Parché le Testimònie de Geovà no le partissipa in serimònie che le dà onor ala nassion?

Le Testimònie de Geovà le rispeta i governi e quel che lori i dopera par rapresentarli. Noantri anca rispetemo la dessision dele persone de cantar la mùsica ofissial del paese, de darghe onor ala bandiera o de giurar lealtà al paese.

Ma le Testimònie de Geovà no le partissipa in serimònie che le dà onor ala nassion parché le crede che queste robe le va contra quel che la Bìblia la insegna. Noantri rispetemo la dessision dele altre persone, e restemo contenti quando anca lore le rispeta quel che credemo.

Ndaremo saver la risposta a tre domande:

• Cossa che la Bìblia la dise sora questo?

• Cossa femo se la lege la vol obrigarne a partissipar in queste serimònie?

• Sarà che le Testimònie de Geovà le ze drio difender una banda dela polìtica o dei problemi del mondo?

Cossa che la Bìblia la dise sora questo?

La nostra dessision la ze de acordo con questi due insegnamenti dela Bìblia.

• Ghemo de adorar sol a Dio. La Bìblia la dise: “Te ghè de adorar a Geovà, el to Dio, e te ghè de servir sol a lu.” (Luca 4:8) Tante volte, nela mùsica ofissial del paese e nel giuramento de lealtà ghen’è la promessa de servir al paese in primo posto. Alora, le Testimònie de Geovà le capisse che l’è sbalià partissipar in questo tipo de serimònia.

  Le Testimònie de Geovà anca le capisse che darghe onor ala bandiera l’è una maniera de adorarla, che l’è una roba che la Bìblia la proìbe. (1 Corinti 10:14) Arquanti studiosi i dise che la bandiera del paese l’è un sìmbolo religioso. El studioso Carlton Hayes el ga scrito: “El amor al paese l’è come una religion. Le persone le dopera la bandiera par dimostrar la so fede e adorassion par el so paese.”a El scritor Daniel Mannix el ga dito sora i primi cristiani: “Lori i se ricusea a far sacrifissi par el spìrito del imperador [romano]. Questa la ze la stessa roba che ricusarse de adorar la bandiera.”b

  Le Testimònie de Geovà no le dà onor ala bandiera o altri sìmboli che rapresenta el paese. Ma gnanca la rovinemo, gnanca la brusemo o assemo de rispetarla.

• Par Dio, tute le persone le ze compagne. (Ati 10:34, 35) La Bìblia la dise che Dio “el ga fato de un sol omo tute le persone dele nassion.” (Ati 17:26) Par quela, le Testimònie de Geovà le crede che l’è sbalià pensar che una nassion o una rassa la ze meio che quel’altra. Noantri rispetemo tute le persone, no importa de ndove le ze gnanca ndove le ze de star. — 1 Piero 2:17.

Cossa femo se la lege la vol obrigarne a partissipar in queste serimònie?

Le Testimònie de Geovà no le ze contra i governi. Noantri credemo che i governi i fà parte dela “òrdine de Dio”, e che Dio el assa che lori i ghen sìpia. (Romani 13:1-7) Noantri anca credemo che i seghidori de Gesù i ga de obedir ai governi. — Luca 20:25.

Ma, e se le autorità le dise che ghemo de far una roba che Dio el proìbe? In arquante situassion, se pol domandar al governo de cambiar un poco la lege.c Se no i càmbia, con rispeto, le Testimònie de Geovà le obedisse “a Dio come governante, e nò ai òmini”. — Ati 5:29.

Sarà che le Testimònie de Geovà le ze drio difender una banda dela polìtica o dei problemi del mondo?

Nò. Le Testimònie de Geovà no le difende una banda o l’altra dela polìtica, gnanca le se mete nei problemi che ghen’è nel mondo. Quando se ricusemo de darghe onor ala bandiera, giurar lealtà o cantar la mùsica ofissial del paese no l’è parché ndemo contra qualche banda dela polìtica. L’è parché semo drio obedir a quel che ghen’è nela Bìblia, o sia, quel che credemo.