LESSION 46
Parché dedicarse a Geovà e batesarse?
Te fè la to dedicassion a Geovà quando te prometi a lu che te ndarè adorarlo par sempre e che servirlo sarà la roba pi importante par ti. (Salmo 40:8) Alora, far la to dedicassion a Geovà l’è la dessision pi importante dela to vita. Quando te sì batesà, te mostri ale persone che te ghè fato la to dedicassion. Alora, cossa pol giutarte a far questa dessision?
1. Parché che una persona la desside dedicarse a Geovà?
Noantri se dedichemo a Geovà parché lo amemo. (1 Gioani 4:10, 19) La Bìblia la dise: ‘Te ghè de amar a Geovà, el to Dio, con tuto el to cuor, con tuta la to ànima, con tuta la to mente e con tuta la to forsa.’ (Marco 12:30) Noantri mostremo che amemo a Dio par meso de quel che parlemo e de quel che femo. Compagno un omo e una dona che i se marida parché i se ama, noantri se dedichemo a Geovà e se batesemo parché lo amemo.
2. Che benedission la persona la ga quando la se batesa?
Quando te te batesi, te deventi parte dela bela fameia de Geovà. Alora, Geovà el sarà come un pare par ti, te vederè che lu el te ama tanto e te sarè ancora pi amigo de lu. (Ledi Malachia 3:16-18.) Te gavarè anca tanti fradei e sorele che i ama a Geovà e anca a ti. (Ledi Marco 10:29, 30.) Magari, te ghè de far un per de robe vanti de esser batesà. Par esémpio, te ghè de imparar sora Geovà, amarlo e gaver fede nel so Fiol, Gesù Cristo. Dopo, te pol dedicar la to vita a Geovà. Se te fè queste robe e te dessidi esser batesà, te podarè viver felice par sempre. La Parola de Dio la dise: ‘El batésimo el salva anca a valtri.’ — 1 Piero 3:21.
IMPARA DE PI!
Parché che l’è importante che te fae la to dedicassion a Geovà e te te batesi?
3. Noantri ghemo de scòlier a chi ndaremo servir
Nel passà, arquanti israeliti i pensea che i podea adorar a Geovà e a Baal, che l’era un dio falso. Ma Geovà el ga mandà el so profeta Elia par parlarghe che l’era sbalià farlo. Ledé 1 Rè 18:21, e dopo, parlé sora questo:
Che scólia i israeliti i gavea de far?
Compagno ai israeliti, anca noantri ghemo de scòlier a chi che ndaremo servir. Ledé Luca 16:13, e dopo, parlé sora questo:
Tanti i pensa che i pol adorar a Geovà e anca nantra persona o nantra roba. Ma parché no l’è mia giusto farlo?
Come che mostremo che ghemo dessidio servir sol a Geovà?
4. Pensa nel amor che Geovà l’è drio mostrarte
Geovà el ne ga dato tante bele robe. Cossa che podemo darghe indrio? Vardé el VÌDEO.
Come che Geovà l’è drio mostrarte che el te ama? Ledé Salmo 104:14, 15 e 1 Gioani 4:9, 10, e dopo, parlé sora questo:
Che robe che Geovà el te ga dato che te piase de pi?
Cossa che te senti par causa de quel che Geovà el te ga dato?
Se qualchedun el ne ga dato una roba che ne ga piasesto tanto, noantri ndaremo ringrassiarlo. Ledé Deuteronómio 16:17, e dopo, parlé sora questo:
Dopo de pensar in tuto quel che Geovà l’è drio darte, cossa che te vol far?
5. Quando te fè la to dedicassion a Geovà, te gavarè tante benedission
Tante persone le pensa che sol le sarà felice se le ze importante, le ga un bel laoro o tanti soldi. Sarà che l’è pròpio cossita? Vardé el VÌDEO, e dopo, parlé sora questo.
Anca che Andrey el amesse quel che el fea, parché che el se ga fermà de farlo?
Lu el ga dessidio viver par Geovà e nò par el futebol. Te pensi che lu el ga fato la roba giusta? Parché?
Vanti che Paolo el scominsiesse a ndar drio a Gesù, lu l’era una persona tanto importante in quela època. Lu el gavea studià la lege dei giudei coi maestri che i era tanto importanti. Ma lu el ga assà indrio tute quele robe par deventar un dissìpolo de Cristo. Sarà che Paolo el se ga ciamà gramo dela so dessision? Ledé Filipensi 3:8, e dopo, parlé sora questo:
Parché che Paolo el ga dito che quel che el gavea vanti de ndar drio a Cristo l’era come sporchìssie?
Cossa che Geovà el ghe ga dato indrio?
Te pensi che te gavarè una vita meio se te dessidi servir a Geovà? Parché?
Dopo che Paolo l’è deventà un dissìpolo de Cristo, lu el ga ricevesto tante robe de pi de quele che el gavea assà indrio
FURSI TE GHÈ BELCHE SCOLTÀ: “Mi sò che quel che son drio imparar l’è la verità, ma no son mia parecià par batesarme.”
Te pensi che l’è bon dedicarte a Geovà?
COSSA CHE TE GHÈ IMPARÀ?
Se noantri amemo a Geovà, volaremo dedicar la nostra vita a lu e esser batesadi.
Sito bon de ricordarte?
Cossa che Geovà el ne dà indrio se lo amemo e lo adoremo?
Come che Geovà el benedisse quei che i ze batesadi?
Te piaseria far la to dedicassion a Geovà?
VUTO SAVER DE PI?
Varda parché che una cantora e un atleta i ga dessidio dedicar la so vita a Geovà.
I Giòveni i Domanda — Cossa far dela Me Vita? — Ricordando (6:54)
Che altre robe le mostra che dedicarte a Geovà l’è la meio dessision?
“Parché dedicarse a Geovà?” (La Sentinela, 15 de genaro de 2010)
In questo vìdeo, varda come che quei che i se ga dedicà a Geovà i ze contenti.
Varda quel che ga giutà una dona a saver quel che l’era pròpio importante nela so vita nela stòria “Mi me domandea: ‘Parché che semo qua?’”.
“La Bìblia la càmbia la vita dele persone” (La Sentinela, 1 de novembre de 2012)