Una professia che la ze tanto importante par ti!

1. Cossa che Geovà el ga fato pena dopo che Adon e Eva i ga fato el pecato? (Génesi 3:15)

PENA dopo che Adon e Eva i ga fato el pecato, Geovà el ga fato una professia par dar speransa a quei che i ndaria nasser dopo de lori. Questa professia la ze in Génesi 3:15. — Ledi.b

2. Parché che l’è tanto importante quel che dise Génesi 3:15?

² Questa professia la ze nel primo libro dela Bìblia, ma tuti i altri libri i ne giuta a capirla meio. Génesi 3:15 dopera poche parole par dir tuto quel che la Bìblia la dise che ndaria suceder. Questa professia la dise che Dio el ndaria mandar qualchedun par salvar le persone e che el ndaria finir fora con Sàtana e con quei che i ghe va drio.c Sicuro che quei che i ama a Geovà i restarà tanto contenti quando questa professia la ndarà realisarse del tuto.

3. Cossa che ndaremo imparar ancoi?

³ In questo stùdio, ndaremo risponder a queste tre domande sora la professia de Génesi 3:15: ‘Chi che fà parte de questa professia? Cossa che Geovà el ga belche fato par realisarla? Parché che questa professia la ze tanto importante par noantri?’

CHI CHE FÀ PARTE DELA PROFESSIA DE GÉNESI 3:15?

4. Chi che la ze la “serpente”, e come che lo savemo?

⁴ Chi che fà parte dela professia de Génesi 3:14, 15? La “serpente”, el “dissendente” dela serpente, la “dona” e el “dissendente” dela dona. La Bìblia la ne giuta a capir chi che l’è cada un de lori.d Prima, ndaremo capir chi che la ze la serpente. Savemo che no la ze mia una bèstia parché no la ndaria capir quel che Geovà l’era drio parlar. Cossita, gavaria de esser qualchedun che el fusse bon de parlar con lu e de capir quel che l’era drio suceder. Alora, chi che la ze la serpente? Apocalisse 12:9 dise che la ‘serpente original’ la ze Sàtana, el Diaol. Ma chi che l’è el dissendente dela serpente?

5. Chi che l’è el dissendente dela serpente?

⁵ Tante volte, la Bìblia la dopera la parola “dissendente” par parlar de una persona che la vol far tuto compagno a nantra che ghe par fin esser so fiola. Alora, el dissendente dela serpente l’è tuti i àngeli rugni e tuti quei che i fà compagno a Sàtana. Par esémpio, i àngeli che i ga dessidio desobedir a Geovà nei giorni de Noè e le persone che le vien contra Dio e so pòpolo. — Gén. 6:1, 2; Gioani 8:44; 1 Gio. 5:19; Giuda 6.

6. Come che savemo che la “dona” dela professia de Génesi 3:15 no la ze Eva?

⁶ Adesso, ndaremo capir chi che la ze la “dona” dela professia de Génesi 3:15. Savemo che no la ze Eva parché la professia la dise che el dissendente dela dona el ndaria schissar la testa dela serpente. Noantri ghemo pena imparà che la serpente la ze Sàtana, e che noantri no podemo vederlo. Come che un dissendente de Eva el saria bon de schissar la so testa? Alora, chi che ndaria finir fora col Diaol?

7. De acordo con Apocalisse 12 chi che la ze la dona de Génesi 3:15?

⁷ El libro de Apocalisse el dise chi che la ze la dona dela professia de Génesi 3:15. Questa dona no la ze una persona qua nela Tera parché Apocalisse dise che la ga una luna soto i so pié e una corona de dódese stele sora la so testa. Ela anca la ga bio un fiol, che l’è el Regno de Dio. Come el Regno de Dio l’è nel cielo, alora anca questa dona la ze nel cielo. Cossita capimo che questa dona la ze la parte dela organisassion de Geovà nel cielo, o sia, i àngeli fedeli. — Gàl. 4:26; ledi Apocalisse 12:1, 2,e 5,f 10.g

8. (a) Chi che la ze la parte pi importante del dissendente dela dona? (Génesi 22:15-18) (b) Quando che lu l’è deventà la parte pi importante del dissendente?

⁸ La Bìblia la mostra che Gesù l’è la parte pi importante del dissendente dela dona. Come che lo savemo? La Bìblia la dise che el dissendente el saria dela fameia de Abraon. (Ledi Génesi 22:15-18.h) Questa professia la se ga pròpio realisà parché Gesù l’era dissendente de questo omo fedele. (Luc. 3:23, 34) Ma par finir fora con Sàtana, el dissendente dela dona el gavaria de esser pi poderoso che una persona qua dela Tera. Alora quando Gesù el gavea 30 ani, Geovà lo ga untà con spìrito santo. Cossita, lu l’è deventà la parte pi importante del dissendente dela dona. (Gàl. 3:16) E dopo che Gesù l’è morto e l’è tornà al cielo, Geovà el ghe ga dato una “corona de glòria e onor”. Geovà el ghe ‘ga dato autorità nel cielo e nela Tera’ anca par finir cole robe rugne che el Diaol el ga fato. — Ebr. 2:7; Mat. 28:18; 1 Gio. 3:8.

9-10. (a) Chi che anca fà parte del dissendente dela dona, e quando che lori i deventa parte del dissendente? (b) Cossa che ndaremo imparar adesso?

⁹ Ma chi che ancora fà parte del dissendente dela dona? El apòstolo Paolo el ga dito che tuti i fradei untadi anca i fà parte del dissendente dela dona. Lu el ga dito: ‘E valtri sì de Cristo e dela dissendensa de Abraon, e ndaré veder la promessa realisarse.’ (Gàl. 3:28, 29) Quando che un fradel el deventa parte del dissendente dela dona? Quando lu l’è untà col spìrito santo. Alora, Gesù Cristo e i 144 mila che i ndarà governar con lu i ze el dissendente dela dona. (Apo. 14:1) Tuti lori i fà el meio che i pol par pensar e far tute le robe come Geovà.

¹⁰ Fin adesso, ghemo capio chi che fà parte dela professia de Génesi 3:15. Adesso, ndaremo veder come che Geovà l’è drio realisar questa professia e parché che la ze importante par noantri.

COME CHE QUESTA PROFESSIA LA ZE DRIO REALISARSE?

11. Quando che la serpente la ga fato mal al calcagno del dissendente dela dona?

¹¹ La professia de Génesi 3:15 la dise che la serpente la ndaria farghe ‘mal al calcagno’ del dissendente dela dona. Questo ga sucedesto quando Sàtana el ga fato che i giudei e i romani i copesse el Fiol de Dio. (Luc. 23:13, 20-24) Quando una persona la se fà mal al calcagno, no la ze bona de far arquante. Dela medèsima maniera, Gesù l’è stà morto par tre giorni e no l’è stà bon de far gnente in quel tempo. — Mat. 16:21.

12. Come e quando la testa dela serpente la sarà schissada?

¹² La professia de Génesi 3:15 la ga dito che el dissendente el ndaria restar meio del mal che la serpente la ghe gavea fato al calcagno. E ga sucedesto pròpio cossita parché dopo de tre giorni, Gesù l’è stà ressussità par viver nel cielo par mai morir. E nela ora che Geovà el vol, Gesù el ndarà schissar la testa dela serpente, o sia, finir fora con Sàtana. (Ebr. 2:14) Cossita, Gesù Cristo e i 144 mila i ndarà finir fora col dissendente dela serpente, o sia, con tuti i nemighi de Dio. — Apo. 17:14; 20:4, 10.i

PARCHÉ CHE QUESTA PROFESSIA LA ZE TANTO IMPORTANTE PAR NOANTRI?

13. Parché che la professia de Génesi 3:15 la ze drio giutar tanto i servi de Dio?

¹³ Come ghemo visto, la professia de Génesi 3:15 la ze belche drio realisarse. Questo l’è drio giutar tanto i servi de Dio. Parché? Par realisar la professia, Gesù el ga bio de vegner ala Tera. Qua nela Tera, Gesù el ga fato tuto compagno a so Pare. (Gioani 14:9) Cossita, par meso de lu podemo cognosser e amar a Geovà. E Gesù anca el ne giuta tanto par meso de quel che el ne insegna e dela maniera che el tende dele congregassion qua nela Tera. Gesù anca el ne giuta a viver de una maniera che asse Geovà contento. E quando Gesù l’è morto, lu el ga dato la so vita come sacrifìssio par el perdon dei nostri pecati. — 1 Gio. 1:7.

14. Come che savemo che la professia no la ndaria realisarse nel giardin del Èden?

¹⁴ La professia la disea che la dona la gavaria un dissendente e che anca el Diaol el gavaria un dissendente. Ela la ga anca dito che questi due grupi i saria pròpio nemighi. Alora, ghe meteria tempo par tute queste robe suceder. Cossita, capimo che questa professia no la se ga realisà nel giardin del Èden quando Geovà la ga fato. Questa professia anca la ne giuta a capir che Sàtana e el so mondo i ndaria odiarne. Gesù el gavea belche parlà che questo sucederia. (Mar. 13:13; Gioani 17:14) Noantri semo drio veder che questo l’è drio suceder ancora de pi nei ùltimi 100 ani. Come cossita?

15. (a) Parché che el mondo el ga cada volta de pi òdio contra i servi de Dio? (b) Parché che no ne ocore gaver paura de Sàtana?

¹⁵ Poco tempo dopo che Gesù l’è deventà Rè del Regno de Dio, nel ano 1914, Sàtana l’è stà parà do ala Tera. Adesso, lu l’è qua nela Tera e el sa che ghe manca poco par esser finio fora. (Apo. 12:9, 12) Par quela, lu l’è tanto cativo e inrabià e l’è drio far tuto quel che el pol contra i servi de Dio. (Apo. 12:13, 17) Alora capimo parché che ghen’è cada volta de pi òdio nel mondo contra el pòpolo de Dio. Ma no ghemo paura de Sàtana e de quei che i ghe va drio. Paolo el ga dito: ‘Se Dio l’è con noantri, chi che vegnarà contra noantri?’ (Rom. 8:31) Alora, veder la professia de Génesi 3:15 realisarse ne giuta a fidarse ancora de pi in Geovà.

16-18. Come che capir la professia de Génesi 3:15 l’è drio giutar Curtis, Ùrsula e Jessica?

¹⁶ La professia de Génesi 3:15 la pol giutarne a dàrghene fora cole dificoltà. El fradel Curtis, che l’è missionàrio in Guam, el ga dito: “No l’è stà fàcile seitar a esser leal a Geovà quando go infrontà arquante dificoltà e robe che no spetea. Ma una roba che la ze drio giutarme a fidarme ancora de pi in Geovà l’è pensar sora la professia de Génesi 3:15.” El fradel Curtis el speta con passiensa el tempo che Geovà el ndarà finir fora con tuti i problemi.

¹⁷ Varda anca el esémpio dela sorela Ùrsula, dela Alemagna. Ela la ga dito che la professia de Génesi 3:15 la ga giutà a esser sicura che la Bìblia la ze la Parola de Dio. Ela la ze restada maraveiada de veder che tute le altre professie dela Bìblia le ne giuta a capir la professia de Génesi 3:15. Ela la ga dito: “Son restada tanto contenta quando go capio che suito Geovà el ga fato qualcossa par darne un futuro.”

¹⁸ Una sorela dela Micronèsia, che la ga nome Jessica, la ga dito: “Me ricordo ben de come me go sentio quando go capio che la Bìblia la parla la verità sora Dio. Go anca capio che la professia de Génesi 3:15 la ze drio realisarse. Pensar sora questa professia l’è drio giutarme a ricordar che ancora no semo drio viver come Geovà el vol. Questa professia la me assa anca sicura che l’è bon par mi servir a Geovà adesso e sarà ancora meio nel futuro.”

19. Parché che podemo esser sicuri che la parte final dela professia de Génesi 3:15 la ndarà realisarse?

¹⁹ Come ghemo belche visto, la professia de Génesi 3:15 la ze ancora drio realisarse. In questo stùdio, ghemo imparà chi che l’è el dissendente dela dona e chi che l’è el dissendente dela serpente. Ghemo anca visto che Gesù, che l’è la parte pi importante del dissendente dela dona, l’è restà meio del calcagno e l’è belche un Rè poderoso che mai el ndarà morir. E Geovà el ga belche scoliesto quasi tuti quei che i ndarà governar con Gesù nel cielo. Come la prima parte dela professia la se ga belche realisà, podemo esser sicuri che la parte final anca la ndarà realisarse. Sicuro che sarà tanto bel quando la testa dela serpente, o sia, Sàtana el sarà finio fora. Alora, no stà mia desister. Seita a fidarte in Geovà, e sìpia sicuro che el ndarà doperar el dissendente dela dona par benedir “tute le nassion dela Tera”. — Gén. 22:18.