L’è bon saver controlarse

COSSA VOL DIR CONTROLARSE?

Gaver controlo vol dir:

• saver spetar

• controlar le to voie

• finir i laori che te ghè

• pensar de pi nei altri

PARCHÉ CHE L’È IMPORTANTE GAVER CONTROLO?

Tosatei che i sa controlarse i ze boni de dir nò, ancora che sia una roba che lori i ghe piase de far. Tosatei che no i ze boni de controlarse i pol:

• esser violenti

• gaver depression

• fumar, bever, doperar droghe

• magnar sol poci

Una peschisa la mostra che tosatei che i sa controlarse i gavarà manco problemi de salute e cola lege quando i vien grandi. Anca no i gavarà tanti problemi coi soldi. La maestra Angela Duckworth dela Università dela Pensilvánia la ga dito che questa peschisa la ga giutada a capir che: “Saver controlarse l’è sempre bon.”

COME INSEGNAR TO FIOL A SAVER CONTROLARSE

Impara a dir “nò” e seita cola to dessision.

CONSÌLIO DELA BÌBLIA: “Basta che el vostro ‘si’ el sìpia si, e el vostro ‘nò’ el sìpia nò.” — Mateo 5:37.

I tosatei dele volte i piande o i osa par guadagnar quel che lori i vol. Se el pupà e la mama i ghe dà, i tosatei i seitarà far cossita sempre che i vol qualcossa.

Ma se el pupà e la mama no i ghe dà quel che i vol, lori i ndarà imparar una lession importante dela vita: no l’è sempre che semo boni de gaver quel che volemo. El Dr. David Walsh el ga scrito: “L’è interessante che le persone che le impara questa lession le ze pi felice. No mostraremo amor se assemo che i nostri fioi i pense che lori sempre i pol gaver tuto quel che i vol.”a

Dir “nò” al to fiol ancora quando l’è ceo, ndarà giutarlo quando el vien grando a dir “nò” ale droghe, far sesso vanti de maridarse o qualche altra roba che pol farghe mal.

Giuta el to fiol a saver cossa che ndarà suceder quando el se comporta ben e quando el se comporta mal.

CONSÌLIO DELA BÌBLIA: “Parché la persona la ndarà tor su quel che la ga piantà do.” — Gàlati 6:7.

El to fiol el ghe toca capir che quel che lu el fà gavarà un risultà e che no controlarse portarà brute robe. Par esémpio, se el to fiol l’è sempre inrabià, le persone no piaserà restar darente de lu. Se el to fiol impara a controlarse quando qualchedun no lo assa star e impara a no meterse quando i altri i ze drio parlar, le persone le ghe volarà ben. Giuta el to fiol a capir che se el sa controlarse, el gavarà una vita tanto meio.

Giuta el to fiol a capir quel che l’è pi importante.

CONSÌLIO DELA BÌBLIA: “Che sìpie sicuri de quale che le ze le robe pi importante.” — Filipensi 1:10.

Controlarse ne giuta a no far quel che l’è sbalià e far robe che fursi no ghe piasemo, ma che ne toca far. El to fiol el ga de imparar a dessider quale che le ze le robe pi importante e farle prima. Par esémpio, lu el ga de far i laori dela scola vanti de giugar.

Sia un bon esémpio.

CONSÌLIO DELA BÌBLIA: “Parché mi ve go dato el esémpio, cossita valtri podé far compagno a mi.” — Gioani 13:15.

El to fiol ndarà veder quel che te fè quando sucede una roba che te assa intrigà. Àssalo veder che le robe le va ben quando te ghe controlo. Par esémpio, quando el to fiol el fà una bruta roba, cossa te fè? Rèstito inrabià o calmo?