NOTE FINAI
1 GEOVÀ
El nome de Dio l’è Geovà. Sto nome el vol dir “Lu el fà deventar”. Geovà l’è el Dio Tuto Poderoso e el ga creà tute le robe. Lu el ga el poder de far tuto quel che el vol.
In ebraico, el nome de Dio l’è rapresentà con quatro letere. In talian, ste letere le ze YHWH o JHVH. Ntel testo ebraico original dela Bìblia, se pol catar sto nome intorno de 7.000 volte. In cada léngua, el nome Geovà l’è pronunsià dela maniera pi comun.
2 LA BÌBLIA LA È “INSPIRADA DA DIO”
Dio l’è el Autor dela Bìblia, ma Lu el ga doperà òmini par scrìverla. Compagno una nona che la ga domandà ala so neoda par scriver un messàgio, Dio el ga doperà el so spìrito santo par conduser i òmini a scriver i so pensieri. El spìrito de Dio el ga condusio sti òmini de difarenti maniere, come par meso de vision e de sogni. Dopo lori i ga scrito tuto quel che i ga visto.
3 PRINCIPI
I ze insegnamenti dela Bìblia che i spiega una verità fondamental. Par esémpio, el princìpio che “brute compagnie le rovina i boni comportamenti” el ne insegna che le persone le pol influensarne tanto par el ben come par el mal. (1 Coríntios 15:33) El princìpio “quel che la persona la semena la ndarà tor su” el ne insegna che i nostri ati i ga consequense. —Gálatas 6:7.
4 PROFESSIA
La è un messàgio che vien da Dio. Pol esser un insegnamento moral, un comandamento, un giudìssio, un messàgio sora quel che ndarà suceder ntel futuro o una spiegassion dela volontà de Dio. Tante professie dela Bìblia le se ga belche realisade.
5 PROFESSIE SORA EL MESSIA
Le professie dela Bìblia sora el Messia le se ga realisade in Gesù. Vedi el quadro “Professie sora el Messia”.
▸ Cap. 2, par. 17, vedi la nota de sotopàgina.
6 EL PRÒPOSITO DE GEOVÀ PAR LA TERA
Geovà el ga creà la Tera par esser un paradiso ndove i umani obedienti i pol viver. El so propòsito no l’è mia cambià. Presto, Dio el finirà fora con tute le robe rugne e el darà la vita eterna al so pòpolo.
7 SÀTANA EL DIAOL
Sàtana l’è el àngelo che el ga scominsià la rebelion contra Dio. Lu l’è ciamà Sàtana, che vol dir “Opositor”, parché lu el fà guera contra Dio. Lu l’è anca ciamà Diaol, che vol dir “Caluniador”, parché lu el dise busie sora Dio e el ingana le persone.
8 ÀNGELI
Vanti de crear la Tera, Geovà el ga creà i àngeli par viver ntel cielo. Ghen’è de pi de una sentena de milioni de àngeli. (Daniel 7:10) Lori i ga nomi e difarenti personalità. I àngeli fedeli i ze ùmili e no i aceta la adorassion de umani. Lori i ze de difarenti categorie e i fà diversi laori come par esémpio: servir davanti del trono de Geovà, portar i so messagi, realisar i so giudissi, apoiar la predicassion e proteger e conduser i servi de Dio ntela Tera. (Salmo 34:7; Apocalipse 14:6; 22:8, 9) Nel futuro, lori i ndarà star dela banda de Gesù ntela guera del Armagedon. —Apocalipse 16:14, 16; 19:14, 15.
▸ Cap. 3, par. 5; Cap. 10, par. 1
9 PECÀ
L’è tuto quel che femo, sentimo o pensemo contra Geovà e contra la so volontà. El pecà el rovina la nostra relassion con Geovà. Alora, Lu el ne ga dato legi e principi par giutarne a no pecar aposta. Ntel princìpio, Geovà el ga creà tuto perfeto, ma Adamo e Eva i ga scoliesto desobedir a Geovà. Lori i ga pecà e i ga perso la perfession. I ze restadi veci e i ze morti. Noantri gavemo eredità el pecà de Adamo, par quela restemo veci e morimo.
▸ Cap. 3, par. 7; Cap. 5, par. 3
10 ARMAGEDOM
L’è la guera de Dio par finir fora col mondo de Sàtana e tute le robe rugne.
▸ Cap. 3, par. 13; Cap. 8, par. 18
11 REGNO DE DIO
El regno de Dio l’è un governo che Geovà el ga stabilio ntel cielo e el ga scoliesto Gesù Cristo par esser el Rè. Nel futuro, Geovà ndarà doperar el so Regno par finir fora con tute le robe rugne. El Regno de Dio ndarà governar sora tuta la Tera.
12 GESÙ CRISTO
Prima de tuto, Dio el ga creà Gesù. Geovà el ga mandà Gesù ala Tera par morir par tuti i umani. Dopo dela so morte, Geovà lo ga ressussità. Adesso, Gesù l’è drio governar ntel cielo come Rè del Regno de Dio.
13 LA PROFESSIA DELE 70 STIMANE
La Bìblia la ga profetisà quando el Messia el vegnaria. Questo el sucederia al fin de un perìodo de 69 stimane, che el ga scominsià ntel ano 455 V.E.C. e el ga finio ntel ano 29 E.C.
Come savemo che sto perìodo el ga finio ntel ano 29 E.C.? Le 69 stimane le ga scominsià ntel ano 455 V.E.C. quando Neemia l’è rivà in Gerusaleme e el ga scominsià a far su nantra volta la cità. (Daniel 9:25; Neemias 2:1, 5-8) La parola “stimana” la ne fà ricordar el nùmero 7. Alora, le stimane de sta professia no le ze stimane de sete giorni ma stimane de sete ani, d’acordo cola règola profètica “un giorno par un ano”. (Números 14:34; Ezequiel 4:6) Questo vol dir che cada stimana la ga una durassion de sete ani e che le 69 stimane le duraria 483 ani (69 x 7). Se contemo 483 ani scominsiando del ano 455 V.E.C., rivemo al ano 29 E.C. Questo l’è giusto el ano che Gesù l’è stà batesà e l’è deventà el Messia! —Lucas 3:1, 2, 21, 22.
La medèsima professia la ga dito che ghen saria ancora una stimana de sete ani. Durante sta stimana, ntel ano 33 E.C., el Messia el saria morto. Dal ano 36 E.C. avanti, le bone notìssie del Regno de Dio le saria predicade a tute le nassion e nò sol ai Giudei. —Daniel 9:24-27.
14 EL FALSO INSEGNAMENTO DELA TRINITÀ
La Bìblia la insegna che Geovà Dio l’è el Creador e che Lu el ga creà Gesù prima de tuto. (Colossenses 1:15, 16) Gesù no l’è mia el Dio Tuto Poderoso. Lu mai el ga dito che l’era compagno a Dio. Infati, el ga dito: “El Pare l’è pi grando che mi.” (João 14:28; 1 Coríntios 15:28) Ma arquante religion le fà creder nela Trinità, o sia che Dio l’è tre persone in una sol: el Pare, el Fiol e el spìrito santo. Ma no ghen’è mia la parola “Trinità” ntela Bìblia. Questo l’è pròpio un insegnamento falso.
El spìrito santo l’è la forsa ativa de Dio, el so poder invisìbile che Lu el dopera par far la so volontà. No l’è mia una persona. Par esémpio, i primi cristiani “i ze restadi pieni de spìrito santo”, e Geovà el ga dito: “Mi ndarò spander el me spìrito sora tuti i tipi de persone.” —Atos 2:1-4, 17.
▸ Cap. 4, par. 12; Cap. 15, par. 17
15 LA CROSE
I veri cristiani no i dopera la crose ntela adorassion a Dio. Parché?
La crose la è stata doperada ntela religion falsa par tanto tempo. Nei tempi antighi, la era doperada ntela adorassion dela naturesa e nei riti sessuai pagani. Durante i 300 ani dopo dela morte de Gesù, i cristiani no i doperea mia la crose ntela so adorassion. Pi tardi, el imperador romano Constantino el ga fato dela crose un sìmbolo dela Cristianità. El ga dopera la crose par far el pòpolo acetar la Cristianità. Ma la crose no la ga gnanca una relassion con Gesù Cristo. La New Catholic Encyclopedia la spiega: “Se pol catar la crose tanto ntela cultura prè-cristiana come ntela cultura nò-cristiana.”
Gesù no l’è mia morto ntela crose. Le parole greche traduside “crose” le vol dir “un pal drito”, “un legno” o “una pianta”. El libro The Companion Bible el spiega: “Ntel testo greco del Novo Testamento no ghen’è gnanca una riferensa a due tochi de legno.” Gesù l’è morto in un pal drito.
Geovà no’l vol che doperemo imàgini o sìmboli ntela nostra adorassion. —Êxodo 20:4, 5; 1 Coríntios 10:14.
16 LA SELEBRASSION DELA MORTE DE CRISTO
Gesù el ga mandà i so dissìpoli selebrar el giorno dela so morte. Par quela, lori i fà questo tuti i ani ntel giorno 14 de Nisan, la medèsima data che i israeliti i selebrea la Pasqua. El pan e el vin, che i rapresenta el corpo e el sàngue de Gesù, i ze passadi de man in man ntela Selebrassion. Quei che i ndarà governar con Gesù ntel cielo i magna del pan e i beve del vin. Quei che i ga la speransa de viver par sempre qua ntela Tera i assiste de maniera rispetosa ala Selebrassion, ma no i magna del pan gnanca i beve del vin.
17 ÀNIMA
Ntela Tradução do Novo Mundo, la parola “ànima” la è stata doperada par descriver (1) una persona, (2) un animal, o (3) la vita de una persona o de un animal. Ndemo veder arquanti esempi:
Una persona. “Nei giorni de Noè. . .poche persone, o sia, oto ànime, le ze state salve dal’àqua.” (1 Pedro 3:20) In questo testo, la parola “ànima” la vol dir persone—Noè e la so sposa, i so tre fioi cole so spose.
Un animal. “Dio el ga dito: ‘Assa che le vegna fora dale àque tute le creature viventi [“ànime”], e assa svolar sora la tera le creature che le svola in meso dela espansion del cielo.’ Alora Dio el ga dito: ‘Assa che la tera la produsa creature viventi [“ànime”] d’acordo cola so spèssie, i animai domèstichi e i animai che i se move e i animai selvàtichi dela tera d’acordo cola so spèssie.’ E l’è sucedesto pròpio cossita.” —Gênesis 1:20, 24.
La vita de una persona o de un animal. Geovà el ga dito a Moisè: “Tuti i òmini che i ndea in serca par coparte [“in serca dela to ànima”] i ze morti.” (Êxodo 4:19) Quando Gesù l’era qua ntela Tera, el ga dito: “Mi son el bon pastor; el bon pastor el dà la so vita [“ànima”] par le piégore.” —João 10:11.
Anca quando una persona la fà qualcossa con tuta la so ànima, vol dir che ela la fà sta cosa con piaser e dela meio maniera. (Mateus 22:37; Deuteronômio 6:5) La parola “ànima” la pol esser doperada par descriver la voia de una creatura vivente de magnar o de far qualcossa. Una persona morta o un animal morto i pol esser ciamadi de ànime morte. —Números 6:6; Provérbios 23:2; Isaías 56:11; Ageu 2:13.
▸ Cap. 6, par. 5; Cap. 15, par. 17
18 SPÌRITO
La parola ebraica e greca tradusida “spìrito” ntela Tradução do Novo Mundo la vol dir difarenti cose. Sempre se rifere a qualcossa invisìbile ai umani, come el vento o la respirassion dei umani o dei animai. Queste parole le pol anca riferirse a persone spirituai e al spìrito santo che l’è la forsa ativa de Dio. La Bìblia no la insegna che una parte dela persona la continua a viver dopo dela so morte. —Êxodo 35:21; Salmo 104:29; Mateus 12:43; Lucas 11:13.
▸ Cap. 6, par. 5; Cap. 15, par. 17
19 GEENA
Geena l’è el nome de un vale darente de Gerusaleme ndove la sporcaria la era brusada e destruta. No ghen’è evidense che nei giorni de Gesù i animai o i umani i era torturadi e brusadi vivi in questo vale. Alora Geena no la rapresenta un posto invisìbile ndove persone morte le ze torturade e brusade par sempre. Quando Gesù el ga parlà de quei che i era condenadi ala Geena, l’era drio dir che lori i saria finidi fora par sempre. —Mateus 5:22; 10:28.
20 LA ORASSION DEL PADRE NOSTRO
Gesù el ga doperà questa orassion par insegnar ai so dissìpoli come far orassion. La è ciamada de Padre Nostro o orassion modelo. Par esémpio, Gesù el ga insegnà a far orassion de sta maniera:
“Santificà sia el to nome”
Femo orassion par Geovà netar el so nome, o la so reputassion, de tute le busie. Cossita tuti ntel cielo e ntela Tera i ndarà onorar e rispetar el nome de Geovà.
“Vegna el to Regno”
Femo orassion par el Regno de Dio finir fora col mondo rugno de Sàtana, par el Regno de Dio governar sora la Tera e par far dela Tera un paradiso.
“Sia fata la to volontà . . . ntela tera”
Femo orassion par la realisassion del propòsito de Dio par la Tera. Cossita i umani obedienti e perfeti i podarà viver par sempre ntel Paradiso, pròpio come Geovà el volea quando i umani i ze stati creadi.
21 EL RISGATE
Geovà el ga dato el risgate par liberar i umani del pecà e dela morte. El risgate l’è stà el prèssio pago par comprar de volta la vita umana perfeta che Adamo el ga perso e par indrissar la relassion del omo con Geovà. Dio el ga mandà Gesù ala Tera par morir par i pecadori. Gràssie ala morte de Gesù, tuti i umani i ga la oportunità de esser perfeti e viver par sempre.
▸ Cap. 8, par. 21; Cap. 9, par. 13
22 PARCHÉ EL ANO 1914 L’È IMPORTANTE?
La professia de Daniel capìtolo 4 la ne insegna che Dio ndaria stabilir el so Regno ntel ano 1914.
La professia: Geovà el ga dato al Rè Nabucodonosor un sogno profètico sora una granda pianta che la è stata taiada e butada zo. Nel sogno, un sércio fato de fero e de rame l’è stà messo intorno dela sòca dela pianta par no assarla cresser par un perìodo de “sete tempi”. Dopo de sto tempo, la pianta la ndaria cresser nantra volta. —Daniel 4:1, 10-16.
Cossa vol dir sta professia par noantri: La pianta la rapresenta el governo de Dio. Par tanti ani, Geovà el ga doperà i rè in Gerusaleme par governar sora la nassion de Israel. (1 Crônicas 29:23) Ma questi rè i ga assà de esser fedeli e el so governo el ga assà de esister. Gerusaleme la è stata destruta ntel ano 607 V.E.C. Alora i ga scominsià i “sete tempi”. (2 Reis 25:1, 8-10; Ezequiel 21:25-27) Quando Gesù el ga dito che ‘le nassion le ndaria pestar sora Gerusaleme fin realisarse i tempi dele nassion’, lu l’era drio parlar dei “sete tempi”. (Lucas 21:24) Alora, i “sete tempi” no i era finidi quando Gesù l’era qua ntela Tera. Geovà el ga promesso che ndaria stabilir un Rè al fin dei “sete tempi”. El governo del novo Rè, Gesù, el daria tante benedission al pòpolo de Dio qua ntela Tera par sempre. —Lucas 1:30-33.
La durassion dei “sete tempi”: I “sete tempi” i duraria 2.520 ani. Se contemo 2.520 ani dal ano 607 V.E.C., rivemo al ano 1914. Questo l’è el ano che Geovà el ga stabilio Gesù, el Messia, come Rè del Regno de Dio ntel cielo.
Come savemo che i “sete tempi” i ze 2.520 ani? La Bìblia la dise che tre tempi e meso i ze 1.260 giorni. (Apocalipse 12:6, 14) Alora i “sete tempi” i ze el dópio de sto nùmero, o sia 2.520 giorni. Par via dela règola profètica de “un giorno par un ano”, i 2.520 giorni i ze 2.520 ani. —Números 14:34; Ezequiel 4:6.
23 EL ARCÀNGELO MICHEL
La parola “arcàngelo” la vol dir “comandante dei àngeli”. La Bìblia la mensona sol un arcàngelo e el so nome l’è Michel. —Daniel 12:1; Judas 9.
Michel l’è el Lìder del esèrcito dei àngeli fedeli de Dio. Apocalipse 12:7 el dise: “Michel e i so àngeli i ga fato guera contra el dragon . . . e i so àngeli.” El libro de Apocalipse el dise che el Lìder del esèrcito de Dio l’è Gesù, alora Michel l’è nantro nome de Gesù. —Apocalipse 19:14-16.
24 I ÙLTIMI GIORNI
L’è el perìodo de tempo in che ndaria suceder grandi eventi qua ntela Tera, pena vanti del Regno de Dio finir fora col mondo de Sàtana. Ntela Bìblia, le ze doperade spression come el “fin del sistema de cose” e “la presensa del Fiol del omo”, che le se rifere al medèsimo perìodo de tempo. (Mateus 24:3, 27, 37) “I ùltimi giorni” i ga scominsià quando el Regno de Dio l’è stà stabilio ntel cielo nel ano 1914 e i finirà sol quando el mondo de Sàtana el sarà destruto ntel Armagedon. —2 Timóteo 3:1; 2 Pedro 3:3.
25 RESSURESSION
La ressuression la sucede quando Dio el dà nantra volta la vita a una persona che la è morta. La Bìblia la mensona nove ressuression. Elia, Eliseo, Gesù, Piero e Paolo i ga fato ste ressuression. Questi miràcoli i ze stati possìbili sol par via del poder de Dio. Geovà el promete ressussitar ‘tanto i giusti come i ingiusti’ par viver qua ntela Tera. (Atos 24:15) La Bìblia anca la mensona una ressuression par viver ntel cielo. Questa la sucede quando quei che Dio el ga scoliesto i ze ressussitadi par viver ntel cielo con Gesù. —João 5:28, 29; 11:25; Filipenses 3:11; Apocalipse 20:5, 6.
26 DEMONISMO (SPIRITISMO)
Demonismo o spiritismo l’è la pràtica sbaliada de proar comunicarse coi spìriti diretamente o par meso de un mago o de un mediun. Le persone le pratica el spiritismo parché le crede nel falso insegnamento che i spìriti dei umani i continua a viver dopo dela morte e i deventa fantasmi poderosi. I demoni anca i proa far i umani desobedir a Dio. Astrologia, indovinassion, magia, strionaria, superstission, ocultismo e sopranatural i fà parte del demonismo. Tanti libri, reviste, oròscopi, filmi, posteri e par fin cansion i fà creder che i demoni, la magia e el sopranatural no i fà mia mal a nissuni e i ze emossionanti. Tanti costumi fùnebri, come i rituai durante el funeral e i sacrifissi par i morti, i ze maniere de comunicarse coi demoni. Tante volte le persone le dopera droghe cola intension de doperar el poder dei demoni. —Gálatas 5:20; Apocalipse 21:8.
▸ Cap. 10, par. 10; Cap. 16, par. 4
27 LA SOVRANITÀ DE GEOVÀ
Geovà l’è el Dio Tuto Poderoso e el ga creà tuto el universo. (Apocalipse 15:3) Par quela, Lu l’è el Paron de tute le robe e Lu el ga la sovranità, o tuta la autorità, par governar sora la so creassion. (Salmo 24:1; Isaías 40:21-23; Apocalipse 4:11) Lu el ga fato legi par tuto quel che el ga creà. Geovà anca el ga autorità par stabilir altri governanti. Ghe demo apoio ala sovranità de Dio quando amemo a Dio e lo obedimo. —1 Crônicas 29:11.
28 ABORTO
L’è causar aposta la morte de un bambino che no l’è ancora nassesto. No l’è mia un insidente o el resultà de una reassion natural del corpo umano. Dal momento dela fecondassion el bambino l’è nantra vita, no l’è sol nantra parte del corpo dela mare.
29 TRASFUSION DE SÀNGUE
L’è un prossedimento mèdico che el trasfere el sàngue o un dei so quatro componenti principai par el corpo de una persona. Pol esser el sàngue de nantra persona o el so pròpio sàngue messo via. I quatro componenti principai del sàngue i ze: el plasma, i glòbuli rossi, i glòbuli bianchi e le plachete.
30 DISSIPLINA
Ntela Bìblia, la parola “dissiplina” no la vol dir sol punission, ma la vol dir istrussion, educassion e coression. Geovà mai l’è crudel o cativo con quei che Lu el dissiplina. (Provérbios 4:1, 2) Geovà l’è un bel esémpio par i genitori. La dissiplina che Lu el dà l’è tanto bona che una persona la pol fin amar la dissiplina. (Provérbios 12:1) Geovà el ama e el trena le persone. Lu el dà istrussion che le giuta a indrissar idee sbaliade e anca le giuta a pensar e a far le robe de una maniera che a Lu ghe piase. Par i genitori, la dissiplina la vol dir giutar i so fioi a capir parché i ga de esser obedienti. Anca la vol dir insegnarli a amar a Geovà, la so Parola e a capir i so principi.
31 DEMONI
Lori i ze creature spirituai invisìbili, rugne e poderose. I ze deventadi nemighi de Dio quando i ga desobedio a Lu. (Gênesis 6:2; Judas 6) Lori i se ga unio a Sàtana ntela rebelion contra Geovà. —Deuteronômio 32:17; Lucas 8:30; Atos 16:16; Tiago 2:19.