Parché che Dio el ga una organisassion?

1. Parché che Dio el ga scoliesto el pòpolo de Israel ntel passà?

Dio el ga dito che la fameia de Abraon la saria tanto granda. La fameia de Abraon la se ga tornà el pòpolo de Israel. Geovà el ga scoliesto questo pòpolo par servirlo. Lori i gavea de obedir ale legi de Dio e adorarlo dela maniera giusta. (Salmo 147:19, 20) Cossita, tute le altre persone le podaria ricever el aiuto de Dio par meso de Israel. — Ledi Gênesis 22:18.

Dio el ga scoliesto i israeliti par esser le so testimònie. Altre persone le podaria cognosser a Geovà par meso del pòpolo de Israel. La stòria de sto pòpolo la mostra che l’è bon obedir ale legi de Geovà. — Deuteronômio 4:6. — Ledi Isaías 43:10, 12.

2. Parché che i veri cristiani i ze organisadi?

Col tempo, Israel el ga assà de obedir ale legi de Dio. Alora Geovà no’l ga pi volesto che i israeliti i fusse le so testimònie. Dio el ga scoliesto nantro grupo de persone. (Mateus 21:43; 23:37, 38) Ancoi, Geovà el dopera i veri cristiani par esser le so testimònie. — Ledi Atos 15:14, 17.

Gesù el ga organisà i so seghidori par predicar sora el Regno de Dio e far dissìpoli in tute le nassion. (Mateus 10:7, 11; 24:14; 28:19, 20) El fin de questo mondo rugno l’è pròpio darente e i veri cristiani i ze drio predicar sora el Regno de Dio in tuta la Tera. Par la prima volta ntela stòria, Geovà el ga un pòpolo con milioni de persone de tute le nassion. (Apocalipse 7:9, 10) I veri cristiani i ama e i giuta i altri parché i ze unidi. In tuto el mondo, lori i impara la medèsima cosa sora la Bìblia. — Ledi Hebreus 10:24, 25.

3. Come che ga scominsià la religion dele Testimònie de Geovà?

Del 1870 avanti, un pìcolo grupo de studianti dela Bìblia i ga scominsià a capir meio quel che la Bìblia la insegnea. Lori i savea che Gesù el volea che lori i parlasse sora el Regno de Dio. Cossita, lori i ga scominsià a predicar sora el Regno in tuto el mondo. In 1931, i ga scominsià a doperar el nome Testimònie de Geovà. — Ledi Atos 1:8; 2:1, 4, 11; 5:42.

4. Come che le Testimònie de Geovà le ze organisade?

Gesù sempre l’è stà el Lider dei veri cristiani. Ntel passà, lu el ga doperà un grupo par giutar e insegnar le congregassion. Questo grupo l’era formà de apòstoli e altri ansiani. (Atos 16:4, 5) Ancoi, un grupo de òmini con speriensa i organisa el laoro che le Testimònie de Geovà le fà. Questo grupo l’è ciamà de Corpo Governante. Lori i supervisiona la tradussion, la impression e la distribuission de publicassion bìbliche in de pi de 750 léngue in tuto el mondo. El Corpo Governante el dopera la Bìblia par giutar e insegnar de pi de 110 mila congregassion. In cada congregassion, òmini che i ze qualificadi i serve come ansiani. Lori i ze amorosi e i tende dele piégore de Dio. — Ledi 1 Pedro 5:2, 3.

Le Testimònie de Geovà le predica sora el Regno de Dio. Compagno i apòstoli, lore le va de casa in casa par parlar cole persone. (Atos 20:20) Noantri anca insegnemo la Bìblia par tuti quanti che i vol imparar sora Dio. Ma le Testimònie de Geovà no le ze sol una religion. Semo una fameia con un Pare amoroso. Semo fradei e sorele che i tende un del altro. (2 Tessalonicenses 1:3) Questa la ze la fameia pi felice dela Tera parché l’è el pòpolo che el fà la volontà de Dio e el giuta le altre persone. — Ledi Salmo 33:12; Atos 20:35.