Cossa che te pol far se te vè nte una nova congregassion?

Nicolas e Céline i ga bio nantra dificoltà. El Betel dela Frància el ghe ga domandà se i podea ndar a nantra congregassion. Lori i ga dito: “Nel scomìnsio, èrino tuti contenti. Ma dopo l’è stà tanto fadiga parché ne manchea i nostri amighi. No gaveino gnancora fato bele amicìssie coi fradei dela nova congregassion.”a Alora, con tute queste dificoltà, come che te pol restar contento e seitar a far bele robe par Geovà nela nova congregassion? Cossa che i altri i pol far par giutar? Che benedission te pol ricever nela nova congregassion? Come che te pol incoraiar i altri e esser incoraià?

QUATRO ROBE CHE LE POL GIUTARTE

1. Fìdate in Geovà. (Sal. 37:5) Kazumi, del Giapon, la era nte una congregassion fea 20 ani, ma dopo el so omo el ga bio de cambiar de laoro. Alora, i ze ndati a nantra congregassion. Come che la ze stata bona de assar la so vita nele man de Geovà? Ela la ga dito: “Mi seitea a parlar a Geovà tuto quel che sentia. Mi parlea che me sentia ansiosa e che me sentia mi mi sola. E tute le volte che preghea a Geovà, lu el me dea la forsa che gavea de bisogno.”

Come che te pol fidarte ancora de pi in Geovà? Compagno a una pianta che la ga bisogno de àqua e altre robe par deventar forte, anca la nostra fede la ga bisogno de qualcossa par deventar forte. Varda quel che ga giutà Nicolas, che ghemo parlà vanti. El esémpio de òmini che i ga fato tanti sacrifissi par far la volontà de Dio, come Abraon, Gesù e Paolo, lo ga giutà a fidarse ancora de pi nel aiuto de Geovà. Se ti te fè sempre el to stùdio dela Bìblia, te sarè bon de dàrghene fora con tute le dificoltà dela to vita e anca te ndarè imparar robe che te pol doperar par incoraiar altri dela to nova congregassion.

2. No stà far comparassion intrà la vècia e la nova congregassion. (Ecl. 7:10) Varda el esémpio de Jules, che el se ga cambià dela Àfrica par i Stati Unidi, ndove ghen’era tanta difarensa de cultura. Lu el ga dito: “Tuti i seitea farme domande, e me parea che gavea de contar la stòria de tuta la me vita. Mi no ero costumà a far cossita. Par quela, go scominsià a star distante dei fradei e dele sorele. Ma quando go scominsià a cognosserli meio, go cambià quel che mi pensea. Go capio che in qualche posto dela Tera le persone le ze compagne, sol che lore le parla e le fà robe difarente. Cossita, l’è tanto importante acetar le persone come che le ze.” Alora, no stà far comparassion cola to vècia congregassion. Anne-Lise, una pioniera, la ga dito: “Mi me go cambià parché volea imparar robe nove, e nò parché spetea che le robe le fusse compagno casa.”

Gnanca i ansiani no i ga de far comparassion cola so vècia congregassion. Se i fradei dela nova congregassion i ze drio far le robe de maniera difarente, no vol mia dir che lori i ze drio far robe sbaliade. Par quela, l’è meio saver parché lori i fà le robe de quela maniera vanti de parlar dele to idee. (Ecl. 3:1, 7b) E anca l’è meio insegnar ai fradei par meso del to esémpio, pitosto de proar obrigarli a acetar quel che te disi. — 2 Cor. 1:24.

3. Fà le robe con quei dela to nova congregassion. (Fil. 1:27) L’è vera che cambiarse ghe vol sforso e tempo. Ma l’è tanto importante ndar ale riunion nela nova congregassion prima che te pol e star insieme ai fradei nel Salon. Varda el esémpio de Lucinda, una sorela che la se ga cambià par una granda cità nela Àfrica del Sud cole so due fiole. Ela la ga dito: “Mi go ricevesto el consìlio de farme novi amighi nela nova congregassion, ndar nela predicassion coi fradei e far comentari nele riunion. Noantri anca ghemo dito ai fradei che i podaria doperar la nostra casa par far le riunion par la predicassion.”

Quando femo le robe insieme coi fradei e le sorele dela nova congregassion, noantri femo pi forte la nostra fede e incoraiemo i altri. Anne-Lise, che ghemo parlà vanti, la ze ndata drio el consìlio dei ansiani de predicar con cada un dela so nova congregassion. Sarà che l’è ndato ben? Ela la ga dito: “Go suito capio che se te vè predicar con tuti i fradei e sorele, te te sentirè parte dela congregassion.” E quando te giuti i fradei a netar e far manutension del Salon del Regno, te mostrarè che questa la ze la to congregassion. Alora, se suito te scominsi a far tute queste robe coi fradei e sorele, lori i ndarà acetarte e ti te te sentirè parte dela nova congregassion.

4. Fà novi amighi. (2 Cor. 6:11-13) Se le persone le vede che te te preocupi con lore, sarà pi fàcile deventar boni amighi. Fà sforso de doperar el to tempo vanti e dopo le riunion par parlar cole persone. Sfòrsate de imparar el nome de tuti. Se te te ricordi del nome dei fradei, se te parli con lori e te sì simpàtico, lori i volarà cognosserte meio, e valtri podarè deventar boni amighi.

Invesse de preocuparte de esser come le persone le vol che ti te sìpia, assa che i fradei e le sorele i te cognossa come che ti te sì pròpio. Varda quel che Lucinda la ga dito: “Noantri ghemo bele amicìssie parché se ghemo sforsà de convidar i altri casa nostra.”

RICEVÉ BEN UN AL ALTRO

Par arquanti, podaria esser difìcile ndar rento un Salon del Regno pien de persone che no i cognosse mia. Alora, come che te pol giutarli a sentirse ben ricevesti? El apòstolo Paolo el ga incoraià i fradei de quel tempo a riceverse ben un al altro, come Cristo el ga fato. (Rom. 15:7) Compagno a Cristo, i ansiani i pol giutar i novi a sentirse ben ricevesti. (Varda el quadro “Cossa che te ghè de far se te ndarè cambiar par una nova congregassion?”.) Tuti nela congregassion, anca i toseti, i pol giutar i novi a sentirse casa.

Ricever ben i altri no vol mia dir sol convidarli casa nostra, ma anca vol dir giutarli. Par esémpio, una sorela la ga giutà nantra sorela che la se gavea pena cambià de congregassion a imparar a doperar la lìnea e el tren. Quela sorela la ze stata tanto contenta e la se ga sentio ben nela so nova congregassion.

TE POL IMPARAR TANTE ROBE

Le cavalete le ga de cambiar la so pel tante volte vanti de esser bone de zolar. La medèsima roba sucede quando te te cambi par una nova congregassion. Te ghè de cavar via e assar indrio le to paure par esser bon de far de pi par Geovà. Nicolas e Céline i ga dito che quando te te cambi par una nova congregassion, te impari tante robe. Lori i ga dito: “Quando te sì nte una nova congregassion e te stè con persone difarente e nte un posto difarente, te impari a gaver qualità che no te gavei vanti.” Jean-Charles, che ghemo parlà vanti, el ga dito che, par lu e par la so fameia, l’è stà tanto bon cambiarse par una nova congregassion. Lu el ga dito: “Nela nostra nova congregassion, i nostri fioi i ga imparà tante robe e i ga fato pi forte la so amicìssia con Geovà. Sol pochi mesi dopo, la nostra fiola la ga scominsià a far parte nela congregassion, e el nostro fiol l’è deventà un predicador.”

E se ti no te pol cambiarte par una nova congregassion par giutar ndove che ghen’è de pi bisogno, meti in pràtica quel che te ghè imparà in questo artìcolo nela congregassion che belche te sì. Fìdate in Geovà, sfòrsate de predicar coi fradei e le sorele e fà novi amighi, o fà pi forte le amicìssie che te ghè. Sarà che te pol giutar i novi dela to congregassion o quei che i ga de bisogno? La qualità pi bela che i dissìpoli de Gesù i gavaria saria el amor. (Gio. 13:35) Se te giuti i to fradei, te farè pi forte la to amicìssia con Geovà. Te pol esser sicuro che “questi sacrifissi ghe piase a Dio”. — Ebr. 13:16.

Anca se ghen’è dificoltà, tanti fradei e sorele che i se ga cambià par una nova congregassion i ze restadi contenti e i ga seità far el so meio par Geovà. Alora, stà tranquilo parché anca ti te sarè bon! Anne-Lise la ga dito: “Cambiar de congregassion me ga giutà a far nove amicìssie.” Kazumi la ga capio che quando te te cambi par una nova congregassion, Geovà el te giuta de una maniera che no te gavei mai visto vanti. E Jules el ga dito: “Le amicìssie che go fato le me ga giutà a sentirme casa. Adesso, mi sento che fao parte dela nova congregassion e saria fadiga se gavesse de ndar via.”