STÙDIO 18
Incoraia i altri nele riunion
“Ghemo de preocuparse un col altro . . . , ma ghemo pròpio de incoraiarse un al altro.” — EBR. 10:24, 25.
CÀNTICO 88 Geovà, vui imparar de ti
COSSA CHE NDAREMO IMPARAR?a
1. Parché che l’è importante far comentari nele nostre riunion?
NOANTRI ndemo ale riunion parché volemo adorar a Geovà e incoraiar i nostri fradei che i ze drio infrontar tante brute dificoltà. (Sal. 26:12; 111:1; 1 Tes. 5:11) E lodemo a Geovà e incoraiemo i nostri fradei quando levemo su la man e femo i nostri comentari.
2. Quando che podemo far comentari nele nostre riunion?
2 Tute le stimane, ghemo tante oportunità de far nostri comentari. Par esémpio, nele riunion del fin de stimana, ghemo el stùdio dela Sentinela. E nele riunion in meso la stimana, podemo far comentari sora letura dela Bìblia de quela stimana, nel stùdio bìblico cola congregassion e in altre parte con domande.
3. (a) Parché che pol esser fadiga far un comentàrio? (b) Come quel che dise Ebrei 10:24, 25 pol giutarne?
3 Volemo lodar a Geovà e incoraiar i fradei coi nostri comentari. Ma pol esser fadiga farlo. Parché? Fursi restemo massa preocupadi e con paura de comentar o no comentemo tute le volte che volarìssino parché fradel no’l ne ciama sempre che alsemo su la man. Alora, cossa pol giutarne? Podemo pensar in quel che el apòstolo Paolo el ga scrito ai fradei ebrei. Lu el ga dito che quando semo nele riunion “ghemo pròpio de incoraiarse un al altro”. (Ledi Ebrei 10:24, 25.b) Ricordarte che anca un comentàrio con poche parole pol incoraiar i to fradei ndarà giutarte a no gaver tanta paura de levar su la man. E anca se no te sì bon de comentar tute le volte che te volarissi, te restarè contento de veder la fede dei altri nei so comentari. — 1 Pie. 3:8.
4. Cossa che ndaremo veder in questo stùdio?
4 In questo stùdio, ndaremo veder come podemo incoraiarse un al altro quando semo nte una congregassion pìcola ndove ghen’è poche persone par far comentari. Dopo, vederemo come incoraiarse un al altro nte una congregassion pi granda ndove ghen’è tante persone par comentar. E anca ndaremo imparar come podemo incoraiar i nostri fradei par meso de quel che parlemo nei nostri comentari.
INCORAIARSE UN AL ALTRO NTE UNA CONGREGASSION PÌCOLA
5. Come che te pol incoraiar ai altri se te sì nte una congregassion pìcola?
5 Nte un grupo o nte una congregassion pìcola, no ghen’è tante persone par far comentari. Alora, pol esser che ghe mete tanto tempo fin che i fradei i alse su la man par risponder ale domande. Par quela, fursi la riunion la te asse stufo invesse de incoraiarte. Magari, cossa che ti te pol far? Sfòrsate par far tanti comentari. Cossita, te ndarè incoraiar i altri, e pol esser che lori i ndarà drio al to esémpio.
6-7. Cossa che te pol far se te sì preocupà e te ghè paura de comentar?
6 Ma fursi te resti massa preocupà e te ghè paura de far un comentàrio. Tanti anca i se sente cossita. Alora, cossa pol giutarte a dàrghene fora cola paura e esser bon de incoraiar i fradei coi to comentari?
7 Te pol catar boni consili che i ze belche vegnesti fora in arquanti artìcoli dela Sentinela.c Par esémpio, te pol pareciarte ben e far pìcoli comentari. (Pro. 21:5; Pro. 15:23; 17:27) Quando te sì ben parecià, te sarè bon de capir ben el stùdio e sarà pi fàcile far un comentàrio. Se te fè un comentàrio pìcolo, te sarè bon de farlo nele to parole invesse de sol leder quel che l’è scrito. Alora, se te parli poco e cole to parole, te mostri che te ghè capio ben quel che te sì drio dir. E ricòrdate che l’è pi fàcile che i fradei i capissa un comentàrio pìcolo invesse de un comentàrio massa longo.
8. Cossa che Geovà el pensa quando semo drio sforsarse par far el nostro meio?
8 Ma e se dopo de meter i pràtica arquanti de questi consili, te seiti ancora preocupà de far un o due comentari, ricòrdate che Geovà el ghe dà tanto valor quando te fè el to meio. (Luc. 21:1-4) Far el to meio vol dir far quel che te sì bon. (Fil. 4:5) Alora, pensa in quel che te sì bon de far, gàpia un ogetivo e prega a Geovà che el te giute a seitar calmo. Fursi, el to primo ogetivo sìpia far un pìcolo comentàrio.
INCORAIARSE UN AL ALTRO NTE UNA CONGREGASSION PI GRANDA
9. Parché che pol esser fadiga far un comentàrio nte una congregassion pi granda?
9 Magari, nte una congregassion pi granda, la situassion la ze difarente. Fursi, ghen’è tanti fradei e sorele che i alsa su la man che no te sì mia bon de far un comentàrio. Varda quel che ga sucedesto con una sorela de nome Danielle.d Ela la ga dito che ghe ga sempre piasesto tanto far comentari parché la ze bona de incoraiar i altri e far pi forte so fede nela Bìblia. Par quela, ela la sente che comentar fà parte dela so adorassion a Geovà. Ma, quando Danielle la ze ndata par una congregassion pi granda, ela no la era bona de far tanti comentari. E dele volte, ghen’era riunion che i fradei no i la ciamea gnanca una volta. Ela la ga dito: “Mi restea disgustada. L’era come se no i me assesse far una roba tanto importante. E quando questo sucede una volta drio man, te scominsi a pensar che i fà aposta.”
10. Cossa che pol giutarne a esser boni de comentar nele riunion?
10 Te te ghè belche sentio cossita anca ti? Fursi te pensi de mai pi far un comentàrio e de ndar ale riunion sol par scoltar quel che i altri i dise. Ma no stà mia desister de comentar. Invesse, parecia de pi che sol un comentàrio in cada riunion. Cossita, se no i te ciama nel primo, te podarè seitar a proar far un comentàrio. Intanto che te pareci el stùdio dela Sentinela, pensa nel tema del stùdio e come che cada paràgrafo el te giuta a capir meio el tema. Cossita, te podarè far bei comentari sora quel che te ghè imparà del stùdio. Nantra roba che te pol far la ze pareciarte par comentar in quei paràgrafi che la risposta la ze pi fadiga spiegar. (1 Cor. 2:10) Parché? Parché in questi paràgrafi fursi no ghen sarà tanti che i volerà comentar. Ma, se ancora cossita l’è fadiga far un comentàrio, proa parlar con quel che ndarà far la parte vanti dela riunion e dighe che domanda te volarissi risponder.
11. De acordo con Filipensi 2:4, cossa ghemo de far?
11 Ledi Filipensi 2:4.e El apòstolo Paolo el ga dito che ghemo de preocuparse con quel che l’è meio par i altri. E come che ti te pol meter in pràtica questo consìlio de Paolo nele riunion? Proa ricordarte che, compagno a ti, anca i altri i vol comentar.
Cossita come te assi che anca i altri i parle quando sì drio ciacolar, assa altri fradei comentar nele riunion (Varda el parágrafo 12.)
12. Cossa ancora podemo far par incoraiar i nostri fradei nele riunion? (Varda anca la ilustrassion.)
12 Rèstito contento de ciacolar con un amigo che no’l te assa mia parlar? Sicuro che nò. Invesse, l’è tanto meio quando valtri due parlé. L’è compagno nele nostre riunion. Quando ghe demo ai nostri fradei la oportunità de far un comentàrio e de parlar dela so fede, lori i resta incoraiadi. Cossita, tanti fradei i ze boni de comentar e tuti i resta contenti. (1 Cor. 10:24) Ma come che podemo farlo?
13. Cossa che podemo far par darghe ai nostri fradei la oportunità de comentar?
13 Fà un comentàrio pìcolo. Cossita, ghen sarà tempo par anca altri comentar. Se i ansiani e altri bravi fradei e sorele i proa far cossita, i altri i ndarà drio al so esémpio. Anca se el to comentàrio l’è pìcolo, no stà parlar massa robe del paràgrafo. Se te parli tuto quel che el paràgrafo el spiega, no ghen sarà pi gnente par i altri comentar. Par esémpio, in questo paràgrafo ghemo parlà de due robe che podemo meter in pràtica: far un comentàrio pìcolo e no parlar massa robe del paràgrafo. Alora, se te vol comentar in questo paràgrafo, no saria meio parlar sol de una de queste robe?
Quando che fursi saria meio no levar su la man par far un comentàrio? (Varda el paràgrafo 14.)j
14. Parché che ghemo de star atenti a quante volte ndaremo levar su la man? (Varda anca la ilustrassion.)
14 Ghemo anca de star atenti a quante volte ndaremo alsar su la man. Parché? Parché se te sì sempre cola man alsada, pol esser che el fradel che el fà la parte el ndarà pensar che ghe toca ciamarte invesse de ciamar altri che no i ga gnancora comentà. E se una roba cossita la sucede, i fradei e sorele i pol restar desanimadi. — Ecl. 3:7.
15. (a) Cossa che no ghemo de pensar se el fradel che l’è drio far la parte no’l ne ciama? (b) Quei che i fà una parte con domande i ga de star atenti a che? (Varda el quadro “Cossa pol giutarte se te vè far una parte con domande e risposte?”)
15 Quando ghen’è tanti che alsa su la man, fursi no semo boni comentar tute le volte che volarìssino. O pol esser che el fradel che l’è drio far la parte no l’è bon de ciamarne gnanca una volta. No l’è mia bon quando una roba de queste la sucede. Ma no stà restar disgustà gnanca pensar che el fradel el ga fato aposta. — Ecl. 7:9.
16. Cossa che podemo far par incoraiar quei che i ga comentà?
16 Ancora che el fradel no’l te ga ciamà gnanca una volta, ghen’è una roba che te pol far par incoraiar quei che i ga comentà. Cossa? Proa star ben atento ai comentari dei fradei. Alora, te sarè bon de lodarli e incoraiarli dopo che se finisse la riunion. (Pro. 10:21) Cossita come nostri comentari i pol incoraiar i altri, lodar quei che i ga comentà anca pol incoraiarli tanto.
ALTRE MANIERE DE INCORAIARSE UN AL ALTRO
17. (a) Se te ghè fioi picinini, come che te pol giutarli a pareciar un comentàrio? (b) De acordo col vìdeo, che quatro robe ne giuta a pareciar un comentàrio? (Varda anca la nota.)
17 Che nantra roba podemo far par incoraiarse un al altro? Se te ghè fioi che i ze picinini, giuteli a pareciar un comentàrio de acordo con quel che i capisse. (Mat. 21:16) Par esémpio, anca se el stùdio el parla sora problemi nel matrimònio, sora imoralità e robe che no ghemo mia de far, te pol giutar i to fioi a catar fora un o due paràgrafi che lori i sarà boni spiegar. Proa anca giutarli a capir che el fradel che fà la parte no’l ndarà ciamarli sempre che i leva su la man. Cossita, i to fioi no i restarà disgustadi quando altri i comenta invesse de lori. — 1 Tim. 6:18.f
18. Cossa pol giutarne a no parlar massa de noantri stessi? (Proverbi 27:2)
18 Tuti noantri podemo pareciar bei comentari che i loda a Geovà e i incoraia nostri fradei. (Pro. 25:11) Dele volte, podemo comentar sora quel che ga belche sucedesto nela nostra vita. Magari, ghemo de star atenti de no parlar massa de noantri stessi. (Ledi Proverbi 27:2;g 2 Cor. 10:18) Invesse, ghemo de ricordarse che l’è pi importante parlar sora Geovà, la Bìblia e i so servi, e nò de noantri. (Apo. 4:11) Ma dele volte, ne ocore parlar pròpio sora quel che pensemo, come nel pròssimo paràgrafo.
19. (a) Cossa che ndarà suceder se stemo atenti a quel che i altri i vol? (Romani 1:11, 12) (b) Parché che te piase de comentar nele riunion?
19 No ghemo bisogno de ndar drio a una mùcia de règole par comentar nele nostre riunion. Ma l’è importante far comentari che i incoraie a tuti. E come che podemo farli? Se te sì nte una congregassion pìcola, proa comentar arquante volte. Magari, se la to congregassion la ze pi granda e te sì bon de comentar sol ciare volte, resta contento coi comentari dei altri. Quando semo nele nostre riunion e se preocupemo con quel che i altri i vol, semo boni de “incoraiarse un al altro” del bon. — Ledi Romani 1:11, 12.h
CÀNTICO 93 Benedissi la nostra riunion
a I nostri comentari i pol incoraiar a tuti nela riunion. Ma ghen’è de quei che i resta tanto preocupadi e con paura quando i pensa de far un comentàrio. Magari altri ghe piase de comentar, fursi, de pi de una volta. In questo stùdio, ndaremo veder come che tuti noantri podemo star atenti a quel che l’è meio par i altri e anca come che i nostri comentari i pol incoraiar nostri fradei a mostrar amor e a seitar a laorar par Geovà.
b (Ebrei 10:24, 25) E ghemo de preocuparse un col altro par motivarne a mostrar amor e a far bone assion, 25 sensa assar de riunirse, come arquanti i fà, ma ghemo pròpio de incoraiarse un al altro, ancora de pi quando valtri vedé rivar el giorno.
c Par catar fora altri boni consili, varda La Sentinela de genaro de 2019, págine 8 a 13 e 1 de setembre de 2003, págine 19 a 22.
d Arquanti nomi i ze stati cambiadi.
e (Filipensi 2:4) No sté preocuparve sol con quel che valtri volé, ma anca con quel che i altri i vol.
f Varda el vìdeo Deventa amigo de Geovà — Parecia ben el to comentàrio, nel jw.org.
g (Proverbi 27:2) No stà lodarte, ma assa che i altri i lo fae. Assa che nantra persona lo fae, e nò ti stesso.
h (Romani 1:11, 12) Parché vui tanto catarve par spartir con valtri una benedission spiritual che la ve fae restar pi forti. 12 O meio ancora, par incoraiarse un al altro par meso dela nostra fede, tanto la vostra come la mia.
j ILUSTRASSION: Nte una congregassion pi granda, un fradel che el ga belche fato el so comentàrio el assa che i fradei che no i gavea gnancora alsà su la man i comente.