STÙDIO 46
Sìpia sicuro che te pol viver in Paradiso
“El Dio dela verità el ndarà benedir a tuti quei nela tera che i se sforsa par ricever una benedission.” — ISA. 65:16.
CÀNTICO 3 Geovà, me forsa, confiansa e speransa
COSSA CHE NDAREMO IMPARAR?a
1. Cossa che el profeta Isaia el ga giutà i israeliti a capir?
EL PROFETA Isaia el ga dito che Geovà l’è “el Dio dela verità”. La parola che lu el ga doperà qua par “verità” anca la vol dir “amen”. (Isa. 65:16) E “amen” vol dir “cossì sia” o “sicuro che ndarà suceder”. Quando la Bìblia la dopera la parola “amen” par parlar sora Geovà o Gesù, la mostra che podemo pròpio fidarse in quel che la dise. Alora, Isaia el ga giutà i israeliti a capir che, quando Geovà el dise che el ndarà far qualcossa, lu la farà del bon. E Geovà sempre el ga mostrà che podemo fidarse del tuto nele so promesse.
2. (a) Parché che podemo fidarse nele promesse de Geovà? (b) Cossa che ndaremo imparar in questo stùdio?
2 Sarà che noantri podemo fidarse in quel che Geovà el ga dito che ndarà suceder? Intorno de 800 ani dopo de Isaia, el apòstolo Paolo el ga spiegà parché podemo fidarse nele promesse de Geovà. Lu el ga dito: “Dio no’l pol pròpio dir busie.” (Ebr. 6:18) Cossita come no vien fora àqua salada de una fontana de àqua dolsa, no ghen’è come vegner fora busie de Geovà. Par quela, come savemo che lu l’è el Dio dela verità, se fidemo del tuto in quel che el dise e nele so promesse. In questo stùdio, ndaremo veder la risposta a queste domande: Cossa che Geovà el ga prometesto par el futuro? Parché che podemo esser sicuri che quel lu el ga dito ndarà pròpio suceder?
COSSA CHE GEOVÀ EL GA PROMETESTO?
3. (a) Che bela promessa catemo in Apocalisse 21:3, 4? (b) Cossa che arquante persone fursi le dise quando le scolta questa promessa?
3 Varda una promessa che la ze tanto bela. (Ledi Apocalisse 21:3, 4.b) Geovà el ga dito che ‘no ghen sarà pi la morte, gnanca pi tristessa, gnanca piander, gnanca dolor’. Tanti de noantri ghemo belche doperà questo testo par mostrar ai altri come sarà la vita in Paradiso e par consolar a qualchedun che l’è drio sofrir. Magari, tanti fursi i dise: ‘Imaginarsela! Massa fadiga de creder!’
4. (a) Cossa che Geovà belche el savea? (b) Cossa che Geovà el ga mostrà dopo che el ga fato una promessa?
4 L’è stà Geovà che el ga volesto che Gioani el metesse par scrito questa promessa sora el Paradiso. E Geovà belche el savea che ndarìssino doperarla par predicar sora el so Regno e che tanti i faria fadiga creder. (Isa. 42:9; 60:2; 2 Cor. 4:3, 4) Alora, cossa che podemo far par giutar le persone a fidarse in quel che dise in Apocalisse 21:3, 4? Geovà no’l ne ga dato sol una promessa, ma anca el ne ga mostrà che podemo fidarse del tuto in lu. Come?
GEOVÀ EL NE MOSTRA PARCHÉ PODEMO FIDARSE NELE SO PROMESSE
5. Che testo mostra che podemo fidarse nele promesse de Geovà sora el Paradiso, e cossa che el dise?
5 In Apocalisse 21:5, 6, vedemo parché che podemo fidarse in quel che Geovà el ga prometesto sora el Paradiso. Lì dise: “Quel che l’era sentà nel trono el ga dito: ‘Varda! Son drio far nove tute le robe.’ Lu anca el ga dito: ‘Scrivi, parché queste parole le ze fedele e vere.’ E lu el me ga dito: ‘Le me parole le ga sucedesto! Mi son el Alfa e el Ómega, el scomìnsio e el fin.’” — Apo. 21:5, 6a.
6. Parché quel che l’è scrito in Apocalisse 21:5, 6 ne assa ancora pi sicuri che Geovà el ndarà far quel che el ga prometesto?
6 Parché questo testo fà la nostra fede in Geovà ancora pi forte? El libro Clímax de Revelação el dise: “L’è come se Geovà el ne desse una garansia par scrito, o el fesse un contrato, par mostrarne che queste promesse le ndarà pròpio suceder.”c Alora, in Apocalisse 21:3, 4 ghen’è la promessa de Geovà, e nei versìcoli 5 e 6, ghen’è la garansia che el ndarà pròpio far quel che el ga prometesto. Adesso, ndemo veder come che Geovà el mostra che podemo pròpio fidarse in lu.
7. Chi che l’è drio parlar in Apocalisse 21:5, e parché che questo l’è importante?
7 Apocalisse 21:5 dise: “Quel che l’era sentà nel trono el ga dito.” Alora, l’è stà Geovà che el ga parlà le parole che le vien dopo. Cossita, questo testo l’è tanto importante parché, nele vision del libro de Apocalisse, Geovà el parla sol tre volte. Alora, no l’è stà un àngelo gnanca Gesù che el ga fato questa promessa. Invesse, l’è stà Geovà! Par quela, semo sicuri che quel che dise nei versìcoli 5 e 6 l’è pròpio vera, parché Dio “no’l pol dir busie”. — Tito 1:2.
“VARDA! SON DRIO FAR NOVE TUTE LE ROBE”
8. Che parola Geovà el dopera par mostrar che quel che el ga prometesto ndarà suceder? (Isaia 46:10)
8 Geovà anca el dise: “Varda!” (Apo. 21:5) El libro de Apocalisse el dopera la parola “varda!” arquante volte. Un libro el spiega che questa parola nel greco la ze doperada par ‘far i letori restar ancora pi atenti a quel che vien dopo’. E cossa che Geovà el ga dito dopo? “Son drio far nove tute le robe.” Cossita vedemo che Geovà el ndarà pròpio far quel che el ga prometesto. Lu l’è tanto sicuro dele so promesse che el parla come se le fusse belche drio suceder. — Ledi Isaia 46:10.d
9. (a) Cossa che capimo dele parole: “Son drio far nove tute le robe”? (b) Cossa che ndarà suceder col “cielo” e cola “tera” che ghen’è ancoi?
9 Adesso, ndaremo capir cossa che Geovà el volea dir quando el ga parlà in Apocalisse 21:5: “Son drio far nove tute le robe.” Apocalisse 21 el parla de due robe che Geovà el ndarà far. Prima, lu el ndarà finir fora col bruto mondo de ancoi. Seconda, lu el farà un novo mondo meio. Come che lo savemo? Apocalisse 21:1 dise: “El cielo che ghen’era vanti e la tera che ghen’era vanti no ghen’è pi.” El “cielo che ghen’era vanti” l’è i governi che i ze controladi par Sàtana e i so demoni. (Mat. 4:8, 9; 1 Gio. 5:19) E come la Bìblia la dopera tante volte la parola “tera” par parlar dele persone, capimo che la “tera che ghen’era vanti” la ze le persone rugne de ancoi. (Gén. 11:1; Sal. 96:1) Cossita, vedemo che Geovà el ndarà finir fora con questi governi e anca cole persone rugne che no le vol mia cambiar. Dopo, lu el ndarà far un “novo cielo e una nova tera”, o sia, un novo governo e ghen sarà sol persone che le fà quel che l’è giusto.
10. Come che Geovà el ndarà far nove tute le robe?
10 Come che Geovà el ndarà “far nove tute le robe”? (Apo. 21:5) Lu el ndarà rangiar la Tera e anca giutar le persone fedele a deventar perfete. De acordo cola professia de Isaia, Geovà el ndarà far che tuta la Tera la sìpia un bel giardin, compagno el giardin del Èden. E lu anca el ndarà finir fora con tute le malatie che fà le persone tribolar ancoi. Geovà el ga dito che nissuni mai pi sarà desgrassiadi, orbi, sordi e che i morti i sarà ressussitadi. — Isa. 25:8; 35:1-7.
“QUESTE PAROLE LE ZE FEDELE E VERE!”
11. Cossa che Geovà el ga mandà che Gioani el fesse, e parché?
11 Che nantra roba ne giuta a esser pi sicuri dela promessa de Geovà? Varda cossa che Geovà el ga dito a Gioani: “Scrivi, parché queste parole le ze fedele e vere.” (Apo. 21:5) Alora, Geovà el ga mandà Gioani ‘scriver’ quele parole e anca el ghe ga spiegà parché el gavaria de scriverle. Lu el ga dito che quele parole le era “fedele e vere”, o sia, che podemo fidarse del tuto. Sicuro che ghe demo tanto valor a queste parole e restemo contenti de saver che Gioani el ga obedio a Geovà quando le ga scrito. Par quela, ancoi, podemo leder sora la promessa del Paradiso e pensarghe sora le benedission che ghen sarà nel futuro.
12. Parché che Geovà el pol dir: “Le me parole ga sucedesto”?
12 Dopo, Geovà el ga dito: ‘Le me parole ga sucedesto!’ (Apo. 21:6) Adesso, Geovà l’è drio parlar come se le so promesse sora el Paradiso le fusse belche drio suceder. E lu el pol parlar pròpio cossita parché no ghen’è gnente gnanca nissuni che pol intrigarlo de far quel che el vol. Ma, Geovà el ga dito ancora nantra roba che ne giuta a esser sicuri che el farà quel che el ga prometesto. Cossa che lu el ga dito?
‘MI SON EL ALFA E EL ÓMEGA’
13. Parché che Geovà el ga dito che l’è el “Alfa” e el “Ómega”?
13 Come ghemo belche visto, Geovà el ga parlà tre volte nele vision de Gioani. (Apo. 1:8; 21:5, 6; 22:13) In tute queste volte, lu el ga dito: ‘Mi son el Alfa e el Ómega.’ Nel alfabeto greco, la létera alfa la ze la prima e la létera ómega la ze la ùltima. Cossita, capimo che, quando Geovà el dise che l’è el ‘Alfa e el Ómega’, lu l’è drio mostrar che sempre el finisse del bon tuto quel che el scomìnsia.
Geovà sempre el finisse del bon tuto quel che el scomìnsia (Varda i paràgrafi 14 e 17.)
14. (a) Parla de un esémpio de quando Geovà el ga dito che l’era el “Alfa”. (b) Parla de un esémpio de quando Geovà el ndarà dir che l’è el “Ómega”. (c) Che garansia catemo in Génesi 2:1-3?
14 Dopo che Geovà el ga creà Adon e Eva, lu el ga dito cossa che el volea par le persone e par la Tera. Lu el ga dito: “Gàpie tanti fioi. Gavé de impienir la tera e gavé de esser paroni dela tera.” (Gén. 1:28) Alora, quando Geovà el ga dito che el volea che la Tera la deventesse un Paradiso ndove ghen saria sol persone fedele e perfete, l’era come se el fusse drio dir che l’è el “Alfa”. E quando lu ndarà dir che l’è el “Ómega”? Dopo che sucederà tuto quel che lu el vol par le persone e la Tera nel futuro. E dopo che Geovà el ga fato el ‘cielo e la tera’, lu el ne ga dato nantra garansia, che podemo leder in Génesi 2:1-3. (Ledi.e) Lu el ga dito che el sètimo giorno l’è santo. Cossa che imparemo? Questo mostra che quel che el vol par le persone e par la Tera ndarà suceder nel fin del sètimo giorno.
15. Parché che fursi Sàtana el ga pensà che el saria bon de intrigar Geovà de far quel che el volea?
15 Parché che fursi Sàtana el ga pensà che el saria bon de intrigar Geovà de far quel che el volea? Parché dopo che Adon e Eva i ga desobedio a Dio, lori i ze deventadi pecadori e i so fioi i saria imperfeti e i ndaria morir. (Rom. 5:12) Alora, sarà che Geovà el saria bon de ancora far la so volontà? Fursi, Sàtana el pensesse che Geovà no’l saria pi bon de far quel che el gavea prometesto. Geovà el podaria finir fora con Adon e Eva e far nantro omo e nantra dona che i fusse boni de gaver fioi perfeti. Ma, se lu el fesse cossita, lu el saria un busier. Parché? Parché in Génesi 1:28, lu el gavea dito che i fioi de Adon e Eva i ndaria impienir la Tera.
16. Cossa che fursi Sàtana el ga pensà?
16 Pol esser che Sàtana el ga pensà che Geovà el assaria che Adon e Eva i gavesse fioi, ma che mai i saria perfeti. (Ecl. 7:20; Rom. 3:23) Se questo sucedesse, Sàtana el podaria dir che Geovà no l’era mia bon de far quel che el gavea prometesto. Parché? Parché Geovà el gavea dito che la Tera la deventaria un Paradiso e che i fioi perfeti e obedienti de Adon e Eva i viveria lì.
17. (a) Cossa che Geovà el ga fato dopo che Sàtana, Adon e Eva i lo ga desobedio? (b) Cossa che ndarà suceder cole persone obediente a Geovà? (Varda anca la ilustrassion.)
17 Magari, Sàtana no l’è stà mia bon de pensar cossa che Geovà el ndaria far. Geovà el ga cambià tuto quel che ghe ocorea par far la so volontà. (Sal. 92:5) Lu el ga mostrà che no l’è mia un busier parché el ga assà che Adon e Eva i gavesse fioi. Dopo, lu el ga mandà un dissendente par salvar i fioi de Adon e Eva che i fusse obedienti. Cossita, la so volontà la ndarà realisarse. El dissendente che Geovà el gavea prometesto el ga dato la so vita par salvar a tanti. (Gén. 3:15; 22:18) Geovà el ga fato tuto questo par causa del so grando amor. Come Sàtana el pensa sol in lu stesso e no’l ga amor, lu mai el spetea che Geovà el ndaria far una roba cossita. (Mat. 20:28; Gio. 3:16) Alora, cossa che ndarà suceder cole persone? Dopo el Governo de Mila Ani de Gesù, quei che i obedisse a Geovà i sarà perfeti e tuta la Tera la sarà un Paradiso, compagno quel che Geovà el ga dito che ndaria suceder. In quel tempo, Geovà el ndarà dir che l’è el “Ómega”.
FÀ LA TO FEDE NELA PROMESSA DEL PARADISO ANCORA PI FORTE
18. De che tre maniere Geovà el ne assa sicuri che el farà quel che el ga prometesto? (Varda anca el quadro “Tre robe che te assa sicuro che Geovà el ndarà far quel che el ga prometesto”.)
18 In questo stùdio, ghemo visto che podemo esser sicuri che tuta la Tera la sarà un Paradiso. Alora, come che podemo giutar quei che i pensa che questa promessa mai la ndarà suceder? Prima, podemo mostrar che l’è stà Geovà che el ga fato questa promessa. El libro de Apocalisse el dise: “Varda! Son drio far nove tute le robe.” Geovà anca ga la sabedoria e el poder par far quel che el ga prometesto. Secondo, par Geovà, l’è come se tute le so promesse le gavesse belche sucedesto. Par quela che lu el ga dito: ‘Queste parole le ze fedele e vere. Le me parole le ga sucedesto.’ Terso, Geovà el ga dito: ‘Mi son el Alfa e el Ómega.’ Questo ne insegna che nissuni pol intrigar Geovà de far quel che el ga scominsià. Alora, semo sicuri che lu el ndarà mostrar che Sàtana l’è un busier e che nissuni pol intrigarlo.
19. Se una persona la pensa che l’è fadiga creder nele promesse de Geovà sora el Paradiso, cossa che te pol far?
19 Alora, ricòrdate che sempre che te parli sora le promesse de Geovà a una persona, anca la to fede la resta pi forte. Cossita, cossa che te pol far se, dopo de leder la promessa de Apocalisse 21:4, qualchedun te dise: ‘Imaginarsela! Massa fadiga de creder’? Te pol leder anca i versìcoli 5 e 6, e spiegar che l’è stà come se Geovà el gavesse assà par scrito una garansia che tuto quel che el ga prometesto ndarà pròpio suceder. — Isa. 65:16.
CÀNTICO 147 Dio el promete vita eterna
a Sempre che parlemo coi altri sora la promessa de Geovà par el futuro, la nostra fede la deventa pi forte. In questo stùdio, ndaremo veder parché che podemo esser sicuri che lu el ndarà far quel che el ga prometesto.
b (Apocalisse 21:3, 4) Alora, go sentio una alta voce del trono: “Varda! La tenda de Dio la ze cola umanità. Lu el ndarà de star insieme con lori, e lori i sarà el so pòpolo. Dio el sarà insieme con lori. 4 Lu el sugarà tute le làgrime dei so oci, e no ghen sarà pi la morte, gnanca pi tristessa, gnanca piander, gnanca dolor. Le robe che ghen’era vanti no ghen’è pi.”
c Varda el libro Revelação — Seu Grandioso Clímax Está Próximo! pàg. 303, par. 8 e 9.
d (Isaia 46:10) Del scomìnsio mi digo el final, e dei tempi antighi digo le robe che no le ze gnancora state fate. Mi digo: ‘Quel che go dessidio sarà fato e farò tuto quel che me piase.’
e (Génesi 2:1-3) Cossita i ze stati fati el cielo, la tera e tuto quel che ghen’è lì. 2 Nel sètimo giorno, Dio el gavea finio de far tuto el so laoro. E nel sètimo giorno Dio el ga scominsià a riposar dopo tuto quel che el gavea fato. 3 Dio el ga benedio el sètimo giorno e el ga dito che el saria sacro, parché l’è in questo giorno che Dio l’è drio riposar dopo che el ga creà tuto de acordo con quel che el volea far.