Publicassion par pareciarse par la Riunion Vivemo e Insegnemo
Idee par parlar sora la Bìblia
Ancora un poco, e i rugni no i ghen sarà pi. Te vardarè ndove che i era, e no te li catarè. 11 Ma i mansi i sarà paroni dela tera, e i gavarà tanta alegria par via dela granda pace.
Alora, go sentio una alta voce del trono: “Varda! La tenda de Dio la ze cola umanità. Lu el ndarà de star insieme con lori, e lori i sarà el so pòpolo. Dio el sarà insieme con lori. 4 Lu el sugarà tute le làgrime dei so oci, e no ghen sarà pi la morte, gnanca pi tristessa, gnanca piander, gnanca dolor. Le robe che ghen’era vanti no ghen’è pi.”
7-13 DE NOVEMBRE
LESSION PRESSIOSE DELA BÌBLIA | 2 RÈ 5-6
“Ghen’è de pi con noantri che con lori”
Perspicaz vol. 1 pàg. 797 paràg. 5
Nel scomìnsio, el rè Ben Adade el ga pensà che ghen’era un traditor nel so pòpolo. Ma quando el ga capio de ndove vegnea le so dificoltà, el ga mandà i soldadi a Dotan. Lori i ga fato un sércio con cavai e cari de guera par ciapar Eliseo. Alora, el servo de Eliseo el ga bio tanta paura. Ma Eliseo el ga pregà a Geovà par giutar el so servo a veder tanti cavai e cari e guera de fogo nele montagne. Intanto che el esèrsito el vegnea pi darente, Eliseo el ga pregà a Geovà par farli vegner orbi. Alora, lori no i lo ga ricognossesto gnanca i savea par ndove lu l’era drio menarli. — 2 Rè 6:8-19
Sentinela 15/08/13 pàg. 30 paràg. 2
Eliseo el se ga sforsà par gaver fede in Geovà. Par quela, l’è stà bon de restar calmo stesso che i so nemighi i gavea fato un sércio in Dotan. Se volemo gaver una fede compagno ala soa, ghemo de pregar a Geovà domandando questa fede e anca altre qualità del spìrito santo. — Luc. 11:13; Gàl. 5:22, 23
Perspicaz vol. 1 pàg. 463 paràg. 5
Dopo che Eliseo el ga pregà a Geovà, i soldadi i ze restadi orbi. William James el ga scrito sora quel che ga sucedesto nel so libro Princìpios de Psicologia (Principles of Psychology, 1981, vol. 1, pàg. 59). Lu el ga dito: ‘No l’è che i soldadi no i era boni de veder, ma no i capia quel che i vedea.’ Pol esser che l’è stà questo che ga sucedesto coi òmini de Sodoma. Lori no i ze restadi preocupadi parché no i vedea, ma i ze restadi strachi parché no i era boni de catar la porta dela casa de Lò. — Gén. 19:11
Va in serca de lession pressiose dela Bìblia
Sentinela 01/08/05 pàg. 9 paràg. 2
2 Rè 5:15, 16 — Parché che Eliseo no’l ga acetà el presente de Naaman? Eliseo el savea che no l’è stà par la so forsa che Naaman l’è stà guario, ma sì par el poder de Geovà. Par lu, saria tanto bruto guadagnar qualcossa parché el gavea un privilègio spessial. Che lession imparemo? Gnanca i servi de Geovà ancoi no i va in serca de guadagnar qualcossa par meso del so laoro a Dio.
14-20 DE NOVEMBRE
LESSION PRESSIOSE DELA BÌBLIA | 2 RÈ 7-8
“Geovà el ga fato una roba de gnanca creder”
Perspicaz vol. 1 pàg. 798 paràg. 1
Ben Adade II el fà un sércio e el ciapa el controle de Samaria. La situassion la resta tanto bruta che una dona la magna fin el so pròpio fiol. Ancora cossita, Eliseo el dise al rè che ghen sarà tanto magnar nel giorno drio. Alora, el servo del rè el ghe ride drio. Ma Geovà el fà i siri sentir un bruto bordel, come se fusse de un grando esèrsito che ghe vegnea contra. Par quela, i scampa via del acampamento sensa portar gnente insieme, gnanca el so magnar. Quando i ghe dise al rè che i siri i gavea scampà via, lu el domanda al so servo par tender del porton de Samaria. Intanto che el so servo el tende del porton, una mùcia de Israeliti la va de carera par ciapar quel che ghen’è nel acampamento parché i ga tanta fame. Cossita, i ghe pesta dosso el servo del rè e lu el more. Lu el vede el magnar ma no lo magna. — 2 Rè 6:24–7:20
Va in serca de lession pressiose dela Bìblia
Perspicaz vol. 2 pàg. 188 paràg. 7
Geovà el ga scoliesto Davi come governante. Lu l’è stà ciamà de “la làmpada de Israel” parché l’era un lìder sàbio e, col aiuto de Geovà, el ga guidà ben la nassion. (2 Sam. 21:17) Geovà el ga fato un acordo con Davi e el ga dito che lu el ndaria governar par sempre. (2 Sam. 7:11-16) Alora, quei dela fameia de Davi che i deventaria rè dopo de lu anca i saria come una “làmpada” par Israel. — 1 Rè 11:36; 15:4; 2 Rè 8:19; 2 Cró. 21:7
21-27 DE NOVEMBRE
LESSION PRESSIOSE DELA BÌBLIA | 2 RÈ 9-10
“Geù el ga mostrà che l’era dessidio, coraioso e zeloso”
Sentinela 15/11/11 pàg. 3 paràg. 2
Gesabel la era védova de Acabe e mare del rè Georon, che l’era drio governar Israel. Ela la ze ndata contra la adorassion de Geovà e la ga influensà el pòpolo a adorar a Baal, a far robe imorai e strionaria. Ela la ga anca copà i profeti de Dio. (2 Rè 9:22; 1 Rè 18:4, 13) Alora, Geù el ga ricevesto un laoro pròpio importante intanto che Israel l’era in quela bruta situassion. Geovà lo ga mandà copar tuti dela casa de Acabe. Intrà de questi ghen’era Georon e Gesabel.
Sentinela 15/11/11 pàg. 4 paràg. 2-3
Georon el ga domandà se Geù l’era vegnesto in pace, ma lu el ga rispondesto: “Come se pol gaver pace con tuta la prostituission e strionaria che to mare la fà?” Georon el ga bio paura e el ga proà scampar via. Ma Geù lo ga copà con una fressada nel cuor. Stesso che Acazia el fusse stà bon de scampar, dopo Geù lo ga catà e lu l’è stà copà. — 2 Rè 9:22-24, 27
La pròssima persona dela casa de Acabe che Geù el gavaria de copar la era la regina Gesabel. Lu el ga mandà i servi del rè trarla do par la finestra. Dopo, el ga fato che i so cavai i ghe pestesse dosso. E anca el ga copà tanti altri dela casa del rè Acabe. — 2 Rè 9:30-34; 10:1-14
Sentinela 15/11/11 pàg. 5 paràg. 3-4
La Bìblia la dise che Geù l’è stà un omo coraioso. Cossita, l’è stà bon de libertar Israel dele robe rugne che Gesabel e la so fameia le fea. Par far questo laoro ghe volea esser una persona dessidia, con coraio e zelo. Un dissionàrio bìblico el dise che ‘l’era fadiga far questo laoro, ma lu l’è stà brao de farlo. Se no lo gavesse fato del tuto, fursi no’l saria bon de finir cola adorassion a Baal in Israel’.
Come darghene fora quando vien la voia de far robe che Geovà el condana? Ghemo de rigetarla presto e con coraio, sensa esser in dùbio. No podemo assar che gnente intrighe la nostra adorassion a Geovà.
Va in serca de lession pressiose dela Bìblia
Sentinela 15/11/11 pàg. 5 paràg. 6-7
Mai ghemo de pensar che gnente pol rovinar la nostra amicìssia con Geovà. Tuti i di ghemo de studiar la parola de Dio, pensarghe sora quel che imparemo e pregar de cuor al nostro Pare nel cielo. Ghemo de star atenti par sempre obedir ala lege de Geovà de tuto el cuor. — 1 Cor. 10:12
28 DE NOVEMBRE–4 DE DISEMBRE
LESSION PRESSIOSE DELA BÌBLIA | 2 RÈ 11-12
“Una regina trista la ze castigada”
Perspicaz vol. 1 pàg. 247 paràg. 10
Atalia la ga mandà copar tuti dela fameia del rè. Ma el somo sacerdote e so dona, che la era zia del toseto Geoàs, i lo ga sconto. Par quela, sol lu no l’è stà copà. Dopo, Atalia la ga governà come regina par sei ani. — 2 Cró. 22:11, 12
Perspicaz vol. 1 pàg. 247 paràg. 11
Quando Geoàs el ga fato sete ani, Geoiada, el somo sasserdote che adorea a Dio, lo ga menà fora del posto ndove l’era sconto e lo ga fato rè de Giudà. Atalia la ga sentio che i era drio selebrar, e suito la ze ndata al témpio e la ga osà: “Traditori! Traditori!” Alora, el somo sasserdote Geoiada el ga mandà che i la paresse via de quel posto parché la fusse copada ndove passea i cavai del rè. Cossita, tuti quei dela casa del tristo rè Acabe i ze stati copadi. — 2 Rè 11:1-20; 2 Cró. 22:1–23:21
Va in serca de lession pressiose dela Bìblia
Perspicaz vol. 2 pàg. 31 paràg. 6
La fameia de Davi che portaria al Messia quasi la ze stata finida. Ma con 21 ani, Geoàs, l’era maridà con Geoadan e con nantra dona. Lu el ga bio tanti fioi con lore. Alora, la dissendensa de Davi la ze deventada forte nantra volta. — 2 Rè 12:1-3; 2 Cró. 24:1-3; 25:1
5-11 DE DISEMBRE
LESSION PRESSIOSE DELA BÌBLIA | 2 RÈ 13-15
“Geovà el benedisse quei che i se sforsa de volentiera”
Sentinela 15/04/10 pàg. 26 paràg. 11
11 Geoàs l’era tanto preocupà e el piandea quando l’è ndato parlar con Eliseo. Alora, Eliseo el ga dito che Geoàs el ciapesse le so fresse e el ghe desse bote ntela tera. Geoàs lo ga fato tre volte, ma Eliseo el se ga inrabià parché lu no lo ga fato de volentiera. Se el ghe desse bote ntela tera sinque o sei volte lu el ndaria vinser la Assìria del tuto. Ma come el ga dato sol tre, no l’è stà bon de vinserla. (2 Rè 13:14-19) Cossa che imparemo? Ndaremo ricever tante benedission de Geovà se lo servimo de volentiera e de tuto el cuor.
Sentinela 01/11/13 pàg. 11 paràg. 5-6
Geovà el ricompensa quei che i ga fede e che i lo adora par amor e de volentiera. — Mat. 22:37
Geovà el ricompensa i so adoradori fedeli con una promessa maraveiosa par el futuro, che l’è la vita eterna, nte un paradiso ntela Tera. Questa promessa ne mostra la so granda generosità e el amor che el ga par noantri. (Apo. 21:3, 4) Quei che i fà sforso par ndar in serca de Geovà i riceve tante benedission anca ancoi. Lori i ga una vita felice gràssie al aiuto del spìrito santo e dei consili dela Parola de Dio. — Sal. 144:15; Mat. 5:3
Va in serca de lession pressiose dela Bìblia
Sentinela 01/08/05 pàg. 11 paràg. 3
2 Rè 13:20, 21 — Sarà che questo miràcolo vol dir che podemo adorar una roba che la ze considerada sacra? Nò. La Bìblia mai la parla che i ossi de Eliseo i ze stati adoradi. L’è stà par meso del poder de Dio che quel omo l’è stà ressussità, cossita come i miràcoli che Eliseo el ga fato intanto che l’era vivo.
12-18 DE DISEMBRE
LESSION PRESSIOSE DELA BÌBLIA | 2 RÈ 16-17
“La passiensa de Geovà no la ze par sempre”
Perspicaz vol. 2 pàg. 908 paràg. 6
El rè Oseia no’l ga pi pagà el imposto e l’è ndato far un acordo col rè So, che governea el Egito. Par quela, Salmaneser el ga messo Oseia in preson e dopo el ga fato un sércio intorno de Samaria par tre ani. Quando i ze stati boni de ndar rento la cità, i ga menà via i israeliti come schiavi dela Sìria. — 2 Rè 17:4-6; 18:9-12
Perspicaz vol. 1 pàg. 450 paràg. 9
Geroboan, che l’è stà el primo rè dele diese tribo de Israel, el ga scominsià a praticar la adorassion falsa nela nassion. Ma Geovà el seitea a mandar i so profeti par avisar le nassion de Israel e de Giudà, ma no giovea gnente parché no li scoltea. (2 Rè 17:13) I rè de Israel no i ze stati boni de finir del tuto cola adorassion falsa. E la nassion de Giudà no la ga imparà gnente de quando i israeliti i ze stati menadi come schiavi. (Ger. 3:6-10) Come consequensa, i siri i ze ndati de pi de una volta par ciapar le persone de Israel e de Giudà e menarli come schiavi.
Va in serca de lession pressiose dela Bìblia
Perspicaz vol. 2 pàg. 924 paràg. 8
Prima, i samaritani i era quei che i era de star nel regno al nort vanti dela Assìria ndar rento la cità de Samaria. Lori i era ciamadi de samaritani par far difarensa intrà quei che i ze stati menadi de altre parte dela Assìria par ndar de star a Samaria. (2 Rè 17:29) Dopo de un tempo, i samaritani i era i dissendenti de quei che i ga seità a viver in Samaria e dei dissendenti de quei che i assiri i gavea menà là. Pi tardi i era quei che i fea parte dela religion vegnesta de Sichen e Samaria. Le credense de questa religion le era tanto diferente de quel che i credea i giudei. Alora no i era ciamadi de samaritani par causa dela so rassa o dela polìtica.
19-25 DE DISEMBRE
LESSION PRESSIOSE DELA BÌBLIA | 2 RÈ 18-19
“Come i nostri nemighi i proa assar la nostra fede pi fiaca”
Sentinela 01/08/05 pàg. 11 paràg. 5
2 Rè 18:19-21, 25 — Sarà che Ezechia el ga fato un acordo col rè del Egito? Rabsachè el ga dito una busia quando el ga parlà che el gavea la “autorisassion de Geovà”. Dela stessa maniera, lu el ga dito una busia quando el ga acusà Ezechia de far un acordo col Egito. Ma el rè Ezechia el se fidea sol in Geovà.
Sentinela 15/07/10 pàg. 13 paràg. 3
Rabsachè el ga proà assar i servi del rè in dùbio parlando che Geovà no’l lotaria par el so pòpolo parché l’era disgustà con lori. Ma questo l’era una busia! Geovà l’era tanto contento col rè Ezechia e anca coi giudei che i ga scominsià a adorar a Dio de maniera giusta nantra volta. — 2 Rè 18:3-7
Sentinela 15/11/13 pàg. 19 paràg. 14
14 Rabsaché el ga proà imbroiarli de diverse maniere. Lu el ga parlà in ebraico con lori e el ga fin fato una falsa promessa de che lori i gavaria una vita meio se i tradisse el rè e se i obedisse ai assiri. (Ledi 2 Rè 18:31, 32.) Dopo, lu el ga dito che, cossita come i altri dèi no i ze stati boni de proteger i so adoradori, gnanca Geovà el saria bon de proteger i giudei dei assiri. Ma el pòpolo l’è stà furbo e no’l ga dito gnente. Tante volte i servi de Geovà de ancoi anca i proa far cossita. — Ledi 2 Rè 18:35, 36.
Anuário de 1975 pàg. 177 paràg. 2
Tante volte i proea imbroiar le Testimònie de Geovà nei campi de consentrassion. I volea convinserli de fermar un documento che disea che lori i ndaria abandonar la so fede. Arquanti i lo ga fermà, ma i ga bio de spetar de pi de un ano vanti de esser moladi del campo. Intanto che i spetea, i soldadi dela SS (i guardi nasisti) i disea che lori i fea finta de esser religiosi e che no i era coraiosi. E vanti de esser moladi del campo, lori i li fea passar davanti de quei fradei che i ze restadi fedeli.
Va in serca de lession pressiose dela Bìblia
Perspicaz vol. 1 pàg. 203 paràg. 3
La Bìblia la dise che due fioi de Senacheribe, rè dela Assìria, i lo ga copà. Dopo, nantro fiol suo che gavea nome Esar Hadon l’è deventà rè nel so posto. (2 Rè 19:36, 37) Ma una stòria de Babilònia la conta che sol un dei so fioi lo ga copà nte una guera. Beroso, che l’era un sasserdote babilònio nel terso sècolo vanti de Cristo e Nabonido, rè de Babilònia nel sesto sècolo vanti de Cristo, i ga scrito la stessa roba. Ma pochi ani fà, l’è stà catà una parte del registro de Esar Hadon, el fiol de Senacheribe che l’è deventà rè nel so posto. El registro el dise de maniera ciara che i so fradei (de pi che un) i se ga rebelà, i ga copà el so pare e dopo i ze scampadi via.
26 DE DISEMBRE–1 DE GENARO
LESSION PRESSIOSE DELA BÌBLIA | 2 RÈ 20-21
“Una orassion che la ga motivà Geovà a cambiar una situassion”
Profecia de Isaías I pàg. 394 paràg. 23
23 Nela medèsima època che Senacheribe l’è vegnesto par lotar contra Giudà, Ezechia l’è restà tanto malà. Isaia fin el ga dito che lu el ndaria morir. (Isa. 38:1) El rè, de 39 ani, l’è restà tanto preocupà cola so situassion. Ma el se ga preocupà anca col futuro del pòpolo, parché i assiri i podaria ndar rento le cità de Gerusalen e de Giudà. Ezechia no’l gavea fioi par governar nel so posto. Alora, se no’l fusse vivo, chi che ndaria giutar nela lota? Cossita, el ga pregà con tanta fede a Geovà e el ga domandà che ghe mostresse misericòrdia. — Isa. 38:2, 3
Sentinela 03/17 pàg. 21 paràg. 16
16 Ezechia el ga pregà con tanta fede parché el volea che Geovà el se ricordesse de come lu l’è stà fedele. (Ledi 2 Rè 20:1-3.) Dio el ga scoltà la so orassion e lo ga guario. La Bìblia la dise che no ghemo de spetar che Geovà el ne guarisse par meso de un miràcolo o che el slonghe la nostra vita. Stesso cossita, podemo pregar a Geovà come Ezechia. — Sal. 41:3
Despertai! 22/07/01 pàg. 13 paràg. 4
La orassion de Ezechia la ga motivà Geovà a giutarlo. Nei tempi bìblichi, tante persone fedele le ga ricevesto le risposte ale so orassion fin par meso de miràcoli. Par esémpio, quando el rè Ezechia el ga savesto che el ndaria morir par colpa de una bruta malatia, lu el ga bio fede e el ga pregà che Dio lo guarisse. Geovà el ga giutà anca tanti altri servi fedeli. — 1 Sam. 1:1-20; Dan. 10:2-12; Ati 4:24-31; 10:1-7
Va in serca de lession pressiose dela Bìblia
Perspicaz vol. 2 pàg. 478 paràg. 4
Nìvel
El nìvel pol esser doperà par far su una costrussion de maniera polita o par veder se bisogna trar do una costrussion parché la ze massa fora de piombo. Dela medèsima maniera, Dio el ndaria giudicar Gerusalen e i so governanti. Lu el ndaria mostrarghe le robe brute che i era drio far e par quela el finiria fora con questa cità. (2 Rè 21:10-13; 10:11) Par meso del profeta Isaia, Geovà el ga avisà i rugni che i se sprosiea e i governanti del pòpolo de Gerusalen che lori i saria giudicadi.