morto. Ela la ga viaià intorno de 30 chilòmetri fin el Monte Carmelo par catarse con Eliseo, e lori due i ze ndati fin Sunèn. — 2 Rè 4:8-31
Sentinela 12/17 pàg. 4 paràg. 8
“Mi sò che lu el tornarà a viver”
8 Eliseo l’è ndà rento el quarto ndove l’era el toseto e el ga pregà. Alora, Geovà el ga fato un miràcolo e el toseto l’è tornà a viver. Sicuro che so mare la ze restada tanto contenta. (Ledi 1 Rè 4:32-37.) Questo miràcolo el ga assà ciaro che Geovà el pol far una persona tornar a viver.
Va in serca de lession pressiose dela Bìblia
Perspicaz vol. 2 pàg. 728 paràg. 4
Profeta
La spression “fioi dei profeti” fursi ghe vol dir una scola par insegnar quei che i ze stati scoliesti par questo laoro o pol esser che sia sol un grupo de profeti che i se giutea. La Bìblia la mostra che lori i fea su el so pròpio posto de star e che una volta i ga ciapà in préstio la feramenta de nantra persona. Alora, vedemo che lori i gavea una vita sémplisse. Quasi sempre lori i restea insieme e i spartia el magnar, ma fursi quando i ricevea un laoro de profeta, i ndea lori soli. — 1 Rè 20:35-42; 2 Rè 4:1, 2, 39; 6:1-7; 9:1, 2