Gaver responsabilità te assa contento

COSSA VOL DIR RESPONSABILTÀ?

Podemo fidarse nte una persona che la ga responsabilità. Quando ti te domandi a una persona che la ga responsabilità par far qualcossa, te se che la ndarà far ben e sensa tardigar.

Un tosatel pol scominsiar a gaver responsabilità ancora quando ze picinin. Un libro sora slevar i fioi el dise: “Quando un tosatel el ga 1 ano e 3 mesi, lu l’è belche bon de far quel che so pupà e so mama el ghe domanda, quando el ga 1 ano e meso de età, el vol far quel che so pupà e so mama i ze drio far. In tanti posti, quando i tosatei i ga intrà 5 e 7 ani, el pupà e la mama scomìnsia a insegnarli che lori i pol scominsiar a giutar far qualcossa in casa, ancora che sia ciei i tosatei i ze boni de far i so laori.”a

PARCHÉ CHE L’È IMPORTANTE GAVER RESPONSABILITÀ?

Tanti gióveni i va via de casa, ma dopo, i torna de star col so pupà e so mama parché la vita no la ze fàcile. Questi gióveni i fà cossita parché no i ga mai imparà a doperar ben i soldi, tender de una casa o gaver responsabilità ntela vita.

Par quela, l’è bon insegnar el to fiol a gaver responsabilità adesso, vanti che lu el vien grando. El libro Como Criar um Adulto el dise: “No te vol che el to fiol de 18 ani no sàpia far gnente sensa el to aiuto, parché quando el va via de casa no’l sarà bon de tenderse.”

COME INSEGNAR EL TO FIOL A GAVER RESPONSABILITÀ

Daghe laori de casa par far.

CONSÌLIO DELA BÌBLIA: “Tuti i laori i ga el so vantaio.” — Proverbi 14:23.

I tosatei sempre i vol giutar so pupà e so mama nei so laori. Alora, dopera questa oportunità par darghe qualche laoro.

Arquanti pupà e mame no i vol dar laori de casa ai so fioi parché i cata che lori i ga de far massa laori dela scola.

Ma i tosatei che i giuta nei laori de casa i fà meio i so laori dela scola. E l’è cossita parché i tosatei che i giuta in casa, i impara a gaver responsabilità e a finir qualche laoro che i ga scominsià. El libro che ghemo parlà vanti el dise: “Quando no assemo i nostri fioi giutarne, lori i pol pensar che giutar i altri no l’è importante . . . E che i altri i ga la obrigassion de far le cose par lori.”

Quando el tosatel el fà i laori de casa, lu impara a giutar i altri e a no pensar sol in si stesso. Anca, el capisse che el so aiuto l’è importante par la fameia.

Giuta i to fioi a gaver la responsabilità dei so sbali.

CONSÌLIO DELA BÌBLIA: “Scolta el consìlio e aceta la dissiplina, par deventar sapiente nel futuro.” — Proverbi 19:20.

Quando el to fiol el fà una roba sbaliada — par esémpio, se lu el spaca una roba de nantra persona — no stà sconder quel che el ga fato. Un tosatel l’è bon de gaver responsabilità par quel che el ga fato — in questa situassion, lu el pol domandar scusa e dar indrio quel che lu el ga spacà.

Gaver responsabilità par i to sbali giutarà el to fiol a:

• parlar la verità

• no meter la colpa nei altri

• no dar scuse

• domandar scusa sempre che ghe ocore